Mä awkejj paqallqo marani wawaparojj akham siwa: “Diosaw Oraqsa ukat kunanakatï ukan utjki ukanaksa lurawayi, ukhatjja, jaya tiempöjjewa. Juparakiw Intsa, Phajjssa, warawaranaksa lurawayi” sasa. Wawapajj mä jukʼa lupʼisajja, akhamwa jisktʼi: “Papito... ¿khitis Diosar luri?” sasa.

“Janiw khitis Diosar lurkiti. Diosajj utjapunïnwa” sasaw awkipajj saraki. Uk satajja, wawajj kusisitakëjjewa. Jukʼamp jachʼäjje ukhajja, ‘¿kunjamarak Diosast utjapunïspänsti?’ sasin jisktʼasiskakiwa, janiw amuytʼirjamäkiti. Jan khitin luratajj ¿kunjamatsa Diosajj utjpachäna? Oraqes alajjpachasa maynin luratawa. Ukhamajja, “¿kunjamatsa Diosajj utjpacha?”

¿Bibliajj kamsisa? Kunjamtï awkejj wawapar siskänjja, uka pachpwa Bibliajj saraki. Moisesajj akham sasaw qellqäna: “[Jehová Dios] Tatay, [...] Qollunak janïr utjkipana, akapachas janïr utjkipana, wiñayatpacha, wiñayatakiw jumajj Diosätajja” sasa (Salmo 90:1, 2). Isaías profetajj ukar uñtasitarakwa akham säna: “¿Janit yatipktasti, janit istʼkta? Tatituw, wiñay Diosajja, aka oraqpacha lurirejja” sasa (Isaías 40:28). Ukat Judas qellqatanjja, ‘wiñayatpachwa’ Diosajj utjäna sasaw saraki (Judas 25, NM).

Uka qellqatanakajja, Jehová Diosajj “wiñay jachʼa Rey[ïtapwa]” uñachtʼayistu, apóstol Pablojj ukhamwa sarakïna (1 Timoteo 1:17). Ukhamajja, Diosajj qalltatpachsa utjapunïnwa. Jichhas utjaskakiniwa (Apocalipsis 1:8). Diosajj janiw qalltanïkisa ni tukuyanïkisa, janiw khitis Jupjamajj utjkiti.

¿Kunatsa uk amuyañajj chʼama? Jukʼa tiempokiw jakasktanjja, janiw Jehová Diosjamajj amuyksnati. Jupatakejj waranqa maranakajj mä urukïkaspas ukhamawa, kunattejj Jupajj utjapunïnwa (2 Pedro 3:8). Uk sum amuytʼañatakejj mä tʼiju tʼijut parltʼañäni. Tʼiju tʼijojj 50 urunakakwa jaki. Kunjamas 70 jan ukajj 80 maranak jakañajj uk ¿amuyaspati? Janiwa. Jiwasanakajj Dios nayraqatanjja, tʼiju tʼijunakjamakïtanwa sasaw Bibliajj qhanañchi. Jupajj wali jachʼa yatiñaniwa, nayraqatapanjja, janiw kunäktansa (Isaías 40:22; 55:8, 9). Ukhamïpansti kunjamäkiti Diosajj uk janiw taqpach sum amuyksnati.

Diosan wiñay utjatap amuyañajj chʼamäkchisa, ukampis ukajj cheqawa. Diosarutï maynejj luraspäna ukhajja, uka jaqew Lurirïspanjja. Ukampis Bibliajja, Jehová Diosaw ‘taqe kunsa ina chʼusat lurawayi’ sasaw qhanañchi (Apocalipsis 4:11). Qalltanjja, janiw alajjpachasa, oraqesa utjkänti, ukjja sum yattanjja (Génesis 1:1, 2). ¿Kunjamatsa utjawayi? Cheqas Luriripajj ukanakats nayraw utj-jjpachäna, janiw qhepatak utjkaspänti. Ukhamarakiw jilïr Yoqapatsa, angelanakapatsa nayra utj-jjpachäna (Job 38:4, 7; Colosenses 1:15). Diosajj janïr kunsa lurkäna ukhajja, sapapakïnwa. Juparojj janiw khitis lurkaspänti, kunattejj janiw kunas ni khitis utjkänti.

Kunjamatsa alajjpachasa, oraqesa utjawayi, jiwasas utjawaytan ukaw cheqapun wiñay Diosajj utjatap uñachtʼayistu. Khititï alajjpachsa, oraqsa onjjtayki ukat taqe kunas kunjamäñapasa ukataki leyinak uttʼäwayki ukajj wiñayatpachsa utjapunpachänwa. Jupakiw taqe jakirinakarus jakäwi churawayi (Job 33:4).