PASÏR marajja, walja jilatanakaruw jilïr irpirita ukat congregacionan yanapiripat uttʼayasiwayi. Jumatï jupanakat maynïrïstajja, wali kusisitäpachätawa.

Ukampis inas janis wakichtʼatäkasma ukham amuyassta. Jason sat mä jilatajj siwa: “Jilïr irpirit uttʼayapkitäna ukhajja, janis luräwinakaj phoqañ puedkirista ukham amuyasiyäta” sasa. Moisés, Jeremías chachanakajja, kun lurapjjañaptï Diosajj maykäna uk janis phoqerjamäpkaspa ukhamwa amuyasipjjäna (Éx. 4:10; Jer. 1:6). Jumajj inas janiw luräwij phoqañ puedkäti sasin amuyaraksta. Ukhamächejja Timoteon sarnaqäwipaw yanaptʼätam (Hech. 16:1-3).

Pablojj jupamp chika sarañapatak Timoteor invitkäna ukhajja, inas Timoteojj 20 maranïchïna. Waynakiskänwa, ukhamajj congregacionan luräwinakap phoqañajj inas jupatak chʼamakïchïna, ajjsarayasirakpachänwa (1 Tim. 4:11, 12; 2 Tim. 1:1, 2, 7). Ukampis 10 maranak qhepatjja, Filipos congregacionar Pablojj akham sänwa: “Tatit Jesusan munañapächejja, akat mä jukʼa urunakatjja Timoteoruw jumanakan ukar khitaniñ muntjja [...]. Nayatakejj janiw khitis jupjamajj utjkiti, jupajj cheqpachapuniw jumanakat llakisi” sasa (Filip. 2:19, 20).

Timoteojj wali yateqaskay jilïr irpirëjjänwa. ¿Kunas yanaptʼpachäna? Jupajj kunanaksa lurirïna uk sojjta toqet yatjjatañäni.

1. Mayninakat llakisïnwa. Filipos markankir cristianonakarojj Pablojj sänwa: “[Timoteojj] cheqpachapuniw jumanakat llakisi” sasa (Filip. 2:20). Timoteojj wal jaqenakat llakisïna. Diosamp sum apasipjjaspa uk munäna, ukatwa jupanakar yanaptʼäna.

Autobús apnaqerinakat parltʼañäni. Jupanakajj horar puriñatakikiw chʼamachasipjje, janiw jaqenak aptañatakejj llakisipkiti. 20 jila maranak jilïr irpirit servir William jilatajja, akham sasaw congregacionan jichhak uttʼayatäpki uka jilatanakar ewjjtʼi: “Jilat kullakanakarojj munasiñamawa. Janiw congregacionan luräwinakam phoqañatakik chʼamachasiñamäkiti, jan ukasti yanaptʼañatakiw chʼamachasiñama” sasa.

2. Diosar serviñaw jupatak nayrankäna. Timoteompita yaqha jilatanakampit parlkasajj Pablojj akham sänwa: “Mayninakajj kuntï jupanakajj munapki ukak thaqasipki, janiw kuntï Jesucristojj munki uk thaqapkiti” sasa (Filip. 2:21). Roma markankir jilatanakajj munañanakapakwa nayrar uchapjjäna, Diosar serviñatakejj janiw chʼamachasipkänti ukwa Pablojj amuyäna. Ukampis Timoteojj janiw ukhamäkänti. Jupajj jukʼamp yatiyañatakiw chʼamachasirïna, Isaías profetjamarakiw ‘akankasktwa, nayar khitasita’ sasin sirïna (Is. 6:8).

Congregacionansa familiansa luräwinakam sum phoqañatakejja, ¿kunsa lurasma? Nayraqatjja, jakäwiman kunas nayranki ukwa amuytʼasiñama. Pablojj sänwa: ‘Kunatejj wali wakiskirïki uk amuyapjjañamawa’ sasa (Filip. 1:10). Kunatï Diosatakejj wakiskirïki ukajja, jumatakejj wakiskirirakïñapawa. Ukatjja, kunatï tiempsa chʼamsa apaqkiristam ukanakatwa amuyasiñama. Pablojja Timoteorojj akham ewjjtʼäna: “Kunanaktï maynejj waynäkasin munki ukanakat jumajj jitheqtam, antisas cheqaparjam sarnaqañataki, Diosar confiyañataki, munasirïñataki, sumankañataki chʼamachasim” sasa (2 Tim. 2:22).

 3. Diosar serviñatakejj chʼamachasïnwa. Filipos congregacionarojj akham sasaw Pablojj amtayäna: “Jumanakajja kunjam suma chuymanis Timoteojj uk yatipjjtawa. Kunjamtï mä yoqajj awkipampi trabajkejja, ukhamarakiw jupajj nayamp chikajj suma yatiyäwinakan nayrar sartañapatakejj mä esclavjam serviwayi” sasa (Filip. 2:22). Timoteojj janiw jayräkänti. Panpachanejj wal trabajipjjäna, ukhamatwa suma amigöjjapjjäna.

Diosan markapanjja, walja lurañanakaw utji. Diosar servisajj kusisitäyätawa, jilat kullakanakarus jakʼachasirakïtawa. Ukhamasti “Tatitur serviñansa walpun trabajipjjam” (1 Cor. 15:58).

4. Kuntï yateqkäna ukarjamaw jakarakïna. Pablojj akham sasaw Timoteor qellqäna: “Jumajj wali amuyumpiw yatichäwinakaj arkasktajja, sarnaqäwinakajsa, amtäwinakajsa, Diosar confiyatajsa, paciencianïtajsa, munasirïtajsa, aguantatajsa wali amuyumpirakiw arkasktajja” sasa (2 Tim. 3:10). Timoteojj kuntï yateqkäna ukarjamaw sarnaqäna, ukatwa jukʼamp luräwinak katoqäna (1 Cor. 4:17).

Luräwinakam sum phoqañatakejja, yateqaskay mä jilatampiw yanaptʼayasisma. Walja maranak jilïr irpirit serviri Tom jilatajj akham siwa: “Yateqaskay mä jilataw yanaptʼitäna. Juparojj yanaptʼap mayipunirïtwa, ukarjamarakiw kunsa lurirïta. Ukaw jan ajjsarañatak yanaptʼawayitu” sasa.  

5. Diosar serviñan jiltaskakïnwa. Pablojj “Dios chuymäñatak chʼamachasiskakim” sasaw Timoteor säna (1 Tim. 4:7). Mä tʼijurejj yatichirinïskaspawa, ukampis jupa pachpaw sum wakichtʼasiñapa. Ukatwa Pablojj Timoteor akham säna: “Mayninak nayraqatan sum liytʼañatakisa, mayninakar chʼamañchtʼañatakisa, yatichañatakisa chʼamachasiskakim. [...] Ukanakatjja lupʼiskakim, taqe chuymarak ukanak luram, ukhamat taqenis nayrar sartatamjja qhan amuyapjjañapataki” sasa (1 Tim. 4:13-15).

Diosar jukʼamp serviñatakejj chʼamachasiñamawa, jiltaskakiñamarakiwa. Bibliat yatjjatañataki, Diosan markapan kuna mayjtʼäwinakas utji ukanak yatjjatañatakiw chʼamachasiñama. Congregacionan kunas utjani ukhajja nayraqat yatjjatañamawa, janiw Diosar walja maranak servitam laykojj juma pachpa confiyasiñamäkiti. Timoteotwa yateqasiñama, jupajj ‘kunjamsa sarnaqaskäna, kunjamsa yatichaskäna ukanakatjja amuytʼasipunirïnwa’ (1 Tim. 4:16).

6. Diosan espíritu santoparuw confiyäna. Pablojj Timoteor akham sänwa: “Kunatï jumar katuyatäki ukjja, espíritu santon yanaptʼapampi sum cuidam, uka espíritu santojj taqe jiwasampïskiwa” sasa (2 Tim. 1:14). Luräwinakap sum phoqañatakejja, Timoteojj Diosan espíritu santoparuw confiyañapäna.

Jilïr irpirita walja maranak servir Donald jilatajj akham siwa: “Congregacionan uttʼayatäpki uka jilatanakajja, Diosamp sum apasiñatakiw chʼamachasipjjañapa, ukjja wali valoranitwa uñjapjjañaparaki. Ukhamtï lurapjjanejja, ‘chʼamanakapajj jiljjattaniwa’. Diosar espíritu santop mayipjjani ukat ukarjam sarnaqapjjarakini ukhajja, jilat kullakanakatakejj mä bendicionäpjjaniwa” sasa (Sal. 84:7; 1 Ped. 4:11).

Congregacionan jichhak uttʼayatäpki uka jilatanakan nayrar sartasipkatap uñjañajj wali kusiskañawa. Qalltan parltʼaniwayktan uka Jason jilatajj akham siwa: “Jilïr irpirita walja maranak serviñajj wal yanaptʼawayitu, jichhajj janiw ajjsarayasjjtti. Jilïr irpirita serviñajj wal kusisiyitu, nayatakejj wali valoraniwa” sasa.

Diosar serviñatakejj chʼamachasiskakiñamawa. Timoteot yateqasiñatak chʼamachasim. Ukhamatwa Diosan markapatakejj mä bendicionayäta.