JERICÓ markan mayampiw Intejj jalsunjje. Rahab warmejj ventanapat Israel markan ejercitoparuw anqan sarnaqaskir uñji, jupanakajj Jericó marka anqäjjanwa carpanakap uttʼayasipjje. Ukat sarnaqasin laqʼa sartayapjjatapas qhanaw uñjasi. Ukat pututunakas sumwa istʼasiraki.

Rahab warmejj Jericó markanwa jakasi, ukat uka markan callenakapsa, utanakapsa, qhatunakapsa ukat markachirinakarusa sum uñtʼi. Ukat kunjamsa sapürutjam jaqenakajj jukʼamp ajjsarayasipjje uks amuyarakiwa: ukañkamasti israelitanakajj sapüruw uka markar may kuti muytapjje. Ukat pututunakan phustʼasitapajj callenakansa, plazanakansa wali jachʼatwa istʼasi, uk istʼasajj markachirinakajj wal sustjasipjje, ukampis Rahab warmejj janiw sustjaskiti.

Rahab warmejja, kunjamsa israelitanakajj paqallqöri urun Jericó marka muytapjje ukwa ventanapat uñji. Ukat soldadonak taypin Diosamp arustʼäwir mantat arka kallasipkirwa sacerdotenakar uñji, uka arcajja Jehová Diosajj markapampïskatapwa uñachtʼayi. Rahab warmejj ventanapat mä wila wiskha warkoqtatäski ukwa katjjasiski. Ukajj jupana ukat familiapan qhespiyasipjjañapwa amtayi. Cheqas Rahab warmejj jan walin sarnaqerïkchïnsa, iyawsäwinïtap laykojj Jehová Diosajj askitwa uñjäna. Khitïnsa Rahab warmejj ukat kunsa jupat yateqassna uk jichhajj yatjjatañäni.

Jupajj jan wali sarnaqer warmïnwa. Biblia toqet yatjjatirinakajj uk yatisajj wal mayjtʼasipjje, ukatwa qorpachasiñ uta uñjirikïkaspänsa ukham amuyañ munapjje. Ukampis Bibliajj jan kun imtʼasaw Rahab warmit qhanañchi (Josué 2:1; Hebreos 11:31; Santiago 2:25). Cananeonakatakejj kuntï jupajj lurkän ukajj inas walikïkaspas ukham uñjatächïna. Ukampis ukajj janiw maynin concienciap amuktʼaykaspati, Jehová Diosaw kunatï walïki ukat jan walïki uk amuytʼasiñatak conciencia churistu (Romanos 2:14, 15). Rahab warmejj kuntï lurkän ukajj jan walïtap inas amuyasiskchïna. Jupajj inas familiapar yanaptʼañ laykojj jan kun lurirjamäsajj ukham jan walinakan sarnaqchïna, kunjamtï jichhürunakan walja warminakajj lurapjje ukhama.

Cheqas Rahab warmejj sumwa jakasiñ munpachäna. Kunattejj markapanjja kunayman jan wali lurañanakamp phoqhantatänwa, pachpa familiarapampi ukat animalanakampiw wachoqa juchanak lurapjjerïna (Levítico 18:3, 6, 21-24). Ukham jan walinak utjatapatjja, religionanakaw jila partejj juchanipjjäna. Templonakapanjja, qʼañu luräwinakwa lurapjjerïna, Baal ukat Mólek sat jan wali diosanakapar yupaychañatakejj jakkirpachwa wawanakapar phichantapjjerïna.

Kuna jan walinaktï Canaán markan lurapkäna ukjja, Jehová Diosajj sum yatïna. Ukatwa akham säna: “Jupanakan oraqenakapasa qʼañuchata uñjasjjarakejja, ukampisa nayajj jupanakarojj uka ñanqha luratanakapatjja cuenta waytʼarakta ukatwa jupanakarojj uka oraqenakajj apanukjjejja taqe ukan jakirinakarojja” sasa (Levítico 18:25). ¿Kunjamsa Diosajj uk lurpachäna? Jehová Diosajj akham sasaw markapar säna: ‘Jukʼat jukʼatwa uka markanakar jaqonukü’ sasa (Deuteronomio 7:22). Cheqas walja maranak nayraw Jehová Diosajj Abrahaman wawanakaparuw uka oraqenak churä  sasin arsuwayäna, “Diosasti uk arsusajj janiw kʼariskiti” (Tito 1:2; Génesis 12:7).

Ukampisa, yaqhep markanakajj chhaqtayatäpjjaniwa sasaw Jehová Diosajj säna (Deuteronomio 7:1, 2). Niyakejjay Jupajj oraqpachan “Jachʼa jues[ächejja]” kuna jan walinakas chuymanakapan phoqhantatäna uk sum yatïna (Génesis 18:25; 1 Crónicas 28:9). Jericó markajj ukham jan walinakamp phoqhantatänwa. Ukhamajj ¿Rahab warmitakejj ukan jakañajj kunjamakïpachänsa? Israelitanakat parlir istʼasajj kunjamsa jikjjataspachäna uk amuysnawa. Kunjamsa Jehová Diosajj Egipto markankir jachʼa ejercitopar tukjäna ukat markapar qhespiyäna uk sum yatïna. Uka tiemponjja, Egipto markaw taqe markanakat sipan wali chʼamanïnjja, ukat uka markarakiw israelitanakarojj wal tʼaqhesiyäna. Jichhajj Israel markaw Jericó markar niya tukjañampïski, ukampis Jericó markankirinakajj jan walinak lurasipkakiwa. Ukatwa Bibliajj Rahab warmin marka masinakaparojj ‘jan istʼasir jaqenaka’ sasin sispacha (Hebreos 11:31, NM).

Ukampis Rahab warmejj janiw jupanakjamäkänti. Walja maranak nayraw Israel markata ukat israelitanakan Jehová sat Diosapat parlir istʼpachäna. Jupajj janiw cananeonakan diosanakapjamäkänti. Servirinakaparojj arjjatirïnwa, janiw tʼaqhesiykänti, janiw qʼañu luräwinakan sarnaqaykänti. Ukat janiw warminakarojj wachoq jucha lurañatak alañäkaspasa, aljañäkaspasa ukat yupaychäwinakan qʼañu luräwinak lurayasin jiskʼachañatakïpkaspas ukham uñjkänti. Rahab warmejj israelitanakan Jordán jawirar puripjjatap ukat markapar tukjañatak wakichtʼasisipkatap yatisajj wal llakispachäna. Ukhamajj ¿kunatï jupan chuymapan utjkäna uk Jehová Diosajj uñjpachänti?

Jichhürunakanjja, Rahab warmjamarakiw walja jaqenakajj jan wali luräwinakan sarnaqasajj llakita jikjjatasipjje ukat janis jupanakat khitis llakiskaspa, janis kunatak askïpkaspa ukham amuyasipjje. Jupanakatakejj Rahab warmin sarnaqäwipat yatiñajj chuymachtʼkiriwa, kunattejj kunjamsa Jehová Diosajj sapa maynit llakisi ukwa qhan uñachtʼayi. Inas sinti jan walinak lurchiyätan, ukampis Jehová Diosajj “janiw jayankkiti sapaqat jiwasanakatjja” (Hechos 17:27). Jupar confiyapki ukanakar yanaptʼañatakejja, Diosajj jankʼakiwa. ¿Rahab warmejj Diosar confiypachänti?

Israelitanakan Jericó marka muytapjjañapatak mä qawqha urunak faltkipanjja, pä jaqenakaw Rahab warmin uta punkup leqtʼapjje. Jupanakajj janiw uñtʼayasiñ munapkiti, ukampis Jericó markankirinakajj israelitanakach uñaqer juti sasaw wali amuyumpi sarnaqasipki. Rahab warmejja, jan uñtʼatanakar utapar katoqañ yatitawa, ukampis uka pä chachajj qorpachasiñakwa munapjje, janiw jupan ukarojj jan wali amtamp sarapkiti. Ukampis uka chachanakajj khitinakasa uk Rahab warmejj amuyiwa.

Uka uñaqerinakajj israelitanakäpjjewa. Jericó markajj nuwasiñatak wakichtʼatäpjjeti janicha ukanak yatjjatapjjañapatakiw Josué chachajj khitäna. Canaán markatjja, Jericó markaruw israelitanakajj nayraqat tukjapjjani, inas uka markajj taqe markanakat sipans jukʼamp chʼamanïchïna. Josué chachajj kunanakans jupasa ukat jupamp chik  sarapkani uka chachanakas uñjasipjjaspa uk wal yatiñ munäna. Uka uñaqerinakajja, Rahab warmin utaparojj sum amuytʼasisaw sarapjjäna. Kunattejj ukanjja, yaqha markat jutïr aleq jaqenakjamakiw qheparapjjaspäna, janiw uñaqerïpjjatap khitis amuykaspänti. Ukat ukankasajj jaqenakan uka toqet parlirsa inas istʼapjjchispäna.

Rahab warmejj “khitatanakarojj utaparuw katoqäna” sasaw Bibliajj qhanañchi (Santiago 2:25). Uka pä chachajj khitinakäpjjänsa ukat kuna amtampis utapar sarapjjäna uk amuykchïnsa, janiw kamskänsa, utaparojj katoqaskakïnwa. Inas israelitanakan Diosapat jukʼamp yatiñ munchïna.

Ukat mä akatjamatwa Jericó markankir reyin khitatanakapajj purinipjje. Kunattejj Rahab warmin utaparuw uñaqerinakajj purinipjje sasin parlirwa istʼapjjatayna. ¿Kuns Rahab warmejj lurpachäni? Uka israelit chachanakar yanaptʼasajj ¿janit taqpach familiapar jan walin uñjasiykani? ¿Ukham luratapat janit taqenejj jiwarayatäpkani? Maysa toqetjja, uka chachanakajj khitinakapjjesa uk Rahab warmejj sum yati. Jupan diosapat sipans Jehová Diosajj jukʼamp chʼamanïtap amuychi ukhajja, ¿janit Jupar confiyañapajj wakiskaspa?

Kuns lurani uk sum amuyasiñatak janis tiemponïkchejja, jankʼakiw uñaqer jaqenakarojj uta terrasa patjjan lino sat alinak wañachat utjkän ukar imanti. Ukat reyin khitatanakaparojj akham siwa: “Cheqpachaw pani chachanakajj utajjaru purinipjje, ukatjja janirakiw nayajj yatkäyätti kawkit jutapjjatapsa; kunapachatï chʼamakthapjje ukhamaraki markan punkunakapajj niya jistʼantasiñampëjjan ukapachaw uka jaqenakajj sarjjapjje, janirakiw yatkti kawkiru sarapjjatapsa, ukampis jumanakatejj arktapjjasmajja inas jikjjatapjjchisma” sasa (Josué 2:4, 5). Uka jaqenakar uñkatasajj ¿kunjamakis Rahab warmejj jikjjataspachäna uk amuyasmati? Ukat reyin ¿khitatanakapajj jupan ajjsarayasitap amuyapjjpachäniti?

Kuntï Rahab warmejj siskän uk istʼasaw reyin khitatanakapajj Jordán jawira toqer tʼijsuwayapjje (Josué 2:7). Uk uñjasajj Rahab warmejj janiw llakisjjpachänti. Uka jaqenakarojj ukham sasakiw maysa toqer khitanuküna, jupanakan kunatï cheqäki uk yatipjjañapajj janiw wakiskänti. Ukhamatwa Jehová Diosan servirinakaparojj qhespiyäna.

Rahab warmejj jankʼakiw terrasar jalsuwayi ukat kuntï lurkäna ukwa uñaqer chachanakar yatiyi. Ukat Jericó markankirinakajj kunja sustjatäpjjesa ukat ajjsarañat wal khatatisipkatapsa yatiyarakiwa. Ukajj jupanakatakejj suma yatiyäwipuniwa. Canenonakajj Jehová Diosajj kunja chʼamanïkitï uk yatisajj wal ajjsarayasipjje. Ukatjja, Rahab warmejj akham sarakïnwa: “Jumanakan [Jehová] Tatitu Diosamasti pachpakïskiwa alajjpachansa ukhamarak akapachansa” sasa (Josué 2:11). Uka arunakajj jiwasatakejj wali wakiskiriwa. Cheqas kuntï Jehová Diosat istʼkäna ukanakaw Rahab  warmirojj Diosar confiyañ wakisitap amuyayäna. Ukatwa Jehová Diosar confiyasïna.

Jehová Diosajja, Israel markaparojj Jericó markar atipjañapatakejj yanaptʼaniwa sasaw Rahab warmejj taqe chuyma atinisïna. Ukatwa uñaqerinakarojj juparu ukat familiapar qhespiyañatak ruwtʼasïna. Uka mayitaparojj jupanakajj iyaw sapjjänwa, ukampis akwa phoqhañapäna: kunarutï jutapkäna uk janiw khitirus arsuñapäkänti ukat mä wila wiskhwa ventanapar warkkatañapäna, perqa anqäjj toqeru. Ukhamat jarkʼaqatäpjjañapataki (Josué 2:12-14, 18).

Bibliajj akham siwa: “Iyawsañajja istʼapjjatap laykuw utji” sasa (Romanos 10:17). Ukwa Rahab warmin sarnaqäwipajj iyawsäwi toqet yatichistu. Jehová Diosajj cheqapar uñjiri ukat kunja chʼamanisa ukanak istʼasaw Rahab warmejj Jupar confiyasïna. Jichhürunakanjja, Jehová Diosat yatjjatañatakejj walja yanapanakaw utji. Ukhamajj ¿Jupar sum uñtʼañatak chʼamachasiñäniti? Ukat kuntï Jupjjat Biblian yateqktan ukajj ¿Jupar confiyañatak yanaptʼistaniti?

Uñaqerinakan jankʼak jaltjjapjjañapatakiw Rahab warmejj ventanapat mä wila wiskha warktʼi, ukhamat perqnäm saraqasin qollunakar imantasir sarjjapjjañapataki. Jericó marka alay toqenjja, alto qollunakaw utji ukat ukanjja, walja putunakaw imantasiñatakjam utjaraki. Ukaruw uka uñaqer chachanakajj suma yatiyäwinak yatisajj campamentopar kuttʼañkamajj imantasipjjäna.

Uka qhepatjja, Jehová Diosajj mä milagro toqew Jordán jawiran umap saytʼayäna ukhamatwa markapajj waña oraqenjam makatapjjäna, uk istʼasajj Jericó markankirinakajj wal sustjasipjjpachäna (Josué 3:14-17). Ukampis ukanak istʼasajj Rahab warmejj jukʼampiw Jehová Diosar confiyi.

Jericó markwa israelitanakajj sojjta uru muytapjje, sapürojj may kuti muytapjje. Jichhajj paqallqöri uröjjewa, ukampis janiw yaqhürunakjam lurjjapjjeti. Kunjamtï aka yatichäwi qalltan siskayätanjja, wali alwatwa Israel markan ejercitopajj Jericó marka muytañ qalltapjje, ukat markar may kuti muytasajja, jan saytʼas muyusipkakiwa (Josué 6:15). ¿Kunats ukham lurapjjpacha?

Israelitanakan ejercitopajj ukürojj paqallq kutiw Jericó mark muytapjje ukat mä akatjamatwa saytʼapjje. Pututunakajj janiw phustʼasjjeti, ukat janiw kunas istʼasjjeti. Jericó markanjja wali sustjatäsipkiwa. Ukat Josué chachan satajj mä akatjamatwa israelitanakajj jachʼat artʼapjje. Uk istʼasajj Jericó marka perqanakap patankapkäna uka guardianakajj inas akham jisktʼasipjjchïna: “¿Ukhamakti israelitanakajj nuwasipjjerïpacha?” sasa. Ukspachaw Jericó markan perqanakapajj khatatisin qʼal allthaptjjäna. Ukampis uka perqanakat mä cheqajj janiw allthaptkänti, ukasti Rahab warmin utapawa. Jïsa, jupan iyawsäwinïtap laykuw utapajj jan allthaptkänti. Kunjamsa Jehová Diosajj juparusa ukat familiaparus qhespiyäna ¿uk amuyasmati?  * (Josué 6:10, 16, 20, 21.)

Jehová Diosan markapajj Rahab warmirojj iyawsäwinïtap laykojj respetapjjarakïnwa. Cheqansa, utapakiw jan allthaptkänti ukhamatwa israelitanakajj Jehová Diosajj jupampïskatap amuyapjjäna. Ukhamatwa Rahab warmisa ukat familiapasa uka jan wali markan tukjäwipat qhespipjjäna. Uka qhepatjja, Rahab warmejj israelitanakan campamentop jakʼanwa utjasjjäna, ukat tiempompejj israelitanakamp chikaw jakjjäna. Jupajj Salmón sat chachampiw jaqechasïna, wawapajj Booz satänwa, jupajj wali iyawsäwin chacharakïnwa. Qhepatjja, Moab markat jutïr Rut warmimpiw jaqechasjjäna (Rut 4:13, 22). * Cheqansa, David reyisa ukat Jesusas uka familiat jutirïpjjänwa (Josué 6:22-25; Mateo 1:5, 6, 16).

Jehová Diosatakejj taqeniw wali wakiskirïpjje, ukwa Rahab warmin sarnaqäwipajj yatichistu. Diosajj taqeniruw uñjistu, ukat kunas chuymasan utji uksa uñjarakistuwa. Ukat Rahab warminjam mä jukʼa iyawsäwinïtas Diosajj chuymasan uñji ukhajja, Jupajj wal kusisi. Rahab warmirojj iyawsäwipaw askinak lurañatak yanaptʼäna. Bibliajj jupat akham siwa: ‘Ukham luratapatwa Diosajj uka warmirojj askit katoqäna’ sasa (Santiago 2:25). Cheqas Rahab warmin iyawsäwipajj jiwasatakejj wali yateqaskayawa.