Kimsa maranïkayäta ukhajj awkijasa, tiojasa ukat achachilajas kunanakatï Bibliarjamajj jan walïki uk jan lurañ munapjjatapatwa, wali chʼama luräwinakan trabajipjjañapatak apatapjjäna. Ukat Payïr Jachʼa Chʼajjwäwi qhepat 1947 maran awkijakiw jikhanis usuchjata utar kuttʼanjjäna. Sinti usuchjatakchïnsa, iyawsäwip taqe chuymaw arjjatawayi.

Ukat llätunka maranëjjayäta ukhajj Moldaviankir walja jilat kullakanakaw Siberia markar apatapjjäna, familiajas ukhamaraki. Julio phajjsin 1949 maran 6 uru saraqatarojj trenan uywanak apañäki ukaruw apapjjetäna, ukat 12 urunakaw 6.400 kilometronak Lebyazhe sat markar puriñkam jan saytʼas saräna. Ukan mark apnaqerinakajj trenanak sayayañ cheqan suyapjjetäna. Ukat walja grup grupor jalanoqasinsti, kunayman cheqanakaruw apapjjetäna. Nanakarojj mä jiskʼa chʼusa escuelaru. Ukampis qarita, wali llakitaw jikjjatasipjjayäta. Ukat mä chuyman kullakaw kuntï Payïr Jachʼa Chʼajjwäwin Jehová Diosan Qhanañchirinakapajj mä qʼochu apsupkatayna uk jan arunak arsuyasaw qʼochuñ qalltäna, qhepat taqeniw qʼochupjjayäta, akham sasa:

‘¡Qawqha jilat kullakanakas jaya markanakar apat uñjasiwayapjje!

Alay toqeru ukat inti jalsu toqeruw apat uñjasipjje.

Diosan munañap lurasaw tʼaqhesita ukat jan waltʼäwinakan uñjasiwayapjje.’

Ukat tiempompejj sapa domingonakaw tantachasiñatak 13 kilometronak sarapjjayäta. Wali chʼamak chʼamakaw alwajj utat mistuwayapjjerïta, uka markan sintpun thayajj chʼuchtʼasiri (40 grados bajo cero) thaknam sarkasins khunus cinturkamaw purirakiri. Ukan mä jiskʼa utanwa 50 jan ukajj jukʼamp jilan tantachasipjjerïta, ukat mä kimsa qʼochunak qʼochusin Diosaruw mayisipjjerïta, ukjjarojj mä hora jan ukajj jukʼamp horanakwa Bibliat yatjjatapjjerïta. Qhepat wasitat ukham lurapjjarakirïta. ¡Uka pachan iyawsäwin wali chʼamachtʼataw jikjjatasipjjayäta!

Ukat 1960 maran Jehová Diosan Qhanañchirinakapajj yaqha markanakar apatapkayäta ukanakajj janiw sinti jarkʼatajjapjjäyätti, ukampis pisinkapkchiyätsa, Moldavia markaruw sarayäta. Ukanwa Nina sat kullakar uñtʼta, achachilapasa, awichapas ukat awk taykapas Jehová Diosan Qhanañchirinakapäpjjänwa. Mä qawqha tiempot casarasisin Siberia markaruw jupamp kutʼanjjayäta, ukanwa Dina wawajajj 1964 maran nasïna, Viktorajj 1966 maranaraki. Pä mara qhepat Ucrania markar sarjjasin  Dzhankoy sat markan jakasjjapjjayäta, ukasti Crimea sat cheqan Yalta sat markat 160 kilometronak sarañankiwa.

Kunjamtï Unión Soviética markan Diosan arunakapat parlañajj jarkʼatakänjja, ukhamarakïnwa Crimea cheqanjja. Ukampis janiw sinti jarkʼatapkayätti, ukatwa yaqhep jilat kullakanakajj jan sinti chʼamachasjjapjjänti. Niyakejjay Siberia markan wali tʼaqhesiyat uñjasipkchiyätjja, trabajiñas ukat yänak jikjjatañas walikïskaspas ukham amuyjjapjjäna.

Unión Soviética sat sutimp Rusia markajj uñtʼatäkäna ukan 1991 maran marzo phajjsit 27 uru saraqatarojja, markan leyinakaparjam uñtʼatajjapjjayätwa. Ukat jankʼakiw markpachan 7 jachʼa tantachäwinak apasiñapatak wakichasiñ qalltasïna, ukanakajj pä uruw apasiñapäna. Nanakajj Odesa (Ucrania) markaruw sarapjjañajäna, ukansti agosto phajjsin 24 urun qalltasiñapäna. Ukatakejj mä phajjsi faltkipanwa pelot anatañ estadio qʼomachañatak sarjjayäta.

Ukat jurnalpachaw irnaqapjjerïta, arumanakajj gradanakan kun ikipjjerïta. Warminakajj estadion anqajjanakap pichapjjarakiri, tʼunanakas qʼañunakas waljapuniw apthapisiri. Ukat qorpachasiñ toqet sarayirinakajj 15.000 jilat kullakanakatakiw qorpachasipjjañapatak wakichapjjäna. Ukat akatjamat mä jan wali yatiyäw katoqapjjta.

Agosto phajjsin 19 urut phesqa urukiw jachʼa tantachäw apasiñapatak faltjjäna, uka uruw Mijaíl Gorbachov sat Unión Soviética marka apnaqerirojj Yalta sat marka jakʼan policiamp utar katuntat uñjasïna, ukajj kawkhantï tantachäwejj apasiñapäkäna ukhat janiw jayankkänti, ukatwa tantachäwitak permiso mayitajj jarktʼat uñjasïna. Ukat jilat kullakanakan autot ukat trenat jutapjjañapatak pasajenakapajj alatajjänwa, ukanakampejj kamachapjjasa sasaw tantachäwi wakichirinakarojj wal jawsanipjjäna. Jupanakajj taqe chuyma ukat walj kuti Diosar mayisinsti, “¡kunas kunäpan jutasipkakim!” sasaw sapjjäna.

Ukampis tantasiñatakejj wakichasisipkakiyätwa. Ukat markpachat purinir jilat kullakanakarojj katoqañapatak uttʼayatäpkäna ukanakajj purinitarjamaw qorpachasiñ utanakar apapjjäna. Ukat Jachʼa Tantachäw Apasiñapatak Uttʼayatanakajj sapa alwaw marka apnaqer autoridadanakan ukar sarapjjäna, ukampis jan wali yatiyäwinakampikiw kuttʼanipjjeri.

Agosto phajjsin jueves 22 urutjja, pä urukiw tantachäw apasiñapatak faltjjäna ukhaw Jachʼa Tantachäw Apasiñapatak Uttʼayat jilatanakajj mä aski yatiyäwimp kuttʼanipjje: “¡Jachʼa tantachäwejj apasiskakiniwa!” sasa. Ukat tantachäwin qallta qʼochup qʼochupkayäta ukhajj walpun kusisipjjayäta. Tantachäw tukuyatarojj nayra amigonakampiw jikisipjjarakta. Jupanakajj taqe chuymaw Diosar servisipkakïna.

Uka jachʼa tantachäw apasitapat 22 jila maranakaw pasawayjje, ukhat jichhakamajj Jehová Diosan Qhanañchirinakapajj walipuniw jiljjattawayi, Ucrania markapachanwa walja Tantachasiñ Utanakajj lurasiwayi ukat Diosan Reinopat yatiyirinakas 1991 maratakejj 25.000 jilaniw jiljjattawayi ukat jichhajj 150.000 ukhanëjjapjjaraktwa.

Familiajamp Dzhankoy sat cheqan jakasipkaktwa, uka markajj 40.000 markachirinakanëjjewa. Kunapachatï Siberia markat 1968 maran purinipkayäta ukhajja, Jehová Diosan Qhanañchirinakapajj mä qawqha familianakakiw utjäna, ukampis jichhajj sojjta tamanakaw utj-jje.

Familiajas jiljjattawayiwa, wawanakajas allchhinëjjapjjarakiwa, taqpachaniw Diosar loqtasipki.