Diosajj akham sasaw Abrahamarojj säna: Jutaniw sat ‘wawajja’, wawanakam toqew jutani sasa. Jupa toqnamwa Oraqpachankir taqe jaqenakajj bendicitapjjañapäna (Génesis 22:18). Ukat mä qawqha tiempotjja, Jacob sat Abrahaman allchhipajj Egipto markaruw sarjjäna, ukanwa familiapajj Israel markar tukuñkam waljaptapjjäna.

Qhepatjja, mä qhoru faraonaw israelitanakar tʼaqhesiyäna. Diosajj jupanakar qhespiyañatakejj Moisés profeta toqew Wila lamar qota payar jaljtayäna. Ukatjja, jan walinakat jarkʼaqañataki ukat jupanakar irpañatakejj Diosajj leyinakwa churäna. Ukat Tunka Mandamientonakasa ukat juchanakat pampachatäñataki leyinakasa uka taypinkarakïnwa. Ukat Diosan amuytʼayatajja, Moisesajj Diosaw yaqha profeta khitanini sasaw israelitanakar säna. Uka profetaw jutaniw sat ‘wawänjja’.

Ukat 400 jila maranak qhepatjja, kawkïr ‘wawattï’ Edén jardinan arsuwaykta ukajj wiñayatakiw apnaqani sasaw Diosajj David reyir säna. Uka wawajj Mesiasänwa, juparuw Diosajj jaqenakar qhespiyañataki ukat Oraqe wasitat mä paraisor tukuyañapatak uttʼayawayi.

Mesiasajj khitïnsa ukjja, jukʼat jukʼatwa Diosajj David toqe ukat yaqha profetanak toqejj qhanstayäna. Mesiasajj altʼat chuymani ukat khuyapayasirïniwa sasaw uka profetanakajj arsuwayapjjäna. Ukat jupajj apnaqjjani ukhajja, janiw manqʼat pistʼañasa ukat chʼajjwäwinakas utj-jjaniti, taqe kunas cheqaparupuniw uñjatäni. Jaqenakajj jupanak purasa ukat animalanakampis sumakiw jakasjjapjjani. Usuntañasa, tʼaqhesiñasa ukat jiwañas janiw Diosan amtapankkänti, ukampis Diosajj taqe ukanakwa chhaqtayjjani. Ukat jiwatanakarus Oraqen jakasipjjañapatakiw jaktayani sasaw arsuwayapjjarakïna.

Mesiasajj Belén markanwa nasini sasaw Diosajj Miqueas profeta toqnam qhanañchäna, ukatjja jiwayatäniw sasaw Daniel profeta toqejj qhanañcharakïna. Ukampis Diosaw jaktayasin alajjpachan Reyit uttʼayañapäna. Mesiasan apnaqäwipaw taqe akapachankiri gobiernonak lantejj wiñayatak uttʼayatäni sasaw Daniel profetajj qellqarakïna. Ukampis ¿kunjamtï Mesiasat qhanañchasiwaykäna ukhampunit phoqhaspachäna?

(Génesis 22-50, Éxodo, Deuteronomio, 2 Samuel, Salmos, Isaías, Daniel, Miqueas ukat Zacarías 9:9 qellqatanakarjama.)