Acul sat cheqanwa nasta, Guatemala marka inti jalanta toqena. Familiajajj ixil aru parlasir markatäpjjewa, ukajj maya sat grupot jutiriwa. Ixil aru parlasaw jilsta, ukampis español arsa yatiraktwa. Guatemala markanjja, 36 maranakaw markachirinak pura chʼajjwawayapjje. Ukhamanwa jilsuwayta. Uka tiempon ixil markachirinakajj waliw jiwarapjjäna.

Pusi maranïkayäta ukhajja, paqallq marani jilajajj mä granadamp anatasaw mä akatjamat phallayäna, ukhamatwa juykhuptawayta, ukampis jilajajj jiwänwa. Qhepatjja, juykhunakar yatichaski uka yateqañ utanwa jakasjjayäta, ukanwa braille qellqat liyiñsa yateqawayta, ukajj Guatemala markankiwa. Ukampis uka uta uñjirejj janiw masinakajampi parlañaj munirïkiti, masinakajas janirakiw nayampi parlañ munapjjerïkiti. Ukatwa sapak jikjjatasirïta, maran pä phajjsiw mamitajampi qamir sarirïta, uka phajjsi puriniñap wal suyirïta. Ukampis 10 maranïkayäta ukhaw mamajajj jiwjjäna, jupakiw wali munasiñamp uñjitäna. Ukatwa jukʼamp llakisjjayäta.

Ukat 11 maranëjjayäta ukhajj markajaruw jilajan familiapampi jakasir kuttʼjjta, jupajj awkejj toqet jilajänwa. Jupanakajj manqʼañ toqet yanaptʼapkchitänsa, janiw kunja llakitäyätsa uk amuyapkänti. Ukatwa awisajj “¿kunatsa mamajajj jiwawayjje? ¿Kunatsa akham juykhüta?” sasin Diosar sirïta. Jaqenakajj Diosan munañapawa sasaw sapjjerïtu, ukatwa Diosajj jan sinttʼasiri, jan cheqapar uñjiriwa sasin amuyjjayäta. Ukhaman uñjasisajj jiwañ munayäta.

Juykhütaj laykojja, jan walinakat jarkʼaqasiñajj wali chʼamänwa. Wawakayät ukhajj walja kutiw munkir jan munkir jan walinak lurapjjetäna, uk janiw khitirus awisirïkti, janis uka toqet khitis yatiñ munkaspa ukham amuyirïta. Jaqenakajj janiw nayamp parlañ munapjjerïkiti. Ukajj walpun aynachtʼayitäna, ukat janiw khitimp parlañs munjjayätti ni khitirus confiyjjayätti.

Qʼajjo waynäjjayät ukhajja, mä chacha warmiw escuelar visittʼapjjetu, jupanakajj Jehová Diosan Testigopapjjänwa. Yatichirejjaw nayat sinttʼasis  jawsatayna. Jupanakasti, ‘juykhunakajj uñjapjjaniwa, jiwatanakas jaktapjjaniwa’ sasaw Bibliat yatichapjjetäna (Isaías 35:5; Juan 5:28, 29). Ukanak istʼañajj wali sumänwa, niyakejjay mayninakamp parlañ ajjsarchiyätjja, janiw kunsa kamsirïkti. Ukhamäkchïnsa, Bibliat yatichirejj 10 kilometronakwa qollu patnam kayuk jutapjjerïna, ukat wali munasiñampiw uñjapjjetäna.

‘Jupanakajj pisinsa jakasipkchejja, suma isthaptʼatäpjjewa’ sasaw jilajajj sirïtu. Jupanakajj cheqapuniw nayat llakisipjjäna, awisajj regalonak kun apanipjjeri. Jesusan cheqpach arkirinakapakiw ukham lurapjjaspa sasaw amuyirïta.

Braille qellqatanakampiw Bibliat yateqayäta. Kuntï yatichapkitäna ukanak amuyayätwa, ukampis yaqhep yatichäwinakajj nayatak mayjänwa. Sañäni, Diosajj cheqapunit nayat llakispacha sasin jisktʼasiyäta, ukat mayninakajj Diosjamarakit nayar munasipjjpachïtu sasins jisktʼasirakiyätwa. Kunatsa Diosajj jan walinak ukhamak jaytaski uksa sum amuyarakiyäta, ukampis wali munasiri mä Awkirjam uñjañajj nayatak wali chʼamänwa. *

Bibliat yatjjatasajj jukʼat jukʼatwa jan nayrjam amuyjjayätti. Sañäni, tʼaqhesktan ukhajja, Diosajj chuym ustʼayasirakiwa. Servirinakap tʼaqhesir uñjasajja, Jupajj akham siwa: ‘Nayajj sumwa uñjta, kunjamtejj markajajj tʼaqhesiski ukjja, ukampis nayajj sum yatta tʼaqhesitanakapjja’ sasa (Éxodo 3:7). Jehová Diosajj kunja munasirisa uk yatisajja, Jupan munañap phoqañatakiw jakäwij katuyasiñ amtawayta. Ukatwa 1998 maran Jehová Diosan Testigopjam bautisasjjta.

Mä mara qhepatjja, kawkhantï juykhunakar yatichaski ukaruw sarta, ukajj Escuintla sat cheqankiwa. Ukan jakasir mä jilatajja, Acul sat cheqar tantachäwinakar sarañajj nayatak wali chʼamätap amuyasajj yanaptʼañ munitäna. Tantachäwinakar puriñatakejj qollu qollunak pasañajänwa, kunjamtï nayar yatichiri Testigonakajj jutapjjerïkäna ukhama. Yanaptʼañatakejja, uka jilatajj mä familiaruw jikjjatäna, jupanakajj Jehová Diosan Testigopapjjänwa, ukanwa jakasjjayäta, jupanakarakiw tantachäwir sarañatakis yanaptʼapjjetäna. Jichhakamas ukan jakasiskaktwa, ukampis jupanakajj familiaparjamaw sum uñjapjjetu.

Cheqas kunjamsa tamajankir walja jilat kullakanakajj yanaptʼawayapjjetu, ukajj wali muspharkañawa. Jehová Diosan Testigonakapajj wali munasirïpjjewa, taqe ukanakaw cheqpach cristianonak taypinkatajj amuyayitu (Juan 13:34, 35).

Nayrajj janis kunatak askïkirista, ni kuna suytʼäwinikirïstsa ukham amuyasiyäta, ukampis jichhajj kusisitaw jakasjjta. Kunatsa juykhüpachäta sasin lupʼiñat sipansa, jaqenakar Bibliat yatiyañatakiw precursorjam irnaqtʼaskta. Tamajansa irpir chuymanjamaw irnaqtʼaskta, yaqha tamanakarus arstʼir sararaktwa, awisajj jachʼa tantachäwinakansa arstʼaraktwa. Ukanakatjja Jehová Diosar walpun yuspärta.

Pasïr 2010 maranjja, Escuela de Entrenamiento Ministerial satäkis ukaruw sarta (jichhajj Diosan Reinopat Yatiyirinakataki Escuela satäjjewa) ukajj El Salvador sat markanwa apasïna. Uka escuelajj jilat kullakanakar sum yanaptʼañatakiw yanaptʼawayitu. Ukar sarasajja, Jehová Diosajj wali askitsa uñjkitaspa, walsa nayar munaskitaspa ukham amuyasta, Jupajj munañap phoqasiñapatakejj khitirus yanaptʼakispawa.

Jesusajj “katoqerit sipansa jukʼamp kusisiñaniw khititï churki ukajja” sasaw säna (Hechos 20:35). Nayrajj janis kusisita jakasiñajj utjkaspa ukham amuyayäta, ukampis jichhajj wali kusisitaw jakasjjta, jichhakuchaw mayninakar yanaptʼirista.