Hebreo arun qellqaskäna uka qellqatanakarjamajja, ukajj pä toqet amuyañjamäspawa. Ukhamajj khitinakatsa uka Salmo qellqatajj parlaski uk yatiñatakejj pä toqet yatjjatañäni:

1. Salmo 144 qellqatajj kuna toqetsa parlaski uk sum yatjjatañasawa. Traducción del Nuevo Mundo de las Santas Escrituras sat Bibliajj Inglés arun 2013 maran uñakipasiwayi ukanjja, 12 versiculon “then” aruw uñsti. Uka arojja, 12-14 versiculonakan parlki uka bendicionanakjja, cheqapar sarnaqer jaqenakaw katoqapjjani sasin qhanañchañatakiw apnaqasi. Uka cheqapar sarnaqer jaqenakajja, ñanqha jaqenakat ‘qhespiyatäña jan ukajj salvatäñwa’ mayipjje (versículo 11). 15 versiculonwa ukajj ukhamäskapunitap jukʼamp qhanañchi. Ukanjja ‘Diosan markapajj’ ‘kusisiñaniwa’ sasaw pay kuti qhanañchi, ukhamasti cheqapar sarnaqer jaqenakatwa parlaski.

2. Ukham qhanañchasitapajja Diosajj markapatak apankani uka bendicionanakat parlir yaqha textonakampejj kikpakiwa. Salmo 144 qellqatajja, Davidajj Diosaw Israel markarojj enemigonakapat salvani, ukatjja kusisit jakasiñampiw bendisini sasin taqe chuyma confiyatapwa uñachtʼayistu (Lev. 26:9, 10; Deut. 7:13; Sal. 128:1-6). Amuytʼañataki, Deuteronomio 28:4 qellqatan akham siwa: ‘Bendisitäniw taqe wawanakamasa, cosechanakamasa, vacanakamasa, ovejanakaman qallunakapasa, taqe uywanakamasa’ sasa. Cheqansa, David chachan Salomón yoqapajj Israel markan reyipäkäna ukhajja, sumankañasa kusisiñas jilarkiriw utjäna. Salomón reyin apnaqäwipajja, Jesusajj Diosan Reinopan apnaqkani ukhajj kunjamänisa ukwa uñachtʼayäna (1 Rey. 4:20, 21; Sal. 72:1-20).

Ukhamajja, Salmo 144 qellqatajj kunanaktï jutïritak Diosan servirinakapajj suytʼasipktan ukar jukʼamp confiyañatakiw yanaptʼistu. Jutïrinjja ñanqha jaqenakajj tukjatäpjjaniwa, ukatjja cheqapar sarnaqer jaqenakatakejj sumankañasa kusisiñas jilarkiriw utjarakini (Sal. 37:10, 11).