Bibliat apstʼat qellqatanakajj jan kun mayisakiw jaqenakar churasi. Ukhamajja yaqhepajj uka qellqatanaka pachpa Internetaru, jan ukajj redes sociales ukanakar uchañajj walikïskaspas ukhamwa amuyapjje. Ukampis “Ak amtañamapuniwa” (Términos y Condiciones de Uso) siski uka cheqarjamajj janiw walïkiti. Ukham lurasajja waljaniw jan walin uñjasiwayapjje. “Ak amtañamapuniwa” siski uka cheqajja, jw.org cheqan nayrïr paginapan aynach toqenwa uñsti. Ukanwa kunanak lurañas jan walïki uk akham sasin qhanañchi: “Taqe kunatï akan utjki ukanakjja, janipuniw pachpa Internetan yaqha cheqar uchasiñapäkiti (janirakiw redes sociales satäkis ukaru, ni documentonak yaqhanakan uñjapjjañapatak utjki uka cheqanakarus uchasiñapäkiti)” sasa. Uka ewjjtʼanak amtañajja wali wakiskiriwa.

Internetan utjkistu taqe uka qellqatanakajja derechos de autor ukan jarkʼatawa. Dios contra saytʼiri jaqenakasa, Diosan markapar uñisipki ukanakas Internetanwa qellqatanakas uchapjje, ukhamat Testigonakasa jan ukhajj yaqha jaqenakas ukar mantapjjañapataki. Ukanjja, jaqenakar pächasiyir kʼari yatichäwinakaw utji (Sal. 26:4; Prov. 22:5). Yaqhepanakajja, kunatï qellqatanakasan mistki ukanakwa apnaqapjje, jw.org uka letranak kunayman cosasanak aljañataki, celularataki jan ukajj tabletatak aplicacionanakwa lurapjje. Ukanak jan lurapjjañapatakejja, Diosan markapajj jarktʼaspawa. Maynejj jan walinwa uñjasirakispa (Prov. 27:12). Diosan markapatï yatkasina Testigonakarusa jan ukajj yaqha jaqenakarusa, Bibliat apstʼata qellqatanakas pachpa Internetaru uchapjjañapatak jaytsna ukajj janiw walïkaspati. Ukat jw.org uka letranakampi  kunayman cosasanak aljañ jaytsna ukajj janiw walïkarakispati. Ukham jaytsna ukhajja, Diosan markap conträpki ukanakatsa aljirinakatsa janiw tribunalanakajj arjjatjjestaspati.

Bibliat apstʼata qellqatanak yaqha cheqanakat apaqañajj janiw walïkiti. ‘Suma phoqeri amuyasir esclavokiwa’ Jehová Diosat yatichañatak uttʼayatajja (Mat. 24:45). Suma phoqeri amuyasir esclavojja, Internetan aka paginanak toqekiw yatichistu: www.pr418.com, tv.pr418.com, wol.pr418.com. Ukatjja, aka aplicacionanakakiw utji: JW Language^®, JW Library^®, JW Library Sign Language^®. Uka paginanakansa aplicacionanakansa janiw aljañ toqet yatiyäwinakajj utjkiti, janirakiw Supayan apnaqat akapachampis qʼañuchatäkiti. Yaqha cheqanakat qellqatanak apaqsna ukhajja janiw cheqäkaspati, mayjtʼayatäspawa (Sal. 18:26; 19:8).

Maynitï qellqatanakas kawkjantï yaqhanakajj uka toqet qellqanipki ukhar uchaspa ukhajja, Dios contra saytʼirinakasa, markapar uñisirinakasa, pächasiyir arunakwa qellqanipjjaspa, Diosatsa jitheqtayistaspawa. Yaqhep jilat kullakanakajja, Internetan cheqa yatichäwinak arjjatañ laykojj chʼajjwañaruw puripjje. Janiw Internetajj Diosat ‘jan istʼañ munirinakarojj llampʼu chuymampi yatichañatak’ mä suma lugaräkiti (2 Tim. 2:23-25; 1 Tim. 6:3-5). Maysa toqetjja, Diosan markapan sutipampi, Oraqpachan Jilïr Irpirinakan sutipampi uchata cheqanakaw Internetana jan ukajj redes sociales ukanakan uñsti. Ukampisa, janiw Oraqpachan Jilïr Irpirinakat ni maynis Internetan mä paginanïpkiti ni redes sociales ukanakansa mä cuentanïpkiti, ukanakajj kʼarikiwa.

Jaqenakar jw.org cheqar mantapjjañapatak invitktan ukhajja “suma yatiyäwinaka” yatiyasiñapatakiw yanaptʼasktanjja (Mat. 24:14). Internetan utjkistu uka Bibliat apstʼat qellqatanakajja, jukʼamp sumaw lurasjje. Taqenis suma yatichäwinak apssna ukwa muntanjja. Ukampisa “Ak amtañamapuniwa” siski uka cheqarjamajja, qellqatanak correo electrónico toqejj apayasksnawa jan ukajj Internetar mantapjjañapatak dirección apayaraksnawa. Kunatï cheqäki uk yatiñ munirinakarojj jw.org cheqar mantapjjañapatak invitktan ukhajja, ‘suma phoqeri amuyasir esclavompi’ yatichatäpjjañapatakiw yanaptʼtanjja.