Jesusajj wawäskäna uka toqetjja, Mateo qellqatampi Lucas qellqatampejj janiw mä pachpaki qhanañchapkiti, ¿kunatsa? Sapa maynejj kunjamtï amuyapkäna ukarjamaw qellqapjjäna.

Mateojja, kunanakas Joseampejj pasäna uka toqetwa qellqäna. Sañäni, Marian usur jaqëtap yatisasa, kunatï paskani uk mä angelajj samkan siskäna ukanak yatisas kamsänsa, kunjamsa angelan aruparjam luräna ukanakwa qhanañchi (Mat. 1:19-25). Ukatjja, mä angelajj familiamampi Egiptor sarjjam sasaw Josear mä samkan säna, Joseasti ukar istʼänwa sasaw qhanañcharaki. Ukatsti mä angelajj Israel markar kuttʼjjam sasin yaqha samkan siskäna ukhas istʼarakïnwa. Ukat Nazaret markanwa jakasjjäna sasaw Mateojj qhanañcharaki (Mat. 2:13, 14, 19-23). Mateo qellqatan nayrïr pä capitulonakapanjja, Josean sutipajj 13 kutiw uñsti, ukampis Marian sutipajj kimsaqallqo kutikiw uñsti.

Ukampis Lucasajj Mariatwa jukʼamp parlaraki. Mariarojj Gabriel angelaw visittʼäna, jupajj Elisabet warmir visittʼiriw saräna, Jehová Diosaruw jachʼañcharakïna sasaw qhanañchi (Luc. 1:26-56). Ukatjja, kunjamsa Jesusajj tʼaqesini uk Simeonajj Mariar yatiykäna uksa qhanañcharakiwa. Jesusajj 12 maranïskäna ukhajj kunjamsa Mariajj familiapampi templor saräna, kunanakas ukan pasäna ukanakat qhanañchkasajja, Lucasajj Marian arunakapakwa ayti, janiw Joseat kamskisa. Ukat kunanakatï paskäna ukanakatwa Mariajj chuymapan amuykiptʼäna sarakiwa (Luc. 2:19, 34, 35, 48, 51). Lucas qellqatan nayrïr pä capitulonakapanjja, Marian sutipajj 17 kutiw uñsti, ukampis Josean sutipajj pusi kutikiw uñsti. Ukhamajja, Mateojj kunanaktï Joseajj lurkäna amuykäna ukanakatwa qhanañchi, ukampis Lucasajj Mariatwa qhanañcharaki.

Joseasa Marias kawkïr familiatsa jutäna ukjja, Mateojj janiw kunjamtï Lucasajj qhanañchki ukham qhanañchkiti. Mateojj Josean achachilanakapat parlasinjja, Jesusajj Josean uywat wawapjamajj rey Davidat jutiriwa sasaw säna. Mateon qhanañchataparjamajja, Joseajj Davidan Salomón yoqapat jutirïnwa, ukhamasti leyinakarjamajja Jesusajj Davidat jutirïnwa (Mat. 1:6, 16). Ukampis Lucasajj Marian nayra achachilanakapatwa parläna, ukhamasti Jesusajj “Davidan wawanakapat jutir wawjamaw nasïna” sasaw säna (Rom. 1:3). ¿Kunatsa ukham sispachäna? Mariajj David chachan Natán yoqapat jutirirakïnwa (Luc. 3:31). Ukampis Helí chachan wawapajj Mariänwa, ¿kunatsa Mateojj Joseaw Helí chachan wawapajja sasin sispachäna? Kawkïr familiatsa jutäna uka listanjja, chachanakan sutinakapakiw uñstirïna. Ukhamajja, Joseaw Helí chachan wawapajja sasinjja, tollqapatwa Lucasajj parlaskäna (Luc. 3:23).

Ukhamajja, Joseasa Marias kawkïr familiatsa jutäna ukanakat Mateompi Lucasampejj qhanañchapki ukarjamajja, Jesusajj cheqapuni Mesiasätapwa amuytʼayistu. Fariseonakas saduceonakasa, Jesusajj janiw Davidan familiapat jutkiti sasajj janiw sapkaspänti. Kuntï Mateosa Lucasas qhanañchapki ukajj Jehová Diosar jukʼamp confiyañatakiw chʼamañchistu. Diosajj kuntï jutïrin lurañ amtki ukajj phoqasiniwa sasajj taqe chuymaw confiysna.