INAS congregacionan mä asignación katoqañ jan puedkstanti. Inas yaqha jilatajj uka asignación katoqchi, jan ukajja, inas nayrajj uka asignacionan sirvchiyästan. Inas chuymankipstatästan, usutästan, qollqet pistʼatästan, jan ukajj familiasar yanaptʼañasächi, ukatwa kuntï lurañ munktan uk jan lurirjamäksnati. Diosan markapan cambionak utjatap laykojja, inas walja maranak sirvkayätan uka asignación jaytawaystan. Ukatwa akham amuysna: “Janiw Jehová Diosatakejj qhawqtï lurañ munkta ukham lurkti” sasa. Ukhamajj inas awisajj jan kuns lurirjam amuyassna. Ukampis ¿kunas jan aynachtʼañatakisa, jan colerañatakisa, jan chuym ustʼayasiñatakis yanaptʼistaspa? ¿Kunas kusisitäskakiñatak yanaptʼistaspa?

Bautisir Juanan sarnaqäwipaw yanaptʼistaspa. Diosar servir uka chachajja, walja privilegionakwa katoqäna. Ukampis kunas jakäwipamp pasañapäna uk janiw amuykpachänti. Jupajja, Diosar sirvkäna ukat sipansa jukʼamp tiempow carcelan jistʼantat uñjasïna. Ukhaman uñjasisas kusisitäskakïnwa. ¿Kunas ukatak yanaptʼäna? Chuym ustʼayasiñat sipansa, ¿kunas kusisitäskakiñatak yanaptʼistaspa?

Juanajj 29 maranwa jaqenakarojj Mesiasan puriniñapatak wakichañ qalltäna, kunjamatï Jehová Diosajj luram siskäna ukarjama. Jaqenakar akham sänwa: “Arrepentisipjjam, alajjpachankir Reinojj jakʼankjjewa” sasa (Mat. 3:2; Luc. 1:12-17). Waljaniw uka arunak istʼasajj Juanan yatichäwinakap istʼañatakejj jaya cheqanakat sarapjjäna, waljanirakiw arrepentisisajj bautisasipjjäna. Juanajj jan ajjsarasaw kʼari chuymani religión pʼeqtʼirinakar akham säna: ‘Jan arrepentisipjjäta ukhajj castigataw uñjasipjjäta’ sasa (Mat. 3:5-12). 29 marana octubre phajjsinjja, Jesusaruw Juanajj bautisäna, uk lurañajj walpun jupar kusisiypachäna. Ukat uksarojj jutaniw sat Mesiasar arkapjjañapatakiw jaqenakar chʼamañchäna (Juan 1:32-37).

Wali wakiskir luräwi luratapatjja, Jesusajj Juanat akham sänwa: “Warmit nasir jaqenak taypinjja, janiw khitis Bautisir Juanat sipans jukʼamp  jilïrejj utjkiti” sasa (Mat. 11:11). Luräwinak katoqasajja, walpun Juanajj kusispachäna. Jichhürunakanjja, jupjamarakiw walja jilat kullakanakajj bendicionanak katoqapjje. Terry sat jilatat parltʼañäni, jupajj Sandra esposapampiw Diosarojj 50 maranak jila serviski. Jilatajj akham siwa: “Walja privilegionakwa katoqawayta. Precursor regularata, betelitata, precursor especialata, congregacionanak tumptʼirita, congregacionanak tumptʼirinakan uñjiripata ukhamaw serviwayta, jichhajj wasitampiw precursor especialat serviskarakta” sasa. Diosar ukham serviñajj wal kusisiyistu, ukampis kunjamtï Juanan sarnaqäwipat yateqawayktanjja, jakäwisan mayjtʼäwinakajj utjki ukapachan kusisitäskakiñatakejj chʼamachasiñasawa.

Bautisir Juanajja, privilegionak katoqasajj wal yuspäräna, ukaw kusisitäñatak yanaptʼäna. Jesusar bautiskäna uka qhepatjja, Juanan discipulonakapajj jukʼaptaskänwa, Jesusan discipulonakapasti jiljjattaskarakïnwa. Ukatwa Juanan discipulonakapajj llakisipjjäna, jupar akham sapjjänwa: “Rabí, uñjam, khititï Jordán Jawir khurkatan jumamp chikäskäna, [...] uka jaqew bautisaski, taqeniw jupan ukar sarasipki” sasa (Juan 3:26). Juanajj jupanakar akham sänwa: “Khititejj casarasir tawaqompïki ukaw casarasir waynajja. Kunapachatï casarasir waynan amigopajj saytʼasi, casarasir waynan arunakap istʼaraki ukhajja, walpun kusisi. Nayajj ukhamarakiw kusista”  sasa (Juan 3:29). Jesusan wali wakiskir luräwip uñjasajja, janiw Juanajj akham siskänti: “Jesusajj atipjitaniwa” sasa. Janirakiw ‘kuntï lurkta ukajj janiw valoranïkiti’ sasinsa amuykänti. Antisas kusisitäskakïnwa, jupatakejja, ‘casarasir waynan amigopäñajj’ wali valoranïnwa.

Asignacionap phoqañajj Juanatak chʼamäkchïnsa, kusisitaw Diosar serviskakïna. Naskäna ukhatpachaw jupajj nazareöna, ukhamajj janiw vino umañapäkänti (Luc. 1:15). Kunatï wakiski ukampikiw jakasïna, ukatwa Jesusajj jupat akham säna: “Juanajj jutkäna ukhajja, janiw manqʼkänsa ni umkänsa” sasa. Ukampis Jesusasa discipulonakapas janiw nazareöpkänti, ukatwa mayninakjam jakasipjjäna (Mat. 11:18, 19). Juanajj janis milagronak lurkchïnjja, Jesusan discipulonakapasa, nayrajj discipulonakapäpkäna ukanakat yaqhepasa milagronak lurañatakejj chʼam katoqapjjänwa (Mat. 10:1; Juan 10:41). Juanajj janiw uka toqet añch llakiskänti, jan ukasti kun lurañtï Jehová Diosajj maykäna uk phoqañatakiw chʼamachasïna.

Kuntï Jehová Diosatak jichhajj lurasktan uk wali valoranit uñjañäni ukhajja, kusisitaw Jupar serviskakiñäni. Parlaniwayktan uka Terry jilatajj akham siwa: “Kuna lurañanaktï katoqkayäta uk sum phoqañatakiw chʼamachasiyäta” sasa. Kunanaktï Diosar sapürunjam servisajj lurkäna ukanak amtasajj akham siwa: “Janipuniw kunats arrepentiskti. Diosar wali kusisitaw serviyäta” sasa.

Jiwasajj ‘Diosamp chika trabajirïtanwa’, ukjjat lupʼiñaw kun lurañtï Diosan markapan katoqktan uk wali valoranit uñjañatak yanaptʼistani (1 Cor. 3:9). Amuytʼañataki, wali valorani mä kunarus sum cuidañäni ukhajja, sumitakïskaniwa. Jiwasatï Jehová Diosar serviñ wali valoranit uñjañänejja, kusisitaw Jupar serviskakiñäni. Jan akham amuyañäniti: “Privilegiojajj mayninakan privilegionakapat sipansa janiw sinti wakiskirïkiti” sasa (Gál. 6:4).

Juanajj mä jukʼa tiempokiw Diosar serviñapäna, uk jupajj yatpachänwa. Ukampis asignacionapajj mä akatjamatwa tukusïna (Juan 3:30). Khä 30 maranjja, Herodes reyejj carcelaruw Juanar jistʼantayäna, ukhakamajj niya sojjta phajjsinakakiw Jesusar bautisatapat pasaskäna. Ukhamäkchïnsa, Juanajj Diosan arunakapat parlaskakïnwa (Mar. 6:17-20). ¿Kunas kusisitäskakiñatak yanaptʼäna? Diosar serviñaw yanaptʼäna.

Kunanaktï Jesusajj Diosar servisin lurkäna ukanakjja, Juanajj carcelan istʼänwa (Mat. 11:2; Luc. 7:18). Jesusan Mesiasätapat janiw pächaskänti, ukampis ‘¿kuntï Qellqatanakajj Mesiasat siski ukajj taqpachat phoqaspachäni?’ sasaw jisktʼaspachäna. Sañäni, niyakejjay Mesiasajj reyjam apnaqañapächïnjja, ‘¿niyat apnaqañ qalltpachäni? ¿Carcelat apspachitäniti?’ sasaw jisktʼasirakpachäna.  Juanajja, kunanaksa Jesusajj lurani uk sum yatiñ munasajja, pä discipulonakaparuw Jesusar akham jisktʼapjjañapatak khitäna: “¿Jumätati jutañapäkäna ukajja, jan ukajj yaqharuch suyapjjäjja?” sasa (Luc. 7:19). Discipulonakajj kuttʼanisajja, kunjamsa Jesusajj jaqenakar qolläna, kuntï Jesusajj jupanakar siskäna ukwa yatiyapjjäna. Jesusajj akham sänwa: “Juykhunakas uñjapjjewa, cojonakas sarnaqapjjewa, lepra usuninakas qʼomachatäpjjewa, oqaranakas istʼapjjewa, jiwatanakas jaktayatäpjjewa, suma yatiyäwinakas pobrenakarojj yatiyasirakiwa” sasa. Juanajj sumwa uka arunak istʼpachäna (Luc. 7:20-22).

Uka arunakajj walpun Juanar chʼamañchtʼpachäna. Kunjamsa Mesiasat parlir profecianakajj Jesusamp phoqasiskäna ukwa uka arunakajj uñachtʼayäna. Ukhamäkchïnsa, Jesusajj janiw carcelat apskänti, ukampis Juanan luratanakapajj janiw inamayäkänti, jupajj uk sumwa yatïna. Juanajj jan walinakansa uñjaskchïnjja, kusisitäskakïnwa.

Jiwasatï Juanat yateqasisin Diosar serviskakiñänejja, jan walinakan uñjaskasas kusisitaw pacienciampi aguantañäni (Col. 1:9-11). Ukatakejj Biblia liyiña, kuntï liyktan ukjjat lupʼiñaw yanaptʼistani, kunattejj ukanakajja, Diosar servitasajj jan inamayätapwa amtayistu (1 Cor. 15:58). Parlaniwayktan uka Sandra kullakajj akham siwa: “Biblia sapüru mä capítulo liyiñajj Jehová Diosar jukʼamp jakʼachasiñataki, nayat llakisiñat sipansa Jehová Diosar jukʼamp serviñatakiw yanaptʼitu” sasa. Maysa toqetjja, jilat kullakanakasajj kunanaksa Diosar serviñatak lurasipki ukanakatwa lupʼiraksna, ukaw jiwasat llakisiñat sipansa kuntï Jehová Diosajj luraski uk amuyañatak yanaptʼistani. Sandra kullakajj saskakiwa: “JW Broadcasting^® programa uñtañajj Diosan markapar jukʼamp jakʼachasiñatakiw yanaptʼapjjetu, Diosar servisipkta ukan kusisitäñatakis yanaptʼapjjarakituwa” sasa.

Bautisir Juanajj mä jukʼa tiempokis Diosan arunakap yatiykchïnjja, ‘Eliasan chuymapat chuymani chʼamapat chʼamaniw’ yatiyäna. Jupajj Elías chachjama, jiwasjam jaqekirakïnwa (Luc. 1:17; Sant. 5:17). Jiwasatï Juan chachat yateqasisin Diosar serviskakiñäni, yuspärasir chuymanirakiñäni ukhajja, jan walinakan uñjaskasas kusisitäskakiñäniwa.