Sapa maraw millón millón jaqenakajj Navidad amtapjje. Uka urunakajj yaqhepatakejj familiampi, amigonakampi tantachtʼasiñatakïkaspas ukhamawa, yaqhepatakisti Diosat amtasiñataki ukat jaqenakar yanaptʼañatakirakiwa. Ukanakajj walikïskchisa, ¿kunatsa Navidad amtañajj jan walïkpacha?

‘Navidadanjja, Jesusan nasïwipaw amtasi’ sasaw waljanejj amuyapjje. Ukampis nayra sarnaqäwinakat walja yatjjatirinakajja, ‘kuna fechans Jesusajj nasïna ukjj janiw khitis yatkiti’ sasaw sapjje. “Nayrïr cristianonakajja, Jesusan nasïwipatak janiw mä fecha uñstayañ munapkänti”, jupanakajj “akapachan costumbrenakapat” jitheqtañwa munapjjäna sasaw mä librojj qhanañchi (The Christian Book of Why). Ukat Jesusajj nasiñ urunak amtirïnwa, nasïwipsa amtarakïnwa sasajj janipuniw Bibliajj siskiti. Antisas jiwatap amtapjjañapatakiw arkirinakapar ewjjtʼäna (Lucas 22:19).

Papá Noel, Navidad jiskʼa qoqa, regalonak churaña katoqaña, velanaka, villansiconaka, manqʼañanaka ukat yaqha ukhamanakasa, Diosar jan yupaychir jaqenakan uñstayatawa sasaw uka toqet walja yatjjattʼatanakajj sapjje. Católica Iglesia toqet mä qellqatajj akham siwa: “¿Jiwasanakat qawqhanis yattanjja, navidadan regalonak katoqañasa, churañasa ukat uta punkunakaru iglesia punkunakaparu coronanak uchañas Diosar jan uñtʼir jaqenakan uñstayatätapjja?” sasa (The Externals of the Catholic Church).

‘Uka costumbrenak amtañajj janiw kuna jan walïkisa’ sasin inas amuysta. Ukajj ukhamäspawa, ¿Ukampis Diosajj kamspachasa? Diosatakejj cheqpach religionajj janiw jan wali costumbrenakamp qʼañuchasiñapäkiti sasaw Bibliajj qhanañchi. Jan istʼasir israelitanakarojja, Amós profeta toqnamajj akhamwa säna: “Fiestanakamjja uñistwa, [...] qʼochunakamjja nayat jitheqayapjjeta” sasa (Amós 5:21, 23).

¿Kunatsa ukham sispachäna? Kunas pasäna uk amtañäni. Israel markankir Jeroboam reyejja, qorit lurat wakaqallunakwa Dan ukat Betel markanakan lurayäna. ‘Uka wakaqallunak toqnämaw Jehová Diosar yupaychapjjäta’ sasaw israelitanakar säna, ukhamat Jerusalén markar jan sarapjjañapataki. Janiw ukakïkänti, yaqha fiestanaksa uñstayarakïnwa, ukatakejj sacerdotenakwa uttʼayäna (1 Reyes 12:26-33).

Israelitanakan amtapajj inas walikjamächïna. Kunattejj Jehová Diosar yupaychañatakiw ukham lurasipkäna. Ukampis Diosajj kuntï Amós profetampisa ukat yaqha profetanakampis Israel markar siskäna ukajja, kunsa ukanakat amuyäna ukajj qhanänwa. Walja maranak qhepatjja, akham sasaw amtayarakïna: “Nayätwa [Jehová] Diosajja, nayasti pachpakïsktwa” sasa (Malaquías 3:6). Jichha tiemponjja, Jehová Diosan amtapajj pachpakïskiwa. Ukhamajj navidadan amtaski uka costumbrenak lurir uñjasajj ¿kunjamakis jikjjataspacha?

Taqe ukanak yatjjatasajja, walja millón jaqenakaw Navidad jan amtjjapjjeti. Antisas maran yaqha urunakanwa familiapampis, amigonakapampis kusisit tantachtʼasipjje, ukhamarak jaqe masiparus yanaptʼapjjaraki.