¿YATIYÄTATI?

¿Biblian áloe toqet parlki ukajj kunänsa?

Mä qʼapkir qollänwa, ukampiw isinakarusa ikiñanakarus uchasirïna (Salmo 45:8; Proverbios 7:17; Cantar de los Cantares 4:14). Uka qʼapkir qollajj áloe sat lawatwa apsusirïna (Aquilaria uka kasta qoqar uñtatawa), ñusantjje ukhajja, suma qʼapkir aceitew ukat mistu. Ukat uka aceitemp chʼachʼantat maderanakjja, kʼiyjasaw aljapjjerïna.

Israel markan carpanak utjkän ukanakarojja, ‘Jehová Diosan ayruntat áloes’ ukar uñtasitawa sasaw Bibliajj qhanañchi (Números 24: 5, 6). ¿Kunatsa ukar uñtayaspachäna? Kunattejj uka áloe lawajj 30 metronakanïnwa ukat walja laphinakanirakïnwa. Jichhajj uka áloe qoqajj janis Israel markan utj-jjchejja, Bibliat parlir mä diccionariojj akham siwa: “Biblia qellqaskäna uka tiemponakanjja, uka áloe qoqasa ukat yaqha ukham jan uñtʼat qoqanakas Jordán sat cheqan utjapunpachänwa” sasa.

Jerusalén templon ¿kuna kasta ofrendanakas loqtasirïna?

Diosan leyinakaparjamajj kuna sacrificionakatï templon loqtasiñapäkän ukanakajj sumäñapänwa. Diosajj janiw jan wali ofrendanak katoqerïkänti (Éxodo 23:19; Levítico 22:21-24). Nayrïr patak maranakan jakir Filón sat mä judío qellqerin aruparjamajja, sacerdotenakajj sacrificiot loqtasiñapäkäna uka uywanakjja, “pʼeqet kayukamaw uñakipapjjerïna”, ukhamatwa kʼumaräskiti janicha uk yatipjjerïna.

Biblia toqet yatjjatir E. P. Sanders sat chachan arsutaparjamajja, “kawkïr animalanakatï sacerdotenakan uñakipatapkän ukanakakiw templon aljasirïpachäna. Ukhamaspän ukhajja, uywa aljirejj uywan kʼumaräskatap uñachtʼayañatakejj mä qellqatwa churañapäna”.

Khä 2011 maranjja, arqueología toqet yatjjatirinakajj templo jakʼanakan mä qellqatwa jikjjatapjjatayna. Ukajj qollqer uñtasit ñeqʼet lurat mä sellönwa, uka sellojja pataka nayra pacha maranakat 70 jichha pacha maranakatawa. Ukanjja, arameo arut pä aruw uñsti uka arunakajj akhamwa jaqokipasi: “Diosatak qʼomawa” sasa. Ukampis maynïr arojja, “Jah” siwa, ukjja Jehová Diosan sutip lantiw uchapjjerïna. Amuyatajj uka templon irnaqerinakaw sacrificiot loqtasiñapäkäna uka uywanakaru jan ukajj achunakar uka sello uchapjjerïpachäna.