1. ¿Khitinakas Filipos markan mä congregación uttʼayasiñapatakejj yanaptʼapjjäna?

KUNAPACHATÏ apóstol Pablosa, Silasasa, Lucasasa, Timoteosa Roma markan apnaqata Filipos markar puripkäna ukhajja, Reinon suma yatiyäwinakap istʼañ munir walja jaqenakaruw jikjjatapjjäna. Diosan arunakap taqe chuyma yatiyiri uka pusi cristianonakajja, Filipos markan mä congregación uttʼayasiñapatakiw yanaptʼapjjäna. Discipulonakajj tantachasiñ qalltapjjäna ukhajj inas Lidia kullakan utapan tantachasipjjchïna, jupajj wali katoqtʼasiri kullakänwa (Hech. 16:40).

2. ¿Kuna jan walinakansa Filipos markankir congregacionajj uñjasïna?

² Uka machaq congregacionajj ukjpachaw jan walinakan uñjasïna. Supayajja, uka pusi cristianonak contra saytʼapjjañapatakiw Diosan arunakapar uñisiri jaqenakar chʼamañchäna. Autoridadanakajj Pablompir Silasampir katuntasajj lawampiw jawqʼjapjjäna, carcelaruw llawintapjjarakïna. Qhepürojj carcelat mistjjasajja, jilat kullakanakar chʼamañchtʼiriw sarapjjäna. Uka qhepatjja Pablompi, Silasampi, Timoteompejj Filipos markat sarjjapjjänwa, Lucasasti inas ukan quedaschïna. Ukampis jilat kullakanakajja, espíritu santon yanaptʼapampejj Jehová Diosar servisipkakïnwa (Filip. 2:12). Uk yatisajja, Pablojj wal kusispachäna.

3. Filipenses 1:9-11 textorjamajja, ¿kunsa Pablojj Diosar mayïna?

³ Mä tunka maranak qhepatjja, Pablojj mä cartwa uka cristianonakar qellqäna. Uka carta liytʼasajja, Pablojj qhawqsa jupanakar munasïna ukwa amuysna. Akham sänwa: “Kunjamtï Cristo Jesusajj jumanakar munasipktamjja, ukhamarakiw  nayajj wal munasipjjsma, ukatpï nayajj taqe jumanakarojj wal uñjañ munapjjsmajja” sasa (Filip. 1:8). Ukat akham sarakïnwa: ‘Munasiñanakamajj jukʼamp jiltañapataki, kunatejj wali wakiskirïki uk amuyapjjañamataki, wali qʼoma jakasipjjañamataki, jan khitirus lanktʼayapjjañamataki, suma luräwinak jukʼamp lurapjjañamatakiw Diosarojj mayta’ sasa. Jichhürunakansa uka ewjjtʼajj wal yanaptʼistaspa (Filipenses 1:9-11 liytʼañataki). Aka yatichäwinjja, kuntï Pablojj siskäna ukanakatwa yatjjataskañäni, kunjamsa ukarjam sarnaqsna uksa yatjjatarakiñäniwa.

4. 1) Kunjamtï 1 Juan 4:9, 10 texton siskejja, ¿kunjamsa Jehová Diosajj munasiñap uñachtʼayistu? 2) ¿Qhawqsa Diosar munasiñasa?

⁴ Diosajja, Yoqapar juchanakas layku jiwañapatak khitanisaw jiwasar wal munasitap uñachtʼayistu (1 Juan 4:9, 10 liytʼañataki). Ukham luratapatwa Jupar munastanjja (Rom. 5:8). ¿Qhawqsa Diosar munasiñasa? Jesusajj mä fariseor akham sänwa: “Jehová Diosamar taqe chuymamampi, taqe almamampi, taqe amuyumampi munasiñamawa” sasa (Mat. 22:36, 37). Jehová Diosarojj taqe chuymaw munasiñasa. Sapürutjamaw Jupar jukʼamp munasiñasa. Pablojja, ‘munasiñanakamajj jukʼampiw jiltañapa’ sasaw Filipos markankir cristianonakar säna. Ukampis ¿kunsa Diosar jukʼamp munasiñatak lursna?

5. ¿Kunsa Jehová Diosar jukʼamp munasiñatakejj lurañasa?

⁵ Jehová Diosar munasiñatakejj Jupar uñtʼañasawa. Bibliajj akham siwa: “Khititejj jan munasirïki ukajj janirakiw Diosar uñtʼkiti, Diosajj munasiñawa” sasa (1 Juan 4:8). Apóstol Pablojj akham sänwa: ‘Munasiñanakamajj jukʼamp jiltañapatakejja, Diosar sum uñtʼapjjañamawa, kunjam chuymanisa uks sum amuytʼapjjañamarakiwa’ sasa (Filip. 1:9). Bibliat yateqañ qalltkayätan ukhajja, Diosajj kunjam chuymanisa uk mä jukʼa yateqayätanwa, ukaw Jupar munasiñatak yanaptʼistäna. Ukampis jukʼamp yateqasajja, jukʼampiw Jupar munasjjayätan. Ukatwa Bibliat sapa kuti yatjjatañasa, yatjjatktan ukat lupʼiñas jiwasatak wali wakiskirejja (Filip. 2:16).

6. Kuntï 1 Juan 4:11, 20, 21 texton siski ukarjamajja, ¿khitinakarus munasiñasaraki?

⁶ Diosajj wali munasiriwa, ukatwa jilat kullakanakasar munasiñasaraki (1 Juan 4:11, 20, 21 liytʼañataki). Ukampis inas akham amuystan: “Jilat kullakanakar munasiñajj janiw chʼamäkiti” sasa. Cheqas taqeniw Jehová Diosar sirvtanjja, Jupjam chuymanïñatakiw chʼamachasiraktanjja. Ukhamarusa, Jesusat yateqasisaw sarnaqaraktanjja, jupajj jiwasar wal munasitap laykuw jiwäna. Ukampis awisajja, ‘maynit maynikam munasipjjam’ siski uka mandamientor istʼañajj chʼamakïspawa. Filipos markankir congregacionan kunas pasäna uk uñjañäni.

7. ¿Kuntï Pablojj Evodia kullakampiru Síntique kullakampir ewjjtʼkäna ukat kunanaksa yateqsna?

⁷ Evodia kullakasa Síntique kullakasa, taqe chuymaw Diosarojj Pablomp chik servipjjäna. Ukampis inas jan waltʼayasipjjatap laykojj jan sum apasipkchïnti. Pablojj cartapanjja, sutinakap aytasaw uka kullakanakarojj akham sas qhan ewjjtʼäna: ‘Mä pachpa amuyunikïpjjam’ sasa (Filip. 4:2, 3). Mayni jilat kullakanakarojj akham sarakïnwa: “Jumanakajj taqe kunsa jan arusisa jan chʼajjwas lurasipkakim” sasa (Filip. 2:14). Pablon uka qhana ewjjtʼapajja, Diosar taqe chuyma servir uka pä kullakanakarusa mayni jilat kullakanakarus jukʼamp munasipjjañapatakiw yanaptʼpachäna.

8. ¿Kunatsa jilat kullakanakasar munasiñajj chʼamakïspa, ukat kunas jupanakar munasiñatak yanaptʼistaspa?

 ⁸ Jiwasatï jilat kullakanakan pantjasitanakapak uñchʼukisksnajja, kunatï Evodia kullakampiru Síntique kullakampir paskäna ukarakiw pasistaspa, jilat kullakanakar munasiñajj wali chʼamäjjaspawa. Taqeniw sapür pantjastanjja. Jiwasatï mayninakan pantjasitanakapak uñchʼukiskañänejja, janiw jupanakar munasjjsnati. Sañäni, mä jilatajj Tantachasiñ Uta qʼomachañ jan yanaptʼkistu ukhajja, colerassnawa. Ukampis taqe pantjasitanakap amtsna ukhajja jukʼampiw colerassna, janiw nayrjam munasjjsnati. Jiwasatï ukhaman uñjasstanjja, ak amtañasawa: Jehová Diosajj pantjasirïtassa jilat kullakanakasan pantjasirïtapsa yatiwa. Ukhamäkchisa taqeniruw munasistu. Ukatwa Jupjam munasirïñataki, mayninakan pantjasitanakap jan uñchʼukiñatak chʼamachasiñasa. Jilat kullakanakar munasiñatak chʼamachastan ukhajja, mä wawakiw jupanakamp jakastanjja (Filip. 2:1, 2).

9. Kuntï Pablojj Filipos markankir cristianonakar siskäna ukarjamajja, ¿kunanakäspas kunatï wali wakiskirïki ukanakajja?

⁹ Espíritu santon amuytʼayatäsajja, Pablojj Filipos markankir cristianonakar akham sänwa: ‘Kunatejj wali wakiskirïki uk amuyapjjam’ sasa (Filip. 1:10). Kunatï wali wakiskirïki ukanakat mä qhawqhajj akanakawa: Diosan sutip jachʼañchaña, amtanakap phoqasiñapatak yanaptʼaña, congregacionan sumankañ utjañapataki mayachtʼatäñapatak yanaptʼaña (Mat. 6:9, 10; Juan 13:35). Taqe ukanakajj jiwasatak wali wakiskirïki ukhajja, Jehová Diosar munasitaswa uñachtʼaytanjja.

10. ¿Kunsa Jehová Diosampi wali qʼomat uñjatäñatakejj lurañasa?

¹⁰ ‘Wali qʼomaw jakasipjjañama’ sasaw Pablojj sarakïna. Ukham sasinjja, janiw ‘perfectöpjjañamawa’ sañ munkänti. Jehová Diosakiw perfectojja, jaqenakajj pantjasikipuntanwa. Ukampis jukʼamp munasirïñataki, kunatï wali wakiskirïki ukanak lurañatak chʼamachastan ukhajja, wali qʼomas jakasksna ukhamwa Diosajj uñjistani. ¿Kunjamanakatsa munasirïtas uñachtʼaysna? Mä toqetjja, yaqhanakar jan lanktʼayañatak chʼamachasisaw uñachtʼaysna.

11. ¿Kunatsa yaqhanakar jan lanktʼayañatak chʼamachasiñasa?

¹¹ ‘Jan khitirus lanktʼayapjjamti’ siski uka arunakat wal amuytʼañasawa, ¿kunatsa? Awisajja, kunanaktï kusistʼañatak lurktan ukanakasa, isisitasasa, trabajosas yaqhanakar lanktʼayaspawa. Inas jan walinak jan lurkstanti, ukampis kun lurañtï amtktan ukaw yaqhanakar lanktʼayaspa, ukajj janipuniw walïkaspati. Jesusajj akham sänwa: “Maynitï nayar confiyir aka jiskʼanakat mayniru lanktʼayki ukhajja, uka jaqetakejj jukʼamp walïspawa asnojj muyuyki uka molino qalampi kunkat chinuntasin chika qotar jaqontatäñapajja” sasa (Mat. 18:6).

12. ¿Kunsa precursorat servir mä chacha warmit yateqsna?

¹² Precursorat servir mä chacha warmit parltʼañäni. Jupanakajja, ‘jan khitirus lanktʼayapjjamti’ siski uka ewjjtʼarjam sarnaqañatakiw chʼamachasipjjäna. Congregacionapanjja, jichhak bautisat mä chacha warmiw utjäna. Jupanakajja, ‘cristianonakajj janipuniw cinerojj suma peliculanak uñtiris sarapjjañapäkiti’ sasin amuyir familianwa jilsupjjäna. Ukhamasti, precursor jilatampina esposapampina mä película uñtapjjatap yatipjjäna ukhajja wal colerasipjjäna. Ukatwa precursorat servir uka chacha warmejj peliculanak uñtir jan sarjjapjjänti. Ukjja, jichhak  bautisat jilatampi kullakampejj kunatï walïki jan walïkaraki ukanak amuytʼañ yateqjjapjjäna ukapachkamaw ukham lurapjjäna (Heb. 5:14). Ukham lurasajja, jilat kullakanakapar taqe chuyma munasipjjatapwa uñachtʼayapjjäna (Rom. 14:19-21; 1 Juan 3:18).

13. ¿Kun lurasas maynirojj juchar purtʼasiysna?

¹³ Juchar purtʼasiñapatak jan amuykay chʼamañchasaw maynirojj lanktʼayaraksna. ¿Kunjamsa ukajj pasaspa? Sañäni, inas Bibliat mä yateqerejj alcohol umañ jaytawayjjchi, ukatakejj inas wal chʼamachaschi, ‘janiw mä jukʼsa umañajäjjeti’ sasin amtarakchi. Walja jan wali lurañanak jankʼaki apanukusajj bautisasjjarakchi. Ukampis mä urojja, mä jilataw jupampiru yaqha cristianonakampirojj utapar invittʼi. Utanejja, machjayir umañwa munasiñat akham sas wajjtʼi: “Bautisatäjjtawa, Jehová Diosan espíritu santopas yanaptʼaskaraktamwa. Espíritu santon achupajj munañasamp jan apnaqayasiñawa. Jumatï munañamamp jan apnaqayaskätajja, janiw machjaskätati” sasa. Jichhak bautisat jilatatï uka arunakar istʼasajj machañar mayamp kuttaspa ukhajja, jan walipunïspawa.

14. ¿Kunjamsa tantachäwinakajj kuntï Filipenses 1:10 texton siski ukarjam sarnaqañatak yanaptʼistu?

¹⁴ Tantachäwinakajj kuntï Filipenses 1:10 texton siski ukarjam sarnaqañatakiw yanaptʼistu. ¿Kunjamanakatsa yanaptʼistu? Maya, kunatï Jehová Diosatakejj wali wakiskirïki ukwa amtayistu. Paya, kuntï yateqktan ukarjam sarnaqañatakiw yanaptʼistu, ukhamat wali qʼoma sarnaqañataki. Kimsa,  mayninakar munasiñataki ukhamarak suma luräwinaka lurañatakiw chʼamañcharakistu (Heb. 10:24, 25). Jilat kullakanakampi jukʼamp chʼamañchtʼatäsajja, jukʼampiw jupanakarusa Jehová Diosarus munastanjja. Jupanakar taqe chuyma munasitas laykojj janipuniw mä jilatarusa ni mä kullakarus lanktʼaykañäniti.

15. ¿‘Suma luräwinak’ lurañajj kamsañsa muni?

¹⁵ Filipos markankir jilat kullakanakajj ‘suma luräwinak’ lurapjjaspa ukatakiw Pablojj Jehová Diosar mayïna (Filip. 1:11). Uka suma luräwinakajj akanakäspawa: Jehová Diosar munasiña, markapar munasiña, Jesusar creyiñat yaqhanakar parlaña, kuntï Diosajj jutïrin lurkani ukanak suyaña. Filipenses 2:15 textonjja, ‘mä qhanar uñtataw akapachan qhantapjjañama’ sasaw Pablojj säna. Ukajj cheqäskapuniwa, ¿kunatsa? Jesusajj arkirinakapar akham sänwa: ‘Jumanakajj akapachan qhanapäpjjtawa’ sasa (Mat. 5:14-16). Ukatsti akham sarakïnwa: “Jaqenakar nayan discipulojar tukuyapjjam”, ‘taqe aka oraqpachan nayat qhanañchapjjarakim’ sasa (Mat. 28:18-20; Hech. 1:8). Diosan arunakap jan inaktʼas yatiytan ukhajja, ‘suma luräwinakwa’ lurasktanjja.

16. Jan walinakan uñjaskasas mä qhanar uñtataw qhantsna, ¿kunjamsa Filipenses 1:12-14 textojj uk uñachtʼayi? (Nayrïr paginankir dibujo uñjjattʼäta).

¹⁶ Jan walinakansa uñjaskchiñänejja, mä qhanar uñtataw qhantsna. Awisajja, kunanakatï Diosan arunakap yatiyañ jarkʼkistu ukanakaw jukʼamp yatiyañatak yanaptʼistaspa. Ukaw Pablomp pasäna. Filipos markankir jilat kullakanakar carta qellqkäna ukhajja, carcelanjam mä utan llawintataw Roma markan uñjasïna. Ukhamäkchïnsa, guardianakarusa utapar visitapkäna ukanakarus predicaskakïnwa. Ukham luratapajja, ‘Diosan  arunakapat jan ajjsaras yatiyapjjañapatakiw’ jilat kullakanakar chʼamañchtʼäna (Filipenses 1:12-14 liytʼañataki; Filip. 4:22).

17. Diosan arunakap yatiyañajj jarkʼatäki uka cheqanakan kunjamsa jilat kullakanakajj yatiyasipki uk qhanañchtʼam.

¹⁷ Jichhürunakanjja, walja jilat kullakanakaw Pablot yateqasisajj jan ajjsarirïpjjatap uñachtʼayapjje. Jupanakajja, kawkjanakantï Diosan arunakap yatiyañajj jarkʼatäki uka markanakanwa jakasipjje, ukatwa uka jilat kullakanakajj kunaymanit yatiyapjje (Mat. 10:16-20). Uka markanakat maynïrinjja, congregacionanak tumptʼir mä jilatajj akham sasaw jilat kullakanakar säna: “Familiaranakamaru, vecinonakamaru, yateqañ utankir masinakamaru, trabajir masinakamaru ukhamarak yaqha uñtʼatanakamaruw predicapjjasma” sasa. Pä mara qhepatjja, jukʼamp congregacionanakaw uka circuiton utj-jjäna. Jakasktan uka cheqan inas Diosan arunakap yatiyañajj jan jarkʼatäkchiti. Ukhamäkchisa, akwa uka jilat kullakanakat yateqsna: jiwasatï Diosan arunakap kunaymanit yatiyañatak chʼamachasiñänejja, Jehová Diosaw chʼamäkani ukhas yatiyaskakiñatak yanaptʼistani (Filip. 2:13).

18. ¿Kun lurañatakis jukʼamp chʼamachasiñasa?

¹⁸ Pablojj Diosan amuytʼayataw Filipos markankir cristianonakarojj carta qellqäna. Uka cartan utjki uka ewjjtʼanakarjam sarnaqañatakejj jichhaw jukʼamp chʼamachasiñasa. Ukhamajj kunatejj wali wakiskirïki uk amuyañatak chʼamachasiñäni, wali qʼoma jakasiñatakis chʼamachasirakiñäni, jan khitirus lanktʼayañäniti, suma luräwinaksa jukʼamp lurapjjañäni. Ukhamtï lurañänejja, jukʼamp munasirïñäniwa, wali munasir Jehová Dios Awkisarus jachʼañcharakiñäniwa.