Betania jiskʼa markajja, Jerusalenat 3 kilometronak sarañankänwa ( Juan 11:18). Mä qawqha semananak Jesusan jiwañapatak faltaskäna ukhajja, uka markan mä jachʼa llakinwa jikjjatasipjjäna. Jesusan Lázaro sat amigopaw akatjamat usuntasin jiwjjäna.

Lazaron jiwatapat Jesusajj yatjjäna ukhajja, “Lázaro amigosajj ikiskiwa, ukampis nayajj sartayanïwa” sasaw arkirinakapar säna ( Juan 11:11). Jupanakajj kuntï Jesusajj siskäna uk janiw amuyapkänti, ukatwa jupajj “Lazarojj jiwatäjjewa” sasin qhana arumpi säna ( Juan 11:14).

Ukat Lazarojj pusi uru imatäjjäna ukhaw Jesusajj Betania markar purisin Lazaron Marta kullakapar chuymachtʼañatak thaqhäna. “Jumatejj akankasamänjja jilajjajj janiw jiwkasapänti” sasaw Martajj säna ( Juan 11:17, 21). Jesusasti uk ­satajj akham sänwa: “Nayätwa jaktañasa, jakañasa. Khititejj nayaru iyawsarakitu ukajja jiwatäkanisa, jakaniwa” sasa ( Juan 11:25).

Uka arunakapajj cheqätap uñachtʼayañatakejja, Jesusajj kawkhantï Lazarojj imatäkäna ukar jakʼachasisajj akham sasaw artʼäna: “¡Lázaro, mistunim!” sasa ( Juan 11:43). Uk satajj Lazarojj mistunïnwa, uk uñjasasti jaqenakajj wal muspharapjjäna.

Uka nayrajja, Jesusajj paniniruw jiwatat jaktayatayna. Jupanakat maynïrejj Jairo sat chachan phuchapänwa. Jupar jaktaykäna ukhajj ikiskiwa sasaw sarakïna (Lucas 8:52).

Uka paninir jaktaykäna ukhajja, ‘jupajj ikiskiwa’ sasaw säna. Kunattejj ikktan ukhajja, janiw kuns amuyjjtanti ukat janirakiw usjjestusa ni tʼaqhesjjtansa (Eclesiastés 9:5, “Jiwañajj ikimpi sasiwa” siski uka recuadro uñjjattʼäta). Jesusan nayrïri arkirinakapajj jiwatanakajj kunjamansa jikjjatasipjje uk sum amuyapjjäna. Mä librojj akham siwa: “Jesusan arkirinakapatakejj jiwañajj ikimpi sasikïnwa, ukat jiwatanakar imaski uka cheqajj taqe kunat samartʼañatakïkaspas ukhamänwa [...] Diosar jan jitheqtas servis jiwapkäna  ukanakatakejja” sasa (Encyclopedia of Religion and Ethics). *

Jiwatanakajj jan tʼaqhesipkatap yatiñajj wal chuymachtʼistu; jupanakajj kawkhantï imtʼatäpki ukanwa ikisipki. Ukhamajja, jiwatanakajj kunjamäsipkisa uk sum yatjjasajja, janiw ajjsarjjtanti.

Arumanakajj taqeniw sum samartʼañ muntanjja, ukampis ¿wiñay ikiskakiñ munsnati? ¿Lázaro chachjama ukat Jairo sat chachan phuchapjamat jiwatanakajj jaktanipjjpachäni?

Job chachajj jiwirjamäjjän ukhajj akham sasaw jisktʼasïna: “¿Mä jaqesti jiwjjasinjja wasitat jaktanjjaspati?” sasa (Job 14:14).

Taqe chʼamani Diosampi parlkasajj jupa pachpaw jisktʼapar akham sasin qhanañchasïna: “Jumatejj jawsitasmajja, nayajj jaysarakirismawa; munasiñampiw uñtanitasmajja, jumajjay nayaru uskuschistajja uka layku” sasa (Job 14:15). Diosat jan jitheqtir Job chachajja, Jehová Diosajj jupar jaktayañ wal munatap sum amuyäna. Ukham amuyasajj ¿jupa pachpati sallqjasiskäna jan ukajj engañjasiskäna? Janiwa.

Jesusan jiwatanakar jaktayatapaw Diosajj jupar jiwatanak jaktayañapatak chʼam churatap qhan uñachtʼayistu. Uka toqet Bibliajj akham siwa: ‘Jesusaw jiwañan llavep katu’ sasa (Apocalipsis 1:18). Ukhamajja, Jesusajj uka llavempiw sepulcron punkup jistʼarani, kunjamtï Lazaron imäwipat qala ateqaykänjja ukhama.

Bibliajj kutin kutiniw jiwatanakajj jaktanjjapjjaniwa sasajj qhanañchi. Mä angelajja, akham sasaw Daniel profetar säna: “Samartʼarakim, qhepa urunakanwa sartasjjarakïta, kunatejj waktʼkätam uka katoqañamataki” sasa (Daniel 12:13). Ukat jiwatat jaktañar jan iyawsir saduceonakan pʼeqtʼirinakaparojj Jesusajj akham sänwa: “Jumanakajj wali pantjatäpjjtawa, Qellqatanaksa ukhamarak Diosan chʼamapsa jan uñtʼapjjatam layku” sasa (Mateo 22:23, 29). Ukat apóstol Pablojj akham sarakïnwa: “Diosar[uw] iyawsas suytʼaskta, jiwatanakat ñanqha jaqenakansa, aski jaqenakansa jaktañapjja” sasa (Hechos 24:15).

¿Kunapachas ñanqha jaqenakasa ukat aski jaqenakas jaktanjjapjjani? Kunjamtï angelajj Daniel profetar siskänjja, “qhepa urunakanwa” jaktanipjjani. Martajj ukhamarakiw Lázaro jilapan ‘qhepa urun jiwatat jaktaniñap suytʼaskäna’ (Juan 11:24).

Bibliajj “qhepa uru” sasinjja, Jesusan apnaqäwiparuw uñtayi. Apóstol Pablojj akham sarakïnwa: “Cristojj reinañapawa Diosajj taqe uñisirinakapar [...] atipjaykani ukkhakama. Qhepïri uñisiristi jiwañawa, ukas qʼala tʼunjatarakïniwa” sasa (1 Corintios 15:25, 26). Ukatwa Diosan Reinop jutañapa ukat munañap aka Oraqen phoqasiñapatak mayiñajj wali wakiskirejja. *

Diosajj jiwatanaka r jaktayañjja wal muni, Job chachajj uk sum yatïna. Uka uru purinkani ukhajja, jiwañajj chhaqtayatäjjaniwa ukat janipuniw khitis akham sasin jisktʼasjjaniti: “¿Jiwañaruti taqe kunas tukusjjpacha?” sasa.