SARA warmejj jakaskäna uka utapwa uñkattʼaski. Jupajj Oriente Medio uksa toqen jakasir warmiwa, wali suma chʼiyar nayritanakani ukhamarakiwa. Inas jupajj llakitächi. Jupajj munat esposopampiw uka utan wali kusisit jakasïna. *

Jupanakajj Ur markanwa jakasipjjäna. Uka markanjja, walja artesanonaka ukat alakip luririnakaw utjäna. Jakapkäna uka utanjja, walja yänakani jan ukajj cosasanakanïpjjpachänwa. Ukampis Sara warmitakejj utapajj janiw aleq utakïkänti. Ukanwa Abrahán esposopampejj walja maranak walinsa jan walinsa jakasipjjäna. Jehová Diosarus uka utanwa oración toqe jakʼachasipjjäna.

Ukhamäkchïnsa, taqe kunatï jupan utjkäna uk jaytañatakejj jankʼakïnwa. Sarajj mä 60 maranïkchïnsa, jan uñtʼkäna uka cheqanakaruw sarjjañapäna. Kunayman jan walinakanwa uñjasiñaparakïna, markapar wasitat kuttʼañatsa armasjjañapänwa. ¿Kunatsa ukhaman uñjasïna? Diosar confiyatapatsa, ¿kunsa yateqassna?

Sarajj Ur markanwa jilsuwaypachäna. Jichhürunakan uka markajj janiw utj-jjeti, qala montonakëjjewa. Ukampis nayra tiemponjja, wali suma markänwa. Uka markarojja, taqe cheqat apanita jila alan yänakwa alakip luririnakajj Éufrates jawirnama barconakat puriyapjjerïna. Jaqenakas wali phoqapuniw callenakan sarnaqapjjäna, barconakas waljapuniw uka cheqar purïna. Uka markan utjkäna uka tiendanakasa wali phoqapunïnwa. Ukanwa Sara warmin familiapajj jakasïna. Uka markan jakasipkäna ukanakarusa, waljaniruw Sarajj uñtʼpachäna. Uka jaqenakas jupar uñtʼapjjarakpachänwa. Wali suma uñnaqtʼan warmïtapatjja, waljanin uñtʼatäpachänwa.

Biblianjja, Diosar confiyatapatwa Sara warmir jukʼamp uñtʼasi. Ur markanjja, jaqenakajj “dios-luna” ukaruw yupaychapjjäna. Uka diosar jachʼañchañatakis mä jachʼa torre lurapjjäna. Ukampis Sarajj janiw uka diosar yupaychkänti, jan ukasti Jehová Diosaruw servïna. Kunjamsa Diosar serviñ qalltäna ukajj janiw yatiskiti, tatapan mä qhawqha tiempo idolonakar yupaychatapakiw yatisi. Qhepatjja, Sarajj Abrahán chachampiw jaqechasjjäna. Abrahanajj jupat tunka maranak jilïrinwa, ukat tiempompejj ‘Diosar confiyapki ukanakan awkipaʼ sasin uñtʼatäjjarakïnwa (Génesis 17:17; Romanos 4:11). * Jupanakajj wali respetomp uñjasiri, purapat parltʼasiri, jan waltʼäwinak askichañatakis purapat yanaptʼasiri ukhamäpjjänwa. Ukampis jupanakarojj Diosar taqe chuyma munasipjjatapatwa jukʼamp uñtʼasi.

Sarajj esposopar wal munasïna, jupamp chikarakiw familiap jakʼan Ur markan jakasïna. Ukampis mä llakiw jupanakan utjäna, Sarajj jan wawachasir warmïnwa (Génesis 11:30). Uka tiemponjja, jan wawanïñajj jan walit uñjatänwa. Sarajj ukhamansa  uñjaskchïnjja, janiw Diosatsa ni esposopatsa jitheqtkänti. Amuyatajja, Lot sobrinopan jan awkinïtap laykojj wawaparjamaw jupar uywasipjjäna.

Mä urojja, Abrahán chachajj wali kusisitaw esposapamp jikisir saräna. Sirvkäna uka Diosaw mä ángel toqe jupar parläna. Sara warmejj wali kusisitaw esposopar uñkattʼasajj akham sispachäna: “Angelajj ¿kamstamsa? Mirä amp sum awistʼita” sasa. Abrahanajj janïr yatiykasajj inas mä rat qontʼaschïna, ukat akham sasaw yatiypachäna: “‘Markamatsa familiaranakaman ukatsa mistjjam, ukat jutam, nayajj uñachtʼaykäma uka oraqer mantam’ sasaw Diosajj situ” sasa (Hechos 7:2, 3). Kuntï Diosajj maykäna uka toqetwa wal lupʼipjjpachäna. Jakasipkäna uka markatwa sarjjapjjañapäna ukat jan oraqenjamaw jakasipjjañapäna. ¿Kamspachänsa Sara warmejja? Abrahanajj uk wal yatiñ munpachäna. Esposapajj ¿taqe chuymat yanaptʼpachäna?

Kuntï Sara warmejj amtañapäkäna uk amuytʼañajj chʼamakïspawa. Inas jumajj akham amuysta: “Nayarusa esposojarusa janiw Diosajj markamsa utamsa jaytjjapjjam sasin mayipkituti” sasa. Ukhamäkchisa taqeniruw mä amtar puriñajj waktʼistu, akapachankir jaqenakajj jupanakatakik kuns muniri qollqe chuyma ukhamäpjjewa, ukhamäñasatakiw chʼamañchapjjarakistu. Ukampis Bibliajj Diosan Reinop nayraqat thaqapjjam, Diosamp sum apasiñatak chʼamachasipjjam sasaw chʼamañchtʼistu (Mateo 6:33). Ukhamajj kuntï Sara warmejj lurkäna uka toqet lupʼisajja, “¿kunas nayatakejj nayranki?” sasaw jisktʼasiñasa.

Utapat sarjjañataki wakichtʼaskasajja, kunanaksa jaytawayani, kunanaksa apasini uka toqetwa Sara warmejj amuytʼpachäna. Jupajj kunanaktï mä asnor jan ukajj mä camellor khumjjatkasapäna ukakwa apasiñapäna. Jiltʼkäna uka yänakapsa regaljjañapänwa jan ukajj alj-jjañapaw wakisïna. Janiw mercadonakarusa, tiendanakan waña manqʼanaka, frutanaka, isinak aljapkäna ukanakarus sarañ puedjjasapänti.

Saratakejj utap jaytañaw jukʼamp chʼamäpachäna. Arqueología toqet yatjjatat jaqenakarjamajja, Ur markan wali suma lurtʼat utanakaw utjäna. Ukhamajj Sara warmejj mä suma utan qamasiñwa aptʼasiskäna. Yaqhep utanakajj tunka payanits jila cuartonakani, pachpar umani ukat phujunakani ukhamäpjjänwa. Jiskʼa utanakas techonakani, perqanakani, punkunakas llaveni ukhamänwa. Uka markat sarjjasajja, ¿jan ajjsarayasisakit Sarajj carpanakan jakasisapäna? Sarañapäkäna uka cheqanakanjja lunthatanaka, leonanaka, leopardonaka, osonaka ukat lobonakaw utjäna, taqe ukanakat ¿jarkʼaqatäsapänti?

Markamatsa familiaranakaman ukatsa mistjjam sasin Diosajj siskatayna uka arunakar istʼañajja, Saratakejj chʼamakïpachänwa. Jupajj wali munasir  warmïnwa, inas jil kullakanakani, sobrinonakani, tionakani ukhamächïna, jupanakampejj wali yatitäpachänwa. Sarjjasajj janiw jupanakamp mayamps jikisjjasapänti. Ukhamäkchïnsa, jupajj sapüruw viajiñatak wakichtʼasiskakïna.

Sara warmejj llakthapiskchïnsa, sarjjañ urutakejj taqe kunwa waktʼayjjäna. Abrahanampi Sarampejj Taré chachaw viajiñaparakïna, jupajj niya 200 maranëjjänwa (Génesis 11:31). Sara warmiw uka jilïr jaqerus uñjañapäna. Lot sobrinopaw jupanakampejj sarañaparakïna. Ukhamatwa jupanakajj Diosar istʼasajj “caldeonakan oraqepat” sarjjapjjäna (Hechos 7:4).

Ur markat mistjjasajja, Harán markaruw nayraqat sarantapjjäna. Uka markajja, niya 960 kilometronak inti jalanta alay toqenkänwa (noroeste). Éufrates jawir laknamwa sarantapjjäna. Harán markar purisajja, inas Taré chachan wali usuntatätap laykojj ukan mä qhawqha tiempo qheparapjjchïna. Uka markanwa Taré chachajj 205 maranëjjasajj jiwjjäna. Janïr uka markat viajiñ qalltkasajja, Jehová Diosajj wasitatwa uka oraqet mistjjañapatak Abrahanar amtayäna. Ukat akham sarakïnwa: “Wawanakamampisti mä jachʼa marka tukuyäma” sasa (Génesis 12:2-4). Harán markat sarjjapjjäna uka tiempotakejja, Abrahanajj 75 maranëjjänwa, Sara warmisti 65 maranëjjarakïnwa, janirakiw wawanïpkänti. ¿Kunjamatsa Abrahanajj wawanakamp mä jachʼa markar tukusapäna? ¿Yaqha warmirut ajllisisapäna? Uka tiemponjja, walja warminïñajj janiw jan walit uñjatäkänti. Sara warmis uka toqetwa lupʼpachäna.

Harán markatjja, Abrahanampi familiapampejj kunanaktï uka markan jikjjatapkäna ukanakampi, “ukhamarak qawqha jaqenaktejj” uka lugaran jikjjatapkäna ukanakampiw mistjjapjjäna sasaw Bibliajj qhanañchi (Génesis 12:5). Uka jaqenakajj ¿khitinakäpjjänsa? Inas sirvientenakapächïna. Abrahanampi Sarampejj Jehová Diosjjat parlapjjapunirïpachänwa. Uka toqetjja, judionakan nayra qellqatanakapajj akham siwa: “Uka jaqenakajj Abrahanampi Sarampi chika Jehová Diosar yupaychirinakäpjjänwa” sasa. Ukatï cheqächejja, Sara warmejj Diosar taqe chuym confiyiri warmïpachänwa, ukatwa Diosar jakʼachasipjjañapatakejj yaqhanakarus yanaptʼpachäna. Aka qhepa urunakanjja, janiw jaqenakajj Diosar confiyjjapjjeti ni jutïr urunaksa suma chuymamp suytʼjjapjjeti, ukatwa Sarat yateqasiñasajj wakisi. Bibliat suma yatichäwinak yateqasajja, akham sasaw jisktʼasiñasäspa: “¿Janit yaqhanakar ukanak yatichkarakirista?” sasa.

Éufrates jawir paskatjjasajja, Abrahanampi Sarampejj Jehová Diosajj jupanakar churañ arskäna uka oraqeruw sarañ qalltapjjäna, ukhajj 14 de nisán, 1943 (a.C.) maräpachänwa (Éxodo 12:40, 41). Uka oraqejj kunja sumänsa ukwa Sara warmejj uñtpachäna. Siquem markar niya puripkäna ukhajja, Jehová Diosajj Moré cheqan arbolanakajj utjkäna uka cheqanwa wasitat Abrahanar uñstäna, ukat akham sänwa: “Aka oraqjja wawanakamaruw churä” sasa. ‘Wawanakamaru’ sasin istʼañajj Abrahanatakejj wali kusiskañäpachänwa. Jehová Diosajj mä wawaw Supayar qʼal tukjani sasin Edén huerton siskäna ukwa Abrahanajj amtaspachäna. Kuntï Diosajj jupar siskäna uksa amtarakpachänwa, ‘wawamat jutiri markajj walja bendicionanakwa aka oraqpachatak apanini’ sasaw Diosajj säna (Génesis 3:15; 12:2, 3, 6, 7).

Abrahanan familiapatakejj janiw taqe kunas facilapunïkänti. Amuytʼañataki, Canaán markanjja manqʼat pistʼañaw utjäna, ukatwa Abrahanajj Egipto markar familiapamp sarjjäna. Ukampis ukanjja yaqha jan waltʼäwinwa uñjasipjjarakïna. Ukatwa Abrahanajj Sarar akham säna: ‘Jumajj suma uñnaqtʼan warmïtawa, Egiptonkir jaqenakajj uñjapjjätam ukhajja, “aka warmejj aka jaqen warmipawa” sasaw sapjjani, ukatsti nayarojj jiwayapjjetaspawa, jumarojj janiw jiwayapkätamti. Jan nayar jiwayapjjañapatakejja, “kullakapätwa” samaya’ sasa (Génesis 12:10-13). ¿Kunatsa Abrahanajj Sara warmipar ukham sispachäna?

Janiw ajjsariri kʼarisiri jaqëtap laykojj ukham siskänti, kunjamtï yaqhepajj sapki ukhama. Sara warmejj jupan kullakapäskapunïnwa, Jehová Diosan amtap phoqasiñapatakisa jupanakajj wali amuyumpiw sarnaqapjjañapäna. Abrahán chachan familiapatwa mä wawajj jutañapäna, jupan familiapaw mä jachʼa markarus tukuñapäna. Ukhamajj  Abrahán chachatï jiwasapäna ukhajja, Diosan amtapajj janiw phoqaskaspänti. Ukhamarusa, Egiptonkir wali munañani jaqenakajj ukhamapuniw casado warminakar katuntasajj esposonakapar jiwayapjjerïna sasaw arqueología toqet yatjjatatanakajj sapjje. Ukhamajj kuntï Abrahanajj lurañ amtkäna ukajj walikïskänwa, Sara warmis altʼat chuymampiw jupar iyawsäna.

Mä qhawqha tiempotjja, kunjamtï Abrahanajj siskäna ukhamapuniw Faraonan principenakapajj Sara warmin wali suma uñnaqtʼanïtap uñjapjjäna, Sarajj jilïr warmëjjchïnsa, suma uñnaqtʼanïskakïnwa. Ukwa Faraonar yatipjjäna, ukat jupasti “akar irptanipjjam” sasaw sarakïna. Abrahanajj wal llakispachäna, Sara warmis ajjsarayasirakpachänwa. Ukampis janjamakiw Sara warmir jan wal uñjapkänti, antisas wali sumwa jupar katoqapjjäna. Inas Faraonajj kunanaktï jupan utjkäna ukanak uñachtʼayasajj Saran chuymap lunthatañ munchïna, ukhamat jupamp casarasiñatakejj kunsa ‘jilapajj’ mayini uka toqet jupamp parlañataki (Génesis 12:14-16).

Sarajj Faraonan palaciopan utjkäna uka terrazata jan ukajj ventanatwa Egipto markajj kunja sumasa uk uñtpachäna. “Mä utana suma manqʼanak manqʼasa wasitat jakasiñajj kunjamakïspasa” ¿sasat jupajj jisktʼaspachäna? Ur markat sipansa jukʼamp suma markan jakañajj ¿jupatakejj munañjamäpachänti? Sara warmitï Faraonamp casarasiñataki esposopar jaytjjañ amtaspäna ukhajja, ¿janit Supayajj wal kusiskaspänjja? Ukampis Sarajj janiw ukham warmïkänti. Jupajj Diosata ukat esposopat jan jitheqtir warmïnwa, Abrahanamp casaratäkäna ukarus wali respetompiw uñjäna. Qʼañu juchanak luriri akapachanjja, casarat chacha warminakatï Sara warmit yateqasis sarnaqapjjaspa ukhajj wali kusisitaw familian jakasipjjaspa. Ukhamajj Sara warmit yateqasisajj janipuniw familiasatsa amigonakasatsa jitheqtañasäkiti.

Jehová Diosajja, wali munata Sara warmir jarkʼaqañatakejj jan wali plaganakwa Faraonarusa familiaparus apayäna. Sarajj Abrahán chachan esposapätap Faraonajj yatïna ukhajja, esposopan ukaruw wasitat khitäna ukat Egipto markat sarjjapjjam sasaw Abrahanar mayirakïna (Génesis 12:17-20). Sara esposapar wasitat katoqasajj wali kusisitaw Abrahanajj jikjjataspachäna. Jupajj esposapar walpun munasïna, ukatwa “jumajj suma uñnaqtʼan warmïtawa” sasin mä kutejj säna. Ukampis janiw wali suma uñnaqtʼanïtap laykukejj Sarajj munaskänti, Sarajj suma chuymanïnwa, ukatwa Abrahanajj jupar wal munasïna, ukaw Jehová Dios nayraqatansa jukʼamp valoranejja (1 Pedro 3:1-5). Taqeniw ukham suma chuymanïsna. Jiwasatï Diosar serviñ jakäwisan nayrar uchañäni, yaqhanakarus Diosat parlañäni, ukat Diosajj yatichkistu ukarjam qʼom sarnaqañataki chʼamachasiñäni ukhajja, Sara warmjamarakiw sum sarnaqañäni.