Bakú (Azerbaiyán) markan nasta, pä kullakanakatjja, sullkäkis ukätwa. Tatajajj musulmanäkchïnsa ukat mamajajj judiakchïnsa panipajj sum apasipjjäna. Wal munasipjjarakïna. Tatajajj ramadán phajjsin ayunäna ukhajja, mamajajj janiw jarkʼirïkänti, ukat Pascua purinirïna ukhajja, tatajajj janirakiw mamajar jarkʼirïkänti. Utanjja, Corán, Torá ukat Biblia kunaw utjapjjetäna.

Nayajj musulmanäkiristsa ukham amuyasiyäta. Diosan utjatapjja, creyiyätwa, ukampis akham jisktʼasiyäta: ‘¿Kunatsa Diosajj lurpachïstu? Niyakejjay maynejj jakkasajj tʼaqheschejja, ¿kunatsa infiernon tʼaqhesiskakpachäni?’ sasa. Kunanakatï paski ukajj Diosan munañapawa sasaw jaqenakajj sapjje, ukatwa ‘¿Diosat jakäwis apnaqpacha, tʼaqhestan ukhajj kusispachati?’ sasin lupʼirïyäta.

Nayajj 12 maranirojj namaz satäkis uka phesqa oracionanak sapüruw lurjjayäta. Ukhanakarakiw tatajajj judío escuelar kullakajampiru qellqayapjjetäna. Ukanwa hebreo aru ukat religionatsa yateqawayapjjta. Sapürojja, judionakan costumbrenakaparjamaw orapjjerïta. Utanjja, musulmananakjamaw orasirïta, escuelansti judionakan oracionanakapwa orapjjarakirïta.

Walja jisktʼaniyätwa, qhanañchäwip yatiñ wal munayäta. Escuelankir yatichirinakaruw (rabinos) kutin kutin akham jisktʼasirïta: “¿Diosajj kunatsa lurpachïstu? Tatajan musulmanätapatjja, ¿kunsa amuypacha? Jupajj suma jaqewa ¿kunatsa jan wali jaqew sapjjpacha? Jan wali jaqëchejja, ¿kunatsa Diosajj lurpachäna?” Mä jukʼa qhanañchapkitäna ukajj janiw yanaptʼkitänti.

2002 maranjja, Alemania markaruw jakasir sarjjapjjayäta, mä semanatjja, tatajaw usuntjjäna pʼeqepanwa venajj phallatayna ukat jan amuyuniw jikjjatasïna. Walja maranakaw familiajar uñjañapatakejj Diosar mayiyäta, Taqe chʼamani Diosakiw jakayasistaspa sasaw confiyasiyäta ukat sapürupuniw tatajar yanaptʼañapatak mayisirïta. ‘Niyakejjay Diosajj  chʼamanïchejja, istʼapunitaniwa’ sasaw sayäta, ukampis qhepatjja tatajajj jiwjjänwa. Ukanak uñjasajja, janiw Diosar confiyjjayätti.

Diosajja janis jiwasat llakiskaspa ukham amuyasajj aynachtʼataw jikjjatasiyäta. ‘Janich mayisiñ yatkpachäta jan ukajj Diosach jan utjkpacha’ sasaw lupʼiyäta. Pächasisajj janiw mayisjjayätti. Janirakiw yaqha religionanakan yatichäwipas chuymar purtʼkitänti, ukhamïpansti Diosajj janiw utjkiti sasaw amuyjjayäta.

Sojjta phajjsitjja, Jehová Diosan Qhanañchirinakapaw visittʼapjjetu. Cristianonakajj pantjatäpkaspas ukham kullakajampejj amuyapjjayäta, ukatwa amuyasipjjañapatakejj munasiñampi akham jisktʼapjjta: “Tunka mandamientonakanjja, janiw idolonakarusa, crusarusa, Jesusarusa ni Mariarus yupaychapjjätati sasaw qhanañchi, ¿kunatsa cristianonakajj yupaychapjje?” sasa. Cheqpach cristianonakajja, janiw idolonakaru yupaychapjjañapäkiti, ukat Diosarukiw orañasa sasaw Bibliampi qhanañchapjjetu. Ukajj wal muspharayitäna.

“¿Ukat Trinidadasti? Jesusatï Diosächejja, ¿kunjamarak Oraqer jutaspänsti ukat jiwayatäspänsti?” sasaw jisktʼapjjta. “Jesusajj janiw Diosäkiti ni Diosjamäkisa, ukatwa nanakajj Trinidadar jan creyipkti” sasaw wasitat Bibliampi qhanañchapjjetäna. Wal muspharayäta. ‘¡Mayja cristianonakäpjjewa!’ sasaw sayäta.

Ukampis ¿kunatsa jaqejj jiwi, kunatsa Diosajj tʼaqhesiñ jan tukjkpacha? sasin jisktʼasiskakiyätwa. Jupanakajj El conocimiento que lleva a vida eterna, * sat libro uñachtʼayapjjetu, ukanwa uka jisktʼanakar sum qhanañchäna. Ukat jankʼakiw Bibliat jupanakampi yateqañ qalltawayta.

Sapa kuti yatichapkitäna ukhajja, Bibliampipuniw jisktʼanakajar qhanañchapjjetäna. Diosajj Jehová satätapa ukat wali munasir Diosätapwayateqawayta (Salmo 83:18, NM; 1 Juan 4:8). Diosajj jiwasanakan jakañasjja munarakïnwa, ukatwa lurawayistu. Ina chʼusat tʼaqhesiñanak janis chhaqtaykchejja, uñisiwa ukat niyaw tukj-jjarakini, uksa amuyjjarakiyätwa. Adanampi Evampi juchachasitap layku jan waltʼäwinak utjatapsa yateqarakiyätwa (Romanos 5:12). Uka jan waltʼäwinakat mayajja, munat familianakas jiwki ukawa. Ukampisa, Diosan arsutaparjamajj Paraisonjja, taqe kunanakatï tʼaqhesiykistu ukanakajj chhaqtjjaniwa, jiwatanakas jaktanipjjarakiniwa (Hechos 24:15).

Bibliaw jisktʼanakajar qhanañchawayitu. Ukat wasitampiw Diosarojj confiyjjayäta. Jehová Diosan Qhanañchirinakapar jukʼampi uñtʼjjasajja, mä wawaki jakasipjjatapa ukat jan yaqhachasipjjerïtap uñjayäta. Jupanakajj maynit maynikamaw munasiñampi uñjasipjjäna, ukajj wal muspharayitäna (Juan 13:34, 35). Kunanaktï Diosat yateqkayäta ukajj Jupar serviñatakiw chʼamañchawayitu, ukatsti Jehová Diosan Qhanañchiripäjjañatakiw amtawayta. Ukat enero 8, 2005 maranwa bautisasjjta.

Biblian yatichäwinakapaw yanaptʼawayitu, jichhajj janiw nayrjam amuyjjti, kusisitakiw jakasjjta. Diosaw tatajar jaktayani, uk yatiñajj wal chuymachtʼitu ukat kusisiyarakituwa (Juan 5:28, 29).

Diosar taqe chuyma serviri Jonathan esposojampejj sojjta maranakaw jakasjjapjjta. Panpachaniw Diosan Arupajj cheqätapa, amuytʼañas jan chʼamätapa ukat wali valoranïtap yateqawayapjjta. Ukjja, jaqenakar wal yatiyañ munapjjta, kuna suytʼäwitï utjki taqe ukanaksa yatiyañ munapjjaraktwa. Jehová Diosan Qhanañchirinakapajj cheqpach cristianonakäpjjatap jichhaw sum amuyjjta.