1. ¿Familiaranakasan kun lurapjjañapsa wal muntanjja?

PAULINA * sat mä kullakajj akham siwa: “Familiajajj nayamp chika Paraisonkaspa ukjja, kunatï cheqäki uk yateqkayäta ukhatpachaw munayäta. Yamas Jaime esposojampi jiskʼa wawajampejj Diosar nayamp chik servipjjaspa uk jukʼampiw munayäta” sasa. Inas jiwasan yaqhep familiaranakasajj Jehová Diosar janïr uñtʼapkchiti ni munasipkchisa, ukatwa Paulina kullakjam amuyaraksna.

2. ¿Kuna jisktʼanakarus aka yatichäwin qhanañchaskañäni?

² Janiw familiaranakasarojj Diosan arunakap yateqapjjañapatak obligksnati. Ukampis Diosan arunakap istʼapjjañapatakejj yanaptʼsnawa (2 Tim. 3:14, 15). ¿Kunatsa familiaranakasarojj Diosan arunakapat parlañasa? Kunjamäsipkisa uk amuyañatakejj ¿kunatsa chʼamachasiñasa? ¿Kunsa Jehová Diosar jiwasjam munasipjjañapatakejj lursna? ¿Kunjamsa jilat kullakanakajj ukatak yanaptʼapjjestaspa?

3. Kuntï 2 Pedro 3:9 texton siski ukarjamajja, ¿kunatsa familiaranakasarojj Diosan arunakapat parlañasa?

³ Jehová Diosajj niyaw Supayan apnaqat aka pachar tʼunjani. Uka tʼunjäwitjja, ‘khitinakatï wiñay jakañatak suma chuymanïpki ukanakakiw’ salvasipjjani (Hech. 13:48). Ukatwa jakasktan uka cheqankir jaqenakar yatiyañatak wal chʼamachastanjja, tiempsa apstʼasiraktanwa, ukhamarakiw familiaranakasan Jehová Diosar servipjjañap muntanjja. Alajjpachankir  wali munasiri Awkisajj ‘janiw khitin jiwañapsa munkiti, jan ukasti taqenin arrepentisipjjañapwa muni’ (2 Pedro 3:9 liytʼañataki).

4. Familiaranakasar Diosan arunakapat parlasajj ¿kunansa pantjassna?

⁴ Ak amtañasawa, Diosan arunakapat parlasajja, awisajj sumwa yatiysna, awisasti janirakiw ukham lurksnati. Jan uñtʼatanakarojj sum amuytʼasisaw parltanjja, ukampis familiaranakasarojj cheqakwa kuns sissna.

5. ¿Kunsa familiaranakasar Diosan arunakapat parlasajj amtañasa?

⁵ Familiaranakasar kunjamsa nayrïr kutin Diosat parlayätan uk amtasajja, inas waljanejj akham sisstan: “Jukʼamp sum parlañajaw wakisispäna” sasa. Apóstol Pablojj cristianonakar akham sänwa: “Arunakamajj sumapunïpan, jayumpi jayuñchtʼatäkaspas ukhama, ukhamatwa sapa maynirus kunjam qhanañchañsa yatipjjäta” sasa (Col. 4:5, 6). Familiaranakasamp parlkasajj uka arunak amtapjjapuniñasawa. Janitï ukham lurksnajja, Diosat istʼañ munapjjañapataki yanaptʼañ munasajj jukʼampikiw chuymanakap ustʼaysna.

6, 7. Diosar jan serviri espososa, jan ukajj esposas kunjamäskisa uk amuyañajj ¿kunatsa mä Testigotak wali wakiskiri? Uk mä experienciamp qhanañchtʼam.

⁶ Kunjamäsipkisa uk amuyañatak chʼamachasiñäni. Nayrïr parrafon parlaniwayktan uka Paulina kullakajj akham siwa: “Qalltanjja, esposojampejj janipuniw yaqha toqenakat parltʼasipjjerïkti, Diosata jan ukajj Bibliatakwa parlañ munaskirïta” sasa. Jaime esposopajj mä jukʼakwa Bibliat yatïna, janirakiw kuntï esposapajj parlkäna uks sum amuykänti. Religionapakis wali wakiskirïkaspa ukhamwa amuyäna. ‘Esposajajj jan wali sectar mitisitawa, engañjasipkiwa’ sasaw llakisirakïna.

⁷ Paulina kullakajj saskakiwa: “Niya sapa  jaypʼuw jan utankirïkti. Sabadonakasa domingonakas ukhamarakïnwa. Tantachäwinakana predicacionana, jan ukajj jilat kullakanakan utanakapanwa qheparirïta. Jaimejj utar puriri ukhajja, awisajj janiw khitis utankirïkiti, ukatwa sapaki amuyasiri” sasa. Cheqas wawapampïñsa esposapampïñsa walpun munirïna. Jilat kullakanakar janiw uñtʼkänti, ukatwa jupanakas esposapatakejj jukʼamp wakiskirïpkaspa ukham amuyäna. Kullakarojja, “divorciasjjañäni” sasaw säna. ¿Kunsa ukajj amuytʼayistu? Esposopajj kunjamäskisa uk amuyañatakiw kullakajj chʼamachasiñapäna.

8. Kuntï 1 Pedro 3:1, 2 texton siski ukarjamajja, ¿kunsa familiaranakasajj jukʼamp uñchʼukipjje?

⁸ Yateqaskay sarnaqañatak chʼamachasiñäni. Familiaranakasajj arunakasat sipansa, kuntï lurktan ukwa jukʼamp uñchʼukipjje (1 Pedro 3:1, 2 liytʼañataki). Ukwa Paulina kullakajj amuyäna. Jupajj akham siwa: “Jaimejj janiw cheqpachapun divorciasiñ munkänti, nayarusa wawajarus wal munasipjjetäna. Ukampis divorciasiñ munatapajja, Bibliarjam sarnaqañajj kunja wakiskirisa ukwa amtayitäna. Wal parlañat sipansa yateqaskay sarnaqañatakiw chʼamachasiñajäna” sasa. Kullakajj janiw esposopar Bibliat parlañatak obligjjänti, jan ukasti yaqha toqenakat parltʼasiñatakiw chʼamachasïna. Ukham cambiatapsa, wawapan jukʼamp suma wawäjjatapsa Jaimejj amuyänwa (Prov. 31:18, 27, 28). Jupajja, Bibliajj kunjamsa familiapar yanaptʼaskäna uk amuyasajj jukʼampiw Diosan arunakap istʼañ munjjäna (1 Cor. 7:12-14, 16).

9. ¿Kunatsa familiaranakasar yanaptʼañatak chʼamachasiskakiñasa?

⁹ Yanaptʼañatak chʼamachasiskakiñäni. Ukatakejj Jehová Diosatwa yateqassna. Jupajj  “mayampi mayampwa” jaqenakarojj arunakap istʼapjjañapatak tiempo churi, ukhamat wiñay jakañ katoqapjjañapataki (Jer. 44:4). Pablojj Timoteor akham sänwa: “[Yaqhanakar yanaptʼañatakejj] chʼamachasiskakim, ukhamatwa juma pachpas salvasïta, ukhamaraki khitinakatï jumar istʼapktam ukanakas salvasipjjani” sasa (1 Tim. 4:16). Niyakejjay familiaranakasar munasstanjja, Biblian yatichäwinakap uñtʼapjjañap wal muntanjja. Paulina kullakajj arunakapampi luratanakapampiw familiapar yanaptʼäna. Jichhajj wali kusisitaw Diosarojj esposopamp chik serviski, jupasa esposopasa precursoräpjjewa, jilatasti jilïr irpiritwa serviskaraki.

10. ¿Kunatsa paciencianïñasa?

¹⁰ Paciencianïñäni. Diosan arunakaparjam sarnaqañ qalltasajja, jan wali creencianaksa jan wali costumbrenaksa apanukjjtanwa. Ukampis fiestanakar (fiestas religiosas) jupanakamp chik jan sarjjatas uñjasasa, politicar jan mitisjjatas uñjasasa, familiaranakasajj qalltan colerasipjjaspawa (Mat. 10:35, 36). Ukampis jupanakar yanaptʼaskakiñasawa. Janitï ukham lurjjsnajja, jupanakar juzgataswa uñachtʼaysna, mä arunjja, janis wiñay jakañ katoqapjjañapajj wakiskaspa ukham amuyataswa uñachtʼaysna. Ukampis jaqenakar juzgañatakejja, Jehová Diosajj janiw jiwasar uttʼaykistuti, jan ukasti Yoqaparuw uttʼayi (Juan 5:22). Jiwasatï paciencianïñänejja, tiempompejj inas familiaranakasajj Diosan arunakap istʼañ munapjjchini (“ Internetan jw.org cheqajj utjki ukamp yanaptʼapjjañäni” sat recuadro uñjjattʼäta).

11-13. ¿Kunsa Alicia kullakan experienciapat yateqsna?

¹¹ Munasirïñasawa, ukampis janipun kuntï amtktan uk mayjtʼayañäniti (Prov. 15:2). Alicia kullakat parltʼañäni. Bibliat yateqañ qalltkäna ukhajja, janiw awk taykapamp jakjjänti. Jupanakajj janiw Diosar creyipkänti, politicarus wal mitisipjjäna. Ukatwa Alicia kullakajj jupanakar Diosan arunakapat parlañ amtäna. Kullakajj akham siwa: “Jumatï familiamarojj Bibliat yateqkta ukanakat jan jankʼak parlkätajja, jupanakajj jukʼampiw chuym ustʼayasipjjani” sasa. Kullakajja, cartanakwa awk taykapar apayäna, uka cartanakanjja, kunanakattï awk taykapajj yatiñ munapkaspa ukanakatwa jisktʼirïna. Sañäni, ‘¿Bibliajj munasiñ toqet kamspachasa?’ sasaw qellqerïna (1 Cor. 13:1-13). Jupar sum uywapjjatapatsa yuspärarakïnwa, regalonaksa apayarakïnwa. Jupanakar visitir saräna ukhajja, mamitapar taqe kunan yanaptʼañatakiw chʼamachasïna. Ukampis kullakajj awk taykapar Bibliat parläna ukhajja, jupanakajj qalltan colerasipjjänwa.

¹² Awk taykapampïsajja, kullakajj sapüruw Biblia liyiskakïna. Jupajj akham siwa: “Ukaw mamitajarojj kunatsa Diosan Arupajj nayatak wali wakiskiri uk amuyañatak yanaptʼäna” sasa. Papitupasti ukharakiw Bibliat yateqañ jupa pachpa qalltäna, ukhamat kuntï phuchapajj amuykäna uk yatiñataki, pantjat yatichäwinaksa katjañataki. Kullakajj akham siwa: “Papitujarojj mä Biblia churayäta, ukansti mä nota jupatak qellqtʼayäta” sasa. Biblia liytʼasajja, papitupajj janiw kuna pantjat yatichäwsa katjkänti, antisas wal musparäna.

¹³ Munasirïñasawa, ukampis kuntï amtktan ukjja janipuniw jan waltʼäw utjipans mayjtʼayañasäkiti (1 Cor. 4:12b). Mamitapajja, janiw Alicia kullakan Diosar serviñap munkänti. Kullakajj akham siwa: “Bautisaskayäta ukhajja, mamitajajj akham sitänwa: ‘Jan wali wawätawa’” sasa. Ukham satajj ¿kunsa Alicia kullakajj luräna? Jupajj akham siwa: “Religionajat jan parljjañat sipansa, respetompiw mamitajar akham sayäta: ‘Nayaw Testigöñ amtta, janiw uk mayjtʼaykäti, ukampis  wal munassma’ sasa. Ukatwa jachaqtʼasipjjayäta, qhepatsti mä suma manqʼwa phaytʼarapiyäta. Mamitajajja, ukat aksaruw kunjamsa Bibliajj jukʼamp suma jaqer tukuñatak yanaptʼaskitäna uk amuyjjäna” sasa.

14. Familiaranakasajj Diosar serviñ jarkʼapjjestani ukhajja, ¿kunatsa munañanakap jan lurañasäki?

¹⁴ Familiaranakasajja, kunatsa Diosar serviñajj jiwasatak wali wakiskiri uk inas qhepatak amuyapjjchini. Alicia kullakajj precursorat serviñ amtäna ukhajja, mamitapajj wasitampiw jachäna, ¿kunatsa? Awk taykapajj mä profecionwa Aliciatak ajllipjjäna, ukampis Aliciajj janiw ukarjam lurkänti, ukatwa mamitapajj jachäna. Ukhamäkchïnsa Aliciajj janiw amtap mayjtʼaykänti. Jupajj akham siwa: “Jumatï familiaranakaman munañap lurätajja, mayan ukhamarakiw kuntï munapki uk lurayañ munapjjätam. Ukampis jumatï jupanakar munasiñamp parläta, amtanakams jan mayjtʼaykäta ukhajja, inas Diosan arunakap istʼañ munjjapjjchini” sasa. Ukaw Aliciampejj pasäna. Jichhajja, awk taykapajj precursoratwa servisipki, papitupajj jilïr irpiritwa serviskaraki.

15. Mateo 5:14-16 ukat 1 Pedro 2:12 textonakarjamajja, ¿kunjamsa jilat kullakanakan ‘suma luratanakapajj’ familiaranakasar yanaptʼaspa?

¹⁵ Jehová Diosajja, servirinakapan ‘suma luratanakapampiw’ jaqenakarojj Jupar servipjjañapatak yanaptʼi (Mateo 5:14-16; 1 Pedro 2:12 liytʼañataki). Esposomatï, jan ukajj esposamatï jan Testigökchejja, ¿jilat kullakanakar uñtʼiti? Qalltan parlaniwayktan uka Paulina kullakajja, utaparuw jilat kullakanakar invittʼirïna, ukhamat Jaimejj jupanakar uñtʼañapataki. Jaimejj akham siwa: “Mä  jilataw Testigonakar sum uñtʼañatak yanaptʼitäna uk amtapuntwa. Mä urojja, televisionan pelot anatiri nayamp uñtañatakiw trabajopat permiso mayisïna. Ukaw nayjam jaqekirakïtap amuyañatak yanaptʼitäna” sasa.

16. ¿Kunatsa familiaranakasarojj tantachäwinakar sarapjjañapatak invittʼañasa?

¹⁶ Tantachäwinakar sarapjjañapatak invittʼasaw familiaranakasar yanaptʼsna (1 Cor. 14:24, 25). Jaimejj Jesusan jiwatap amtaski uka tantachäwiruw nayrïr kutin saräna. Uka tantachäwejj trabajo tukuyataruw apasïna, janirakiw jaya tiempökänsa, ukatwa saräna. Jupajj akham siwa: “Kuna toqettï ukan parlaskäna uk janiw amuykayätti, kunjamsa katoqtʼapjjetäna ukakwa amtasta. Jupanakajj munasiñampiw qʼapirtʼapjjetäna, ukhamatwa suma chuyman jaqenakäpjjatap amuyayäta” sasa. Mä chacha warmiw Paulina kullakarojj tantachäwinakansa predicacionansa wawapar uñjañ yanaptʼirïna. Ukhamajja, kunapachatï Jaimejj esposapan creencianakapat yateqañ amtäna ukhajja, esposapar wawa uñjañ yanaptʼkäna uka jilataruw “Bibliat yatichita” sasin säna.

17. 1) ¿Kuna toqetsa jiwas pachpajj jan juchañchasiñasäki? 2) ¿Kunatsa familiaranakasar yanaptʼañatak chʼamachasiskakiñasa?

¹⁷ Familiaranakasajj Jehová Diosar servipjjaspa uk wal muntanjja. Jupanakar yanaptʼañatakejj walsa chʼamachaskstanjja, inas Diosar janipun servipkchiniti. Ukhamänejja, jiwasas juchanïksna ukham janipun amuyañäniti. Cheqas janiw khitirus Bibliat yateqañapatak obligksnati. Ukampis Jehová Diosar kusisit serviskakiñäni ukhajja, jupanakajj Diosar serviñ munapjjarakispawa. Diosat mayirapipjjañäni, Diosan arunakapatsa respetompi jupanakar parlañäni, yanaptʼañatakis chʼamachasiskakiñäni (Hech. 20:20). ‘Diosajj chʼamachasitajat bendisitaniwa’ sasinsa confiyarakiñäni. Familiaranakasatï Diosan arunakap istʼapjjani ukhajja, salvasipjjaniwa.