1. Edén jardinan Dios contra saytʼasipkäna ukhajja, ¿kunjamsa Diosajj jaqenakar chʼamañchtʼäna, ukat mä suytʼäwsa churarakïna?

JEHOVÁ DIOSAJJA, jaqenakajj juchar purtʼasipkäna uka tiempotpachwa chʼamañchtʼirïtap uñachtʼayäna. Adanampi Evampejj Edén jardinan Dios contra saytʼapjjäna uka qhepatjja, Diosajj mä profecía arsüna, ukaw Adanan wawanakapar chuymachtʼañapäna, mä suytʼäwsa churañaparakïna. Uka profeciajj Génesis 3:15 texton qellqatawa. Ukanjja, Supayasa luratanakapas qʼala tʼunjatäniwa sasaw Jehová Diosajj säna (1 Juan 3:8; Apoc. 12:9).

2. ¿Kunjamsa Jehová Diosajj Noé chachar chʼamañchtʼäna?

² Noé chachajj Diosar jan servir jaqenak taypinwa jakäna, jupampi familiapampikiw Jehová Diosar servipjjäna. Taqe cheqansa nuwasiñanaka qʼañu juchanak lurañakiw utjaskäna. Uk uñjasajja, Noé chachajj llakimpiw aynachtʼaspäna (Gén. 6:4, 5, 11; Jud. 6). Ukampis Jehová Diosajj jupat jan jitheqtañapatakiw  chʼamañchtʼäna (Gén. 6:9). Kuna jan walinakatï aka oraqen utjki ukanakajj kunjamsa qʼal tukjasini, jupasa familiapas kunsa salvasiñatakejj lurapjjañapa ukanakwa Diosajj säna (Gén. 6:13-18). Uka arunakajj walpun Noé chachar chʼamañchtʼpachäna.

3. ¿Kunjamsa Jehová Diosajj Josué chachar chʼamañchtʼäna? (Página 15 ukankir dibujo uñjjattʼäta).

³ Jehová Diosajja, ‘Suma Oraqeruw israelitanakar irpantäta’ sasaw Josué chacharojj walja maranak qhepat säna. Ukatakejja, Josué chachajj uka jakʼanakan jakiri ajjsarkañ markanakaruw atipjañapäna. Ukampis Josué chachan ajjsarayasitapjja, Diosajj yatïnwa, ukatwa Moisés chacharojj chʼamañchtʼañapatak akham säna: “Jichhajj churamay Josué chacharojj ewjjanaka, ukhamarak juparojj chʼamañcham, thuru saytʼasiyarakim, jupaw markan nayrap sarani, uka oraqenaksa katuntarakini, kawkïrtï jichhajj uñjta ukanaka” sasa (Deut. 3:28). Jehová Dios pachpas akham sasaw Josué chachar chʼamañchtʼarakïna: “Nayasti sismawa: Chʼamani saytʼasim, jan ajjsaramti, janirak mayjtʼasimsa. Naya Tatitu Diosamaw jumampïskä kawkharutï sarkäta ukkhanakana” sasa (Jos. 1:1, 9).

4, 5. 1) Nayra tiemponakanjja, ¿kunjamsa Jehová Diosajj markapar chʼamañchtʼäna? 2) ¿Kunjamsa Jehová Diosajj Yoqapar chʼamañchtʼäna?

⁴ Jehová Diosajj janiw yaqhep servirinakaparuk chʼamañchtʼkänti, jan ukasti markpacharuw chʼamañchtʼarakïna. Sañäni, judionakajj Babilonia markan katuntatapkäna ukhajja, chʼamañchtʼatäñwa munapjjäna. Uk yatisajja, Jehová Diosajj jupanakar akham sänwa: “Jan ajjsaramti, nayaw jumampïskta, jan ajjsaramti, nayäsktwa juman Diosamajja. Nayaw chʼamañchaskäma, nayarakiw yanapaskäma, atipjiri amparajjampirakiw uywaskäma” sasa (Is. 41:10). Nayrïr patak maranakan jakir cristianonakarojj ukhamarakiw Jehová Diosajj chʼamañchtʼäna, jiwasarus chʼamañchtʼarakistuwa (2 Corintios 1:3, 4 liytʼañataki).

⁵ Jehová Diosajj Yoqaparus chʼamañchtʼarakïnwa. Bautisaskäna ukhajja, alajjpachat mä aruw akham sasin istʼasïna: “Jupajj Wawajawa, wali munatawa, nayajj wal jupat kusista” sasa (Mat. 3:17). Uka arunakajja, Jesusarojj walpun aka oraqenkaskäna ukhajj chʼamañchtʼpachäna.

6. Talento qollqe katoqerinakat parlir uñachtʼäwejj ¿kun lurañatakis chʼamañchtʼistu?

⁶ Jesusajj Awkipjamarakiw chʼamañchtʼirïna. Mä kutejja, talento qollqe katoqapkäna uka uñachtʼäwit parlasaw discipulonakaparojj Diosat jan jitheqtapjjañapatak chʼamañchtʼäna. Uka uñachtʼäwirjamajja, uywirejj sapa mayni esclavoparuw akham säna: “Suma phoqeri esclavo, ¡walik ukham lurtajja! Mä jukʼa katoqasas sum phoqtajja, ukatwa jichhajj jukʼamp walja uñjañamatakejj uttʼayäma. Uywirimamp chik kusisim” sasa (Mat. 25:21, 23).

7. 1) ¿Kunjamsa Jesusajj apostolonakapar chʼamañchtʼäna? 2) ¿Kunjamsa Jesusajj Pedror chʼamañchtʼäna?

⁷ Jesusan apostolonakapajja, khitis jupanakat jilïrïna uka toqet sapa kutiw chʼajjwapjjerïna. Ukampis Jesusajj pacienciampiw humilde chuymanipjjañapataki, maynit maynikam yanaptʼasipjjañapatak chʼamañchtʼäna (Luc. 22:24-26). Apóstol Pedrojj walja kutiw pantjasïna (Mat. 16:21-23; 26:31-35, 75). Ukhamäkchïnsa Jesusajj janiw jaytanukkänti jan ukasti chʼamañchtʼänwa, jilat kullakanakar chʼamañchtʼañapatakis juparuw jaytarakïna (Juan 21:16).

8. ¿Kunjamsa Ezequías reyejj soldadonakan pʼeqtʼirinakapampiru Judá markankirinakampir chʼamañchtʼäna?

⁸ Diosar jan jitheqtas servirinakajja, Jesusajj aka oraqer janïr jutkäna ukhaw mayninakar chʼamañchtʼañajj kunja wakiskiris uk amuyjjapjjäna. Amuytʼañataki, asirionakajj Judá markar katuntañ munapjjäna ukhajja, Ezequías reyejj soldadonakan pʼeqtʼirinakapampiru markachirinakampiruw tantachthapisajj chʼamañchtʼäna (2 Crónicas 32:6-8 liytʼañataki).

9. Mayninakar chʼamañchtʼañatakejja, ¿kunsa Job chachat yateqsna?

⁹ Jichhajj Job chachat parltʼarakiñäni. Jupajj wali llakitänwa, jupar chʼamañchtʼir sarapkäna ukanakasa jukʼampikiw chuyma ustʼayir arunakampi tʼaqesiyapjjäna. Ukham llakitpachasa, kunjamsa mayninakar chʼamañchtʼasiñapa uka toqetwa yatichäna. Uka jaqenakarojj akham sänwa: ‘Jumanakatejj nayjamäpjjarakismajja, suma chuymachasiña arunakwa sapjjerisma, ukhamat jumanakaru chʼamañchtʼañataki’ sasa (Job 16:1-5). Qhepatjja, Job chacharojj Eliú chachaw chʼamañchtʼäna, Jehová Diosas chʼamañchtʼarakïnwa (Job 33:24, 25; 36:1, 11; 42:7, 10).

10, 11. 1) ¿Kunatsa Jefté chachan phuchapajj chʼamañchtʼatäñ munäna? 2) Jichhürunakanjja, ¿khitinakas chʼamañchtʼatäñ munapjjaraki?

¹⁰ Jefté chachan phuchapas ukhamarakiw chʼamañchtʼatäñ munäna. Jefté chachajj Amonitanakampi nuwasiriw sarañapäna. Ukatwa Jehová Diosarojj akham säna: ‘Jumatejj amonitanakaru atipjayitäta ukhajja, nuwasïwit kuttʼankä ukhajj khititejj utajat nayraqata mistunkani ukaruw tabernaculon serviñapatak churäma’ sasa. Kuttʼanjjäna ukhajja, mä sapa phuchapaw nayraqat mistunïna. Uk uñjasajja Jefté chachajj wal llakisïna, ukhamäkchïnsa arup phoqänwa. Phuchaparojj Siló cheqaruw tabernaculon jiwañapkam serviñapatak khitäna (Juec. 11:30-35).

¹¹ Ukham lurañajj Jefté chachatak chʼamänwa, ukampis phuchapatakiw jukʼamp chʼamäpachäna. Ukhamäkchïnsa awkipan arsutaparjamaw luräna (Juec. 11:36, 37). Jupajj janiw casarasiñapäkänti ni wawaniñapäkänsa, awkipan sutipas ukhamakiw chhaqtjjañapäna, herenciapsa aptʼasiñaparakïnwa. Ukatwa chʼamañchtʼatäñ wal munäna. Bibliajj uka toqet akham siwa: “Israelitanak taypinjja mä costumbrejj utji sapa mara[w] tawaqonakajja Jefté chachan phuchapata pusi uru jachir sarapjjañapajja” sasa (Juec. 11:39, 40). Jichhürunakanjja, ‘kunanakatï Tatitunkki ukanakat llakisipki’ uka cristiano solter wayn tawaqonakajj ukhamarakiw chʼamañchtʼatäñ munapjje (1 Cor. 7:32-35).

12, 13. ¿Kunjamsa Pedrojj jilat kullakanakar chʼamañchtʼäna?

¹² Jesusajj janïr jiwayatäkäna uka arumajja, akham sasaw apóstol Pedror säna: “Simón, Simón, taqe jumanakar sussuñatakiw Supayajj mayi, kunjamtï trigojj susuñäki ukhama. Nayajj taqe chuymaw Diosar jumatak mayirapsma, ukhamat Diosar confiyañan jan aynachtʼañamataki. Jumajj kuttʼanjjäta ukhajja, jilatanakamaruw chʼamañchtʼäta” sasa (Luc. 22:31, 32).

¹³ Nayrïr patak maranakan jakir cristianonakarojj walpun Pedrojj chʼamañchtʼäna, jupajj congregación katjjasirïkaspas ukhamänwa (Gál. 2:9). Kunanaktï Pentecostés urunsa yaqha urunakansa jan ajjsartʼas lurkäna ukaw jilat kullakanakar wal chʼamañchtʼäna. Jiwañap jakʼäjjäna ukhajja, akham sasaw  cristianonakar qellqäna: “Aka cartjja mä qhawqha arunakam[piw] jumanakar qellqanta, ukhamat jumanakar chʼamañchtʼañataki ukhamaraki Diosajj cheqpachapuni wali khuyapayasiñampi jumanakar uñjaskatap yatiyañataki. Jumanakajj janipun jachʼa khuyapayasiñapat jitheqtapjjamti” sasa (1 Ped. 5:12). Pedron qellqat cartanakajj walpun cristianonakar chʼamañchtʼawayi. Khitinakatï Diosan arsutaparjamajj Paraíso katoqañ suyasktan ukanakarus wal chʼamañchtʼarakistu (2 Ped. 3:13).

14, 15. ¿Kunatsa Juanan qellqat libronakajj nayratpachas cristianonakar wal chʼamañchtʼawayi?

¹⁴ Apóstol Juanajj Pedror uñtasitarakiw nayrïr patak maranakan jakir jilat kullakanakar wal chʼamañchtʼäna. Jesusan sarnaqäwipat qellqkäna ukajj walpun chʼamañchtʼäna, jiwasarus chʼamañchtʼaskakistuwa. Sañäni, “jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasin Jesusajj siskäna uka arunakjja, jupakiw qellqäna (Juan 13:34, 35 liytʼañataki).

¹⁵ Juanan qellqat kimsa cartanakanjja, wali suma yatichäwinakaw utji. Sañäni, pantjasitanakas amtasin wal llakistan ukhajja, Jesusan wila wartasitapajj “taqe juchanakasatwa qʼomachistu” siski uka arunakajj walpun chuymachtʼistu (1 Juan 1:7). Chuymasajj juchañchaskakistu ukhasti, “Diosajj chuymasat sipansa jukʼamp jachʼawa” siski uka arunakajj ukhamarakiw chuymachtʼistu (1 Juan 3:20). Apóstol Juan sapakiw “Diosajj munasiñawa” siski uka arunaksa qellqäna (1 Juan 4:8, 16). Payïri, kimsïri cartanak qellqkäna ukanjja, ‘cheqa yatichäwinakarjam sarnaqer’ cristianonakarojj walik ukham lurapjjtajja sasaw chʼamañchtʼäna (2 Juan 4; 3 Juan 3, 4).

16, 17. ¿Kunjamsa Pablojj nayrïr patak maranakan jakir cristianonakar chʼamañchtʼäna?

¹⁶ Cheqas apóstol Pablow jilat kullakanakarojj jukʼamp chʼamañchtʼäna. Jesusajj jiwjjäna uka qhepatjja, apostolonakat jila partejj  Jerusalenanwa qheparapjjäna, jilïr irpirinakas uka markankapjjarakïnwa (Hech. 8:14; 15:2). Judeankir cristianonakajja, ‘mä sapa Diosakiw utji’ sasin creyir jaqenakarojj Cristotwa parlapjjäna, uka jaqenakajj judionakat yateqasaw ukham creyipjjäna. Ukampis Pablojj espíritu santon irpataw kawkintï griegonakasa romanonakas jakapkäna ukarojj saräna, jupanakajj walja diosanakaruw adorapjjerïna (Gál. 2:7-9; 1 Tim. 2:7).

¹⁷ Apóstol Pablojja, jichhajj Turquía, Italia, Grecia markanakäki uka cheqanakaruw Diosan arunakap yatiyir sarirïna. Ukanjja, jan judiöpki ukanakar yatichasaw walja congregacionanak uttʼayäna. Uka cristianonakajj ‘marka masinakapan’ tʼaqesiyat uñjasisajj chʼamañchtʼatäñwa munapjjäna (1 Tes. 2:14). Pablojj khä 50 maranakan mä carta qellqkäna ukanjja, akham sasaw Tesalónica markankir jilat kullakanakar säna: “Oración lurapjjta ukhajja, taqe jumanakat amtasisajj Diosar yuspärapjjapuntwa. Dios Awkis nayraqatanjja kunanaktï jupar confiyapjjatamatsa munasiñatsa lurasipkta ukanak amtapjjapuntwa, [...] kunanaktï aguantasipkta ukanaksa janiw armasipkti” sasa (1 Tes. 1:2, 3). Ukatsti akham sasaw ewjjtʼarakïna: “Maynit maynikam chʼamañchtʼasisipkakim, maynit maynikamas yanaptʼasisipkakim” sasa (1 Tes. 5:11).

18. ¿Kunjamsa jilïr irpirinakajj Feliper chʼamañchtʼapjjäna?

¹⁸ Nayrïr patak maranakanjja, Jehová Diosajj jilïr irpirinak toqew taqe cristianonakar chʼamañchtʼäna, congregación irpapkäna ukanakarus chʼamañchtʼarakïnwa. Sañäni, Felipejj Samaria markankirinakar Diosan arunakap parläna ukhajja, jilïr irpirinakajj taqe chuymaw yanaptʼapjjäna, ukatwa jupanak taypinkiri Pedrompiru Juanampir khitapjjäna. Jupanakajj Samaria markankir cristianonakatakiw espíritu santo qatoqapjjañapatak Diosar mayipjjañapäna (Hech. 8:5, 14-17). Uka yanaptʼajj walpun Felipe chacharusa cristianöjjapjjäna ukanakarus chʼamañchtʼpachäna.

19. Jilïr irpirinakajj apayapkäna uka cartajja, ¿kunjamsa nayrïr patak maranakan jakir cristianonakar chʼamañchtʼäna?

¹⁹ Mä qhawqha tiempotjja, Moisesan Leyiparjamati jan judiöpki uka cristianonakajj circuncidasipjjañapa janicha sasaw jilïr irpirinakar jisktʼasïna (Hech. 15:1, 2). Ukatakejja, jilïr irpirinakajj Diosaruw espíritu santo mayipjjäna, qellqatanakatsa amuytʼapjjarakïnwa, ukhamatwa circuncidasiñajj janiw wakisjjeti sasin mä amtar puripjjäna. Uka amta yatiyañatakejj mä cartwa qellqapjjäna, uka cartjja mä qhawqha jilatanakaruw congregacionanakar yatiyañatak apayapjjäna. Cristianonakajj uka chʼamañchtʼkir carta liytʼasajja, “wal kusisipjjäna” (Hech. 15:27-32).

20. 1) Jichhürunakanjja, ¿kunjamsa Oraqpachan Jilïr Irpirinakajj taqe jilat kullakanakar chʼamañchtʼapjje? 2) ¿Kunsa akjjar jutki uka yatichäwin yatjjataskañäni?

²⁰ Jichhürunakanjja, ukhamarakiw Oraqpachan Jilïr Irpirinakajj Betelan trabajirinakarusa, sapürunjam Diosatak irnaqapki uka jilat kullakanakarusa, oraqpachankir cheqpach cristianonakarus chʼamañchtʼistu. Ukham chʼamañchtʼatäsajja, nayrïr patak maranakan jakir cristianonakjamarakiw kusistanjja. Oraqpachan Jilïr Irpirinakajja, Diosan markapat jitheqtatanakar kuttʼanipjjañapatak chʼamañchtʼañatakejj Jehová Diosajj kuttʼaniñamwa muni sat folletwa 2015 maran apsupjjäna. Ukampis ¿irpir jilatanakakit Jehová Diosat yateqasisajj mayninakar chʼamañchtʼapjjañapa? Uka toqetjja akjjar jutki uka yatichäwinwa yatjjataskañäni.