“JAN wali awkïtawa. Imill wawamarusa usuri esposamarus jaytanuktawa, ¿khitis jupanakar cuidani, khitis manqʼañsa churarakini? Religionam jaytjjam, utamar kuttʼjjam” sasaw policiajj sitäna. Uk satajja, “janiw familiajar jaytanukkti. Jumanakaw katuntasin akar apanipjjestajja. ¿Kuna juchsa nayajj lurtjja?” sasaw sista. Policiajja, “Testigötamaw jachʼa juchajja” sarakitänwa.

Kuntï alayan siskta ukajj Irkutsk (Rusia) markankir carcelanwa 1959 maran pasäna. Maria esposajampejj Diosat jan jitheqtaña, ‘cheqapar sarnaqapjjataj layku tʼaqesiñwa’ amtapjjta (1 Ped. 3:13, 14). Ukham lurapjjatajat walja bendicionanakwa katoqapjjta. Jakäwijat cuenttʼapjjäma.

Ucrania markankir Zolotniki sat jiskʼa markanwa 1933 maran nasta. 1937 maranjja, Francia markankir Testigo tionakajaw visittʼasajj Gobierno, Liberación sat libronak churapjjetäna, ukanakajj Sociedad Watch Tower jupanakan luratänwa. Awkijajja, uka libronak liytʼasajj wasitampiw Diosar confiyjjäna. Jupajj 1939 maranwa wal usuntäna. Janïr jiwkasajj mamajar akham sänwa: “Akaw cheqa yatichäwejja, wawanakar yaticham” sasa.

Abril, 1951 maranjja, autoridadanakajj Unión Soviética markat inti jalanta toqenkir Testigonakaruw Siberia cheqar apayapjjäna. Mamajampiru, Grigory sat jiskʼa jilajampirojj Ucrania markatwa uka cheqar apayapjjetäna. 6.000 kilometronak trenat sarasajja, Tulun (Siberia) markaruw puripjjta. Bogdan sat jilïr jilajajj kimsa semana qhepatwa Angarsk marka jakʼar purinïna, walja prisioneronakaw ukankapjjäna. Ukanwa 25 maranakajj chʼama tukuñ trabajonak lurañapäna.

Mamajampi Grigory jiskʼa jilajampejja, uka cheqankir jiskʼa markanakan wali amuyumpiw yatiyapjjerïta. Akham sapjjerïtwa: “¿Khitich mä vaca aljañ munaskaspa?” sasa. Maynejj ‘aljirismawa’ siri ukhajja, mä vacajj kunjam lurtʼatasa uka toqet parlañ qalltasaw taqe kun Lurir Diosat parljjapjjerïta. Uka tiempotakejja, ‘Testigonakajj vacanak thaqasajj ovejanakwa thaqasipki’ sasaw mä periodicojj säna. Cheqas ovejanakar uñtasit suma chuymani walja jaqenakaruw Bibliat yatichawayapjjta. Jupanakajj humilde chuymani, wajjtʼasiri ukhamäpjjänwa, Bibliat yatichañajj wali kusiskañänwa. Jichhajj patakats jila yatiyirinakaw Tulun markankir congregacionan utj-jje.

Esposajajj Segunda Guerra Mundial utjkäna ukhaw Ucrania markan Diosan arunakap yateqatayna. 18 maranïskäna ukhajj mä policiaw jupamp ikintasiñ munäna, Mariajj janipuniw iyawskänti. Mä kutejja, utapar purjjäna ukhajj ikiñapar ikintatwa uka policiar katjäna, Mariajj ukaratpachaw utat tʼijsuwayäna. Policiajj wal colerasïna, ‘Testigötamat carcelanwa uñjasïta’ sänwa. 1952 maranjja cheqapuniw carcelar tunka maratak llawintapjjäna. Kunjamtï José waynarojj Jehová Diosar taqe chuyma servitapat carcelar llawintapkänjja ukhamarakiw uñjasïna (Gén. 39:12, 20). Carcelar apkäna uka jaqejj akham sänwa: “Jan ajjsaramti, janiw taqenipunejj carcelat jan walit uñjatajj mistupkiti” sasa. Uka arunakajj walpun jupar chʼamañchtʼäna.

Khä 1952 marat 1956 marakamajja, Mariarojj chʼama tukuñ trabajonakanwa trabajiyapjjäna, Gorki (Rusia) marka jakʼana (jichhajja, Gorki markajj Nizni Nóvgorod satäjjewa). Ukanjja, arbolanakwa saphitpach apsuyapjjäna. Niyakejjay uka cheqajj wali thayächïnjja Mariajj usuntjjänwa. 1956 maran carcelat antutasajj Tulun markaruw khitapjjäna.

Mä kullakaw Tulun markar purinini sasaw mä jilatajj sitäna, ukatwa qʼepip apaña yanapañatakejj autonak purki ukar bicicletat sarta. Mariarojj qalltatpachwa wal munayäta. Iyawsayañajj chʼamäkchïnsa, qhepatjja iyawsjjetänwa. 1957 maranwa casarasipjjta, qhepa marajj Irina wawajaw nasïna. Wali kusisitäpjjayätwa, ukampis 1959 maranjja, qellqatanak imprimitajatwa carcelar llawintapjjetu. Chika maraw mä celdan sapakiyäta. Llakimpi jan aynachtʼañatakejj sapa ratuw orasirïta, qʼochunak cantirïta, jan jarkʼatas yatiykirista ukham amuyirïta.

Carcelan jisktʼapkitäna ukhajja, mä policiajj akham toqjitäna: “Testigonakarojj niyaw achakunakarjam qʼal tukjapjjäma” sasa. Uk satajja, “Diosan Reinopajj oraqpachanwa yatiyasini sasaw Jesusajj säna, ukjja janiw khitis jarkʼkaspati” sasaw sista. Ukatsti kunjamtï qalltan siskayätjja, policiajj suma arunakampiw ‘utamar kuttʼjjam’ sitäna. Ukhamasti janipuniw polician toqesitapasa ni suma arunakapas Jehová Diosat jitheqtaykitänti. Ukatwa chʼama tukuñ trabajonakar paqallqo maratak apayapjjetäna, Saransk marka jakʼaru. Ukar sarkasaw Olga wawajan nasitap yatiyäta. Familiajajj wali jayankchïnsa, nayas esposajas jan jitheqtasaw Diosar servisipkayäta, ukaw wal chuymachtʼitäna.

Mariajj maran mä kutiw visittʼir jutiri, Saransk markarojj sojjta urutwa trenat puriniri, sarjjañatakejj ukhamarakïnwa. Jutasajj machaq botas apanipuniriwa, uka manqharojj Yatiyañataki machaq revistanakwa imantat apaniri. Mä kutejja, paypach wawajampiw jutatayna, uk amtasipuntwa. Jupanakar uñjasajj jachaqtʼasiyätwa.

Chʼama tukuñ trabajonakat 1966 maran mistjjasajj Mar Negro jakʼankir Armavir sat markaruw  familiajamp sarjjapjjta. Ukanwa Yaroslav, Pavel sat yoqall wawanakajajj nasipjjäna.

Mä jukʼa tiempotjja, Bibliat apstʼat qellqatanakwa policianakajj utajan qʼal thaqsupjjäna, vaca manqʼsa thaqsupjjänwa. Mä kutejja, wali calorjataw isis polvontata thaqasipkäna. Jilïrinakapar istʼasakiw ukham thaqasipki sasaw esposajajj sinttʼasïna. Ukatwa fruta wallaqet uma wajjtʼäna, isinakap thalarasipjjañapatakis mä cepillo churäna, jareqasipjjañapatakis umampi toallanakampwa churäna. Policianakan jilïripajj purinïna ukhajja, taqe ukanakwa yatiyapjjäna. Sarjjasasti uka jilïrejj kusisitaw ampar loqtas despidesjjäna. ‘Kunatï walïki ukampi jan walir atipjañajj’ kunjamsa yanaptʼistaspa uk yatisajj kusisipjjayätwa (Rom. 12:21).

Ukhamsa thaqsupjjerïkchejja, Armavir sat markan yatiyasipkakiyätwa. Uka jakʼankir Kurgáninsk markan mä jiskʼa grupo utjkäna ukarus yanaptʼapjjerïtwa. Jichhajj sojjta congregacionanakaw Armavir markan utj-jje, Kurgáninsk markansti pusiraki.

Awisajja, Diosarojj janiw kunjamtï munapkayäta ukham servipkayätti. Ukampis Jupajj jilatanak toqew chʼamañchtʼapjjetäna ewjjtʼapjjarakitäna, ukat walpun yuspärapjjta (Sal. 130:3). Yaqhep policianakajja, Testigor tuktʼasaw Diosan arunakap wal yatiyapjjäna, cheqa yatichäwinakarojj walsa munasipkaspa ukhamaw tukupjjäna. Yaqhepajj lurañanaksa congregacionan katoqapjjänwa, jupanakamp chika Diosar serviñajj wali chʼamänwa. Ukampis tiempompiw kunjam jaqëpjjänsa ukajj yatisjjäna.

Esposajajj 45 maraniruw 1978 maran mayampi usurejjäna. Chuymat usutätap yatisajja, jiwaspawa sasaw doctoranakajj abortayañatak inyección uchañ munapjjäna. Jupajj janiw munkänti, ukatwa yaqhep doctoranakajj hospitalan jeringas aytʼat arknaqapjjäna. Wawar jarkʼaqañatakejja, Mariajj hospitalat escapjjänwa.

Policiajj aka markat sarjjapjjañamaw sapjjetäna ukhajja, Estonia markankir Tallin sat jiskʼa markaruw sarjjapjjta, ukajj Unión Soviética ukankänwa. Jiwaspaw sasas doctoranakajj sapkchïnjja, esposajajj mä suma yoqall wawa ususïna, Vitaly sasaw sutiyapjjta.

Estonia markat Nezlobnaia markaruw sarjjapjjta ukajj Rusia markan aynach (sur) toqenkiwa. Uka jakʼankir jiskʼa markanakanjja, wali amuyumpiw yatiyapjjerïta. Ukarojj turistanakas jutapjjeriwa. Rusia markpachatwa qollayasiñatakejj jutapjjeri, yaqhepajj wiñay jakañ suytʼasaw sarjjapjjeri.

Wawanakajajj Jehová Diosar munasipjjaspa, servipjjarakispa ukwa munapjjayäta. Ukatakejj yateqaskay jilat kullakanakaruw utar invittʼapjjerïta. Grigory jilajajj visittʼir jutapuniriwa, jupajj 1970 marat 1995 marakamaw congregacionanak tumptʼirit servïna. Visittʼapjjerïtu ukhajj wali kusisitäpjjerïtwa, jupajj wali sawkasirïnwa. Jilat kullakanakampejja, Biblian parlki uka sarnaqäwinakarjamaw anattʼapjjerïta. Ukaw  wawanakajarojj uka sarnaqäwinakar jukʼamp munasiñatak yanaptʼawayi.

Yaroslav yoqajajj Letonia markankir Riga markaruw 1987 maran sarjjäna, ukan yatiyañajj janiw sinti jarkʼatäkänti. Cuartelar jan sarañ munatapatjja, llätunka carcelanakaruw mara chikatani llawintapjjäna. Ukanakan aguantañatakejja, kunas carcelan yanaptʼitäna ukanakat cuenttʼirïkayäta ukaw yanaptʼatayna. Qhepatjja, precursorat serviñ qalltäna. 1990 maranjja, 19 marani Pavel yoqajajj Japón markat alay toqenkir Sajalín islaruw precursorat sarañ munäna. Ukan 20 yatiyirinakakiw utjäna, jakapkayäta ukatsa 9.000 kilometronak jayankänwa. Ukatwa sarañap jan munapkayätti. Ukampis qhepat khitapjjtwa. Diosan Reinopat waljaniw uka islan istʼapjjäna, mä qhawqha maranakatjja, 8 congregacionanakaw utj-jjäna. Pavel yoqajajj 1995 marakamaw ukan yatiyäna. Ukhajja, Vitaly sullka wawajakiw nanakampëjjäna. Juparojj wawatpachwa Biblia liyiñajj gustäna. 14 maranirojj precursorat serviñwa qalltäna, nayajj pä maraw jupampejj precursorat serviwayta. Uka maranakajj wali kusiskañänwa. 19 maranirojj precursor especialat serviñatakiw utat sarjjäna.

Khä 1952 maranjja mä policiaw Mariar akham satayna: “Diosat jitheqtjjam jan ukajj tunka maranakaw carcelankäta. Mistjjasajj tayka, sapaki ukhamakëjjätawa” sasa. Ukajj janiw phoqaskiti. Jehová Diosasa, wawanakajasa, Bibliat yatichapkta ukanakas munasiñampiw uñjapjjetu. Kawkjantï wawanakajajj servipkäna ukar esposajampi sarañajj wali kusiskañänwa. Khitinakarutï wawanakajajj Diosar uñtʼapjjañapatak yanaptʼapkatayna, ukanakas wal yuspärapjje.

Jehová Diosan Testigonakapajj 1991 maranwa leyinakarjam uñtʼatäjjäna. Ukaw jukʼampi yatiyasiñapatakejj yanaptʼawayi. Seman tukuyanakan jiskʼa, jachʼa markanakar yatiyiri sarañatakejja, mä jachʼa autwa congregacionajj aläna.

Yaroslav, Pavel yoqanakajajj esposanakapamp chikaw Betelan trabajipjje, ukajj walpun kusisiyitu. Vitaly yoqajampi esposapampejj congregacionanak tumptʼirïpjjewa. Irina phuchajampi esposopampejj Alemaniankapjjewa, wawanakapajj kimspachaniw jilïr irpirïpjje. Olga phuchajajj Estonia markankiwa, jupajj jawsanipunituwa. Munat esposajajj 2014 maranwa jiwjje. Jaktaniñap walpun suyaskta. Jichhajj Bielgorod markanwa jakasiskta, jilat kullakanakaw wal yanaptʼapjjetu.

Jehová Diosar jan jitheqtas serviñajj chʼamakiwa, ukampis Diosan sumankañapajj janipuniw kunampis igualäkiti, ukwa jichhakamajj yateqawayta. Yantʼanak aguantapjjatajat walja bendicionanak katoqawayapjjta. Unión Sovieticajj 1991 maran tukjatäkäna uka nayrajja, 40.000 yatiyirinakat mä jukʼampikiw utjäna. Jichhasti, uka markanakanjja 400.000 yatiyirinakat jukʼampiw utj-jje. Nayajj 83 maranëjjtwa, jilïr irpiritwa yanaptʼaskta. Jehová Diosaw aguantañatak yanaptʼawayitu, walpun bendisirakitu (Sal. 13:5, 6).