Chacha warmjam kusisit jakasipjjañapatakejj Biblian ewjjtʼanakapaw yanaptʼaspa, kunattejj uka ewjjanakajj jaqechasïwi uttʼayir Jehová Diosatwa juti. Ukat kunanakans chacha warmejj sapa mayni chʼamañchasipjjañapa, ukhamarak kuna jan wali sarnaqäwinakas jaqechasïwir aynachtʼayaspa, ukanakat Biblian ewjjtʼanakapajj amuytʼayi, ukat kunjamatsa chacha warmjamas sum parltʼasipjjaspa ukanakats yanaptʼarakiwa. (Colosenses 3:8-10, 12-14 liytʼäta.)

Chacha warmejj purapatwa respetasipjjañapa. Ukat kunanaktï Jehová Diosajj chacha warmjam phoqhapjjañapatak mayki uk phoqhapjjani ukhajja, kusisitaw jakasipjjaspa. (Colosenses 3:18, 19 liytʼäta.)

Munasiñatï mä chacha warmin utjanejja, walja tiempow sum jakasipjjani. Dios pachpaw uka toqet yatichistu. Jehová Diosampi ukat Jesucristo yoqapampejj taqe chuyma munasiñ toqet wali yateqaskayäpjjewa. (1 Juan 4:7, 8, 19 liytʼäta.)

Jehová Diosan mä regaloparjamatï chacha warmejj jaqechasïwir uñjanejja, janiw jaljtañajj utjkaniti. Ukat chacha warmin jan jaljtapjjañapwa Diosajj munaraki, ukhamat familian suma jakasipjjañapataki. Jehová Diosajj chacha warmirojj munasiñ toqetsa, jañchi toqetsa sum apasipjjañapatakiw lurawayi. Ukampis Jupar uñtasita, mä arunjja, Jupjam munasirïpjjañapatakiw luratayna. (Génesis 1:27; 2:18, 24 liytʼäta.)