PANAYIOTA sat warmejja, mä islanwa jilsuwayäna, Mediterráneo jachʼa lamar qotana. Jupajj tawaqetäjjäna ukhajja, politicat wal yatiñ munirïna. Qhepatjja, mä partido politicon secretariapjamaw irnaqäna, ukar yanaptʼañatakejj utat ut kunwa qollqe mayir sarirïna. Ukampis qhepatjja, wali chuyma ustʼataw uñjasïna. Partidopanjja, wali sumsa apasipkaspa ukhamwa tukupjjerïna, ukampis jupanakkamaw uñchʼukisipjjäna, mä qawqhanirukiw sum uñjapjjäna, toqesipjjänwa ukat jupatakikiw kuns munapjjäna.

Irlanda markanwa Daniel chachajj iglesiar sarir familian jilsuwayäna. Ukampis uka iglesianjja, jan walinak lurir uñjäna, tatakuranakajj machjasipjjerïnwa, qollqet anatapjjerïna, qollqe apthapiskäna uk kunwa lunthatapjjerïna. Janiw ukakïkänti, ‘jumatï jucha luräta ukhajja, infiernonwa tʼaqhesïta’ sasaw jupar yatichapjjerïna.

Jeffery chachajja, walja maranakaw barconak lurapki, aljapki uka empresanakataki irnaqäna, Reino Unido ukat Estados Unidos markanakana. Jupajj kunjamsa alasirinakapasa ukat yaqha empresanakas jilïr autoridadanakar qollqe chilltapjjerïna taqe ukanakwa uñjäna. Mä contrato lurañ laykojj kuns kʼarisipjjakirïnwa.

Política toqensa religionanakansa ukat alakip lurañanakansa, kʼari chuyman jaqenakajj utjapuniwa. Kʼari chuymani siski uka arojj griego arutwa juti, ukajj teatronakan máscara uchasisa irnaqapki uka jaqenakaruw uñtayasirïna. Tiempompejja, kun jikjjatañataki suma sum tukupki, jan ukajj jupatakik kuns jikjjatañ layku kʼarisipki ukanakatakiw uka arojj apnaqasjjäna.

Ukampis kʼari chuyman jaqenakampi sallqjjata uñjasipki ukanakajja, chuyma ustʼata, colerata ukat aynachtʼataw jikjjatasipjje. Ukhaman uñjasisajj inas akham sapjjchispa: “Kʼari chuyman jaqenakajj ¿tukusjjpachäniti?” sasa. Ukampis Diosan Arupajj tukusjjaniwa, sasaw qhanañchistu.

Supayaw nayraqat kʼari chuymanir tukuwayi sasaw Bibliajj qhanañchi. Qalltanjja, jupajj asiru toqew Eva warmir sallqjjäna, wals yanaptʼañ munkaspa ukhamwa amuyayäna (Génesis 3:1-5). Ukhat aksaruw waljanejj kʼari chuymanir tukuwayapjje, ukhamat kuntï munapki uk jikjjatañataki.

Nayra tiemponjja, Israel markajj kʼari diosanakar yupaychjjapjjäna ukhajja, Diosajj Isaías profetap  toqejj akham sänwa: “Aka markajj pata chuymakiw sirvitu, lakanakapampikirakiw nayaru jachʼañchapjjetu, ukampisa chuymapajj nayatjja jayankaskiwa” sasa (Isaías 29:13). Israelitanakajj janiw arrepentisipkänti, ukhamïpansti Jerusalenasa ukat templopasa, yaqha markanakampi tʼunjataw uñjasïna. Nayraqatjja, Babilonia markaw 607 nayra pacha maran tʼunjäna, ukjjarusti, romanonakaw 70 jichha pacha maran tʼunjapjjarakïna. Cheqas Diosajj janiw kʼari chuyman jaqenakarojj ukhamak uñchʼukkiti.

Ukampis Jehová Diosampi Jesusampejj jan kʼarisis taqe chuyma loqtapki ukanakarojj wali askitwa uñjapjje. Jesusajj aka Oraqen Diosan arunakap yatiyañ qalltkäna ukhajja, Natanael sat chachar uñjasajj akham sänwa: “Akajjay, cheqpach israelitaw juti, jupansti janirakiw kuna sallqjañas utjkiti” sasa (Juan 1:47). Jupajj Jesusan 12 apostolonakapat maynïriwa, juparojj Bartolomé sat sutimpiw uñtʼasiraki (Lucas 6:13-16).

Jesusajj arkirinakapatakejj tiempo apstʼasipunirïnwa ukat kunsa Diosajj amuyi ukwa yatichirïna. Ukhamajja, arkirinakapajj janiw kʼari chuymanïpjjañapäkänti. Kʼari chuymanïñajj kunja jan walisa, uk amuyapjjañapatakejja, uka tiempon religionanak pʼeqtʼirinakarojj kunja kʼari chuymanipjjesa uk qhanwa Jesusajj irkatirïna. ¿Kunanaksa lurapjjerïna?

Mayninakan askit uñjatäñatakejj suma jaqew tukupjjerïna. “Jan jaqen uñjatäñatakiki Diosankirjam, tukupjjamti [...], kunjämtejj kʼari parlirinakajj sinagoganakana, callenakana lurapki ukhamjja” sasaw Jesusajj arkirinakapar ewjjtʼäna. Ukhamarak pistʼayasitanakar kuns churäta ukhajja, munat amigomas uk “jan yatkpati” ukat jan mayninakan uñjkata Diosar mayisirakim sasaw sarakïna. Cheqas ukhamatakwa cheqpach arkirïpjjatap uñachtʼayapjjaspäna, ukat Diosampis askit uñjatäpjjarakispäna (Mateo 6:1-6).

Mayninakarojj wal jiskʼachapjjerïna. “¡Kʼari chuyman jaqe!, nayraqat uka thuru lawa nayramankkis uk apsusim, ukatwa jumajj sum uñjasma uka jiskʼa qʼañojj jilaman nayrapan utjkis uk apsuñatakejja” sasaw Jesusajj ukham jaqenakar sirïna (Mateo 7:5). Khitinakatï jukʼamp jan walinak lurkasina, mayninakan pantjasitap uñchʼukipki ukanakajj kʼari chuymanïpjjewa. Cheqas “taqeni jucha lurapjjatap laykusti Diosampejj janiw katoqatäpkiti” sasaw Bibliajj qhanañchi (Romanos 3:23).

Mayninakar jan waltʼayañ munapjjerïna. Mä kutejja, fariseonakampi Herodesan arkirinakapampiw Jesusaru impuesto pagañ toqet jisktʼapjjäna. Suma sum tuktʼasaw Jesusar akham sapjjäna: “Yatichiri, yatipjjtwa jumajj cheq arsurïtamjja, ukhamarak Diosan thakipatsa wali sum yatichatamjja” sasa. Ukat “¿walikïskiti romankir Cesarar impuesto pagañajja, janicha?” sasaw jan waltʼayañ amtampi Jesusar jisktʼapjjäna. Jupajj akham sänwa: “Kʼari chuyman jaqenaka, ¿kunatsa jumanakajj nayar aynachtʼayir jutapjjesta?” sasa. Cheqas jupanakajj ‘pantjasiyañwa munapjjäna ukhamat juchañchañataki’ (Mateo 22:15-22).

Cristian tamajj 33 mara Pentecostés urun uttʼayaskäna ukhajja, jan kʼarisisa qhanwa parltʼasipjjerïna. Jupanakajj taqe kunansa cheqa parltʼasiñatakiw chʼamachasipjjerïna. Apóstol Pedrojj “jilatanakaru cheqpachan munañataki” chʼamachasipjjam sasaw cristianonakar ewjjtʼäna (1 Pedro 1:22). Apóstol Pablojj akham sarakïnwa: “Munasipjjam qʼoma chuymat jutki uka munasiñampi suma chuymampi, ukhamarak cheqpach iyawsäwimpi” sasa (1 Timoteo 1:5).

Jesusana ukat arkirinakapan yatichäwinakapajja, nayra patak maranakanjamarakiw wali wakiskirikïski. Uka toqet Pablojj akham sänwa: “Diosan arupasti jakaskiwa, jachʼa chʼamanirakiwa. Purapar arini espadat sipansa jukʼampi ariraki,  ukasti almampir ajayumpirojj jukʼamp manqhakamaw puri, lupʼïwinaksa, chuyman amtäwinakapsa qhanstayarakiwa” sasa (Hebreos 4:12). Cheqas waljanejja, Bibliat yateqasa ukat ukarjam sarnaqañatak chʼamachasisaw jan kʼari chuymanëjjapjjeti, taqe kunsa cheqwa parljjapjje. Qalltan parlaniwayktan ukanakajj kunsa lurapjjatayna uk uñjañäni.

Panayiota sat warmirojja, Jehová Diosan Testigonakapan tantachäwipar sarañaw yanaptʼawayäna. Ukanjja, janiw khitis mayninakan askit uñjatäñ laykuki suma sum tukupkänti, ukaw jupan chuymapar purtʼatayna. Jupajj akham siwa: “Jupanakajj cheqapuniw mayninakar munasiñ uñachtʼayapjjäna, walja maranakas politican yanapkchiyätjja, janipuniw uk uñjirïkti” sasa.

Bibliat yatjjatañ qalltasajja, jupajj nayra jakäwip jaytjjänwa, qhepat Jehová Diosan Testigopjamaw bautisasjjäna. Ukhat jichhakamajj 30 maranakaw pasjje. Jupajj siwa: “Partido politicojar yanaptʼañ layku utat uta sarasajj janiw kusisit jikjjataskayätti, antisas Diosan Reinopat utat uta yatiyir sarañ qalltjjayäta ukhat aksaruw kusisita jakasjjta, cheqas Diosan Reinopakiw sumankañ apanini” sasa.

Daniel chachajj tamapanjja, mä qawqha luräwinakwa katoqäna. Ukampis mä qawqha maranak qhepatjja, pantjasïnwa ukat chuyma manqhapan jan waliw jikjjatasjjäna. Jupajj akham siwa: “Kuntï nayrajj iglesiajan jan walinak lurir uñjkäyäta uk jan armirjamäsajja, taman luräwinak jaytjjañwa amtjjayäta. Janiw jilat kullakanakampejj kʼari chuyman jaqëñ munkayätti” sasa.

Mä qawqha tiempotjja, chuymapan sum jikjjatasjjasajj wasitampiw taman luräwinak katoqjjäna. Khitinakatï cheqa chuymampi Diosar serviñ munapki ukanakajj kunatï cheqäki uk lurañatakiw chʼamachasipjje. Jupanakajj maynin nayrapat ‘jiskʼa qʼañu’ apsuñat sipansa, nayraqatjja nayrapan “thuru lawa” apsusiñwa yateqapjje.

Jeffery chachajj akham siwa: “Bibliat jukʼampi yateqjjasajja, janiw nayrjam kun jikjjatañatakis kʼarinak parljjayätti. Bibliaw qʼoma chuymanïñatak yanaptʼawayitu, sañäni Proverbios 11:1 qellqatanjja, ‘Tatiturojj kʼari pesanakajj ajjtasiyiwa’ sasaw qhanañchi” sasa. Jesusar impuesto pagañjjat jisktʼapkäna uka jaqenakat sipansa, jupajj taqenimpis cheq parlañwa yateqäna.

Jehová Diosan Testigonakapajja, kuntï Biblian yateqapki ukarjam sarnaqañatakiw chʼamachasipjje. Jupanakajj ‘machaq jakäwimpi isthapisiñataki, suma qʼoma cheqa kankañan jakañatakiw’ chʼamachasipjje (Efesios 4:24). Khitinakäpjjes jupanakajja, kunarus creyipjje ukat kuntï Diosajj jutïr urun lurañ amtki uk kunjamsa yatichapjjeristam ukanak juma pachpa yatjjatam. Jutïr urunjja, janiw kʼari chuyman jaqenakajj utj-jjaniti, taqe kunas cheqaparuw uñjasini (2 Pedro 3:13).