DIOSAR confiyañajj wal yanaptʼistu. Sañäni, Supayajj janis Jehová Diosamp sum apasiñas munkchejja, Diosar confiyasajj ‘Supayan aqkir flechanakap jiwaraysnawa’ (Efes. 6:16). Mä qollur uñtasit jan waltʼäwinakarus saykataraksnawa. Jesusajj discipulonakapar akham sänwa: “Mä mostaza jatha ukchʼaksa Diosar confiyapjjasma ukhajja, aka qollurojj ‘akawjat khaya cheqar jittam’ sasaw sapjjasma, ukat uka qollojj jittaspawa” sasa (Mat. 17:20). Diosar confiyañajj Jupamp sum apasiñatakiw yanaptʼistu, ukatwa akham jisktʼasiñasa: ¿Diosar confiyañajj kamsañsa muni? ¿Diosar confiyañatakejj kunjam chuymanïñasasa? ¿Kunas Diosar jukʼamp confiyañatak yanaptʼistaspa? ¿Kunatsa Diosar confiyañasa? (Rom. 4:3).

Diosar confiyañajj janiw Biblian yatichäwinakapar aleq creyiñakïkiti, ‘demonionakas Diosan utjatap creyipjjewa, jupar ajjsarañatsa khatatipjjarakiwa’ (Sant. 2:19). Ukhamajj ¿Diosar confiyañajj kamsañsa muni?

Diosar confiyaña sasinjja, Bibliajj pä toqetwa parli. Maya, “Diosar confiyañajja, kuntï suytʼasktan ukajj phoqasipuniniwa sasin jan pächasis suyaña sañ muni” (Heb. 11:1a). Jiwasatï Diosar confiystanjja, ‘taqe arsutanakapajj cheqapawa phoqasirakiniwa’ sasaw creytanjja. Diosajj israelitanakar akham sänwa: “Phoqhasipuniniwa kuna arustʼäwtejj nayajj urumpisa, arumampisa lurkta ukanakajja, ukhamat urus arumasa horasaparu puriniñapataki. Uka kipkarakiwa: Kuna arustʼäwtejj David uywatajjampi lurkta ukajj phoqhasipuniniwa” sasa (Jer. 33:20, 21). Intin jalsuniñapatsa jalantañapatsa janiw pächasktanti, ‘urusa arumasa utjapuniniwa’ sasaw confiytanjja. Jiwasatï kunjamsa oraqejj muyuski, kunjamsa intir muytaraki uka toqenakat jan pächaskstanjja, ¿taqe ukanak Luriri Diosan arsutanakapat pächasiñasäspati? Janiwa (Is. 55:10, 11; Mat. 5:18).

Paya, Diosar confiyañajja, “kunanakatï jan uñjatäki ukanakajj cheqapun utjaskatapa taqe chuyma creyiña sañ munaraki” (Heb. 11:1b). Mä wawajj akham sistaspa sañäni: “¿Kunjamatsa thayan utjatap yattajja?” sasa. Thayar janis uñjkstanjja, wawar amuytʼayañajj janiw chʼamäkaniti. Ukatakejj inas samanata, kunanaktï thayajj unoqeyki ukanakata, jan ukajj yaqha ukhamanakat parlchiñäni. ‘Thayajj utjaskapuniwa’ sasin wawajj amuyani ukhajja, kuntï jan uñjki ukan utjatap creyiniwa. Diosar confiyañajj ukhamarakiwa, pruebanak utjipanwa Jupar confiytanjja (Rom. 1:20).

Diosar confiyañatakejj pruebanakaw utjañapa, ukatwa nayraqatajj ‘kunatï cheqäki uk sum uñtʼañasa’ (1 Tim. 2:4). Ukampis janiw aleq uñtʼañakejj wakiskiti, apóstol Pablojj akham sänwa: “Maynejj chuymapanwa Diosar confiyañapa” sasa (Rom. 10:10). Biblian yatichäwinakaparojj janiw aleqak creyiñasäkiti, jan ukasti, valorañasawa, ukhamatakwa  uka yatichäwinakarjam sarnaqañäni (Sant. 2:20). Maynejj Biblian yatichäwinakapar jan valorki ukhajja, amtaparjam sarnaqañ munasajj janiw pruebanak utjipans creencianakap mayjtʼayañ munkaspati (2 Ped. 3:3, 4; Jud. 18). Ukatwa Bibliajj qellqaskäna ukhajj milagronak uñjasas waljanejj Diosar jan confiyapkänti (Núm. 14:11; Juan 12:37). Diosan espíritu santopajj khitinakatï Biblian yatichäwinakapar munasipki, kʼari yatichäwinakarus uñisipki ukanakarukiw Diosar confiyapjjañapatak yanaptʼi (Gál. 5:22; 2 Tes. 2:10, 11).

Diosar taqe chuyma confiyirinakat maynejj David reyïnwa (Heb. 11:32, 33). Ukampis janiw taqe familiaranakapajj Diosar confiyapkänti. Sañäni, Davidajj Goliat chachan nuwasiñ munatapat jisktʼäna ukhajja, Eliab sat jilïr jilapajj Davidar toqenoqänwa ¿kunatsa? Eliab chachajj janiw Diosar confiykänti (1 Sam. 17:26-28). Cheqas janiw khitis Diosar confiyas nasktanti, ni awk taykasatsa mä herenciäkaspas ukham katoqktanti. Ukhamajj Davidajja, Diosamp sum apasitapatwa Jupar confiyäna.

Salmo 27 qellqatanwa Davidajj kunas Diosar confiyañatak yanaptʼäna uk säna (versículo 1). Jupajj sarnaqäwipata, kuntï Jehová Diosajj enemigonakapar lurkäna ukanakatwa lupʼïna (versículos 2, 3). Diosan tabernaculopar wal munasïna (versículo 4), ukanwa Diosarojj mayni israelitanakamp chik adoräna (versículo 6). Diosaruw oracionan yanaptʼa mayisirïna (versículos 7, 8). Juparurakiw ‘thakim uñachtʼayita, uknam irparakita’ sasin mayisïna (versículo 11). Diosar confiyañajj Davidatak wali wakiskirïnwa ukatwa akham säna: ‘¿Diosar jan confiykirista ukhajj kawkinkakiristsa?’ sasa (versículo 13, NM).

Jiwasajj Davidjamarakiw Diosar confiysna, ukatakejj jupjamaw amuyañasa, kuntï Salmo 27 qellqatan siski ukanakwa Davidjam lurarakiñasa. Diosar confiyañatakejj Jupar sum uñtʼañasawa, ukatakejj jukʼampiw Bibliatsa qellqatanakatsa yatjjatañasa, ukaw Diosar jukʼamp confiyañatak yanaptʼistani (Sal. 1:2, 3). Yatjjatasajj lupʼiñatakiw tiempo apstʼasiñasa, lupʼiñajj yuspärasirïñatakiw yanaptʼistu. Yuspärasirïñajj tantachäwinakan Diosar adorañataki, jaqenakar suytʼäwisat parlañatakiw yanaptʼistu, ukhamatwa Diosar confiyatas uñachtʼayaraktanjja (Heb. 10:23-25). Maysa toqetjja, Diosar jan qarjtas mayisisaw Jupar confiyatas uñachtʼayaraksna (Luc. 18:1-8). Ukhamajj oración lurapjjapuniñäni, Diosajja, ‘kunatï paskistu ukanakat wal llakisi’ (1 Tes. 5:17; 1 Ped. 5:7). Diosar confiyañajj cheqaparjam sarnaqañatakiw yanaptʼistu, cheqaparjam sarnaqañasti, Diosar jukʼamp confiyañatakiw yanaptʼarakistu (Sant. 2:22).

Jiwañap jakʼäjjäna uka arumajja, Jesusajj discipulonakapar akham sänwa: “Diosar confiyapjjam, nayarus confiyapjjarakita” sasa (Juan 14:1). Ukhamajj janiw Jehová Diosaruk confiyañasäkiti, Jesusarus confiyañasarakiwa. Kunjamsa Jesusar confiyatas uñachtʼaysna uk kimsa toqet yatjjatañäni.

Maya, Jesusan jiwas layku jiwatapajj Diosan mä suma regalopawa. Apóstol Pablojj akham sänwa: “Diosan Yoqapar confiyatajatwa jakaskta, jupaw nayarojj wal munasitu, naya laykurakiw jakäwip churäna” sasa (Gál. 2:20). Jesusar confiytan ukhajja, jupan jiwas layku jiwatapat janiw pächasktanti. Jesusan jiwatapatwa Diosajj juchanakas perdonistu, wiñay jakañsa churistani, qhawqsa munasistu uks uñachtʼayarakistu (Rom. 8:32, 38, 39; Efes. 1:7). Jesusan jiwas layku jiwatapajj jan walinak jan amuyañatakiw yanaptʼistu (2 Tes. 2:16, 17).

Paya, Jehová Diosarojj Jesusan jiwatapatwa oración taypejj jakʼachastanjja. Cheqas Jesusan jiwatapatwa Diosarojj jan ajjsartʼas mayistanjja, ukhamat Jupajj “khuyapayasiñapata jachʼa munasiñapata horasapar jiwasar yanaptʼañapataki” (Heb. 4:15, 16; 10:19-22). Diosat mayisiñajj juchar jan purtʼasiñatakiw yanaptʼistu (Luc. 22:40).

Kimsa, Jesusar istʼaña. Apóstol Juanajj akham sänwa: “Yoqar confiyki ukajja, wiñay jakañwa katoqani. Yoqar jan istʼki ukajja, janiw wiñay jakañ uñjkaniti, jan ukasti Diosan colerasiñapaw jupjjankani” sasa (Juan 3:36). Confiyañasa jan istʼasirïñas kunarus apistaspa ukwa Juanajj qhanstayäna. Ukhamajj Jesusar confiyatasjja, jupar istʼasaw uñachtʼaytanjja. Jesusar istʼatasjja, ‘Criston leyiparjam’ sarnaqasa, mä arunjja, mandamientoparjama yatichäwinakaparjam sarnaqasaw uñachtʼaytanjja (Gál. 6:2). Jesusajj kuntï ‘suma phoqeri amuyasir esclavo’ taypnam yatichkistu ukarjam lurasaw istʼaraktanjja (Mat. 24:45). Jiwasatï Jesusar istʼañänejja, jan waltʼäwinakar saykatañatakejj chʼamanïñäniwa (Mat. 7:24, 25).

Mä kutejja, mä jaqew Jesusar akham säna: “¡Nayajj Diosar confiytwa! ¡Wakischi ukhajja, Diosar jukʼamp confiyañatak yanaptʼita!” sasa (Mar. 9:24). Uka jaqejj Diosar mä jukʼa confiyänwa, ukampis humilde chuymanïtap laykuw Jesusar yanaptʼa mayïna. Awisajj taqeniw uka jaqjamajj Diosar jukʼamp confiyañ muntanjja. Cheqas taqeniw chʼamachassna. Ukatakejj Diosan Arupatwa yatjjatañasa lupʼiñasaraki, ukaw jukʼamp yuspärasirïñatak yanaptʼistani. Jilat kullakanakasamp chika Diosar yupaychtan, jaqenakarus suytʼäwisat parltan, jan qarjtas mayistan ukhajj jukʼampiw Diosar confiytanjja. Jiwasatï ukanak lurasin Diosar jukʼamp confiyañatak chʼamachasiñänejja, Jupajj bendisistaniwa. Bibliajj akham sistuwa: ‘Jumanakajj wali santo yatichäwinakampi chʼamañchtʼasisipkakim, ukhamatwa jumanakajj Diosan wali munata jakasipjjäta’ sasa (Jud. 20, 21).