Kunanakatï uñjtan ukanak sum amuyañatakejj nayrasaw lajjwir jan ukajj lejjwir yanaptʼi. Amuytʼañataki, mä fruta uñjasajj manqʼantätati janicha uk jumaw amttajja. Ukat alajjpach uñtasajj janiw jalluntkaniti saraktawa. Aka qellqatan liytʼkta uka arunak uñjasajj kamsañs muni uk amuyaraktawa. Coloranakajj kunjamsa yanaptʼistu uk janis amuykstanjja, yanaptʼistuwa ¿kunjamanakatsa?

Amuytʼañäni, mä frutajj kunjam coloranisa uk uñjasaw manqʼantañjamati janicha uk amuytanjja. Ukat alajjpachajj kuna colorasa ukat qenayaniti janicha uk uñjasaw kunjam urünis uk amuytanjja. Aka yatichäwjja coloramp suma lurtʼatätap laykurakiw kunatï qellqatäki uk sum liytʼtanjja. Ukhamajj janis amuykstanjja, coloranakajj taqe kunatï jiwas jakʼan utjki uk sum amuyañasatakiw yanaptʼistu, ukat chuymassa mayjtʼayarakispawa.

Mä jachʼa tiendar sarktan ukhajja, aljañanakjja kunayman papelanakar uchatwa uñjtanjja ukat ukjja taqenin munkayañapatakiw ukham lurapjje. Cheqas janis amuyasktanjja, aljañatak kuns lurapjje ukanakajj kunsa warminakasa, chachanakasa, wawanakasa ukat wayn tawaqonakas munapjjaspa ukatakjamaw coloranak sum ajllipjje. Ukat uta kʼachachtʼirinakasa, isi luririnakasa ukat cuadronak pintapki ukanakasa kuna coloranakas maynirojj kusisiyaspa uk sum yatipjje.

Sapa colorajj kamsañs muni uk kawkhantï jakasipki ukarjamaw jaqenakajj amuyapjje. Amuytʼañäni: Asia toqenkiri jaqenakatakejja wila jan ukajj chupika colorajj phuñchhäwinakampi ukat suertempi sasiwa, ukampis África toqenjja, yaqhep cheqanakanjj wila color uñjasajj ‘mayniw jiwpacha’ sasaw amuyapjje. Ukampis kawkinsay jilsuwaystan mä qawqha coloranakajj taqeniruw mä pachpaki amuyayistu, ukanakat kimsa uñjañäni.

WILA. Uka colorajj qhana uñjkayawa. Ukat chʼamampi, guerrampi ukat jan walimpi sasiwa. Ukat maynirojj mayjtʼayaspawa, jankʼakiw samaqeyaspa ukatjja chuymsa wal putoqeyaspa.

Biblianjja hebreo arut “wila” jan ukajj chupika sasin jaqokipatäki uka arojja cheqpach “wila” sañ muni. Biblianjja, jan walinakan sarnaqeri ukat jaqe jiwayir mä warmitwa parli, jupajja wila morado isimp isthaptʼatawa sasaw qhanañchi, ukat “mä jachʼa wila ajjsarkañ animaljjaru latʼjjatata[wa]” sasaw qhanañcharaki (Apocalipsis 17:1-6).

CHʼOJJÑA. Uka colorajj janiw wila colorjamäkiti, janiw maynirojj mayjtʼaykiti ukat sum jikjjatasiñapatakiw yanaptʼi. Chʼojjña colorajja, sumankañampi sasiwa. Amuytʼañataki: suma chʼojjña jardín uñjtan jan ukajj qoqanakampi phoqhantata mä qollo uñjtan ukhajja, chuymasajj wal qhanartistu. Diosajj ukham jikjjatasiñasatakiw qoqanaka ukat ukham yaqha chʼojjñanak luräna sasaw Génesis libron qhanañchi (Génesis 1:11, 12, 30).

JANQʼO. Uka colorajja, qhanampi, qʼomampi ukat sumankañampi sasiwa. Ukat khuyapayasiñampi, jan juchanïñampi ukat qʼomäñampi sasirakispawa. Cheqas Bibliajj walja kutiw uka colorat parli. Amuytʼañäni: visionanakan uñstapki  uka chachanakasa ukat angelanakasa, janqʼot isthapitäpjjewa. Cheqas ajay toqet qʼomäpjjatapa ukat cheqapar sarnaqerïpjjatap qhanstayañatakiw ukham isthapitäpjje (Juan 20:12; Apocalipsis 3:4; 7:9, 13, 14). Janqʼo ukat qʼoma lino isimpi isthapit jaqenakampi latʼjjatata janqʼo caballonakajj cheqapa chʼajjwäwimpi sasiwa (Apocalipsis 19:14). Ukat juchanakas perdonañatak jankʼakïtap uñachtʼayañatakejja, Diosajj janqʼo colorwa aytaraki: “Juchanakamajj wila colorar uñtatäkchinisa, nayajj khunjam janqʼow tukuyajja” sasa (Isaías 1:18).

Kunjamsa coloranakajj Biblian aytasi ukajja, kunjamsa jaqerojj mayjtʼayaspa uk Diosajj sum yatitapwa uñachtʼayistu. Amuytʼañataki, Apocalipsis libronjja kunanakatï jichhürunakan pasaski ukaw mä visionan qhanañchasi, sañäni: chʼajjwäwinakata, manqʼat pistʼañ utjipan jiwañanakata ukat usunakatwa parli. Ukanak sum amtañatakejja, mayj mayj colorani caballonakar latʼjjatat jaqenakaw uñjasi.

Nayraqatjja, mä suma janqʼo caballow uñsti, ukajj Jesusan cheqaparjam chʼajjwäwipa sañ muni. Ukatsti mä wila color caballow uñjasiraki, ukajj marka pura chʼajjwaña sañ muni. Ukjjarojja, mä chʼiyar caballow uñsti, ukajj manqʼat pistʼaña sañwa munaraki. Ukjjarusti mä qʼellu caballow uñjasiraki, ukat ukar “latʼjjatatäkän ukan sutipasti ‘jiwaña’ satänwa” (Apocalipsis 6:1-8). Uka coloranakajj jankʼakiw uka caballonakar amtayistu, ukat uka caballonakat sapa mayajj jichhürunakan kunarus uñtayi uks amtayarakistuwa.

Biblianjja, mä uñachtʼäwi uñjksnas ukham amuyañatakejja walja coloranakwa ayti. Qhana ukat jaqenakan nayranakap Lurir Diosajja, jiwasan amuyañasataki ukat kuntï yatichkistu uk amtañatakejja coloranak aytapuniwa. Ukat coloranakajja, yateqañatakisa, amuyañatakisa ukat amtañatakis yanaptʼarakistuwa, ukat chuymassa mayjtʼayarakispawa. Coloranakajja, taqe kun Lurir Diosan mä aski churäwipawa, ukhamat kusisit jakasiñasataki