“DIOSAJJ ajayuwa” janiw jaqenakajj uñjapkaspati (Juan 4:24). Ukampis mä qawqhanejj Diosar uñjapjjänwa siw Biblianjja (Hebreos 11:27). ¿Kunjams uñjapjjpachäna? ¿Cheqapunit “jan uñjkay Diosa[r] uñjsna”? (Colosenses 1:15.)

Kunjamsa jikjjatastan uk sum amuyañatakejja, nacïwitpach juykhüki uka jaqet parltʼañäni. Juykhütap laykojj kunanakatï jupa jakʼan utji ukanakat amuyarakispawa. Jupajja, kunayman toqetwa jaqenakarusa ukat kunatï jupa jakʼan utjki ukanakarus amuyaspa. “Janiw nayrampipunejj uñjktanti, jan ukasti amuyusampiw uñjaraktanjja” sasaw mä juykhojj säna.

Diosar janiw cheqpach nayranakasamp uñjksnati, ukampis ‘chuymasan nayranakapampejj’ uñjsnawa (Efesios 1:18, NM). Kunjamatsa Jupar uñjsna uk kimsa toqet yatjjatañäni.

Juykhunakajja, jukʼamp sum istʼapjje ukat llamktʼasas jankʼakiw sum amuyapjjaraki. Jiwasajj Diosan luratanakapjja, ukhamarakiw uñjasa, muktʼasa, istʼasa, manqtʼasa ukat llamktʼasa sum amuyaraksna. “[‘Diosajj kunjamäkitï ukjja’, NM] luratanakap toqew uñachtʼayasi. Qhanpachwa uñachtʼayasi kunapachatejj aka oraqejj luratäkäns ukürutpacha.” (Romanos 1:20.)

Oraqet amuytʼañäni. Janiw aleq jakañatakik luratäkiti, jan ukasti kusisita jakañatak luratawa. Mä jukʼa thayan thaytʼanitapasa, lupin luptʼanitapasa, mä mojjsa fruta manqʼañasa, jamachʼinakan cantatapasa taqeniruw kusisiyistu. ¿Janit ukanakajj Diosajj wajjtʼasirïtapa, munasirïtapa uñachtʼayki?

Alajjpach uñtasajj ¿kamsaraksnasa? Alajjpachajj Diosan chʼamapwa uñachtʼayi. Jichhak mistki uka yatiyäwinakarjamajja, alajjpachan utjki uka galaxianakajj jukʼampi ukat ratukiw jupanakkamajj jayarstʼasisipki. Arumanak alajjpach uñtasajj akham jisktʼassna: “¿Kuna chʼamampis ukham jayarstʼasisipki?” sasa. Bibliajj taqe kun Luriri Diosan ‘chʼamapajj wali jachʼawa’ sasaw qhanañchi (Isaías 40:26). Ukat taqe luratanakapanwa ‘jachʼa chʼamanïtapajj’ qhan uñachtʼayasi (Job 37:23).

Pä juykhu wawanakani mä taykajj akham siwa: “Yatichañatakejj jupanakar parljjayañaw wali askejja. Kuntï uñjktan istʼktan, kunatï pasaski ukanakwa yatiyañasa. Jiwasaw nayranakapätanjja” sasa. Niya ukhamarakiwa, ‘Diosarojj janiw khitis uñjkiti’, ukampis Jesusajj ‘Awkip jakʼan qontʼatawa’, jupaw Awkipajj kunjamasa uk qhanañchistu (Juan 1:18). Jesusarojj Diosaw jan khitin yanaptʼata nayraqat lurawayi ukat amigoparakiwa. Jesusajj ‘nayranakasäkaspas’ ukhamawa ukat jupakiw Diosajj kunjamasa uk qhanañchistaspa.

Jesusajj millón millón maranakaw Diosampejj jakasïna. Kunanaksa jupajj qhanañchäna uk uñjañäni:

• Jan qarjtasaw Diosajj trabaji. “Awkejjajj jichhakamaw irnaq[askaki].” (Juan 5:17.)

• Kuntï munktan uk Diosajj yatiwa. “Awkimajj janïr arsupktas ukkhaw yatjje kuntï jumanakajj mayipkäta ukjja.” (Mateo 6:8.)

• Kunanaktï munktan uk Diosajj wal churañ munistu. ‘Alajjpachankir Awkimajj taqenitakiw intsa  jalsuyani, aski jaqenakatakisa, jan aski jaqenakatakisa jallsa puriyaniraki.’ (Mateo 5:45.)

• Diosajj sapa mayniruw wali askit uñjistu. ‘¿Janit pä jamachʼis jukʼa qollqer aljaskejja? Ukampis janiw maynisa aka oraqerojj liweqtkiti jan Diosan munañapatjja. Jumanakan taqe ñikʼutanakamasa suma jaktʼatarakiwa. Ukhamasti jan ajjsarapjjamti, uka jiskʼa jamachʼinakat sipanjja wali jila alanïpjjtawa.’ (Mateo 10:29-31.)

Juykhunakajj sum uñjapki ukanakat sipanjja, mayjwa amuyapjje. Jupanakatakejj chʼiwejj janiw chʼiyartʼayatäkaspas ukhamäkiti, jan ukasti lupit jarkʼaqat mä suma cheqakïkaspas ukhamakiwa. Kunjamtï mä juykhojj lupirus chʼiwirus jan uñjkejja, ukhamarakiw jiwasajj jan khitin yanaptʼatajj Diosajj kunjamäkiti uk jan amuyksnati. Ukatwa, Diosajj kunjamäkiti Jupajj uk sum uñachtʼayañapatak mä chacharu khitaniwayi.

Uka chachajj Jesusanwa (Filipenses 2:7). Jupajj Awkipat parlawayistuwa ukat kunjamäkitï uksa uñachtʼawayarakistuwa. Mä kutejj Felipe sat arkiripajj akham sänwa: “Tata, Awkiru uñachtʼayapjjeta” sasa. Uk satajja, “khititejj nayar uñjkitu ukajj Awkirojj uñjarakiwa” sasaw säna (Juan 14:8, 9). Jesusan sarnaqäwipat yatjjatasajj ¿kunanaksa Diosat yateqsna?

Jesusajj munasiri, altʼat chuymani ukat jakʼachaskayänwa (Mateo 11:28-30). Taqeniw jupampïñ munapjjäna. Jaqenakar tʼaqhesir uñjasajj wal sinttʼasirïna ukat kusisitäpjjäna ukhajj kusisirakirïnwa (Lucas 10:17, 21; Juan 11:32-35). Jesusan sarnaqäwipat istʼasas liytʼasasa, cheqapunis uñjkasma ukham amuyañama. Ukat kunjamsa Jesusajj mayninakar uñjirïna ukanakat lupʼïtajja, Diosajj kunjamäkiti ukjja qhanwa amuyäta, ukat Jupa jakʼankkasmas ukham amuyasirakïta.

Kunanakatï utjki ukanak amuyañatakejj kunsa juykhunakajj lurapjje uka toqetjja, mä yatjjatatajj akham siwa: ‘Kunjamäkiti uk sum amuyañatakejja, kunayman toqetwa yanaptʼasipjje (llamktʼasa, muktʼasa, istʼasa, ukat yaqha ukhamanakampi), ukhamatwa sum amuyjjapjje’ sasa. Jiwasatï Diosan luratanakap amuytʼañäni, kuntï Jesusajj Awkipat siskän uk liyiñäni, ukat Diosajj kunjamäkiti uk kunjamsa Jesusajj uñachtʼayäna ukanakat yatjjatañänejja, jukʼamp sumwa Diosarojj uñtʼañäni. Ukat cheqapunis Jupar uñjksna ukham amuyañäni.

Job chachat amuytʼañäni, sarnaqäwipajj Bibliankiwa. Qalltanjja, ‘jan sum amuytʼasaw’ parläna (Job 42:3). Ukampis Diosan luratanakapat sum yatjjatasajja, akham sänwa: “Jumatjja mayninakan parlatap toqekwa uñtʼayäsmajja, ukampis jichhajj naya kipkaw jumarojj uñkatsma” sasa (Job 42:5).

Jumajj ukhamarakwa Diosat amuyasma. Jumatï Diosar thaqätajja, Jupajj “jikjjatayasïtamwa” (1 Crónicas 28:9). Jehová Diosan Qhanañchirinakapaw jan uñjkay Diosar uñtʼañamatak yanaptʼapjjerïstam.