Jaqenakjamajj taqeniw juchararätanjja sasinwa Bibliajj yatichi. Ukat taqenirakiw Adanan wawanakapjamajj juch lurtanjja. Ukatwa awisajj kuna juchanak lurasajj qhepatak arrepentistänjja. Ukampis Jesucristo Diosan Yoqapaw juchanakasat qhespiyañatak jiwawayi. Ukhamatwa juchanakas perdonarakistu. Cheqas ukajj Diosan mä suma churäwipawa. (Romanos 3:23, 24 liytʼäta.)

Yaqhepanakajj jachʼa juchanakaruw purtʼasiwayapjje ukatwa akham jisktʼasipjje, ¿Diosajj uka juchanakajat perdonpachïtaniti?, sasa. Uka toqet Bibliajj akham siwa: “Jesucristo Yoqapan wilapaw taqe juchanakasat qʼomacharakistu” sasa (1 Juan 1:7). Jïsa ukhamawa, jiwasatï taqe chuyma juchanakasat arrepentisiñäni ukhajja, jachʼa juchanakanïskchiñänisa Jehová Diosajj perdonistaniwa. (Isaías 1:18 liytʼäta.)

Jehová Diosamp perdonayasiñ munstan ukhajja, Jupar uñtʼañasawa, mä arunjja, ewjjanakapsa, yatichäwinakapsa ukat kunatsa ukham luri ukanakat sum amuyañasarakiwa (Juan 17:3). Ukat khitinakatï juchanakapat taqe chuyma arrepentisipki ukat ukanak jaytañatakis chʼamachasipjjaraki ukanakarojj Jehová Diosajj perdoniwa. (Hechos 3:19 liytʼäta.)

Diosamp askit uñjayasiñajj janiw chʼamäkiti. Kunattejj juchararätas Jupajj sum yati. Ukat khuyaptʼayasiri ukat munasiri ukham Diosarakiwa. ¿Taqe ukanak yatjjatasajj janit Jupat jukʼamp yatjjattʼañ munkasma? (Salmo 103:13, 14 liytʼäta.)