Yaqhep familianakanjja, uywat wawanïpjjewa jan ukajj hijastro wawanïpjjewa, jupanakajj jan waltʼäwinakan uñjasipjjaraki, mayajj akaspawa: Jupanakamp jakapki ukanakamp sum apasiña. * Amuytʼañataki, qhepa warminakajj jan ukajj madrastranakajj * walja kutiw uywat wawan cheqpach taykapamp wawar tumptʼañata, manqʼañata jan ukajj khitis wawar yatichani ukat kunjams uywasini ukanakat parlapjjañapa. Ukat familiaranakasa, amigonakasa uywat wawanakar familia taypin katoqañajj chʼamakïspawa. Taqe ukanakatakejj Biblian ewjjtʼanakapaw sum yanaptʼaspa.

Namibia markata Judit sat mä warmejj akham amti: “Mä urojj uywat wawanakajan taykapaw jupanakar akham säna: Jupajj awkiman warmipakiwa ukat wawanïpjjani ukhajj janiw jilamäkanisa ni kullakamäkanisa sasa. Uka arunakajj wal chuym ustʼayitäna, kunattejj wawanakajäpkaspas ukham jupanakar munasta”.

 Uywat wawan cheqpach taykapampi ukat madrastrampejj janikipuniw taqe kunans sum apasipkaspati, ukaw chachan machaq familiaparojj mä jukʼa aynachtʼayaspa sasaw yatjjattʼatanakajj amuyapjje. ¿Kunjamsa yanaptʼasispa?

Ak lurasma: Qhan parlañama. Jumatï chachjamajj nayra warmimar wawanak uywañan jarkʼata ukhajja, janiw walïkaspati. * Kunattejj jupajj jakañs churarakiwa ukat wawanakapas chuymapankarakiwa janiw yaqhajj utjkaspati (Proverbios 23:22, 25). Ukampis taqe kunan jupakis kuns lurañ munani ukhajja, qhepa warmimaruw ukajj mayjtʼayaspa. Ukhamajj wal amuytʼasiñamawa, janiw sinti jarkʼañamäkiti ni taqe kuns jupak lurañ munjjani ukhas ukhamak uñchʼukiñamäkiti, antisas purapat yanaptʼasipjjañama.

AWKINAKATAK EWJJTʼANAKA

• Nayra warmimamp parlkäta ukhajja, wawanakatak parlañama, janiw yaqha toqenakat chʼajjwañamäkiti. Ukat sinti aruma jan ukajj jan suyat horar wawanakar jan jawsaniñapatakejj munasiñampiw kuna horas jawsanispa uk amtapjjarakisma.

• Jichhajj wawanakamatï jan jumampïpkchi ukhajj jupanakamp parltʼañatakejj telefonotsa, cartatsa, celularats mensajenak aptʼayasas jan ukajj correo electrónico siski uka toqetsa jawsañamapuniwa (Deuteronomio 6:6, 7). Yaqhepanakajj video conferencia toqnamwa parlapjjaraki. Cheqas kunjamatsa wawanakamamp parltʼañamapuniwa, ukham lurasajj jupanakar wal yanaptʼäta.

MADRASTRATAK EWJJTʼANAKA

• Uywat wawanakan cheqpach taykaparojj akham sasma: Janiw nayajj jumäkiristsa ukham wawanakar amuyayañ munkti sasa (1 Pedro 3:8). Ukat wawanakajj jumampïpki ukhajj kuns lurapjje ukanak yatiyañamarakiwa (Proverbios 16:24). Wakisini ukhajj kun yatiñatakis jupar jisktʼarakismawa, ukat yanaptʼätam ukhajj yuspärañamarakiwa.

• Jupa jakʼan janiw wawanakar munartʼañajj wakiskaspati. Estados Unidos markat Beverly sat mä madrastrajj akham siwa: “Jiskʼa wawanakajj mamita sañ wal munapjjetäna, ukampis janiw taykam jakʼansa ni familiaranakap jakʼansa ukham sapjjetätati utanakwa ukham sapjjetäta” sasaw tatapamp sapjjarakiyäta. Ukhamatwa Jane sat taykapampejj sum apasipjjta, ukat yateqañ utan kuna lurañanak utjkäna ukanakans panpachaniw yanaptʼapjjarakiyäta.

CHEQPACH TAYKAMP UKAT MADRASTRAMP SUM APASIPJJAÑAPATAK EWJJTʼANAKA

• Jumatï madrasträstajja, wawanakan taykapat janiw jan walinak jupanak jakʼan parlañamäkiti. Kunattejj wawanakaruw aynachtʼayaspa. Ukat kunjamatsa taykapar kuntï siskta uk yatiyapjjarakispawa (Eclesiastés 10:20). Ukat wawanakan taykapatï jumat jan walinak parlchi, ukat uk wawanakajj yatiyapjjeristam ukhajja, janiw juma pachpatak llakisiñamäkiti jan ukasti jupanakat llakisiñamarakiwa. Inas akham sischisma: “Mamitamajj wali coleratapachänwa, awisajj coleratäkasinwa maynejj ukham jan amuyasis jan walinak parlaspa” sasa. Jumatï wawanakan taykapästajja uka ewjjtʼanakajj yanaptʼiristamwa.

•   Ukhamajj kunjamsa utamansa ukat uywir taykan utapansa wawanakar uywasini uk sum amtapjjañama. Ukat jan ukhamirjamäkanejja, kun lurañaps wawanakat suyta uk qhan sañama. Amuytʼañäni:

  Madrastra: Rober, mirä amp suma kawkharutï qʼañu isinakajj uchaski ukar ucham.

  Rober: Mamajan utapanjja, ukhamakwa jaytapjjerïta, mamajaw aptaskiri.

  Madrastra (colerata): Aptam, jan ukajj añchhitaw...

  ¿Janit akham sañajj wakiskaspa?

  Madrastra (altʼat chuymampi): Janiw uk yatkayätti, ukampis aka utanjja sapa mayniw isinak kawkharutï uskusiñapäki ukhar uchapjje.

• Ukat kunaratutï wawanakajj taykapampipjjañapäki ukhajja, janiw ukhatakejj wawanakamp kun lurañs amtañamäkiti (Mateo 7:12). Ukat kuna lurañtï amtkta ukajj jan mayjtʼayañjamäkchi ukhajja, janïr wawanakar arskasaw mamapar yatiyjjañama.

Jilsut wawanakan taykapa jan ukajj awkipa wasitat casarasjjapjje ukhajja, kuna jan walinakas utji ukat toqet sum amuytʼañatakejj Step Wars, sat qellqatajj mä warmitwa parli. Uka warmin uywat wawanakajj jupar wals tʼaqhesiyapkchejja, esposopajj janiw jupar arjjatañatakejj kuns lurkiti. “¡Sintpun colerayjjetu!” sasaw warmejj saraki. Ukhaman jikjjatasta ukhajja, ¿kuns chacha warmjam jan aynachtʼapjjañamatakejj lurapjjasma?

Ak lurasma: Maynin askipwa thaqhañama. Bibliajj akham sasaw ewjjtʼi: ‘Jaqe masisan askip munañasawa, janiw jiwasan askisak munañasäkiti’ sasa (1 Corintios 10:24). Cheqansa, mayninakan askipwa thaqhañama. Inas wawanakajj awkipan munasiñaps aptʼasipkaspa ukham amuyjjapjjchispa, jan ukajj nayra familiapats jitheqtkaspa ukham amuyapjjarakchispa, ukat chachamajj wawanakap jupat jan jitheqtapjjañapatakejj inas wawanakapar jan toqenoqañ munkchispati.

Janiw wawanakamatak munkir jan munkir amigopar tukkasmati, ukham lurasma ukhajja, janiw jupanakamp sum apaskasmati, jupanak pachpaw munasiñ uñachtʼayapjjañapa (El Cantar de los Cantares 8:4). Ukhamajj taqe ukanakat sum amuytʼasiñamawa, ukat kunjamsa uywat wawanakamamp apasïta ukas jumatäjjarakiwa.

Jan wal uñjapjjätam ukhajj janiw coleratajj kuns arsuñamäkiti (Proverbios 29:11). Ukat coleramp atipjayasirjamästa ukhajja, Diosan yanapapwa mayiñama, kunjamtï David reyejj maykäna ukhama: “Tatay, lakajj jarkʼañatak mä jarkʼir ucharapita, lakanakajj jan jistʼarañatak mä uñjir uskurapita” sasa (Salmo 141:3).

Ukat kawkhantï chachaman wawanakapajj jilsuwayapki ukan jakañ amtapjjäta ukhajja, inas wawanakajj jan kuna mayjtʼayañ munapjjatap amuychïta. Ukat ikiñ utanakas kunjam apthaptʼatasa ukanakjja janiw sinti mayjtʼayañamäkiti. Ukat inas yaqha utar jakasir sarjjañajj walirakïchispa.

Canadá markat Marion sat mä madrastrajj akham amti: “Awk taykajajj wawajarojj sapa kutiw kuns wajjtʼapjjerïna, ukampis chachajan wawanakaparojj janiw kuns churapjjerïkänti, ukhamajj janisay qollqenipkchiyatjja kuns jupanakatakejj alapjjapunirïtwa”.

Ak lurasma: Machaq familiamaw nayrankañapa. Familiaranakamaru ukat amigonakamarusa qawqha wakiskirisa machaq familiamajj uk yatiyañamawa (1 Timoteo 5:8). Cheqansa, janiw ukaratpach chachaman wawanakapar munasipkaniti, ukampis wawanakar jan chuyma ustʼayañatakejj familiaranakamaru ukat amigonakamar munasiñampi uñjapjjañapataki ukat jan yaqhachapjjañapatakiw achiktʼasirakisma.

Nayrïr chachaman awk taykapatsa janiw armasiñamäkiti, allchhinakaparojj tumptʼasipkaspawa. Inglaterra markat Susan sat mä warmejj akham siwa: “18 phajjsinak chachajan jiwatapat mayampiw casarastjja, ukat jiwat chachajan awk taykaparojj qhepa chachajar janiw askit uñjapkänti, kunaratutï kun lurañatakis jupanakar jawsapjjerïta ukat wawanakas yuspärañatak jawsapjjerïna, ukhamatwa jupanakamp sum apasjjapjjayäta”.

Ukat familiaranakapampisa ukat amigonakapampisa sum apasiñajj chʼamakïspawa. Ukampis Biblian ewjjanakaparjamatï sarnaqäta ukhajja, wali askïniwa ukat kuntï Proverbios 24:3: qellqatajj siski ukas phoqasirakiniwa: ‘Yatiñ kankañampiwa familiajj uttʼayasi cimientonakapasa chʼikhi kankañampi uchatarakiwa’ sasa.