Kunanakatï aka Oraqen utjki uk jiskʼitatpachaw wal muniriyäta. Familiajampejj sapa kutiw qotanakaru ukat kawkhantï qoqanakajj utjki ukar sarapjjerïta. Ukasti Jyväskylä, sat markankiwa, ukat ukasti Finlandia sat jachʼa markankarakiwa. Animalanaksa wal munarakta. Jiskʼitäkasinjja, anunakaru ukat phisinakaru uñjasajj wal munartʼañ muniriyäta. Ukampis yaqhepanakajj animalanakarojj wal tʼaqhesiyapjje, cheqas ukaw jachʼäjjayat ukhajj llakisiyitäna, ukatwa kawkïr organizacionantï animalanakar yanaptʼañatak chʼamachasipkäna ukar mantjjayäta. Ukanjja, waljaniw nayjam amuyapjjäna.

Animalanakan derechonakap laykojj walja kutiw chʼajjwäwinak lurapjjta. Ukat animalanakan lipʼichinakap aljapki ukhamarak laboratorion jan kuns lurapjjañapatakejj jupanak contra kunayman qellqatanakwa lakirapjjerïta. Ukhamajj animalanakar jan walinakat jarkʼaqañatakejj mä organizacionwa uttʼayapjjta. Cheqas chʼajjwäwinak lurasajj sapa kutiw marka apnaqerinakamp jan walinakan uñjasipjjerïta. Walja kutiw nayar katuntasin juchañchawayapjjetu.

Janiw animalanakatak llakiskayätti, jaqenak taypin kuna jan walinakatï utjkän ukas llakisiyarakitänwa. Ukatwa Amnistía Internacional ukat Greenpeace sat organizacionanakar mantjjayäta, ukanakarojj taqe chuymapuniw yanaptʼayäta. Ukat jan manqʼaninakatakisa ukhamarak pisinkirinakar yanaptʼañatakisa chʼajjwäwinak lurarakiyätwa.

Ukampis ‘akapach jan mayjtʼayañjamätapwa’ qhepat amuyjjayäta. Awisajj uka chʼajjwäwinakanjj askinak jikjjtapjjerïtwa, ukampis jan walinakajj jiljjattaskakïnwa. Cheqas jan walinakajj Oraqpacharus muyuntkaspa, ukat janis uka toqet khitis kuns yatiñ munkaspa ukham amuyayäta. Jan kun lurirjamäsajj aynachtʼataw jikjjatasiyäta.

Ukham aynachtʼata jikjjatasisinjja, Diosata ukat Bibliat lupʼiñ qalltayäta. Nayrajj Jehová Diosan Qhanañchirinakapas Bibliat yatichañatak jutapjjerïkchïnjja, jupanakar wal yusparirïta, ukampis  janiw sarnaqäwejj jaytirjamäkayätti. Jichhajj janiw ukhamäjjänti.

Biblia thaqtasisinjja, ukaratpachaw liyiñ qalltayäta. Ukajj mä suma qolläkaspas ukhamänwa. Ukanjja, walja cheqanakanwa animalanakar sum uñjañat parli. Amuytʼañataki, Proverbios 12:10 qellqatajj akham siwa: “Aski jaqejj uywanakapatjja khuyapayasiwa” sasa. Ukat akapachan jan waltʼäwinakapat Diosajj jan kuna juchanïtapwa yateqawayarakta. Antisas jaqenakan Diosan arunakaparjam jan sarnaqapjjatapatwa ukham jan walinakajj jiljjattaskatayna. Ukat Jehová Diosajj kunja munasirisa ukat paciencianisa uk yatiñaw wal chuyma chʼalljjtayitäna (Salmo 103:8-14).

Ukürunakajja, ¿Kunsa Bibliax chiqpachapuni yatichi?, sat libro mayiñatak mä qellqatan jikjjatta. Ukat apayanipjjeta sasinwa correo toqnam apayjjayäta. Mä qawqha urunakatjja, Jehová Diosan pä Qhanañchiripaw Bibliat yatichañatak jutapjjäna. Ukat ukaratpachaw Bibliat yateqañ qalltawayta, ukat Tantachasiñ Utaparus sarjjarakiyätwa. Ukhamatwa jukʼat jukʼat cheqa yatichäwinakajj chuymajar saphintaskäna.

Biblian yanaptʼapampiw nayra jakäwejj apanukuwayta. Sañäni: janiw cigarro pitjjayätti, machjayir umañanaksa jaytjjarakiyätwa, parlatajas ukhamarak isisitajas janiw nayrjamajjänti, ukat marka apnaqerinakats janiw jan wal amuyjjayätti (Romanos 13:1). Ukat janirakiw qʼañu sarnaqäwinakans sarnaqjjayätti, ukans Bibliajj yanaptʼarakituwa.

Cheqansa, chʼajjwäwinak lurañatak organizacionanak jaytañaw nayatakejj chʼamänjja. Janiw ukaratpach jaytkayätti, jupanakat jitheqtañajj janis walïkaspa ukham amuyayäta. Ukampis ‘jaqenakan jan waltʼäwinakap askichañatakejj Diosan Reinopakiw askichaspa’ sasaw amuytatasirïta, ukatwa Diosan Reinopar taqe chuyma yanaptʼañataki ukhamarak jaqenakar yatiyañatak wal chʼamachasiwayta (Mateo 6:33).

Chʼajjwäwinak lurirïta ukhajja, jaqenakarojj payaru jaljirïta: suma jaqenaka ukat jan wali jaqenaka, cheqas jan wali jaqenakamp chʼajjwañatakejj jankʼakirïtwa. Ukampis Bibliajj jaqenakar jan uñisiñatakiw yanaptʼawayitu, jichhajj jaqenakar wal munasiñatakiw chʼamachasta (Mateo 5:44). Ukat Diosan Reinopat yatiyañatakejj chʼamachasiraktwa. Ukat ukajj janiw chʼajjwañ utjaykiti, antisas kusisiña sumankaña utjayi, ukat jaqenakarojj mä cheqpach suytʼäwi churaraki.

Sumankañ jikjjatañatakejj Jehová Diosan amparapar taqe kun jaytañaw yanaptʼitu. Cheqansa, Diosajj janiw jaqenakaru ukat animalanakar tʼaqhesisipkañapatak apanukkaniti ni aka Oraq tukjapjjañapatakis jaytkaniti. Antisas, kuna jan walinaktï jaqenakajj lurapki ukjja niyaw Reinop toqe askichani (Isaías 11:1-9). Taqe ukanak yatisajj wali kusisitaw jikjjatasta, ukat ukar iyawsapjjañapataki jaqenakar yanaptʼañas wal kusisiyarakitu, jichhajj janiw ‘akapach mayjtʼayañ munjjti’.