Nayrïr yatichäwin parlaniwayktan uka Naoko sat warmejja, ¿kunjamatsa pitañ jaytatayna? Jupajj akham siwa: “Kuntï Diosajj amuyki ukat kunjam Diosäkitï uk yatjjatañaw yanaptʼawayitu” sasa. Yateqawayki ukajj Bibliankiwa. Biblian cigarro (tabaco) arojj janis utjkchejja, cigarro fumañat * Diosajj kamsisa uk qhanañchiwa. Waljanejj Bibliat yatjjatasaw jan pitjjapjjeti, pitañs jan qalltapkiti (2 Timoteo 3:16, 17). Cigarrojj kunjamsa jaqer jan waltʼayi uk kimsa uñjañäni, ukat Bibliajj kamsisa uksa yatjjatarakiñäniwa.

Cigarrojj nicotina sat droganiwa, ukajj mayni droganakat sipans jukʼamp vicio katuyi. Nicotinajj chʼamanjam tukuyi, ukat aynachtʼayarakiwa. Maynejj cigarro fumi ukhajja, nicotinajj mäkiw lejjwir (lajjwir) makati. Sapa kuti cigarro muktʼasajja, qawqhatï cigarron nicotinajj utjki ukjpachampis maynejj qolljaskaspa ukhamawa. Maynitï mä urun cajetillpacha pitaspajja, 200 kutis nicotinampi qolljaskaspa ukhamäspawa, mayni droganakat sipansa jukʼamp jan waliwa. Cigarro fumirejj yatintjje ukhajja, ukak munaski, jan pitjjasajj cuerpopas usjjewa.

Bibliajj uka toqet akham amuytʼayistu: “Jumanakajj wal yatipjjtajja [...], mä esclavojj mä patronaru serviñataki katuyasjjchi ukajja, patronaparojj istʼañapawa” sasa (Romanos 6:16). Maynejj amuyupansa, luratapansa pitañak munaski ukhajja, mä esclavorjamaw uka viciojj katuntjje. Ukampis Jehová * Diosajja, kunatï cuerposar qʼañuchkaspa ukampejj janiw mä esclavorjam katuntayasiñas munkiti, kunatï chuymas mayjtʼaykaspa ukanakatsa jarkʼaqarakistuwa (Salmo 83:18; 2 Corintios 7:1). Maynitï Diosar munaschi ukat respetchejja, Diosarojj sumäkis ukpun churañ muni, ukampis pitañar yatintatäsajj janiw uk lurkaspati. Uk amuyañaw cigarro fumañ jaytañatakejj yanaptʼi.

Alemania markankir Olaf chachajj 12 maraniruw pitañ qalltatayna, ukampis 16 maranakatwa uka vicio jaytjjatayna. ‘Mä cigarrojj janiw kuns kamachkitaniti’ sasaw qalltan amuyäna. Ukampis walja maranakatjja janiw jaytirjamäjjänti. Jupajj akham siwa: “Mä kutejja janiw cigarrojj utjjetänti, ukhamïpansti wal mayjtʼasiyäta, ukat cigarro qhellanak taypit puchunak apsusaw mä periodicoru cigarror uñtat llawuntta. Uk amtasajj wal phenqʼasta” sasa. ¿Kunjamatsa uka vicio jaytjjäna? Jupajj saskakiwa: “Diosampi askit uñjatäñ wal munayäta. Jupajj wal munasistu, jutïritakis mä suma suytʼäwi churistu, ukanakat lupʼisaw cigarro fumañ jaytta” sasa.

“Pitañajj cuerppacharuw jan waltʼayi, ukat walja usunakampiw usuntayi ukat waljaniruw jiwayaraki, sasaw yatjjatat cientificonakajj sapjje” (The Tobacco Atlas qellqatarjama). Cigarro fumañajj cáncer usu apantirïtapa, chuymarus pulmonarus jan waltʼayirïtap taqeniw yatipjje (uka usunakajj janiw maynir piykataykiti). Ukampis OMS organizacionajja, pitasaw jila parte jaqenakajj tuberculosis usumpi usuntapjje sasaw qhanañcharaki.

Diosajj Biblia toqew kunjamsa jakäwissa, cuerpossa, amuyussa uñjañasa uk qhanañchistu. Uka toqet Jesusajj akham sänwa: “[Jehová] Tatit Diosamaruw munäta taqe chuymamampi, taqe almamampi, taqe amuyumampiraki” sasa (Mateo 22:37). Diosajj jakäwissa ukat cuerpossa respetompi uñjañaswa muni. Ukat kunjam Diosasa, kuna amtanisa ukanak jukʼat jukʼat yateqasajja, kuntï Jupajj jiwas layku lurawayki uk jukʼamp askit uñjtanjja. Ukat ukaw jan waltʼaykistaspa ukanakat jitheqtañatak yanaptʼarakistu.

India markankir Jayavanth sat doctorajja, 38 maranakaw cigarro fumatayna. Jupajj akham siwa: “Doctoranakan revistapan liytʼasajja, pitañajj jan waltʼayirïtap sum yatjjatayäta. Cheqas pitañajj jan walïtapjja sum amuyayäta. Ukat qollayasipkit ukanakarus pitañ jaytjjañamawa sirïtwa, ukampis nä pachpajj janiw jaytirjamäkäyätti, mä phesqa jan ukajj mä sojjta kutiw inak chʼamachasiyäta” sasa. ¿Kunas uka vicio jaytañatak yanaptʼpachäna? Jupajj akham siwa: ‘Bibliat yatjjataña ukat Diosampi askit uñjatäñ munañaw uka vicio jaytañatakejj yanaptʼawayitu’ sasa.

Cigarro fumirejj samski uka jewqʼesa, ukat cigarro jewqʼesa jan walipuniwa. Jan pitirinakarus cáncer usumpi ukat yaqha usunakampiw apantaspa. Sañäni, sapa marajj 600.000 ukhaniruw cigarro jan fumirinakarojj uka jewqʼejj jiwayi, ukanakat jila partejja, warminaka ukat wawanakäpjjewa. OMS organizacionajja, akham siwa: “Taqeniw cigarro jewqʼe muktʼapjjtanjja, uka jewqʼejj taqe cheqanwa utji” sasa.

 Diosaruw munäta ukat “jaqe masimarusti juma kipkarjam munarakim” sasaw Jesusajj säna, ‘jaqe masimaruw munäta’ sasinjja, familiaranakasaru, amigonakasaru ukat taqe jaqenakar munañatwa parlaskäna (Mateo 22:39). Jiwasatï mayninakar jan waltʼayir vicio jan jaytkañäni ukhajja, Jesusan uka mandamientoparojj janiw istʼktanti. Cheqas munasiñaw Bibliankir aka ewjjtʼar istʼañatakejj yanaptʼistani: “Jaqe masisan askïñap munañasawa, janiw jiwasan askïñasakti munañasäkejja” (1 Corintios 10:24).

Armenia markankir Armen sat chachajja, akham siwa: “Familiajajja, ‘jan pitjjamti jan waltʼayasipkistawa’ sasaw wal rogapjjetäna. Ukampis aleqataks parlapkitaspa ukham amuyayäta” sasa. ¿Kunas uka vicio jaytañ yanaptʼpachäna? Jupajj saskiwa: “Diosar munasiña ukat Bibliat yateqatäjaw pitañ jaytañatakisa ukat cigarro fumasajj nä pachpasa, familiajarusa ukat yaqhanakarus jan waltʼayaskatäj amuyañatakis yanaptʼawayitu” sasa.

Olaf, Jayavanth ukat Armen sat chachanakarojja, cigarro fumañaw jupanak pachparusa, familaranakaparus jan waltʼayaskäna. Ukampis Bibliat yatjjatasaw uka vicio jaytjjapjjäna. Janiw ukakejj yanaptʼkänti, jan ukasti Jehová Diosaruw munasipjjäna ukat kusisiyañwa munapjjarakïna. 1 Juan 5:3 qellqatanjja, akham siwa: “Diosar munañajja mandamientonakar phoqhañawa; mandamientonakapasti janirakiw jan phoqhañjamäkiti” sasa. Biblian aski yatichäwinakaparjam sarnaqañajj chʼamakiwa, ukampis jiwasatï Diosar munasiñänejja, ukarjam sarnaqañajj janiw sinti chʼamäkaniti.

Oraqpachan Bibliat yatichasiski uka toqew Jehová Diosajj millón millón jaqenakar cigarro jan fumapjjañapatak yanaptʼaski (1 Timoteo 2:3, 4). Akapachanjja, cigarro luririnakajj qollqechasiñ laykojj waljaniruw cigarro fumapjjañapatak mä esclavorjam katuntayapjje. Ukampis Jehová Diosaw Reinop toqejj ukanak jan mayampitak chhaqtayjjani, uka Reinon pʼeqtʼiripajj Jesusawa. Ukat jupaw suma chuyman jaqenakar kʼumara jakasipjjañapatakejj yanaptʼani (Isaías 33:24; Apocalipsis 19:11, 15).

Cigarro fumañ jan jaytirjamäkstajja, jaytañatak chʼamachasiskakim. Jehová Diosar munasiña ukat kuntï Jupajj cigarro fumañ toqet amuyki ukanak yateqañaw uka vicio jaytañatakejj yanaptʼätam. Jehová Diosan Qhanañchirinakapasa, Biblian aski yatichäwinakaparjam sarnaqañamatakis yanaptʼapjjarakïtamwa. Jumatï Diosaru uka vicio jaytañatak yanaptʼa mayïtajja, Jupajj taqe chuymaw yanaptʼätam (Filipenses 4:13).