Walja jaqenakatakejj Diosar munasiñajj wali chʼamawa, kunattejj janis uñtʼañjamäkaspa, wali jayankkaspasa ukat jan sinttʼasirïkaspas ukhamwa amuyapjje. Jupanakat mä qawqhanejj kamsapjjesa uk uñjañäni:

• “Diosarus yanap maykchiyätjja, nayat wali jayankkaspa, janis utjkaspa ukat janis sinttʼasirïkaspa ukhamwa amuyayäta.” (Marco, Italia.)

• “Diosar wal serviñ munayäta, ukampis wali jayankkaspasa, ukat jan wali Diosäkaspasa, jiwasar juchañchañaks munkaspa ukat janis sinttʼasirïkaspa ukham amuyayäta.” (Rosa, Guatemala.)

• “Jiskʼaskayät ukhajja, Diosajj pantjasitasaks juchañchañatak uñchʼukkistaspa ukat janis jakʼachasiñjamäkaspa ukham amuyayäta. Kunjamtï marka pʼeqtʼirinakajj markachirinakapar jan sinttʼasis apnaqkejja ukhamwa Diosar uñj-jjayäta.” (Raimunda, Canadá.)

¿Jumajj kamsasmasa? ¿Cheqapunit Diosar jan munasksna? Walja maranakaw cristianonakajj ukham jisktʼasiwayapjje. Cheqas 500 maranakat niya 1500 jichha pacha maranakkamajja, jaqenakat jila partejj janiw Diosarojj oracionan mayisipjjerïkänti. ¿Kunatsa? Kunattejj Diosar wal ajjsarapjjerïna. Sarnaqäwinakat qellqeri Will Durant sat chachajj akham sänwa: “¿Kunjamarak mä jucharar jaqesti wali jayankir ukat ajjsarkañ Diosar mayisispasti?” sasa.

¿Kunatsa jaqenakajj Diosat ukham amuyapjjpacha? ¿Kunsa Bibliajj uka toqet yatichi? Diosat kunatï cheqäki uk yatsna ukhajja, ¿Jupar munassnati?