Texcoco sat markatätwa. Naskayät ukhajj markajan callenakapajj laqʼakïnwa. Ukat kunjamsa jaya cheqanakat aljasiñanakap asnonakapar khumtʼat apanipjjerïna uk sum amtasta. Familiajajj wali pisinkirïnwa ukat llätunka jilanakapjjayätwa, nayajj paqallqörïkis ukayätwa. Awkijajj lipʼichit lurat wiskhunak askichirïna, ukat paqallq maranëjjayat ukhaw jiwjjäna. Mamitajajj nanakar uywañatakejj wal chʼamachasiwayi.

Achachilajajj violín sat instrumentwa tokirïna ukat iglesianakan qʼochupki ukanakan pʼeqtʼiriparakïnwa. Familiajat niya taqeniw instrumentonak tokapjjerïna; mamajajj iglesianakan qʼochupki uka taypinkänwa ukat tiojasti piano sat instrumento tokirïna ukat ópera sat musicjja cantarakirïnwa. Ukham Diosatakjam kuns lurañ munapjjapunirïtwa. Wawäkasajj iglesian kuna lurañanakatï utjkän ukan yanaptʼarakiyätwa, ukat catoliconakan misioneropäñ wal munarakiyäta, ukampis jaqenak pura nuwasir peliculanak uñchʼukirïta, ukat ukaw colerir jaqer tukuyawayitu.

Ukat kawkhantï Diosat yatichaski uka escuelaruw Puebla sat markan mantawayta, ukanjja tatakurapjjañapatakirakiw yatichasirakïna. Cheqas nayajj tatakurañ wal munayäta, ukampis qhep qhepa maranjja, iglesiajan jan walinak uñjawayta. Mä monjaw wal munapayitäna, ukampis jupar janiw siskchiyät ukhas casarasiñ amtanejjayätwa. Walja tatakuranakarurakiw kuntï yatichapkäna ukarjam jan sarnaqapjjatap uñjarakiyäta. Tiempompejj janiw tatakurañ munjjayätti.

Qhepat México markaruw kawkhantï musicat sum yatjjataski ukar mantayäta. Ukat mistjjasajja, casarasjjayätwa ukat pusi  wawanakanëjjarakiyätwa. Ukat iglesianakan misanak utjki ukan qʼochusinwa trabajiyäta.

Warmijampejj jan walinakanwa uñjasipjjayäta. Janipuniw sum apasipkayätti, kunattejj purapat celasipjjeriyäta. Qalltan aleqakiw toqesipjjerïta, qhepatsti nuwasiñaruw purjjapjjayäta. Ukhakamajj tunka kimsan maranakaw casadosipkayäta, ukat jaljtasin divorciasjjapjjarakiyätwa.

Jan walinakan uñjaskasaw Jehová Diosan Qhanañchirinakapar uñtʼawayta. Jupanakat paniniw utajar jutapjjäna ukat ‘¿Bibliat yatjjatañ munasmati?’ sasaw jisktʼapjjetäna. Ukat jupanakajj kʼarinaks yatichapkaspa ukham amuyayäta, ukhamajj uk uñachtʼayañatakikiw Bibliat yateqañ qalltawayta. Ukampis kuna chʼama jisktʼanaktï jan khitis qhanañchirjamäkan ukanakwa jisktʼayäta, uka jisktʼanakajarojj janiw khitis qhanañchkitaspati sasaw amuyayäta, ukampis taqe uka jisktʼanakarojj Bibliampiw qhanañchapjjetäna uk uñjasajj wal muspharayäta, ukhamatwa Bibliat jan sum yatitajj amuyasiyäta. Warmijajj janiw munasiñap jupanakar katoqerïkänti, nayas jan tiemponikarakiyätwa ukatwa Bibliat yateqañ jaytawayta.

Phesqa maranak qhepatjja, mayampiw Jehová Diosan Qhanañchirinakapampejj jikisiwayta. Ukhatakejj Elvira sat uñtʼatajampiw jakjjayäta, jupajj janiw jupanakatakejj colerirïkänti, ukhamatwa Bibliat yateqañ wasitat qalltawayta. Ukampis nayra jakäwij jaytañajj wali chʼamänwa.

Ukhamajj Jehová Diosampi askit uñjatäñatakejj uka jakäwij jaytanukuñajänwa. Niyakejjay iglesian qʼochus trabajchiyätjja, nayraqat uk jaytañajänwa ukat yaqha trabajo thaqhasjjañajjarakïnwa (Apocalipsis 18:4). Ukat Elvira warmijampejj casarasipjjañajänwa janiw ukhamak jakapjjañajakänti.

Niyakejjay wali colerirïchiyätjja, uk jaytañaw nayatakejj wali chʼamänjja. Ukampis Bibliat pä jiskʼa tʼaqanakaw wal yanaptʼawayitu. Nayrïri; Salmo 11:5 jiskʼa tʼaqa, ukanjj Jehová Diosajj jan wali lurañ munirinakar wal uñisitapwa qhanañchi, ukat 1 Pedro 3:7 jiskʼa tʼaqanjj akham qhanañcharaki ‘Diosampitï mayisitanakam istʼayasiñ munapstajja warminakamarojj wali respetompiw uñjapjjañama’ sasa. Ukhamajj jan colerampi atipayasiñatakejj uka qellqatanak wal lupʼiyäta ukat Jehová Diosan yanapapsa wal mayisirakiyäta.

Familiajampejj kusisitaw jakasjjta: Ukat nayrïr warmijamp pusi wawanïpkayät jupanakamp sum apasiñatakis chʼamachasiskaraktwa, ukat Elvira esposajampisa ukat pusi wawanakajampis iyawsäwip chʼollqheñapatakiw yanaptʼaskarakta.

Wawäkasinjja, jaqenakar yanaptʼañatakiw tatakurañ munayäta, ukampis jichhaw kunjamsa jaqenakarojj yanaptʼirista uk sum yatjjta, ukat ukarakiw kusisit jakasiñatakis yanaptʼarakitu. Jichhajj music tokañ yatichasaw trabajta, ukampiw familiajar qollqemp yanaptʼaskarakta. Ukat Jehová Diosar wali paciencianïtapatjja, wal yuspärta kunattejj ukaw jan walinak jaytañatakisa ukat suma jaqëñajatakis yanaptʼawayarakitu.