Jesusan jaktäwipajja, arkirinakaparojj jukʼamp iyawsäwinïpjjañapataki ukat chʼamañchtʼatäpjjañapatakiw yanaptʼäna. Amuytʼañataki, apóstol Pablojj Asia Menor ukat Mediterráneo uksanakar sarasajj tamanakwa uttʼayäna. Ukat jan walinakar saykatañataki ukat wachoq qʼañu luräwinakat jitheqtapjjañapatakis cristiano jilat kullakanakarojj yanaptʼarakïnwa. Ukhamatwa cristiano tamajj jukʼamp jiljjattaskakïna.

Ukat pachpa apóstol Pablow carcelan jistʼantat uñjasïna. Ukhamäkchïnsa, carcelankkasas cristiano tamanakar chʼamañchtʼañataki ukat ewjjtʼañatakejj cartanakwa qellqäna. Ukat tamat jitheqtjjasin Diosan markap contra saytʼirinakat amuyasipjjañapatakis ewjjtʼarakïnwa. Diosan qollan ajayupamp amuytʼayatajj akham sänwa: “Yaqhanakaw jutapjjani [tamar] tʼunjañ munasa, kunjämtejj qamaqenakajj ovejanakar tukjañataki jutapkejja ukhama. [...] kʼarinak yatichasa, cheqäkaspas ukhama, iyawsirinakar jupanak toqer apaña munasa” sasa (Hechos 20:29, 30).

Ukat nayrïr patak maranak tukuyatarojja, cheqapuniw ukajj pasäna. Niya uka tiemporakiw jaktanit Jesusajj kunatï jutïrin paskani uk apóstol Juanar uñachtʼäwinakamp qhanañchäna. Ukat kunjamtï apóstol Juanajj qellqkänjja, janiw Diosan uñisirinakapasa ni kʼari yatichirinakas Diosajj kuntï Oraqetakis ukat jaqenakatakis amtki uk phoqhasiñ jarktʼapkaspati. Diosan Reinopat suma yatiyäwinakajj “taqe markanakaru, taqe casta jaqenakaru, kunayman parlani jaqenakarusa” yatiyasiniwa (Apocalipsis 14:6). Oraqejj wasitatwa paraisor tukuyatäni ukat Diosan munañap phoqhañ munapki ukanakajj ukanwa jakasipjjarakini.

¿Ukanakajj jumatakejj suma yatiyäwinakati? Ukhamächi ukhajja, Diosan suma yatiyäwinakapajj Biblian jikjjataski uk jukʼamp yatjjatam, ukat kunjamsa ukajj jichhasa ukat jutïrinsa yanaptʼätam uksa yatjjatarakim.

Ukat Bibljja, niya 50 arunakatwa Internetan www.pr418.com cheqan liytʼasma. Ukat uka pachpanwa Diosan apayanit suma yatiyäwinaka sat folleto ukat ¿Kunsa Bibliax chiqpachapuni yatichi?, sat libro jikjjatäta. Ukat kunatsa Bibliar confiyañasa ukat kunjamsa jakäwisansa familiansa uka ewjjtʼanakarjam sarnaqsna uka toqenakat qhanañchtʼiri qellqatanaksa jikjjatarakismawa. Jukʼamp yatjjatañ munsta ukhajja, Jehová Diosan Qhanañchirinakapampiw parltʼasma.

(Hechos, Efesios, Filipenses, Colosenses, Filemón, 1 Juan ukat Apocalipsis qellqatanakarjama.)