1. ¿Kunsa wiñay jakañar apki uka thakin tukuykam tʼijuñatakejj lurañasa?

CRISTIANONAKAJJ tʼijurinakäksnas ukhamätanwa, wiñay jakañ katoqañatakiw tʼijusktanjja. Jichhakis qalltaskstanjja, jan ukajj walja maranakas tʼij-jjstanjja, kawkirutï puriñ munktan ukar puriñkam tʼijuskakiñasawa. Ukatakejja, kuntï apóstol Pablojj Filipos markankir cristianonakar ewjjtʼkäna ukaw yanaptʼistaspa. Pablon cartap katoqapkäna ukhajja, uka markankir jilat kullakanakat yaqhepajj walja maranakaw Diosar sirvjjapjjäna. Taqe chuymas servisipkchïnjja, jan qarjtas tʼijusipkakiñamawa sasaw Pablojj amtayäna. Wiñay jakañ katoqañatakejj jupjamarak tʼijupjjaspa ukwa Pablojj munäna (Filip. 3:14).

2. Kuntï Pablojj Filipos markankir jilat kullakanakar ewjjtʼkäna ukajja, ¿kunatsa wali wakiskirïna?

² Pablon uka ewjjtʼanakapajj wali wakiskirïnwa. Filipos markankir congregacionajj qalltatpachaw arknaqat uñjasïna. Ukajja, Pablompi Silasampejj uka markar puripkäna ukhaw qalltäna, jupanakarojj Diosaw ‘Macedoniar sarapjjam’ sasin khä 50 maran säna, ukatwa ukar sarapjjäna (Hech. 16:9). Filipos markanjja, Lidia sat mä warmiruw jikjjatapjjäna, Pablon arunakap sum istʼañapatakejj Jehová Diosaw uka warmin chuymap jistʼaräna (Hech. 16:14). Qhepatjja, jupasa utapankirinakas taqpachaniw bautisasipjjäna. Ukampis Supayajj ukjpachaw jan walinak lurañ qalltäna. Uka markankir mä qhawqha chachanakaw Pablompiru Silasampir katuntasajj magistradonakan ukar qatatipjjäna, “aka jaqenakajj markasaruw chʼajjwayasipki” sasaw sapjjäna. Ukatwa wal nuwjapjjäna, carcelaruw llawintapjjarakïna, ‘aka markat sarjjapjjam’ sasaw qhepat sapjjarakïna (Hech. 16:16-40). Ukham luratajj ¿aynachtʼapjjänti?  ¿Jichhak uttʼayat congregacionajj aynachtʼänti? Janiwa. Pablompiru Silasampir jan aynachtʼir uñjasajj aguantapjjänwa.

3. 1) ¿Kunsa Pablojj jan armasiñapäkäna? 2) ¿Kuna jisktʼanakarus aka yatichäwin qhanañchaskañäni?

³ Pablojj tukuykam jan aynachtʼas tʼijuñwa amtäna (2 Cor. 4:16). Ukampis tukuykam tʼijuñatakejj janiw katoqañapäkäna uka premiot armasiñapäkänti. ¿Kunsa Pablot yateqsna? ¿Khitinakan sarnaqäwipatsa jan walinak aguantañ yateqsna? Kuntï jutïrin katoqkañäni uk suytʼañajja, ¿kunjamsa janipun aynachtʼañatak yanaptʼistaspa?

4. ¿Kunsa Pablojj mä utan carcelanjam llawintat uñjasisajj luräna?

⁴ Pablojj Filipos markankir cristianonakar carta qellqkäna ukhajj kunjamäskänsa, kunjamsa Diosan arunakap yatiyañatakis chʼamachasiskäna uk uñjañäni. Pablojj Roma markanjja, mä utan carcelanjam llawintataw uñjasïna, ukhamajj janiw predikir sarañ puedkänti. Ukhamäkchïnsa, visitir sarapkäna ukanakaruw predicäna, jaya cheqanakankir congregacionanakaruw cartanak qellqarakïna. Jichhürunakanjja, ukhamarakiw utat jan misturjamäpki uka jilat kullakanakat waljanejj jupanakar visitapki ukanakar predicapjje. Utapan jan visitañjamäki ukanakarus chʼamañchtʼir cartanakwa qellqapjje.

5. Kuntï Filipenses 3:12-14 texton siskäna ukarjamajja, ¿kunas Pablorojj premio katoqañkam tʼijuñatakejj yanaptʼäna?

⁵ Pablorojj janiw nayra suma luratanakapasa ni nayra juchanakapas Diosar serviñ jarkʼkänti. Akham sänwa: “Kunanakatï qhepankki ukanak nayajj armanuktwa, kunanakatï nayrankki ukanak katoqañatakiw chʼamachasiskta” sasa. Mä arunjja, tukuykam tʼijuñatakiw wal chʼamachasïna (Filipenses 3:12-14 liytʼañataki). ¿Kunas Pablorojj Diosar serviñ jarkʼaspäna? Maya, janïr cristianökasajj kunanaktï yatjjatkäna ukaw jarkʼaspäna. Ukampis ukanakjja, “basuräkaspas” ukhamwa uñjäna (Filip. 3:3-8). Paya, cristianonakar arknaqatap laykuw jupa pachpa juchañchaspachäna, ukampis janiw ukamp aynachtʼkänti. Kimsa, Pablojj carcelan jistʼantata, jawqʼjata, qalamp kʼupjata, barcomp walja kuti qotar jalantata, jan kuna manqʼani, jan isini ukhamas uñjaskchïnjja, waljaniruw Diosar uñtʼapjjañapatak yanaptʼäna. Ukampis Diosar jukʼamp serviñajj janis wakisjjaspa ukham janiw amuykänti (2 Cor. 11:23-27). Pablojj waljanirus yanaptʼkchïnjja, jan ukajj tʼaqeskchïnsa, Diosar serviskakiñapänwa. Jiwasajj ukhamarakiw lurañasa.

6. Kunanakatï qhepankki ukanakat ¿kunanak armañasas wakisispa?

⁶ ¿Kunjamsa Pablot yateqasisajj “kunanakatï qhepankki ukanak” armanuksna? Nayrajj jan walinak lurkayätan ukanakat jiwas pachpaw juchañchassna. Ukhamächejja, ¿janit Jesusan jiwas layku jiwatapat jukʼamp yatjjatañajj wakiskaspa? Yatjjatañasa, lupʼiñasa, uka toqet orañasa, jan sint llakisiñatakiw yanaptʼistani. Jehová Diosajj perdonjjestu uka juchanakatsa inas jan juchañchasjjchiñäniti. ¿Kunsa Pablot yateqaraksna? Yaqhep Testigonakajja, Diosar jukʼamp serviñatakejj sum pagapkäna uka trabajonakwa jaytapjjäna. Jiwasatï ukham lurstanjja, janiw mayampsa amtañasäjjeti, ukhamatwa “kunanakatï qhepankki ukanak” armanukutas uñachtʼayañäni (Núm. 11:4-6; Ecl. 7:10). ‘Kunanakatï qhepankki ukanakat’ yaqhepajja, kuntï Diosar serviñatak lurawayktan, kuna jan walinakantï uñjasiwayktan ukanakäspawa. Alajjpachankir Awkisajj  kunjamsa bendisistu, yanaptʼarakistu uk amtañajj Jupar jukʼamp jakʼachasiñatakiw yanaptʼistaspa, ukampis janiw ukaruk qheparañasäkiti (1 Cor. 15:58).

7. Kuntï 1 Corintios 9:24-27 texton siski ukarjamajja, ¿kunsa wiñay jakañar apki uka thakin tukuykam tʼijuñatakejj lurañasa? Uk mä uñachtʼäwimp qhanañchtʼam.

⁷ “Walpun chʼamachasipjjam” sasaw Jesusajj säna (Luc. 13:23, 24). Pablojj uka arunak sumwa amuyäna. Cristojj kunjamtï chʼamachaskänjja, ukhamarakiw Pablojj tukuykam chʼamachasiñapäna. Ukatwa cristianonakan jakäwipajj tʼijuñampi sasïkaspas ukhamawa sasin säna (1 Corintios 9:24-27 liytʼañataki). Tʼijurinakajja, kawkirutï puripjjañapäki ukar uñtataw tʼijupjje, janiw yaqhanak uñchʼukisajj tʼijupkiti. Sañäni, tʼijuñajj mä markan utji ukhajja, tʼijurinakajj janiw negocionak uñjasasa ni yaqha ukhamanak uñjasas qheparapkiti. Niyakejjay ganañ munapjjchejja, janiw jupanakat maynis ukanak uñjasajj qheparkaspati. Jiwasampejj niya ukhamarakiwa, wiñay jakañar apki uka thakin tʼijkasajja, janiw qheparañasäkiti. Jiwasatï puriñ munktan ukar puriñatak Pabljam chʼamachasiñänejja, premio katoqañäniwa.

8. ¿Kunanakatsa yatjjataskañäni?

⁸ Kunas Diosar jan nayrjam serviñatak jarkʼistaspa ukanakat jichhajj yatjjatañäni. Ukanakajj akanakäspawa: maya, kunanaktï suyktan ukanakan jan jankʼak phoqasitapa. Paya, jan nayrjam chʼamanëjjaña. Kimsa, jan walinakan walja tiempo uñjasiña. Ukhamanakan uñjasisajj kunanaksa Diosan yaqhep servirinakapajj lurawayapjje uk yatjjatañaw yanaptʼistani (Filip. 3:17).

9. Kunanaktï suyktan ukajj jan jankʼak phoqaski ukhajja, ¿kunas jiwasamp pasaspa?

⁹ Kunanaktï suyktan ukanakan jan jankʼak phoqasitapa. Diosan arsutanakapajj phoqasispa uk taqeniw muntanjja. Habacuc profetajja, kuna jan walinakatï Judá markan utjkäna uk tukusiñap wal munäna. Ukampis Jehová Diosajja, suytʼaskakim sasaw uka profetar säna (Hab. 2:3). Ukampis kuntï suyktan ukajj jan jankʼak phoqaski ukhajja, janiw  Diosarojj nayrjam sirvjjsnati, jan ukajj janiw serviñ munjjsnati (Prov. 13:12). Ukaw 1914 mara jakʼanakan pasäna. Uka tiemponjja, ajllit walja cristianonakaw alajjpachar 1914 maran sarañ suyapjjäna, ukampis ukajj jan phoqaskäna ukhajja, ¿kunsa Diosat jan jitheqtir jilat kullakanakajj lurapjjäna?

10. Kuntï suyapkäna ukan jan phoqasitapatjja, ¿kunsa Diosat jan jitheqtir mä chacha warmejj luräna?

¹⁰ Royal Spatz jilatampita Pearl kullakampit parltʼañäni, jupanakajj jan jitheqtasaw Diosar servipjjäna. Jilatajj 20 maraniw 1908 maran bautisasïna. ‘Niyaw alajjpachar sarjjä’ sasaw suyäna. 1911 maranjja, Pearl kullakaruw ‘casarasiñäni’ sasin säna. Kullakar akham sänwa: “1914 maran kunas pasani uk yattawa. Jichpach casarassna ukajj walipunïspawa” sasa. Uka chacha warmejj alajjpachar jan sarjjasajj ¿Jehová Diosat jitheqtapjjänti? Janiwa. Jupanakajj janiw alajjpachar sarañ laykukejj Diosar servipkänti, jan ukasti, jan jitheqtas serviñatakiw chʼamachasipjjäna. Jupanakajj jan qarjtas tʼijuñwa amtapjjäna. Jakäwinakapajj aka oraqen tukuyjjäna ukapachkamaw Diosar servipjjäna. Cheqas taqeniw kunjamsa Jehová Diosajj sutip qʼomachani, Taqe Kunjjar Munañanïtapsa uñachtʼayani, kunjamsa promesanakap phoqani uk uñjañ muntanjja. Taqe ukanakajj Diosan amtataparjamaw phoqasini. Ukapachkamajja, Diosar jan inaktʼas serviskakiñäni, kuntï suyktan ukan jan jankʼak phoqasitapas janirak aynachtʼayistpanti.

11, 12. Janis nayrjam chʼamanëjjstanjja, ¿kunatsa Diosar serviskakiñasa?

¹¹ Jan nayrjam chʼamanëjjaña. Diosar jukʼamp confiyañatakisa serviñatakisa, janiw cheqpach tʼijurinakjam wali chʼamanïñajj wakiskiti. Jan nayrjam chʼamanëjjapjje uka jilat kullakanakat waljanejja, Diosar jukʼamp serviñatak chʼamachasisipkakiwa (2 Cor. 4:16). Arthur Secord * jilatat parltʼañäni. Jupajj 88 maranëjjäna ukhajja, 55 maranakaw Betelan sirvjjäna. Mä urojja, jupar uñjir enfermeraw wali munasiñamp akham säna: “Jilata Arthur, walja maranakaw Jehová Diosar serviwaytajja” sasa. Arthur jilatajj janiw nayra jakäwip amtasajj jakkänti. Ukatwa kullakar uñkattʼasajj wali kusisit akham säna: “Jïsa ukhamawa. Ukampis janiw kuntï lurawayktan ukajj jukʼamp wakiskirïkiti, jan ukasti, kuntï jichhat uksar lurkañäni ukaw jukʼamp wakiskirejja” sasa.

¹² Inas Diosarojj walja maranak serviskstan, ukampis usutätas laykojj janiw nayrjam serviñ puedjjsnati, ukhamäkchisa jan aynachtʼañäniti. Jehová Diosajj jupar servitasjja, janipuniw armkaniti (Heb. 6:10). Diosar munasitasjja,  janiw qhawqtï lurktan ukamp uñachtʼayktanti, jan ukasti, kusisita servisa, Jupar taqe chuyma servisaw munasitas uñachtʼaytanjja (Col. 3:23). Jehová Diosajja, qhawqsa lurirjamätan uk yatiwa, janiw ukat sipan jukʼamp lurañas maykistuti (Mar. 12:43, 44).

13. Jan walinakansa uñjaskchiñänejja, ¿kunjamsa Anatoly jilatampina Lidiya kullakampin sarnaqäwipajj jan aynachtʼañatak chʼamañchtʼistu?

¹³ Jan walinakan walja tiempo uñjasiña. Diosan servirinakapat yaqhepajj walja maranakaw jan walinakana, arknaqata uñjasiwayapjje. Moldavia markankir Anatoly Melnik * jilatat parltʼañäni. Awkiparojja, carcelaruw katuntasin llawintapjjäna, ukatsti Siberia cheqaruw apayapjjäna. Uka cheqajja, jakasipkäna ukjat 7.000 kilometronak jayankänwa. Ukapachanjja, Anatoly jilatajj 12 maranikïskänwa. Mä mara qhepatjja, juparusa, taykaparusa, achachilaparusa, awichaparus ukhamarakiw Siberia cheqar apayapjjäna. Tiempompejj tantachäwinakar sarapkchïnsa, 30 kilometronakwa khunu taypnama, wali thaya cheqnam sarapjjañapäna. Mä qhawqha maranakatsti, kimsa maratakiw Anatoly jilatarojj carcelar jistʼantapjjäna. Uka tiemponjja, janiw Lidiya esposaparusa ni mä marani jiskʼa imill wawaparus uñj-jjänti. Walja maranakas jan walinakan uñjasiwayapkchejja, Anatoly jilatasa familiapas Diosar servisipkakïnwa. Jilatajj 82 maranëjjewa, Asia Central toqenkir sucursalanwa serviski, Sucursal sarayirit maynïrirakiwa. Kunjamatï Anatoly jilatampi Lidiya kullakampejj serviwayapkejja, ukhamarakiw jiwasajj qhawqtï puedktan ukarjam serviskakiñasa, chʼamachasiskakiñasa (Gál. 6:9).

14. ¿Kunsa Pablojj premio katoqañatak lurañapäna?

¹⁴ Apóstol Pablojja, tʼijuñ tukuyañkama ukhamarak premio katoqañkama chʼamachasiñwa amtäna. Niyakejjay ajllit cristianöchïnjja, alajjpachar sarañwa suytʼaskäna. Ukampis ukatakejj jan qarjtasaw Diosar serviskakiñapäna (Filip. 3:14). Filipos markankir jilat kullakanakajj uka premio katoqañ taqe chuyma suyapjjañapatakejja, Pablojj mä uñachtʼäwitwa jupanakar parläna.

15. Mä markatäñ toqet parlasajja, ¿kunjamsa Pablojj Filipos markankirinakar chʼamañchtʼäna?

¹⁵ “Jiwasanakajj alajjpachankirïtanwa” sasaw Pablojj Filipos markankir cristianonakar amtayäna (Filip. 3:20). ¿Kunatsa uk amtapjjañapäna? Khä tiemponakanjja, Roma markatäñajj  wali valoranit uñjatänwa. * Ukampis ajllitanakatakejja, alajjpachankirïñajj Roma markatäñat sipansa jukʼamp valoranïnwa. Jupanakajj jukʼamp suma gobiernotäpjjänwa, walja bendicionanakwa katoqapjjañaparakïna. Roma markatäñajj janiw ukhamäkänti. Ukatwa Pablojj uka cristianonakar akham säna: “Cristjjat suma yatiyäwinakarjam sum sarnaqapjjam” sasa. “Sum sarnaqapjjam” sasajj alajjpachankirinakjam sarnaqapjjam sañwa munäna (Filip. 1:27). Jichhürunakanjja, alajjpachar sarañatak ajllit cristianonakajj wali yateqaskayäpjjewa. Premio katoqañatakejj jan qarjtasaw Diosar servipjje.

16. Filipenses 4:6, 7 textorjamajja, ¿kunsa alajjpachan wiñay jakañ suyasasa, Paraisoptayat oraqen jakañ suyasas luraskakiñasa?

¹⁶ Alajjpachan jakañsa, jan ukajj Paraíso oraqen jakañsa suyaskstanjja, uk katoqañatakejj Diosar serviskakiñasawa. Kuna jan walinakansay uñjaskstanjja, janipun kunas Diosar serviñ jarkʼistpanti, kunanaktï jaytawayktan ukanakatsa janipun amtasiñäniti (Filip. 3:16). Inas kuntï suyktan ukajj jan jankʼak phoqaskchiti, jan ukajja, jilïrëjjatas laykojj jan nayrjam chʼamanëjjstanti. Inas jan walinakana, jan ukajj arknaqat walja maranaka uñjasstan. Ukhamächejja, jan kunatsa sint llakisiñäniti, jan ukasti taqe llakinakasjja Diosaru yatiyañäni, taqe chuym ruwtʼasisa yuspärasisa jupar mayisiñäni. Diosaw sumankañapjja churistani, uka sumankañapasti jaqenakajj kuntï amuyki ukat sipansa jukʼampiwa (Filipenses 4:6, 7 liytʼañataki).

17. ¿Kunsa akjjar jutki uka yatichäwin yatjjataskañäni?

¹⁷ Kunjamtï mä tʼijurejj kawkirutï puriñapäki ukar niya puriñampëjje ukhajj wal chʼamachaskejja, ukhamarak jiwasajj wiñay jakañar apki uka thakin tukuykam tʼijuñatak chʼamachasiñäni. Jutïrin walja bendicionanakwa katoqañäni, ukatakejja, qhawqha chʼamanïtansa, kunanaksa lurirjamätan ukarjam chʼamachasiskakiñäni. ¿Kunas Diosar jan qarjtas serviskakiñatak yanaptʼistaspa? Akjjar jutki uka yatichäwiw kunas jakäwisan nayrankañapa, ‘kunas wali wakiskiri uk amuyañatak’ yanaptʼistani (Filip. 1:9, 10).