“Khititï jan perdonki ukajja, kawkïr puetnamtï pasañapäki ukwa tʼunji” sasaw Gran Bretaña markankir Edward Herbert jaqenakan sarnaqäwipat yatjjattʼat chachajj säna, jupajj 1600 maranakanwa jakäna. Uka arunakapajja kunatsa perdonasirïñajj wakisi uk sum amuytʼayistu. Kunattejj mä akatjamat pantjasisajj jiwasas perdón mayirakiñäniwa (Mateo 7:12). Ukampis janiw ukakïkiti, apóstol Pablojj akham sasaw ewjjtʼistu: ‘Jumanak purajj llampʼu chuymampi sarnaqapjjam, maynit maynirus perdonasipjjarakim jan wali lurasipjjsta ukapachajja. Kunjämtï jumanakarojj Jehová Diosajj perdonapjjtamjja, ukhamarak jumanakajj perdonapjjam’ sasa (Colosenses 3:13).

Taqeniw pantjasirïtanjja ukatwa awisajj maynirojj coleraysna jan ukajj chuym ustʼaysna, jan ukajj mayniw jiwasar uk luristaspa (Romanos 3:23). Ukhamäkchisa, ¿taqenimp sumankañatakejj kuns lursna? Pablojj Diosan amuytʼayataw paciencianïñasataki ukat perdonasirïñasatak ewjjtʼistu. Uka ewjjtʼapajja, jichhürunakans wali wakiskirikïskiwa, kunjamäkäntï nayra pachanakan ukhama. Jichhajj kuntï siskäna uk amuytʼañäni.

‘Jumanak purajj llampʼu chuymampi sarnaqapjjam.’ Uka arunakajja, griego arut jaqokipat mä arutwa juti, ukat paciencianïña sañ muni. Mä qellqatajj akham sänwa: pacienciani cristianonakajja, “colerayirjam kuns lurapki ukat panjasipki ukanakarojj pacienciampiw uñji” sasa. “Jumanak pura” siski uka arunakajja, purapat paciencia uñachtʼayasiñaswa amuytʼayistu. Mä arunjja, jiwas pachpa yaqhanakar colerayirjamätas amuyastan ukhajja, kunanakatï mayninakat coleraykistu ukanakajj janiw sum jakasiñatak jarkʼañapäkiti. Ukampis maynejj chuym ustʼayistani ukhajj ¿kuns lursna?

‘Maynit maynirus perdonasipjjarakim.’ Yatjjattʼat mä chachan arunakaparjamajja, “maynit maynir perdonasipjjam” sasin jaqokipatäki uka griego arojja, “janiw perdón sañatak arükiti [...], jan ukasti khuyaptʼayasirïñwa qhanstayi”. Ukat yaqha qellqatarjamajja, uka arunakajj “askinak churaña, khuyaptʼayasiña” sañwa munaspa. ‘Jan wali lurapjjestu’ ukhajj perdonañatak jankʼakïtan ukhaw khuyaptʼayasirïtas uñachtʼaytanjja. Ukampis ¿kunatsa khuyaptʼayasirïñasa? Kunattejj jiwas pachpaw maynin perdonatäñ munaraksna, ukhaw maynejj jiwasar khuyaptʼayarakistaspa.

‘Kunjämtï jumanakarojj Jehová Diosajj perdonapjjtamjja, ukhamarak jumanakajj perdonapjjam.’ Jehová Diosaw jiwasar perdonistu, ukatwa jiwasajj jaqe masisar perdonañasaraki (Miqueas 7:18). Kunja khuyaptʼayasiñsa Jehová Diosajj juchanakapat arrepentisitarojj uñachtʼayi uk mä jukʼa amuytʼañäni. Diosajj janiw jiwasjam juchachaskiti, ukhamajj janiw khitin perdonatäñs suykiti, ukhamäkchi ukasa munasiñampiw perdonistu. Cheqas perdonañajj kunjamasa ukjja, Jehová Diosatwa yateqassna.

Jehová Diosan khuyapayasiñapaw Jupar jakʼachasiñataki ukat Jupat yateqasiñasatak yanaptʼistu (Efesios 4:32–5:1). Ukhamajja, akham jisktʼasiñasajj wali askïspawa: “Jehová Diosatï khuyaptʼayasiñat perdonchitojja, ¿nayjam pantjasiri ukat nayar jan wali luratapat taqe chuyma arrepentiski ukarojj janit perdonkarakiristjja?” sasa (Lucas 17:3, 4).