Nueva York markan Ancram sat cheqanwa jilsuwayta. Uka jiskʼa markanjja lecher wakanak wal uywapjjerïna. Wakanakaw jaqenakat sipansa, jukʼamp jiläna.

Familiajajj uka markankir iglesiaruw sarapjjäna. Sapa domingo alwaw achachilajajj iglesiar sarañatakejj zapatonak pichararapirïtu. Awichajaw mä jiskʼa janqʼo Biblia regalitäna uka aptʼasitaw sarirïta. Jilanakajarus nayarus irnaqtʼaña, vecinonakar respetaña, yanaptʼaña ukat utjapkitu ukanakat Diosar yuspärañ yatichapjjetäna.

Jilsusinjja, utajat sarjjtwa ukat yatichirejjayätwa. Dios toqetsa, jakäwitsa walja jisktʼanakaw utjitäna. Amuytʼañataki, yaqhep yateqerinakajj wali chʼikhipjjänwa, yaqhepasti janiw jankʼak yateqapkarakïnti. Yaqhep waynanakajj wali kʼumarakiw tʼijnaqtʼapjjäna, yaqhepasti usurnukstatarakïnwa. Ukanakaw nayatakejj jan askïkänti. Usurnukstatanakan awk taykanakapajja, “Diosan munañapawa” sasaw awisajj sapjjerïtu. Ukatwa ‘kunatsa Diosajj jan juchan jiskʼa wawanakar ukham usurnukstata utjaypacha’ sasin jisktʼasiyäta.

Akham jisktʼasirakiyäta: ‘¿Kun lurañajas jakäwijampi wakisispa?’ sasa. Walja maranakaw pasjjäna, janjamakiw kuna aski luratanakajas utjkänti. Mä suma familiat jutirïtwa, suma yateqañ utanakarus sararaktwa ukat kunantï trabajiñ munkayäta ukansa trabajarakiyätwa. Ukampis janiw kusisit jakaskayätti. Inas casarasiña, wawanakanïña, suma utanïña, trabajiskakiña ukat chuymankipstatarojj chuymankipstatanakar uñjapki ukan qheparjjaña ukakwa suyayäta. ‘Kunarak jukʼampi utjaspasti’ sasaw jisktʼasiyäta.

Yatichir masinakajampiw vacacionat Europa toqer viajapjjta. Ukat walja iglesianakaruw visitapjjta, Westminster sat monasterioru, Notre-Dame sat iglesiaru ukajj París sat markankiwa, Vaticano iglesiaru ukat yaqhanakampiru. Sapa cheqar  visittʼkasaw pachpa jisktʼanakaj jisktʼayäta. Utajar (Sloatsburg, Nueva York) kutʼkasasa, walja iglesianakaruw visittʼawayarakta, ukampis janipuniw ni maynis jisktʼanakajar sum qhanañchapkitänti.

Mä yateqerijaw kimsa jisktʼanak mä urojj nayar jisktʼitu, jupajj 12 maranikïskänwa. Nayraqat akham jisktʼitu, ‘¿Jehová Diosan Qhanañchiripätaj yatiyätati?’ sasa. ‘Jïsa’ sasaw sista. Ukat akham jisktʼarakitu, ‘¿Jehová Diosan Qhanañchirinakapat yatjjatañ munasmati?’ sasa. ‘Jïsa’ saraktwa. Ukjjarusti akham jisktʼarakitu. ‘¿Kawkhansa jakasta?’ sasa. Kawkhantï jakaskta uka yatiyta, ukhakiw niya jakʼa puran jakasipkataj yatisipjjta. Kunjamsa uka kimsa jisktʼanakajj yanaptʼitaspäna uk janipuniw amuykatätti.

Qhepatjja, jiskʼa imillajj bicicletatwa utajar jutatayna ukat jupampiw Bibliat yateqañ qalltta. Kuna jisktʼanaktï iglesia pʼeqtʼirinakar jisktʼkayäta uka pachpwa jisktʼta. Mayninakat sipansa, jupajj ukjpachaw Bibliajampi uka jisktʼanakajar qhanañchitu. ¡Jaya tiempo Bibliajankaskatap yatiñajj janipuniw cheqaw sañjamäkänti!

Bibliat kunanaktï yateqkayät ukajj kusiskañänwa. Kuntï 1 Juan 5:19 qellqatan siski ukaw wal muspharayitäna, ukan akham siwa: ‘Taqe aka oraqpachaw Supayan munañapanki’ sasa. Oraqpachan tʼaqhesiñanak utjki ukanakat janiw Diosajj juchanïkiti, Supayaw uka jan walinak utjayi, ukat Diosajj niyaw uk askichjjani ukanak yatiñajj wal chuymachtʼitäna (Apocalipsis 21:3, 4). Kuntï Bibliajj yatichki uk amuyañajj janiw chʼamäkiti. Kunatï cheqäki ukajj cheqawa, khitis yatichakispawa ukwa 12 marani yatichirijat yateqawayta.

Ukhamäkchïnsa, Jehová Diosan Qhanañchirinakapajj yatichapki ukarjamati sarnaqapjje janicha ukwa yatiñ munayäta. Amuytʼañataki, cheqpach cristianonakajj pacienciani, khuyaptʼayasiri ukhamäpjjewa sasaw jiskʼa imillajj yatichitäna (Gálatas 5:22, 23). Uk yatiñatakiw yantʼañ amtayäta. Mä urojj aleqatwa yateqañatak qheptʼanta. Suyakitaniti jan ukajj colerasikinicha uk yatiñ munayäta. Utar purinta ukhajj uta punkun gradar qontʼataw suyaskatayna. Autojkamaw tʼijtani ukat akham situwa: “Utar niya sarjjañampïskayätwa, policiaru ukat hospitalanakar mamitajampi jawsayañ munayäta. Janipuniw qheptʼanirïktati, kuna jan walich pasjje sayätwa. ¡Walpun llakisiyäta!” sasa.

Yaqha urusti, kunatï jupatak qhanañchañajj chʼamäkaspa uk jisktʼta. Kamsakitanisa uk yatiñ munayäta. Uk satajj akham situwa: “Jisktʼamajj wali chʼamawa. Qellqtʼasiwayä, awk taykajaruw jisktʼä” sasa. Yaqha urusti Yatiyañataki sat revistas aptʼasitaw purini, ukanwa jisktʼanakajar qhanañchäna. Jehová Diosan Qhanañchirinakapan Bibliat apstʼat qellqatanakapajj jisktʼanakarojj Bibliampipuniw qhanañchi, ukaw jupanakampi yatjjatañatakejj yanaptʼawayitu. Jupampejj yateqasipkakiyätwa, mä mara qhepatjja Jehová Diosan Qhanañchiripäjjayätwa. *

Jisktʼanakajan qhanañchäwip yatjjatjjasajja, taqeniruw kuntï yateqkayät uk yatiyañ munayäta (Mateo 12:35). Qalltanjja, familiaranakajajj janiw istʼañ munapkänti, qhepatjja janiw ukhamäjjänti. Mamajajj janïr jiwkasaw Bibliat yateqañ qalltawayi. Janis bautisasiwaykchejja, Jehová Diosar serviñ amtawayatapawa.

Elias Kazan sat jilatampiw 1978 maran casarasta ukat 1981 maranjja Estados Unidos markankir Betelan irnaqañatakiw invitapjjetu. * Pusi mara qhepatjja esposojajj jiwawayjjewa. Ukampis nayajj Betelanwa qheparta. Ukaw jan sinti llakisiñataki yanaptʼawayitu.

Richard Eldred jilatampiw 2006 maran wasitat casarasjjta, jupajj Betelan irnaqaraki, jichhakamas wali kusisitaw ukan irnaqasipkakta. Bibliat yatjjatañaw sum jakasiñatak yanaptʼawayitu... ukat kuna kimsa jisktʼanaktï mä jiskʼa imillajj jisktʼkitäna ukaw yanaptʼawayitu.