Montreal sat markanwa jilsuwayta, ukan wali pobrepjjänwa. Kimsaqallqo jila sullkäpjjtwa, nayajj sullkïrïtwa. Sojjta phajjsinikäyät ukhaw tatajajj jiwjjäna, mamajampikiw qheparjjapjjayäta.

Qollqet anatañarusa, droganakarusa, jan walinakarusa wawatpachaw yatintäyäta ukat lunthatanak taypin jakarakïyäta. 10 maranirojja, jan wali sarnaqer warminakataki, qollqe maytʼirinakatakiw irnaqjjäyäta. Jaqenakar kʼarintañas, qollqe apaqañas wal gustitäna. Janiw jaytañjamäkänti, mä vicior uñtasitänwa.

Ukat 14 maranirojja, jaqenakar kʼarimp qollq apaqeri yatintatajjäyätwa. Sañäni, walja relojonaka, pulseranaka, qorimp jarit anillonakwa alirïta. Ukatjja, 14 quilatemp luratawa sasaw qellqjjatirïta, ukanak callenakaru, jachʼa aljañ utanakaruw aljañatak apirïta. ¡Walja qollq ganirïta! Mä kutejj mä urunakwa 10.000 dolaranak ganasta.

Kunapachatï 15 maranëjjayät ukhajja, kawkharutï jan walinak lurir wawanakar apapki uka cheqat jaqsjjapjjetänwa. Ukat jan utaniw uñjasjjayäta, callenakana, plazanakana, awisajj amigonakajana utapan ikjjayäta.

Kunatsa ukanak lurayäta uk jisktʼañatakejj walja kutiw policiajj katuntitäna. Niyakejjay aljkäyät uka yänakajj jan lunthatatäkchïntejja, janiw mä kutis carcelar llawintapkituti. Ukampis kʼarintatajatsa, qollqe apaqatajatsa, yänak mayjtʼayatajatsa ukat jan permison aljatajatsa, walja kutiw multa pagawayta. Janiw khitirus ajjsarkäyätti, qollqe maytʼirinakatakis irnaqawaytwa. Qollq mayirejj wali armantataw sarirïta, wali ajjsarat jan wali jaqenakatakis irnaqawayaraktwa.

Bibliat nayrïr kut parlir istʼkäyät ukhajj 17 maraniyätwa. Ukhajj mä tawaqompiw jakaskäyäta, jupajj Jehová Diosan testigonakapampiw Bibliat yateqañ qalltäna. Natakejj Biblian ewjjanakapajj  janiw askïkänti, ukatwa yaqha tawaq thaqasjjayäta.

Jupajj ukhamarakiw Testigonakamp Bibliat yatjjatjjäna. Janiw nayrjamäjjänti, munasiri, pacienciani ukhamäjjänwa, ukaw muspharayitäna. Mä urojj tantachäwiruw Testigonakajj invittʼapjjetu. Ukanjja, munasiñampiw katoqtʼapjjetäna, janiw kawkhans ukham kusisit jikjjatasirïkti. Wawakayät ukhajj janiw familiajajj sum uñjapkitänti, ukampis Testigonakajj wali sum uñjapjjetäna. Ukatwa Bibliat yatjjatañäni satajj jankʼak iyaw sista.

Mä kutejj pä lunthatampiw lunthatañ amtapjjayäta, 50.000 dolaranak manuyätwa, uk phoqañatakiw munayäta. Biblian yateqkayät ukaw jakäwejj qhespiyawayitu. Jupanakajj lunthatir sarasipkakïnwa, maynirojj jiwayapjjänwa, maynirusti carcelaruw jistʼantapjjäna. ¡Walikpun uk jan lurkayätti!

Bibliat yatjjatasajja, kuntï nayrajj lurkayät uk jaytañajaw wakisïna. Sañäni, 1 Corintios 6:10 qellqatan akham siwa: “Wachoqa juchan sarnaqer jaqejj janiw Diosan markapar mantkaniti, ni idolonakar yupaychirisa, wachoqa juchan sarnaqerisa, lunthatanakasa, machirinakasa, mantapkaniti” sasa. Uk Biblian liytʼasajja, walpun jachaqtʼasta. Nayra jakäwejj jaytañajaw wakisïna (Romanos 12:2). Nayajj wali qhoru, kʼarinak parliri ukhamäyätwa ukajj janiw walïkänti.

Ukampis Jehová Diosajj munasiri, perdonasiriwa uk yateqawayta (Isaías 1:18). Ukatwa uka jan walinak apanukuñatakisa, jakäwejj mayjtʼayañatakis Diosar taqe chuyma maytʼasta. Yanaptʼapampejj jukʼat jukʼatwa, jan walinak jaytawayjjta. Qhepatjja, jakapkäyät uka uñtʼatajampejj casarasjjtwa.

Ukhamasti, 24 maranirojj kimsa wawanejjayätwa. Jupanakar uywañatakejj mä suma trabajo thaqañajaw wakisïna. Niyakejjay escuelar jan sarkchiyättejja, janiw trabajañ yatkayätti. Ukatwa Jehová Diosar mayamp maytʼasta. Ukat trabajo thaqeriw sarta. Jisktʼapkitan ukhajja, ‘janiw nayrjam jan walinak lurañ munjjti, sum irnaqtʼasaw qollq gantʼasiñ munta’ sasaw sirïta. ‘Suma jaqëñatakiw Bibliat yatjjataskta’ sasaw awisajj sarakirïta, ukampis janiw kawkhans trabajo churañ munapkitänti. Qhepatjja, mayampiw trabajo thaqer sarta ukat kuna jan walinaktï lurawaykta uk cuentʼañ tukuyta ukhajja, uka chachajj akham situwa: “Janiw kamsirjamäkti, ukampis chuymajan uka trabajo churam sasin maynis siskitaspa ukham amuyasta” sasa. Diosajj mayisitajj istʼitänwa. Mä qawqha tiempotjja, esposajampejj Jehová Diosan testigoparuw tukuwayjjapta.

Jesusan kayup arkatajata, Biblian ewjjtʼanakaparjam sarnaqatajatwa jakaskta. Jichhajj familiajampejj kusisitaw jakasjjta, chuymajansa sumakiw jikjjatasjjta. Jehová Diosajja, perdonawayituwa ukatwa kusisit jakasjjta.

Ukat 14 maranakaw precursorjam irnaqtʼasa, jaqenakar yanaptʼaskta. Ukhamasti walja urunakaw Bibliat jaqenakar yatichta ukat amuytʼañatakis yanaptʼarakta. Esposajajj jichhanakakiw precursorjam irnaqtʼañ qalltawayaraki. Aka qhepa 30 maranakanjja, 22 irnaqtʼir masinakajaruw Jehová Diosan testigopar tukupjjañapatak yanaptʼawayta. Jachʼa aljañ utanakar saraskaktwa, ukampis janiw lunthatasir sarjjtti, jan ukasti jutïr urunakan kunjamas jakasjjañäni uka toqet parliriw sarjjta. Ukanjja janiw lunthatanakajj utjjaniti (Salmo 37:10, 11).