Templon qollqe uchañanakajja, Patio de las Mujeres sasin uñtʼatäkäna uka cheqankänwa. Mä librojj akham siwa: “Atrio sasin uñtʼatäkäna ukajj pilaranakampi muytayatänwa, ukat perqa jakʼanakanjja 13 cofrenakaw (qollqe uchañanaka) ‘trompetar’ uñtasit utjäna. Ukaruw qollqe uchapjjerïna” (El templo: su ministerio y servicios en tiempos de Jesucristo).

Uka cofrenakarojj trompeta sasinwa uñtʼasïna, kunattejj juchʼus kunkanïnwa ukat aynachäwjajj añchorakïnwa. Sapa mayninwa kuna kasta ofrendas uchasiñapäna ukajj qellqkatatäna. Ukat uka qollqejj kunayman lurañanakatakiw irtasïna. Jesusajj ukawjankkasaw mä viuda warmiru ukat yaqhanakar qollqe uchaskir uñjäna (Lucas 21:1, 2).

Ukat 1, 2 cofrenakajja, templot uka marata ukat uka pasïr marat impuesto pagañatakïnwa. Ukat 3-7 cofrenakasti qhorukutunaka, palomanaka, lawanaka, incienso ukat qori vasonak alañatakïnwa. Ukat sacrificio loqtirejj ofrendap alasin qollqep jiltʼkän ukjja, maynïr cofrenakaruw uchjjäna. Ukat 8 cofrerusti, jucha luratat ofrendat jiltʼkän uka qollqwa uchapjjerïna. Ukatjja, 9-12 cofrenakarojj jan amuyasisin jucha luratat ofrendanakata, jamachʼi loqtañ ofrendanakata, nazareonakata ukat lepra usut qollasjjapjjäna uka ofrendanakat jiltʼkäna uka qollqwa ukar uchapjjerïna. Ukat 13 cofrerojja, qawqhtï maynejj chuymapan amtkäna ukwa ukar uchapjjerïna.

Lucas chachajj Bibliankir pä libronakwa qellqäna: Lucas ukat Hechos libronaka. Jupa pachpaw akham säna: “Wali amuyumpi[w] taqe ukanakatjja qalltatpacha suma yatjjatta” sasa (Lucas 1:3). Ukhamajj ¿Lucas libro qellqerejj confiykayäpachati?

Lucas chachan qellqatapajj cheqätap sum yatjjatasispa. Roma imperion pʼeqtʼirinakarojj kuna sutiñchanakampis uñtʼatäpjjäna uk sum qhanañchi, sañäni: Filipo markankirinakarojj juezanaka, Tesálonica markankirinakarojj jilïrinaka, ukat Éfeso markankirinakarojj autoridadanaka (Hechos 16:20; 17:6; 19:31). Ukat Herodes Antipas chachatjja, “Galilea apnaqeri” siwa, ukat Chipre marka pʼeqtʼiri Sergio Paulo chachatjja, ‘jilïrinwa’ sarakiwa (Hechos 13:1, 7).

Lucas qellqerejj uka sutiñchanakjja yäparuw apnaqäna, kunattejj Roma Imperion sapa kutiw mayjtʼirïna. Biblia toqet yatjjatat mä chachajj akham sänwa: “Hechos libron apnaqaski uka sutiñchanakajja, kuna cheqatsa ukat kuna tiempotsa parlaski ukajj walja cheqanakanwa qhan amuyasi” sasa (Bruce Metzger). William Ramsay sat arqueólogo chachajja, Lucas qellqerit akham siwa: “Sarnaqäwi toqet mä suma qellqeripuniwa” sasa.