¿Wal usupan mä kutis jachirïtati?... * Jïsa, taqeniw mä kutis ukhaman uñjastänjja. Ukampis awisajj janiw kayus ni amparas uskistaspati. Amuytʼañataki, inas jiwasat maynejj kʼarinak parlchispa, ukat ukaw wal usuyistaspa, ¿janich ukhamäki?... Diosajj ukhamarakiw Jupat kʼarinak parlapki ukhajja chuym usuyasi. Jichhajj uka toqeta, ukat Jupar kusisiyañatakejj kunsa lursna ukatanakat parltʼañäni.

Yaqhep jaqenakajj Diosaruw wal munasta sasins sapkchïnjja, Diosan ‘chuymap usuyasipkakïnwa’ jan ukajj llakisiyasipkakïnwa. ¡Ukham Diosar ‘llakisiyañastï’! Ukampis ¿kunjamatarak Diosan chuymap usuyapjjaspasti? Jan istʼasirïtasat kunjamsa Diosan chuymap ustʼaysna uka toqet jichhajj yatjjatañäni.

Nayrïr chacha warmejj Jehová Diosarojj walpun llakisiyapjjäna. Diosajj mä suma oraqeruw usküna ukajj ‘Edén jardín’ satänwa. ¿Uka pani chacha warmejj kamsatapjjänsa?... Adán ukat Eva satäpjjänwa. ¿Kunsa jupanakajj lurapjjpachäna?

Éden jardinar uchasinsti Adanamp Evampirojj “sum uñjapjjäta” sasinwa Diosajj säna. Ukat walja wawanakanïpjjatawa ukat wiñayaw ukan jakapjjarakïta sasaw säna. Ukampis janïr wawanïkasin mä jan waliw utjäna. ¿Kunäpachänsa?... Mä angelaw Evar parljjayäna Diosar jan istʼañapataki. Ukjjarusti Adanajj ukhamarakiw jan istʼjjänti. Kunas paspachäna uk uñjañäni.

Mä angelaw Evar parljjayäna, ukampis mä kataris jan ukajj asirus jupar parljjaykaspa ukham jupar amuyayäna. Kuntï istʼkäna ukajj jupatakejj khusänwa, kunattejj “Diosjamäpjjasmawa” sasinwa  säna. Ukat kuntï katarejj siskäna ukwa Evajj luräna. ¿Kuns lurpachäna?...

Kawkïr qoqan achupattï Adanarojj janiw manqʼätati sasin Jehová Diosajj siskän ukwa manqʼantäna. Akham sasinwa Adanarojj janïr Evajj utjkän ukhajj säna: “Aka huerton taqe qoqanakat manqʼasïta, ukampisa aski ukhamarak ñanqha yatiñ qoqatjja janiw manqʼätati. Uka qoqan achunakapjja jan manqʼamti, manqʼäta ukapachasti cheqpachan jiwäta” sasa.

Evajj uk sum yatiskäna, ukampis uka qoqan achupajj “manqʼañatakisa ukhamaraki yatiñanïñatakisa sumätapwa uñkatäna ukhamasti mä achu apaqasinsti manqʼantänwa” ukjjarusti chachapar kunaw churäna, “jupasti manqʼantarakïnwa”. ¿Kunats uk lurpacha sasmasa?... Kunattejj Jehová Diosar munasiñat sipansa, Adanajj Evaruw jukʼamp munasïna, ukatwa juparojj istʼäna. Ukampis jaqer istʼaskañat sipansa, wali wakiskiriw Jehová Diosar istʼañasajja ¿janich ukhamäki?

¿Evar parljjaykän uka katarit amtasktati? Kataris parljjaykaspa ¿ukhamanjjaya? Kunjamtï jaqenakajj mä tʼejjetar munañaparjam apnaqkejja, ukar uñatasitwa Supayajj munañapar katarir apnaqäna ¿katarejj arskän uka arojj khitinkpachänsa?... “Uka dragonapï nayrapacha uka jachʼa katarïnjja, ukasti Supaya Satanás satarakiwa”.

¿Kunjamatsa Jehová Diosar kusisiyasma?... Jupar istʼasa. Supayajj taqe jaqenakaw nayar istʼapjjetaspa sasaw amuyi. Ukatpï Jehová Diosajj akham ewjjtʼistojja: “Munat wawajjay, yatiñanïmaya, nayarojj kusisiyitätawa; ukhamatwa arsusëjja nayar toqer jaqenakarusa” sasa. “Nayar toqer jaqenakarusa” sasinjja, Jehová Diosat phiskasir Supayatwa parlaski. Jupajj taqe aka oraqpachankir jaqenakaruw Diosat jitheqtayañ muni. Ukhamajj Jehová Diosar istʼam ukat yupaycharakim ukhamat Jupar kusisiyañataki. ¿Uk lurañatakejj chʼamachasïtati?...