KUNJAM jaqëñatakis espíritu santojj yanaptʼistu ukwa apóstol Pablojj llätunka toqet qhanañchäna (Gál. 5:22, 23). Ukanakajj ‘espíritu santon achupa’ * satawa, ukaw cristianjam “machaq jaqëñamp isthapisi[ñatak]” yanaptʼistu (Col. 3:10). Kunjamtï suma uñjat mä arbolajj suma fruta achoqkejja, ukhamarakiw espíritu santon achuparjam sarnaqapki ukanakajj suma jaqëpjje (Sal. 1:1-3).

Apóstol Pablojj munasiñatwa nayraqat parläna. ¿Kunatsa munasiñajj wali wakiskirejja? Jan munasiñanejj “janiw nayajj kunäkiristsa” sasaw Pablojj säna (1 Cor. 13:2). ¿Kunas munasiñajja? ¿Kunsa jukʼamp munasirïñatak lursna? ¿Kunjamsa munasirïtas sapür uñachtʼaysna?

Munasiñajj kunasa ukajj janis arunakampi sañjamäkchejja, munasir jaqejj kunjamasa ukwa Bibliajj akham sasin qhanañchi: “Munasir jaqejj paciencianiwa, khuyapayasiriwa”, “kunatejj cheqäki ukatwa kusisi”, “taqe kunansa amukiw tʼaqesi, taqe kun creyiraki, taqe kun suytʼi, taqe kun aguanti” sasa. Ukhamarus munasir jaqejj taqe chuymaw yaqhanakat llakisi, suma amigorakiwa. Ukampis jan munasir jaqejj envidiasiri, jachʼa jachʼa tukuri, munañapak thaqeri, jan walinak luratajj amjjäsiri, jan perdoniri ukhamawa. Ukampis jiwasajj janiw ‘kunatï jiwasatak walïki ukak thaqeri’ jaqëñasäkiti (1 Cor. 13:4-8).

“Diosajj munasiñawa”. Ukhamasti, Jehová Dios pachpaw munasiñajja (1 Juan 4:8). Ukaw taqe luratanakapan qhan amuyasi. Jehová Diosajj Jesusaruw jiwas layku jiwañapatak aka oraqer khitanïna, ukhamatwa jaqenakar wal munasitap uñachtʼayi. Apóstol Juanajj akham sasaw qellqäna: “Diosajj mä sapa Yoqaparuw akapachar khitanïna, ukhamat jupïpan wiñay jakañ katoqañasataki, ukhamatwa Diosan munasiñap uñjtanjja. Diosaw Yoqaparojj juchanakas laykojj mä sacrificior uñtat khitanïna, ukhamat jupampi sumankthapiñasataki. Janiw jiwasan juparu munasitas laykojj uk lurkänti, jan ukasti jiwasar munasitap laykuw uk luräna” sasa (1 Juan 4:9, 10). Jehová Diosan munasiñapatwa juchanakasat perdonatätanjja, wiñay jakañsa suyaskaraktanjja.

Diosan amtap phoqañatakejja, Jesusajj taqe chuymaw jaqenak layku jiwir jutäna, ukhamatwa wali munasirïtap uñachtʼayarakïna. Pablojj akham sänwa: “Jiwasanakajj Diosan uka ‘munañapatwa’ qʼomachatätanjja, Jesucristojj cuerpop mä kutiki wiñayatak loqtasitap layku” sasa (Heb. 10:9, 10). Janipuniw khitis Jesusjam munasiñ uñachtʼaykaspänti. Jesusajj akham sänwa:  “Khititï jakañap amigonakap layku churki ukat sipansa jukʼamp munasiñanejj janiw utjkiti” sasa (Juan 15:13). Jiwasajj jucharar jaqëkstansa, ¿Jehová Diosatsa Jesusatsa munasirïñ yateqassnati? Jïsa. Kunjamsa jupanakat yateqassna uk uñjañäni.

Apóstol Pablojj akham sasaw chʼamañchtʼistu: “Diosan munat wawanakapjamajj jupat yateqasipjjam, munasiñan sarnaqasipkakim, kunjamtï Cristojj munaskistojj ukhama, jupajj [...] sacrificior uñtataw jiwasanak laykojj jakäwip Diosar loqtasïna” sasa (Efe. 5:1, 2). Munasirïtasajj sapüruw qhanäñapa, ukhamatwa munasir jaqëskakiñäni. Munasirïtasajj luratanakasanwa qhan amuyasiñapa, janiw arukïñapäkiti. Apóstol Juanajj akham sänwa: “Munat wawanaka, janiw arumpikisa ni lakampikisa munasiñasäkiti, jan ukasti luratasampi cheqapampi munasiñasawa” sasa (1 Juan 3:18). Jehová Diosampir jaqenakampir munasitasatwa, ‘Reinon suma yatiyäwinakap’ yatiyir sartanjja (Mat. 24:14; Luc. 10:27). Jiwasajj paciencianïktan, suma chuymanïktan, perdonirïktan ukhaw munasirïtasajj qhan amuyasiraki. Ukatwa Biblian akham sasin ewjjtʼistu: “Kunjamtï Jehová Diosajj taqe chuyma perdonapktamjja, ukhamarak jumanakajj perdonasipjjam” sasa (Col. 3:13).

Ukampis munasiñajj janiw taqe kunsa iyaw sasaki kuns lurañäkiti. Sañäni: yaqhep awk taykanakajj wawapan jan jachjjañapatakejj inas kuntï munki uk lurapjjakchi. Ukampis wawanakapar cheqapun munasir awk taykajja, cheqañchiwa. Jehová Diosajj ukhamarakiw ‘munaski ukanakarojj cheqañchi’ (Heb. 12:6). Ukhamasti wakisitarjam cheqañchasajj munasiñwa uñachtʼaytanjja (Pro. 3:11, 12). Ukampis juchararätas laykojja, awisajj jan munasiñampiw kunsa lursna. Ukatwa jukʼamp munasirïñatakejj chʼamachasiskakiñasa. Kunas yanaptʼistaspa uk kimsa toqet uñjañäni.

Maya. Espíritu santo churita sasaw Diosar mayisiñasa. Diosajja “mayipki ukanakarojj espíritu santo” churiwa sasaw Jesusajj säna (Luc. 11:13). Jiwasatï ukham mayisiñäni, ‘espíritu santompi irpayasiñatakis’ chʼamachasirakiñäni ukhajj sapürutjamaw jukʼamp munasirïñäni (Gál. 5:16). Jilïr irpirinakajja, Bibliarjam munasiñampi ewjjtʼañatakejj Diosaruw espíritu santop mayisipjjaspa. Awk taykanakajj ukhamarakiw wawanakapar munasiñampi cheqañchañatakejj espíritu santon yanaptʼap mayisipjjaspa.

Paya. Jesusarojj walsa tʼaqesiyapkchïnjja, munasiñampiw jupanakar uñjaskakïna (1 Ped. 2:21, 23). Jupat yateqasiñajja, chuym ustʼayapkistu, jan ukajj ina chʼusat tʼaqesiyapkistu ukhaw yanaptʼistaspa. Ukham jan walinakan uñjasisajj akham jisktʼasiñasawa: “¿Kunsa Jesusajj luraspäna?” sasa. Leigh sat mä kullakarojja, ukham jisktʼasiñaw amuytʼasiñatak yanaptʼatayna. Jupajj akham siwa: “Nayamp chik trabajir mä warmejja, trabajojan kuntï lurkta ukanakatsa nayatsa jan wal parlasaw taqenir mä correo apayäna. Ukham luratapajj walpun chuym ustʼayitäna. Ukhaw ‘¿kunsa Jesusajj luraspa?’ sasin jisktʼasiyäta. Kunsa Jesusajj luraspäna ukanakat amuytʼasisajja, uka jan walit armasjjañwa amtayäta. Qhepatjja uka warmejj wali usutätapa, wali llakitätapwa istʼayäta. Ukatwa janiw jan wali amtampi ukham qellqkpachänti sasin amuyjjayäta. Jesusajj tʼaqesiyatpachas kunja munasirïnsa ukanak amuytʼañaw jupjamäñatakisa, uka warmir munasiñampi uñjañatakis yanaptʼitu” sasa. Jesusat yateqasiñäni ukhajja, munasiñampiw taqe kunsa lurañäni.

Kimsa. Yaqhanakar munasiñampi yanaptʼañatakiw chʼamachasiñasa. Cheqpach cristianonakajj ukham munasirit uñtʼatäpjjewa (Juan 13:34, 35). Biblianjja “Cristo Jesusajj kunjam amuyunïkäntejj uka pachpa amuyunïpjjarakim” sasaw  ewjjtʼistu. Jesusajj jaqenak laykuw taqe kun apanukus alajjpachat aka oraqer jutäna, jiwañsa janiw ajjsarkänti (Fili. 2:5-8). Jiwasatï Jesusat yateqasis yaqhanakar yanaptʼañäni, munasirïñäni ukhajja, jupjam jaqëñäniwa, yaqhanakan munañapwa nayraqat thaqarakiñäni. Ukhamasti, ¿kunjamsa munasirïñajj yanaptʼarakistu?

Munasirïñatak chʼamachastan ukhajja, walja bendicionanakwa katoqtanjja. Kunanaksa katoqtan ukanakat pay uñjañäni.

• ORAQAPCHAN MÄ FAMILIAKÏÑA. Niyakejjay maynit maynikam munasstanjja, kawkïr congregacionansa jilat kullakanakajj munasiñampiw katoqtʼapjjestu. Oraqpachankir jilat kullakanakajj munasiñampi uñjapkistu ukajj Diosan mä bendicionapawa (1 Ped. 5:9). Uka kasta munasiñajj Jehová Diosan markapanakwa utji.

• TAQENIMPIW SUMANKTANJJA. Maynit maynikam aguantastan ukhajja, mayachtʼataw ‘sumankañan jakastanjja’ (Efe. 4:2, 3). Akapachanjja tʼaqa tʼaqaw jaqenakajj sarnaqapjje, ukampis jiwasajj congregacionansa jachʼa tantachäwinakansa mä wawakïtanwa (Sal. 119:165; Isa. 54:13). Taqenimpi sumankañatak chʼamachastan ukhajj munasirïtaswa uñachtʼaytanjja, Diosarus kusisiyaraktanwa (Sal. 133:1-3; Mat. 5:9).

“Munasiñasti chʼamañchtʼasiriwa” sasaw Apóstol Pablojj säna (1 Cor. 8:1). Uka arunakajj kamsañsa muni ukjja, jupa pachpaw 1 Corintios capítulo 13 qellqatan qhanañchäna. Munasir jaqejj “janiw kunatï jupatak walïki ukak thaqkiti” (1 Cor. 10:24; 13:5). Paciencianiwa, kunsa amuyumpi, munasiñampiw luraraki, ukaw suma familianïñatakisa, congregacionan mayachtʼatäñapatakis yanaptʼi (Col. 3:14).

Jehová Diosar munasiñajj wali wakiskiriwa, ukaw kunayman kasta jaqenakar mayachtʼistu, ukhamatwa Diosar mayachtʼata kusisita sirvtanjja (Sof. 3:9). Ukhamasti, munasirïñatak sapüru chʼamachasipjjañäni.