Jupajj parálisis cerebral sat usuniwa nasiwayi, ukajj cuadriplejía espástica sasin uñtʼatawa. * Ukatwa cuerpop jan onjjtayirjamäkiti. Niyakejjay lejjwipat usutächejja, amparanakapas kayunakapas janiw apnaqayaskiti. Awisajj mä akatjamatwa thalarasi ukat usuchjasjje kunawa. Jakʼapankirinakas jan amuyasipkaspa ukhajj usuchjatäpjjaspawa. Jan ukanak pasañapatakejj silla de ruedaruw amparanakapa kayunakap sapa kuti ñachʼantapjjerïta.

Jairojj tʼaqhesisaw jilsuwayi. Kimsa phajjsinïkän ukhatpachwa tʼukhu usunjam khatatiñ qalltjjäna, ukajj jan amuyunwa jaytirïna. Mamitajajj walja kutiw hospitalar jankʼaki apirïna jiwatäjjpachaw sasa.

Ankunakap jan sumäjjatap laykojja, chʼakhanakapajj wejjrurnukstjjänwa. 16 maranirojja, caderan ukat cinturan utjki uka chʼakhanakap onjjtayasitap laykuw operayasïna. Jairojj ukanakat waliptkasajja, kunjamsa arumanakajj wararirïna uk jichhakamas amtaskaktwa.

Uka usunïtap laykojja, jilajajj taqe kunatakiw maynin yanaptʼap muni, manqʼañatakisa, isthapisiñatakisa jan ukajj ikintjjañatakisa. Awk taykajaw jila partejj yanaptʼapjje. ‘Ukampis janiw yaqhanakan yanaptʼapakejj munaskiti Diosan yanaptʼapaw munasi’ sasaw jupar sapa kuti amtayapjje.

Niyakejjay awk taykajajj Jehová Diosan Qhanañchiripäpjjchejja, Jairojj jiskʼaskäna ukhatpachwa Biblian qellqat sarnaqäwinakat liyirapipjjerïna. Diosatï amigosächejja jakañajj sumakiwa uk yatipjjatap laykuw jilajarojj usutäkchi ukasa, suma suytʼäwit yatichapjjerïna. ‘Bibliat yateqakiniti janicha’ sasaw sapa kuti jisktʼasipjjerïna.

Mä urojja, akham sasaw tatajajj säna: “¡Jairo, mirä ampsuma parltʼita! Munaschistajja, parltʼitätawa” sasa. Ukjpachaw Jairon nayranakapat jachajj jalaranïna. Wal arsuñ munaskäna, ukampis inakiw yanäna. Tatajajj ukham jachayasajj walpun chuymap chʼalljjtayasïna. Ukampis kuntï siskäna uk amuyaskatap yatjjäna.

 Awisajj nayranakap ratuk onjjtirwa awk taykajajj amuyapjjäna. Kuntï amuyki, kunjamtï jikjjataski uk nayrapampis “sañ” munkaspa ukhamänwa, jan khitis amuyjje ukhajja, jan kun kamachtʼirjamaw uñanaqasirïna. Awk taykajajj kuntï Jairojj nayranakapampi sañ munki uk amuyapjjeri ukat kuntï mayki uk churapjjeri ukhajja, kusisitaw uñkattʼiri. Ukhamwa yuspärirïna.

Arsuyañ toqet yatjjatat mä qollirejja, ‘Jairompi sum parlañatakejj jïsa jan ukajj janiwa sañjam jisktʼanak lurapjjam ukat nayraqatapar paypach amparanakam uskupjjam, ukhamatwa jïsa sischi ukhajj kupi ampar toqer uñtani, janiwa sischi ukhajj chʼeqa ampar toqer uñtani’ sasaw ewjjtʼapjjetu.

Jehová Diosan Qhanañchirinakapajj maran kimsa kutiw jachʼa tantachäwinak lurapjje, ukarojj walja jaqenakaw sarapjje. Jairojj bautisasirinakataki mä arstʼäwi arstʼaski ukhajj wal kusisiri. Mä urojja, 16 maranïskän ukhajj tatajaw akham jisktʼi: “Jairo, ¿bautisasiñ jumajj munaraktati?” sasa. Uk satajj jankʼakiw tatajan kupi amparap toqer uñti. Ukat akham jisktʼaraki: “¿Wiñayaw loqtañ munsma sasinti Diosarojj mayista?” sasa. Uk satajj ukhamarakiw jankʼak tatajan kupi amparap toqer uñtaraki. Jairojj jakäwip Jehová Diosar katuyasjjataynawa.

Bibliat jupamp walja kuti parlasajja, bautisasiñ wali askit uñjatapaw amuyasjjäna. Ukatwa 2004 maran aka wakiskir jisktʼa jisktʼapjjäna: “¿Jehová Diosan munañap phoqañataki jakäwim Jupar katuyasiwayjjtati?” sasa. Uk jisktʼatajja, alayaruw uñtäna, jupatï jïsa sischïn ukhajj ukham uñtañapäna. 17 maranirojja, bautisasjjänwa ukat Jehová Diosan qhanañchiripäjjänwa.

Ukat 2011 maranjja, Jairojj ordenador sat computador toqew maynimpi parljjaraki, ukajj nayramp uñkatas apnaqañawa. Nayrasan iris sasin uñtʼatäki ukaruw ukajj arknaqe ukat pantallan icono sasin uñtʼat utjki ukanakat kawkïrsa naktayakispawa. Nayra chʼipjjti jan ukajj mä iconor cheqak uñkati ukhajja, chʼetjjtaykaspas ukhamawa. Jupatakejj kunayman icononakan mä pantallwa wakicharapipjje, ukhamat maynimpi parlañapataki. Ukajj qellqat arunakjja, parlarapiwa.

 Jairojj Bibliat jukʼamp yatjjataskakïnwa, yateqkän uksa wal yaqhanakar parlañ munäna. Familjama Diosar sapa seman yupaychapkta ukhajja, kuntï tantachäwin jisktʼanakar jayskani uk qelltʼayasiñatakejj nayaruraki ukat maquinaparurakiw kutin kutin jan qarjtas uñkatapjjerïtu. ¿Kunjamsa uk luri?

Tantachäwinjja, Jairojj computador pantallapan kawkïr iconor chʼetjjtayañapäkiti uk pacienciampi thaqasaw chʼetjjtayi. Ukhamatwa computadorajj arsurapki uk istʼapjjta. Ukham arstʼasin yaqhanakar chʼamañchtʼatap amuyasisajja, wali kusisitaw uñkattʼapjjetu. Alex sat amigopajj akham siwa: “Jairojj kuntï Biblia toqet arski ukajj sapa kutiw wal muspharayitu” sasa.

Bibliat yateqki ukanakjja, nayrapampirakiw jaqenakar parli. Ukatakejj computadorapan mä jardinan animalanakasa, kunayman kasta jaqenakas mä wawaki sum jakasipjje uka dibujoni iconoruw chʼetjjtayi. Ukat ukajj akham siwa: “Aka Oraqejj mä paraisor tukuyatäjjani ukhajja, janiw usunakasa ni jiwañas utj-jjaniti sasaw Biblian qhanañchi; Apocalipsis 21:4” sasa. Utanejj jukʼamp yatjjatañ munaskakchejja, wasitampiw chʼetjjtayi, ukat computadorapajj akham sarakiwa: “¿Bibliat nayamp yatjjatañ munasmati?” sasa. Achachilajaw ‘nayajj yatjjatañ muntwa’ sasin säna, uk janiw suyapkäyätti. Kunjamsa jilajajj yaqha jilatan yanaptʼapampi achachilajar jukʼat jukʼat Bibliat yatichäna uk uñjañajj kusiskañänwa. Achachilajajj Madrid markanwa agosto 2014 maran mä jachʼa tantachäwin bautisasjjäna. ¡Taqeniw wal kusisipjjayäta!

Colegiopankir yatichirinakapajj Diosar Jairojj iyawsatapjja, amuyapjjänwa. Terapia toqet yatjjatat Rosario sat qollirejja, akham siwa: “Nayatï mä religionar mantañ muniristjja, Jehová Diosan Qhanañchiripäñwa munirista. Jairojj wali usurnukstatäkchisa, Diosar iyawsäwinïtap laykuw jakañ munaskaki, ukwa amuyta” sasa.

“Suchunakasti taruja qallunakjamaw sinkʼusipjjani, amutunakasti arnaqasipjjarakiniwa” sasin Bibliajj qhanañchi uk sapa kuti liytʼarapkta ukhajja, nayranakapas wal kusistatiri (Isaías 35:6). Awisajj aynachtʼatas uñjasirakiriwa, ukampis kusisitakipuniwa, kunattejj Diosar serviñaw jupatak nayranki ukat cristiano amigonakapatsa janiw armaskiti. Usutäkasins kusisitakïskatapa ukat Diosar iyawsäwinïtapasa akwa amuyayistu: Jehová Diosarutï serviñänejja, jakañajj wakisiwa.