1. Apóstol Pablojja, ¿kunatsa hebreo cristianonakar maynit maynikam jichhajj jukʼamp chʼamañchtʼasipjjam sasin sispachäna?

NAYRAT sipansa jukʼampiw jichhürunakan maynit maynikam chʼamañchtʼasiñasa. ¿Kunatsa? Apóstol Pablojj hebreo cristianonakar akham sänwa: “Mayninakajj kunjamäsipkisa ukjja amuyapjjapuniñäni, ukhamat munasiñasa wali suma luräwinakasa jukʼamp utjañapataki. Tantachäwinakasjja janirak jaytanukupjjañäniti, kunjamtï yaqhepanakajj jaytanukuñar yatitäpki ukhamjja, antisas maynit maynikam purapat chʼamañchtʼasipjjañäni, Diosan urupan jakʼankjjatap yatisajj jukʼamp uk lurapjjañäni” sasa (Heb. 10:24, 25). Jupanakajja, phesqa maranak qhepatwa ‘Jehová Diosan jachʼa urupa’ Jerusalén markjjar purinir uñjapjjañapäna, mä arunjja uka markan tʼunjäwipajj jakʼankjjatapwa amuyapjjañapäna. Jesusajj arskäna uka señalanak phoqasiskatap amuyasajja, uka markat sarjjapjjañapänwa (Hech. 2:19, 20; Luc. 21:20-22). Diosan uka urupajj 70 maranwa purinïna, uka maranwa romanonakajj Jerusalén marka tʼunjapjjäna.

2. ¿Kunatsa maynit maynikam jukʼamp chʼamañchtʼasiñajj wali wakiskiri?

 ² Jehová Diosan jachʼa ajjsarkañ urupajj kunja jakʼankisa uk sum yattanjja (Joel 2:11). Kuntï Sofonías 1:14 qellqatan siski ukas jichhürunakanwa phoqasiski, ukan akham siwa: “Jakʼankiwa Tatitun khä jachʼa urupajja. ¡Jakʼankiwa uka urojj, jankʼakiw purinirakini!” sasa. Ukatwa Pablojj akham ewjjtʼistu: “Mayninakajj kunjamäsipkisa ukjja amuyapjjapuniñäni, ukhamat munasiñasa wali suma luräwinakasa jukʼamp utjañapataki” sasa (Heb. 10:24). Mä arunjja, jilat kullakanakajj kunjamäsipkisa uk amuyañasapuniwa ukhamatwa jupanakar chʼamañchtʼañäni.

3. ¿Apóstol Pablojj chʼamañchtʼatäñ toqet kamsänsa? (Página 20 ukankir dibujo uñjjattʼäta).

³ “Llakejj jaqerojj mayjtʼayiwa; suma arusti kusisiyiwa” (Prov. 12:25). Uka arunakajj cheqäskapuniwa, awisajj taqeniw chʼamañchtʼatäñ muntanjja. Pablojja mayninakar chʼamañchtʼirinakas chʼamañchtʼatäñwa munapjjaraki sasaw säna. Roma markan jakasiri cristianonakarojj akham sänwa: “Diosan bendicionapamp jumanakaru chʼamañchtʼañatakejj walpun uñjañ munapjjsma, ukhamat Diosar adorañan wali suma saytʼatäpjjañamataki. Nayajj purapat chʼamañchtʼasiñatakiw uñjañ munapjjsma, ukhamat jumanakansa nayansa Diosar confiyañajj utjkistu ukampi chʼamañchtʼasiñasataki” sasa (Rom. 1:11, 12). Kunjamtï amuyktanjja, apóstol Pablos chʼamañchtʼatäñwa awisajj munarakïna (Romanos 15:30-32 liytʼañataki).

4, 5. ¿Khitinakas jichhürunakan chʼamañchtʼatäñ munapjje, ukat kunatsa?

⁴ Walja jilat kullakanakaw Jehová Diosatak sapürunjam irnaqañataki wal chʼamachasipjje. Jupanakat yaqhepajj precursoranaka, misioneronaka, tamanak tumptʼirinaka, esposanakapa, sucursalanakan trabajirinaka, Bibliat apstʼat qellqatanak tradusipki uka oficinanakan trabajirinaka ukanakäpjjewa. Taqe jupanakaw chʼamañchtʼatäñ munapjje, ukatwa jupanakar chʼamañchtʼañasa. Yaqhepajja, nayrajj sapürunjamaw Diosatak irnaqapjjäna, ukampis jichhajj janiw puedjjapjjeti, jupanakarus chʼamañchtʼañasarakiwa.

⁵ Maysa toqetjja, “Tatitun arkiripampikiw casarasiñapa” siski uka ewjjtʼar istʼañataki chʼamachasipki uka solter jilat kullakanakaw chʼamañchtʼatäñ munapjjaraki (1 Cor. 7:39). Casada kullakanakasa chʼamañchtʼatäñ munapjjarakiwa. Esposonakapajja, ‘wal munassma, kuntï lurkta ukajj nayatak wali valoraniwa’ sasaw chʼamañchtʼapjjañapa (Prov. 31:28, 31). Ukatjja arknaqata, usuntata uñjasisas Diosat jan jitheqtapki uka jilat kullakanakat janiw armasiñasäkiti (2 Tes. 1:3-5). Jehová Diosasa Jesucristosa, taqe jupanakaruw chuymachtʼapjje (2 Tesalonicenses 2:16, 17 liytʼañataki).

6. Isaías 32:1, 2 textorjamajj ¿kunsa jilïr irpirinakajj lurapjjañapa?

⁶ (Isaías 32:1, 2 liytʼañataki). Jan wali urunakanwa jaktanjja, ukatwa llakita jan ukajj aynachtʼat uñjassna. Jesucristojja alajjpachar sarañatak ajllitanak toqe, ‘marka apnaqerinakʼ toqe, mä arunjja yaqha ovejanakjam uñtʼatäpki uka taypinkir jilïr irpirinak toqew yanaptʼistu. Jilïr irpirinakajj janiw jilat kullakanakjjar ‘munañanïpkiti’, jan ukasti ‘trabajir masinakäpjjewa’. Jupanakajj kusisitäñasataki, Diosat jan jitheqtañasatakiw yanaptʼapjjestu (2 Cor. 1:24).   

7, 8. Arumpik chʼamañchtʼañat sipansa, ¿kunjamsa jilïr irpirinakajj jilat kullakanakar chʼamañchtʼapjjarakispa?   

⁷ Jilïr irpirinakajj apóstol Pablotwa yateqasipjjañapa. Jupajja, Tesalónica markan arknaqatapkäna uka jilat kullakanakarojj akham sänwa: “Jumanakar wal munasipjjataj laykojja, janiw Diosan suma yatiyäwinakap yatiyañak amtapkayätti, jan ukasti jumanakar yanaptʼañatakejj  vidanakaj churañsa amtapjjarakiyätwa, jumanakar wal munasipjjataj layku” sasa (1 Tes. 2:8).

⁸ Apóstol Pablojja janiw arumpik chʼamañchtʼañajj wakiskiti sasaw qhanañchäna. Éfeso markankir jilïr irpirinakarojj akham sänwa: ‘Aynachtʼatäpki ukanakar yanaptʼapjjañamawa. Tatit Jesusan arunakapsa amtasipjjañamarakiwa, jupajj akham sänwa: “Katoqañat sipansa churañanwa jukʼamp kusisiñajj utji”’ sasa (Hech. 20:35). Pablojj janiw jilat kullakanakar arumpik chʼamañchtʼkänti, jan ukasti jukʼampinakwa luräna. Ukatwa akham säna: “Nayajj taqe chuymaw jumanak laykojj kunanakatï utjkitu ukanak churäjja, naya pachpaw qʼal merqʼsusëjja” sasa (2 Cor. 12:15). Jilïr irpirinakajj ukhamarakiw jilat kullakanakar arumpik chʼamañchtʼañat sipansa, luratanakampi chʼamañchtʼapjjañapa. Ukhamatwa jupanakat cheqpachapun llakisipjjatap uñachtʼayapjjani (1 Cor. 14:3).

9. ¿Kunjamsa jilïr irpirinakajj jilat kullakanakar cheqañchkasajj chʼamañchtʼapjjaspa?

⁹ Jilïr irpirinakajja, awisajj jilat kullakanakar chʼamañchtʼañatakejj ewjjtʼapjjañapawa, jan ukajj cheqañchapjjañapawa. Ukjja Bibliarjamaw lurapjjañapa. Jesusatwa yateqasipjjaspa, jaktayatäjjäna uka qhepatjja, Asia Menor cheqankir walja congregacionanakaruw cheqañchäna. Ukampis janïr cheqañchkasajja, Éfeso, Pérgamo, Tiatira cheqankir congregacionanakarojj chʼamañchtʼänwa (Apoc. 2:1-5, 12, 13, 18, 19). Laodicea markankir congregacionarojj akham sänwa: “Taqe khitinakarutejj nayajj munaskta ukanakarojj toqenoqtwa, cheqañcharaktwa. Ukhamajj juchanakamat arrepentisim, Diosar taqe chuyma servirakim” sasa (Apoc. 3:19). Jilïr irpirinakajj Cristotwa jilat kullakanakar cheqañchañatak yateqasipjjañapa.

10. ¿Kunsa maynit maynikam chʼamañchtʼasiñatakejj taqenis lursna?

¹⁰ Janiw jilïr irpirinakakejj mayninakar chʼamañchtʼapjjañapäkiti. Pablojj taqe cristianoruw akham ewjjtʼistu: “Kunatï mayninakar chʼamañchtʼañatakejj yanapki ukakwa wakisitarjam parlapjjañama, ukhamat kunatï istʼirinakamarojj yanaptʼkaspa uk arsupjjañamataki” sasa  (Efes. 4:29). Cheqas kuna yanaptʼsa jilat kullakanakajj munapjje uk taqeniw amuyañasa. Pablojj hebreo cristianonakarojj akham sänwa: “Jan chʼamani amparanaksa jan chʼamani qonqorinaksa chʼamanir tukuyapjjam, kayunakamatakisa cheqa thakinak lurasisipkakim, ukhamat cojo kayojj jan qhaqsusiñapataki, antisas waliptañapataki” sasa (Heb. 12:12, 13). Wayn tawaqonakas jilat kullakanakarojj chʼamañchtʼapjjaspawa.

11. ¿Kunas mä kullakarojj llakimp aynachtʼatäkäna ukhajj yanaptʼäna?

¹¹ Marta * sat mä kullakat parltʼañäni, jupajj llakimp aynachtʼatänwa. Kullakajj akham siwa: “Mä urojja, Jehová Diosaruw yanaptʼa mayisiyäta, uka urojj mä jilïr kullakampiw jikista. Jupajj munasiñampi khuyapayasiñampiw uñjitäna, ukham yanaptʼatäñ walpun munayäta. Jupajja, ‘jumjamarakiw nayajj mä tiempon wali llakitäyäta’ sitänwa, ukaw jan sapakjam amuyasiñatak yanaptʼitäna” sasa. Uka jilïr kullakajja, kunjamsa arunakapajj Marta kullakar chʼamañchtʼäna uk janiw amuykpachänti.

12, 13. ¿Kuntï Filipenses 2:1-4 qellqatan siski ukarjamajj kunjamsa jilat kullakanakar chuymachtʼsna?

¹² Apóstol Pablojja, Filipos markankir taqe jilat kullakanakaruw akham ewjjtʼäna: “Cristomp mayakïpjjatam laykutejj jumanak taypin maynit maynikam chʼamachtʼasiñasa, munasiñat chuymachtʼasiñasa, maynit maynikam llakisiñasa, munasiñasa, sinttʼasiñas utjchi ukhajja, ukarjam sarnaqasipkakim, mä amuyunikïpjjam, mä pachpa munasiñanikïpjjam, mayachtʼat sarnaqapjjam, mä pachpa amtanikïpjjam, ukhamatwa nayar wal kusisiyapjjetäta. Jan kunsa jumanakajj jiskhisiñ laykusa ni wali wal tukuñ laykus lurapjjamti, jan ukasti mayninakarojj humilde chuymamp uñjapjjam, jumanakat sipansa jilïrïpkaspas ukhama. Jan jumanak pachpatak llakisipjjamti, jan ukasti mayninakatsa llakisipjjarakim” sasa (Filip. 2:1-4).

¹³ Pablon uka arunakapajja, kunjamsa jilat kullakanakar taqenis chʼamañchtʼsna ukwa amuytʼayistu. Jupanakat sinttʼasiñasawa, chuymachtʼañasawa, munasiñasawa, maynit maynikamas llakisiñasarakiwa.

14. ¿Kunjamsa mayninakar chʼamañchtʼsna?

¹⁴ Diosar servipjjañapatak nayrajj yanaptʼkäyätan ukanakajj jichhakamas Diosar servisipkakiwa, uk uñjasajj wal kusistanjja. Apóstol Juanajj akham sänwa: “Wawanakajan cheqa yatichäwinakarjam sarnaqaskatap istʼasajj walpun nayajj kusista” sasa (3 Juan 4). Walja precursor jilat kullakanakajja, Bibliat yateqerinakapajj kunjamsa Jehová Diosar jan jitheqtas servisipki, yaqhepajj precursorat servisipki uk yatiñajj wali chʼamañchtʼkiriwa sasaw sapjje. Ukhamajj mä precursoratï aynachtʼatäni ukhajja, kunjamsa walja jaqenakaru Diosar uñtʼapjjañapatak yanaptʼawayi ukwa amtayañasa.

15. ¿Kunjamsa Diosar jan jitheqtas servir jilat kullakanakarojj chʼamañchtʼsna?

¹⁵ Tamanak tumptʼir walja jilatanakajj akham sapjjewa: ‘Congregacionanakar visittʼasajj mä jilatasa jan ukajj kullakas yuspärañatak mä tarjeta esposajampir churapjjetu ukhajja, wal chʼamañchtʼapjjetu’ sasa. Ukhamarakiw jilïr irpirinakaru, misioneronakaru, precursoranakaru ukat betelitanakaru Diosar taqe chuyma servipjjatapat chʼamañchtʼañatak yuspärsna.

16. ¿Kunjamsa mayninakar chʼamañchtʼsna?

¹⁶ Jiwasatï ajjsarirïstanjja, mayninakar janiw chʼamañchtʼkiristti sasajj janiw amuyañasäkiti. Mayninakar chʼamañchtʼañajj janiw chʼamapunïkiti. Mä jilatarusa jan ukajj kullakarusa kusisitaw aruntañasa. Ukampis jupatï jan kusisit aruntkistani ukhajja, ak amtañasawa: inas kuna jan walinakan uñjasiskchi, maynimpi parlañsa munarakchi. Uk uñjasajja, jupar chʼamañchtʼañatakejj taqe chuymaw istʼañasa (Sant. 1:19).

17. ¿Kunas Henri jilatar jan aynachtʼañatak yanaptʼäna?

 ¹⁷ Pä tunka marani Henri jilatat parltʼañäni. Jupajj wali aynachtʼatänwa, familiapat waljaniw Diosat jitheqtjjapjjäna, jupanakat maynejj tatapänwa, tatapajj respetat jilïr irpirïnwa. Tamanak tumptʼir mä jilatajja, Henri jilatar chʼamañchtʼañatakejj juntʼüma umtʼasiñatakiw irpäna, ukanwa llakinakap taqe chuyma istʼäna. Familiapar yanaptʼañatakejja, Henri jilatajj Jehová Diosaruw taqe chuyma istʼañapäna, ukwa amuyasïna. Salmo 46, Sofonías 3:17, Marcos 10:29, 30 textonakas chuymachtʼarakïnwa.

18. 1) ¿Salomón reyejj kamsasas qellqäna? 2) ¿Apóstol Pablojj kamsasas ewjjtʼarakïna?

¹⁸ ¿Kunsa Henri jilatatsa Marta kullakatsa yateqsna? Taqeniw mayninakar chʼamañchtʼsna. Salomón reyejj akham sasaw qellqäna: ‘Kunja askisa arunak horasapar jikjjatañajja’ sasa. Ukat akham sarakïnwa: “Suma kankañampi [jan ukajj nayrampi] uñtäwejj chuymarojj kusisiyiwa; suma yatiyäwinakasti chʼamañchiwa” sasa (Prov. 15:23, 30). Ukhamajj jilat kullakanakar aynachtʼat uñjañäni ukhajja, ¿kunsa lursna? Inas Yatiyañataki revistata jan ukajj Internetan jw.org cheqatwa mä yatichäwi liytʼarapsna. Apóstol Pablojj akham sarakïnwa: “Jumanakajj maynit maynikam yatichasisipkakim, chʼamañchtʼasisipkakim, salmonakampi, Diosar jachʼañchäwinakampi, yuspärañ cantonakampi, adorañ cantonakampi. Jehová Diosatakis chuymatpach cantapjjam” sasa (Col. 3:16; Hech. 16:25). Ukhamajja, Diosar cantañataki utjki ukanak mayninakampi cantañajj wal chʼamañchtʼistaspa.

19. ¿Kunatsa jutïrin maynit maynikam chʼamañchtʼasiñajj jukʼamp wakiskirïni, ukat kunsa lurañasa?

¹⁹ Jehová Diosan urupajj jukʼamp jakʼachasinjjepanjja, maynit maynikam chʼamañchtʼasiñajj jukʼamp wakiskirïniwa (Heb. 10:25). Ukhamajj apóstol Pablon aka ewjjtʼapar istʼapjjapuniñäni, jupajj akham sänwa: “Jumanakajj maynit maynikam chʼamañchtʼasisipkakim, maynit maynikamas yanaptʼasisipkakim, kunjamtï lurasipkta ukhama” sasa (1 Tes. 5:11).