Chile markan Santiago capitalapanwa jilsuwayta. Jakkayäta ukhanjja, jaqe jiwayañasa, droga apnaqañasa ukat jan wali lurañas walikïkaspas ukham uñjapjjerïna. Phesqa maraniskäyät ukhaw awkijar jiwayapjje. Uka qhepatjja, mamajajj mä qhoru chachampiw jakjjäna, jupajj sapa kutiw mamajarus nayarus nuwjapjjerïtu. Uka maranakanjj kunjamsa chuym ustʼayapjjetäna uk amtaskaktwa.

Qʼajjo waynaskäyät ukhajja, jan wali lurañar chʼamañchatajj jukʼamp jan wal lurirïta. Heavy metal música ischʼukiña ukat machjasiñwa qalltjjayäta, ukat yaqheppachajj droganakampiw qolljasiyäta. Callenakan nuwasipki ukanjja, droga aljirinakampiw nuwasirïta, jupanakajj walja kutiw jiwayañ munapjjetäna. Mä urojja, mä pandillajj jan ajjsaras jaqenak jiwayir mä chacharuw nayar jiwayañapatak pagapjjatayna, cuchillompis khartʼkchitänjja, jupat qhesptwa. Ukat yaqha urojja, droganak aljirinakaw pistolampi pʼeqer apkatapjjetu ukat warkkatañ munapjjetu.

Ukat 1996 maranjja, Carolinaruw uñtʼta, ukat 1998 maranwa jupamp casarajjta. Jilïr wawajajj naskäna ukhaw jan wali qhoru jaqëtaj amuyasiyäta. Qhepa awkijar uñtasitach familiajar jan wal lurjjä sasaw wal ajjsarayasiyäta. Ukatwa kawkhantï nayjam jaqenakar yanaptʼapki ukar yanaptʼayasir sarta. Ukat ukan kuna yanaptʼanaktï katoqkta ukajj janiw añch yanaptʼkitänti. Mä kunatsa colerasjjakirïtwa; jan amuytʼasisaw kuns lurirïta. Ukham inamay chʼamachasitajata ukat familiajar jan jukʼamp tʼaqhesiyañ laykojja, nä pachpaw jiwayasiñ munjjayäta. Ukampis janiw jiwayaskti.

Walja maranakas Diosan utjatap jan iyawskchiyätjja, jichhajj creyiñwa munjjayäta. Ukatwa mä religionar mä qawqha tiempo sarta. Ukañkamajja, warmijajj Jehová Diosan Qhanañchirinakapampiw Bibliat yateqañ qalltäna. Uk uñjasajj wal jupanakatak colerirïta ukat jan wali arunakampiw arnaqjjerïta. Ukampis jupanakajj suma arumpiw parljjayapjjeritu.

Mä urojja, warmijajj Bibliamat Salmo 83:18 thaqtam sasaw situ. Uka tʼaqanjja, Diosan Jehová sutipwa qhan qhanañchi.  Iglesiajan Diosats yateqkchiyätjja, janiw Jehová satätap yatkayätti. Ukat 2000 mara qalltanwa Jehová Diosan Qhanañchirinakapampi Bibliat yateqañ qalltawayta.

Jukʼat jukʼatwa Jehová Diosajj khuyaptʼayasirïtapa ukat juchanak pampachirïtap amuyasjjayäta. Éxodo 34:6, 7 qellqatanjja, akham siwa: “¡Dios Tatitusti, wiñay jakiriwa, ukhamarak khuyapayasiriraki. Janiw jankʼaki colerasirïkiti, jan ukasti jachʼa munasiriwa, ukhamarak cheqaraki! Waranqa wawanakaman wawanakapatakisa pachpa cheqa aski munasirikïskaniwa, ukhamarak perdonarakiwa jan wali luratanaksa, jan wali amtäwinaksa, taqe juchanaksa” sasa. Ukaw wal chʼamañchtʼawayitu.

Ukhamäkchïnsa, yateqatarjam lurañajj chʼamakïnwa. Kunjam jaqëktï uk janjakiw apanukkäti sasaw amuyasiyäta. Aynachtʼirïkt ukhajja, warmijajj munasiñampiw chʼamañchtʼirïtu, ukat Jehová Diosajj chʼamachasitam uñjaskiwa sasaw amtayirïtu. Janiw aka jan waltʼäwit mistkäti sasaw sapa kuti amuyirïta, ukampis warmijan yanaptʼapampejj Diosar kusisiyañatak chʼamachasiskakiyätwa.

Alejandro jilataw Bibliat yatichitäna, jupajj Gálatas 5:22, 23 qellqat liytʼam sasaw situ, ukanjja, Diosan qollan ajayupan luräwinakapatwa parli, sañäni: “Munasiña, kusisiña, samaraña, llampʼu chuymanïña, taqempis sumankaña, khuyapayasirïña, taqe kunansa phoqherïña, llampʼu chuymanïña, janchin munañapar atipjaña”. Ukham jaqëñatakejj Diosan qollan ajayuparuw confiyañama, janiw chʼamamaruk confiyañamäkiti sasaw sitäna. Uka arunakaw yanaptʼawayitu.

Mä jukʼa tiempotjja, Jehová Diosan Qhanañchirinakapan jachʼa tantachäwiparuw sarta. Ukanjja, taqe kunas qʼomänwa ukat suma wakichtʼatarakïnwa. Tantachasirinakajj jupanakkamas wali sum apasipjjäna, taqe ukanak uñjasaw cheqa yupaychäwi jikjjatataj amuyasiyäta (Juan 13:34, 35). Ukat febrero 2001 maranwa bautisasjjta.

Nayrajj wali qhoru jaqëyatwa. Waljaniw uñisipjjetäna, ukampis janiw jupanakar juchañchkti. Jehová Diosaw suma chuyman jaqëñajatakejj yanaptʼawayitu, ukat kuna jan walintï uñjaskayät ukatsa qhespiyawayitu. Jichhajja, kusisitaw warmijampi ukat pä wawajamp chika Jehová Diosar serviskta.

Familiaranakajasa ukat nayra amigonakajas jan qhoru jaqëjatajj uñjasajj wal muspharapjje. Ukat jupanakat waljaniw Bibliat yatjjatañ munapjje. Janiw jupanakaruk Bibliat yatichkti, yaqhanakarus Jehová Diosar uñtʼapjjañapatakejj yanaptʼaraktwa. Kunjamsa Bibliajj jupanakar yanaptʼawayi uk uñjasajj wali kusisitätwa.