Hebreo Arut Qollan Qellqatanakat qhep qhepa libro qellqaskäna ukhat 400 maranak qhepatwa Miqueas profetan arsutanakapajj phoqhasïna: Mesiasajja, mä arunjja, Jesusajj Belén markanwa nasïna. Ukat 30 maranak qhepatwa kuntï Daniel profetajj Mesiasan jutäwipat arskäna ukajj phoqhasïna, 29 jichha pacha marana. Uka maranwa Jesusajj bautisasïna ukat Diosaw qollan ajayumpi ajllïna. Ukhamasti kuntï Mesiasat arsusiwaykäna ukajj ukhampuniw phoqhasïna.

Jesusajj ukspachaw “Diosan reinopat” yatiyañ qalltäna (Lucas 8:1). Ukat kunjamtï jupjjat arsusiwaykänjja, ukhampunwa Jesusajj khuyaptʼayasirïtapa ukat jaqenakat sinttʼasirïtap uñachtʼayäna. Ukatjja, munasiñampirakiw yatichäna ukat walja jaqenakaruw ‘taqe usunakapat kʼumaraptayäna’, ukaw Diosajj jupampïskatap uñachtʼayäna (Mateo 4:23). Jupar arkapkäna ukanakajj taqeniw jupat akham sapjjäna: “Mesiasaruw jikjjatapjjta” sasa (Juan 1:41).

Oraqjjar janïr apnaqkipanjja, guerranaka, oraq khatatinaka ukat yaqha jan waltʼäwinakaw utjani sasaw jupajj arsuwayäna. Ukatwa akham ewjjtʼäna: “Amuyasipjjapunim” sasa (Marcos 13:37).

Jesusajj jan pantjasiri jaqënwa ukat Diosarojj istʼapunirïnwa. Ukampis uñisirinakapaw jiwayapjjäna. Ukat jiwäwipampiw Jesusajj kuntï Adanampi Evampejj aptʼawayapkäna uk kutsuyawayi: paraison wiñay jakaña.

Jesusan jiwatapasa ukat kimsürut ajayjam jaktjjäna ukasa, profetanakan arsutaparjamaw phoqhasïna. Jaktjjasajja, 500 jila arkirinakaparuw uñstäna. Ukat janïr alajjpachar kutʼkasajj jupjjata ukat Reinopat “taqe akapachankir jaqenakar yatiyir sarapjja[ñapatakiw]” arkirinakapar ewjjtʼawayäna (Mateo 28:19). ¿Uka arunakaparojj istʼapjjpachänti?

(Mateo, Marcos, Lucas, Juan ukat 1 Corintios qellqatanakarjama.)