1-3. 1) Cristianjamajj ¿kunsa creyiraktanjja? 2) ¿Kunatsa ukar creyiñajj wali wakiskirejja? (Aka paginankir dibujo uñjjattʼäta).

‘¿JUMAJJ kunanakarus creyta?’ sasin jisktʼapjjestaspa ukhajja, kamsasas qhanañchsna. ‘Jehová Diosaw taqe kuns lurawayi, Juparakiw jakañ vidsa churistu. Jesusaw juchanakas layku jiwawayi’ sasaw sissna. Jutïrinsa, wiñayatakiw mä Paraison jakasiñäni sasin inas saraksna. Ukampis, jiwatanakajj jaktanipjjaniwa sasin ¿saraksnati?

² Jiwasatï wali tʼaqesiñ tiempo jakkir pasañ suyaskstan, Paraison wiñayataki jakañ suyaskstan ukhasa, jiwatat jaktañajj utjkani ukarojj taqe chuymaw creyta sasaw sissna. Kunatsa ukar creyiñajj wali wakiskiri uka toqet apóstol Pablojj akham sänwa: “Jiwatat jaktañatejj cheqpachapuni jan utjkchejja, janirakipï Cristos jaktayatäkäntejja” sasa. Jesusatï jan jaktankaspänjja, janiw jichhajj mä reyïkaspänti, Reinopat yatiyañas inamayakispänwa (1 Corintios 15:12-19 liytʼañataki). Ukampis Jesusan jiwatat jaktatapat janiw pächasktanti. Janirakiw saduceonakjamajj ‘jiwatanakajj janipuniw jaktanipkaspati’ sasin sisktanti. Antisas, jaqenakampi jiskʼachatpachas jiwatanakajj jaktanipjjaniwa sasaw taqe chuyma sistanjja (Mar. 12:18; Hech. 4:2, 3; 17:32; 23:6-8).

³ Apóstol Pablojj akham sasaw qellqäna: “Jiwatat jaktaña” yatichäwejja, ‘Cristjjat qallta yatichäwiwa’ sasa (Heb. 6:1, 2). Ukjjarusti  ‘taqe chuymaw confiyta’ sasaw qhan sarakïna (Hech. 24:10, 15, 24, 25). Uka yatichäwejj ‘Diosan arunakapan qallta yatichäwipäkchisa’, uka toqet jukʼamp yatjjatañaw wakisi (Heb. 5:12). ¿Kunatsa ukham sistanjja?

4. Jiwatat jaktañ toqetjja, ¿kunanaksa maynejj jisktʼasispa?

⁴ Bibliat yatjjatañ qalltapkayätan ukhajja, kunjamsa Lázaro chachasa, yaqhanakas jiwatat jaktapjjäna ukwa yateqawaytanjja. Maysa toqetjja, Abrahan, Job ukat Daniel chachanakajj ‘jutïrin jiwatat jaktañajj utjapuniniwa’ sasin taqe chuymaw confiyapjjäna, uksa yateqawayaraktanwa. Ukampis akhamwa maynejj jisktʼasispa: “¿Walja maranak nayras ‘jiwatanakajj jaktanipjjaniwa’ sasin saskchïnjja, uka arunakarojj confiyaskaksnati? ¿Jiwatanakajj kunapachas jaktanipjjani uk Bibliajj qhanañchiti?” sasa. Uka jisktʼanakar qhanañchasajja, jukʼampiw Diosar confiyañäni. Ukhamajja, kunsa Diosan Arupajj uka toqet qhanañchi uk jichhajj yatjjatañäni.

5. ¿Kuna toqetsa nayraqat yatjjataskañäni?

⁵ Maynejj jiwjjasin mä qhawqha urut jaktjjaspa uk creyiñajj janiw chʼamäkaspati (Juan 11:11; Hech. 20:9, 10). Ukampis ¿walja maranaka, jan ukajj patak patak maranak jiwatäjje ukajj jaktanjjaniwa sasin sapjjestaspa ukhajj creysnati? ¿Nayra maranakana jan ukajj jichhak jiwapki ukanakajj jaktanipjjaniwa sasin creysnati? Cheqas, walja maranak faltkipanwa maynin jiwatat jaktañapatjja qhanañchasïna, jupan jaktatapat janiw pächasktanti. ¿Khitis ukham jaktanïna? ¿Kunjamsa ukajj jutïrin jiwatanakajj jaktanipjjaniwa sasin confiyañatak yanaptʼistu?

6. ¿Kunjamsa Salmo 118 qellqatajj Jesusan phoqasïna?

⁶ Khitin jaktaniñapatsa walja maranak nayrajj qellqasïna uk yatjjatañäni. Salmo 118 qellqatjja, inas David chachajj qellqchïna, ukan akham siwa: ‘Tatay, qhespiyäwim churapjjakitaya ¡Jehová Tatitun sutipar jutirejj qollanäpan!’ sasa. Uka arunakjja, kunapachatï Jesusajj 9 de nisán urun Jerusalenar mantkäna, ukhaw jaqenakajj Mesías toqet parlir uka arunak sapjjäna (Sal. 118:25, 26; Mat. 21:7-9). Ukampis ¿kunatsa Salmo 118 qellqatajj walja maranak qhepat jaktañapäki ukatwa parlaski sasin sissna? Uk amuyañatakejja, kunsa Salmo qellqerejj qhanañcharaki uk yatjjatañäni, jupajj akham sänwa: “Utachirinakan jaqonukut qalajja, esquina [jachʼa] qalaruw tukjje” sasa (Sal. 118:22).

7. ¿Kunsa judionakajj Jesusar lurapjjäna?

⁷ ‘Utachirinaka’ sasin Biblian siski ukajj judionakäpjjänwa, jupanakaw Jesusar jan uñtʼir tukupjjäna. Janirakiw Cristötapsa amuyañ munapkänti, antisas jiwayatäñapwa mayipjjäna (Luc. 23:18-23). Ukhamajj jupanakaw Jesusan jiwatapat juchanïpjjäna.

8. ¿Kunjamatsa Jesusajj ‘jachʼa esquina qalar tukuspäna’?

⁸ Jesusarojj jan uñtʼiriw tukupjjäna ukat jiwayapjjarakïnwa, ukhamajj ¿kunjamatsa ‘esquina jachʼa qalar’ tukuspäna? Jiwatat jaktaspäna ukhakiw ukham tukuspäna. Ukatsti jupa pachpaw mä sarnaqäwit parläna, uka sarnaqäwinjja mä jaqew esclavonakaparu khitäna, yapuchirinakar uñjir sarañapataki. Ukampis wal nuwjasaw khitanukupjjäna. Qhepatsti munat yoqaparuw khitäna, “inas jupar respetapjjchini” sasa. Ukampis jupar uñjasajj jiwayapjjänwa. Israelitanakajja, uka yapuchirinakjamarakiw Diosan khitat profetanakarojj jan wal lurapjjäna. Uka sarnaqäwit cuentañ tukuyasaw Jesusajj Salmo 118:22 qellqatan siski uka profecía arunak aytäna (Luc. 20:9-17). Maysa toqetjja, marka apnaqerinaka, jilïr irpirinaka, escribanakajj Jerusalén markan tantachatäsipkäna ukhaw apóstol Pedrojj uka textonkir arunak sarakïna. Pedrojj “Nazareno Jesucristo[twa]” parläna, jupanakaw Jesusarojj ‘mä  lawar chʼakkatas jiwayapjjäna, ukampis Diosaw jiwatanak taypit jaktayäna’. Ukatjja akham sarakïnwa: “Uka Jesusapï uka qalajja, khitirutejj jumanak utachirïkasin jaqonukupjjta ukajja, ukampis jupajj mä jachʼa esquina qalaw tuku” sasa (Hech. 3:15; 4:5-11; 1 Ped. 2:5-7).

9. ¿Kuna toqetsa Salmo 118:22 qellqatajj qhanañchäna?

⁹ Kunjamtï uñjaniwayktanjja, Salmo 118:22 qellqatajja, maynin jaktaniñapatjja walja patak maranak nayraw qhanañchjjäna. Mesiasarojj jan uñtʼiriw tukupjjañapäna ukat jiwayapjjañaparakïnwa, ukampis jaktasajja, ‘jachʼa esquina qalaruw tukuñapäna’. Jesusajj jiwatat jaktasaw jiwasan qhespiyirisar tukuwayi. Cheqas, “jupat sipanjja yaqha salvirejj janiw utjkiti, janirakiw Diosan ajllit yaqha sutejj aka oraqen utjkiti, ukhamat jiwasan salvasiñasataki” (Hech. 4:12; Efe. 1:20).

10. 1) ¿Kunsa Salmo 16:10 qellqatajj jayäkipan säna? 2) ¿Kunatsa Salmo 16:10 qellqatajj janiw Davidat parlkänti sasin sissna?

¹⁰ Mayniw jiwatat jaktani sasaw yaqha textojj jayäkipan qhanañcharakïna, uk jichhajj yatjjatarakiñäni. Ukajj waranqa maranak qhepatwa phoqasiskäna. Ukasti, ‘jiwatat jaktañajj utjaniwa’ sasin walja maranak nayra qhanañchaski, ukar jukʼamp confiyañatakiw yanaptʼistani. Salmo 16 qellqatjja, inas David chachajj qellqarakchïna, ukan akham siwa: “Jumajj janiw jiwar katjjaruykitätati janirakiw arkiriman janchip ñusantañaps munkätati” sasa (Salmo 16:10). Uka arunakajja, Davidajj janipunis jiwañapäkaspa, janis Seol cheqar sarañapäkaspa ukham janiw sañ munkiti. Hebreo arut Seol siski ukajja, janiw mä cheqpach lugaräkiti, jan ukasti kawkintejj jilaparte jiwatanakajj ikisipki uka lugarawa. Kunjamtï Bibliajj siskejja, Davidajj chuymankipstänwa, jiwjjarakïnwa, “ukatsti imtʼatäjjarakïnwa Davidan markaparu, nayra awkinakapampi chika” (1 Rey. 2:1, 10). Ukhamajj ¿khititsa Salmo 16:10 qellqatajj parlaskäna?

11. ¿Kunapachas Pedrojj Salmo 16:10 qellqatat qhanañchäna?

¹¹ Davidan Salmo 16:10 qellqatapat waranqa maranak jila pasjjäna, ukhaw khititsa parlaskäna uk apóstol Pedrojj qhanañchäna. Jesusan jiwatapata ukhamarak jaktanitapatjja, mä qhawqha semananakakiw pasaskäna, ukhaw Pedrojj waranq waranqa judionakaru, judionakan religionapar mantir jaqenakarojj (prosélitos) Salmo 16:10 qellqatat qhanañchäna (Hechos 2:29-32 liytʼañataki). Ukatsti Davidan jiwatapa, imtʼatäjjatapwa amtayäna. Ukjjarusti Davidat akham sänwa: “Jupasti janïräkipanwa Criston jaktanitap uñjäna” sasa. Ukajj ‘janiw cheqäkiti’ sasin janiw khitis Pedror siskänti.

12. 1) ¿Kunjamsa Salmo 16:10 qellqatajj phoqasïna? 2) Uka qellqatan phoqasitapajja, ¿kunjamsa jiwatanakajj jaktanipjjaniwa sasin confiyañatak yanaptʼistu?

¹² Apóstol Pedrojj kuntï parlkäna ukajj cheqätap uñachtʼayañatakejja, kuntï Davidajj Salmo 110:1 qellqatan siskäna uka arunak aytäna (Hechos 2:33-36 liytʼañataki). Pedrojj Diosan arunakapampi ukham qhanañchasajja, Jesusajj ‘Tatitütapa ukhamarak Cristötapwa’ jaqenakajj sum amuyapjjäna. Jesusajj jiwatat jaktkäna ukhaw Salmo 16:10 qellqatajj phoqasïna sasajj taqeniw amuyapjjäna. Mä qhawqha tiempotjja, Antioquía de Pisidia markankir judionakarojj uka pachpa arunakampiw apóstol Pablojj qhanañcharakïna, taqe ukanak istʼasajj jukʼampwa uka toqet yatiñ munapjjäna (Hechos 13:32-37, 42 liytʼañataki). Uka qellqatan phoqasitapajj ukhamarakiw jiwasarojj yanaptʼistaspa. Jiwatanakajj jutïrin jaktanipjjani sasin walja maranak nayras qellqaskchïnjja, phoqasipuniniwa.

13. Jiwatat jaktañ toqetjja, ¿kunanaksa maynejj jisktʼasispa?

¹³ Jiwatanakajj jaktanipjjaniwa sasin nayra tiempos qellqaskchïnjja, uka arunakajj phoqasipuniniwa.  Uk yatiñajj wal chʼamañchistu. Ukampis, inas maynejj akham jisktʼaschispa: “¿Munat familiaranakajana jan ukajj amigonakajan jaktaniñap uñjañatakejja, walja maranak suyañäjati? ¿Kunapachas jaktanipjjani?” sasa. Jesusan arunakapat amtañäni, “jumanakar parlañajj waliw utjaskitu, jichhajj janiw amuyapkasmati” sasaw apostolonakapar säna. Maysa toqetjja, ak amtañasawa “alajjpachankir Awkejj munañaparjamaw tiemponaksa señalat urunaksa uskuwayi” (Hech. 1:6, 7; Juan 16:12). Ukhamäkchisa, kunapachas jiwatanakajj jaktanipjjani uk yattanwa.

14. Nayra maranakan jaktanipkäna ukampi Jesusan jaktatapampejja, ¿kunatsa jan pachpakïki?

¹⁴ Jiwatat jaktirinakat Biblian qhanañchi ukanakatjja, Jesusan jaktatapaw jukʼamp wakiskirejja. Jesusatï jan jaktkaspänjja, janiw munat familiaranakasana, ni amigonakasan jaktanipjjañapsa suyksnänti. Amuytʼañäni, Elías, Eliseo chachanakajj jakapkäna uka tiempon jaktirinakajj wasitatwa jiwjjapjjäna, cuerponakapas laqʼaruw tukjjäna. Ukampis Jesusajja, “jiwatanak taypit jaktayatä[nwa]”, janirakiw ‘mayampis jiwjjänti’, kunattejj janiw “jiwañajj mä patronar uñtat jupjjar munañanëjjeti”. Antisas alajjpachanwa ‘wiñayans wiñayapataki jakaski’ (Rom. 6:9; Apo. 1:5, 18; Col. 1:18; 1 Ped. 3:18).

15. ¿Kunatsa Jesusarojj ‘nayrïr achu’ sasejja?

¹⁵ Jesusajj alajjpachan jakañatakiw espíritu cuerponi jaktäna, jupapuniw nayraqat ukham jaktawayi (Hech. 26:23). Ukampis janiw jupa sapakejj alajjpachan jakañataki espíritu cuerponi jaktañapäkänti. Jupat jan jitheqtiri apostolonakaparojj ‘nayamp chikaw apnaqanipjjäta’ sasaw säna (Luc. 22:28-30). Ukatakejja, apostolonakapajj jiwapjjañapänwa, ukatsti Jesusjamarakiw espíritu cuerponi jaktapjjañapäna. Apóstol Pablojj niya ukar uñtasitwa, akham sarakïna: “Cristojj jiwatanak taypit jaktayatäjjewa, jupajj khitinakatï jiwañan iktʼjjapjje ukanakat nayrïr achuwa” sasa. Ukatjja Jesusjamarakiw yaqhepajj alajjpachan jakañataki jaktayatäpjjani sasaw Pablojj sarakïna. Ukatsti akham sarakïnwa: “Sapa mayniw horasapar jaktani: Cristow nayrïr achojja, ukjjarusti khitinakatï Cristonkapki ukanakaw jaktanipjjani, jupajj kuttʼankani uka tiempona” sasa (1 Cor. 15:20, 23).

16. Bibliarjamajja, ¿kunapachas alajjpachar saririnakajj jaktapjjañapäna?

¹⁶ Apóstol Pablon uka arunakapajja, alajjpachan jakañatakejj kunapachas jaktapjje uk amuyañatakiw yanaptʼistu. Ukasti, Jesusajj ‘kuttʼankani uka tiemponwa’ pasañapa. Jehová Diosan Testigonakapajja, walja maranak nayraw ‘Jesusan kuttʼaniñap tiempojj’ 1914 maran qalltatap Bibliampi qhanañchtanjja. Jichhas uka tiemponwa jakasktanjja, akapachan tukusiñapas wali jakʼankjjarakiwa.

17, 18. Jesusajj kuttʼankani uka tiemponjja, ¿mä qhawqha ajllitanakarojj kunas pasani?

¹⁷ Alajjpachan jakapjjañapataki jiwatat jaktañ  utjki uka toqetjja, Bibliajj jukʼampinakwa qhanañchi. Akham siwa: “Khitinakatï jiwañan iktʼasipki ukanakatjja sum yatipjjañamwa nanakajj munapjjta [...]. Jiwasatï Jesusan jiwataparusa jaktataparusa confiystanjja, khitinakatï Jesusan arkiripjam jiwañan iktʼasipki ukanakarojj ukhamarakiw Diosajj Jesusampïpjjañapatak jaktayani” sasa. Ukatsti akham sarakïnwa: “Tatitojj kuttʼanjjani uka tiempon khitinakatejj jakaskañäni ukanakajja, jiwañan iktʼasipki ukanakarojj janiw kunjamatsa nayrtʼkañäniti. Pachpa Tatituw [...] arupampi wali jachʼat artʼasisajj alajjpachat saraqanini” sasa. Ukatjja akhamwa qhanañcharaki: “Khitinakatï Cristomp mayakïsin jiwapki ukanakaw nayraqat jaktapjjani. Khitinakatï jakaskañäni ukanakajja, jupanakamp chikäñataki ukhamaraki Tatitumpi jikisiñatakiw qenayanak taypi alayar aptatäñäni, ukhamatwa Tatitumpejj wiñayatak chikäjjañäni” sasa (1 Tes. 4:13-17).

¹⁸ Alajjpachar sarañataki jaktañajja, Jesusajj ‘kuttʼanjjäna uka tiemponwa’ qalltäna, mä arunjja, apnaqañ qalltjjäna ukapacha. Ukhamajj wali tʼaqesiñ tiempon jakasipkani uka ajllitanakajj alayar aptatäpjjaniwa. Uka arunakajj ¿kamsañsa muni? Bibliarjamajja, jupanakajj janiw jiwata jaqenakjam jaya tiempo ikipkaniti. Jan ukasti, ‘qhep qhepa trompetajj tuktʼaskani uka tiemponwa, mayaki, mä chʼipjjtanaki taqenis cambiatäpjjani’ (1 Cor. 15:51, 52; Mat. 24:31).

19. ¿Kuna ‘jukʼamp suma jaktañas’ jutïrin utjani?

¹⁹ Jichhürunakanjja, cristianonakat jila partejj janiw ajllitäpkiti, janirakiw Cristomp chika alajjpachan apnaqanipjjañapatak jawsatäpkiti. Jan ukasti ‘Jehová Diosan urupan’ akapacha tukusiñapwa suyasipki. Kuna urus ukajj purinini uk janiw khitis yatkiti, ukampis wali jakʼankatapajj wali qhanawa (1 Tes. 5:1-3). Uka qhepatwa, jiwatanakajj aka oraqen mä Paraison jakañatak jaktanipjjani. Jupanakajj janiw juchanëjjapjjaniti, wiñayatakiw jakasipjjarakini. Cheqas, nayra maranakan jaktanipkäna ukanakajj wasitat jiwjjapjjänwa, ukampis Paraison jaktanirinakajj ‘jukʼamp suma jakañar jaktayatäpjjaniwa’ (Heb. 11:35).

20. Jutïrinjja sapa mayniw horasapar jaktani sasajj ¿kunatsa sissna?

²⁰ Alajjpachan jakañataki jaktapkani ukanakatjja, Bibliajj akham qhanañchi: “Sapa mayniw horasapar jaktani” sasa (1 Cor. 15:23). Aka oraqenjja, jiwatanakajj ukhamarakiw horasapar jaktapjjpachäni, ukarojj taqe chuymaw confiysna. Uka toqet inas akham jisktʼassna: “¿Jichhak jiwirinakajj kunapachas jaktanipjjpachäni? ¿Jesusajj Waranq Maranak apnaqañ qalltjjani uka tiempot jaktanipjjpachäni, ukhamat uñtʼapki uka familiaranakapan katoqapjjañapataki? ¿Diosar jan jitheqtas serviwayapki sum pʼeqtʼapkarakïna uka chachanakajj kunapachas jaktanipjjpachäni? ¿Jupanakat nayraqat jaktanipjjpachäni, ukhamat Diosan servirinakapar yanaptʼapjjañapataki? ¿Diosar jan servipkäna ukanakajj jaktanipjjpachäniti? ¿Kunapachasa ukat kunjamsa jaktanipjjani?” sasa. Cheqas kunaymanwa jisktʼassna, ukampis janiw ukanakat llakisiñasäkiti. Antisas uñjañatakejj paciencianïñasawa. Jehová Diosajj arsutap phoqaniwa, uk uñjañajj kusiskañäniwa.

21. ¿Kuna suytʼäwis utjistu?

²¹ Ukañkamasti, Jehová Diosar jukʼamp confiyañatakiw chʼamachasiñasa. Jupajj ‘taqe jiwatanakajj jaktanipjjaniwa’ sasaw Jesús toqejj arsuwayäna (Juan 5:28, 29; 11:23). Jehová Diosajj jiwatanakar jaktayañatak wali chʼamaniwa, uka toqet Jesusajj akham sänwa: Abrahán, Isaac, Jacob “taqe uka jaqenakajj [Jehová Diosatakejj] jakasipkiwa” sasa (Luc. 20:37, 38). Ukhamajj apóstol Pabljam sañatakejj walja razonanakaw utjistu, jupajj akham sänwa: ‘Diosar confiyasaw suytʼasktjja, jaqenakan jaktanipjjañapjja’ sasa (Hech. 24:15).