¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:

Yaqha markat jutiri awk taykanakajj wawanakapar Diosan arunakap yatichañatakejja, ¿kunatsa kuna artï parlapki uk amuyasipkiti janicha uk uñjapjjañapa?

Sarjjapjje uka markan kuna artï parlapki uk wawanakajja, escuelansa jan ukajj yaqha jaqenakatsa yateqapjjaspawa. Cheqas ukham yaqha aru yateqapjjañapajj wali wakiskirïspawa. Awk taykanakajja, kuna aru parlir congregacionansa wawanakapajj Diosan yatichäwinakap sum amuytʼapjjaspa, nayrarus sartapjjaspa ukanak sum amuytʼapjjañapawa. Cristiano awk taykanakajja, askip thaqañat sipansa, wawanakapajj Diosar serviñan nayrar sartapjjaspa ukwa munapjje (w17.05, páginas 9-11).

“¿Akanakat sipansa jukʼampit munista?” sasaw Jesusajj Pedror jisktʼäna. “Akanakat sipansa” sasinjja, ¿kamsañsa munpachäna? (Juan 21:15)

Amuyatajja, uka jakʼan chawllanak utjkäna ukanakatwa parlaskpachäna, jan ukajj inas chawlla negociot parlaskchïna. Jesusajj jiwjjäna uka qhepatjja, Pedrojj chawlla katuñaruw kutʼjjäna. Cristianonakajja, kunjamsa trabajopar uñjapjje uk sum amuytʼasipjjañapawa (w17.05, páginas 22, 23).

¿Kunatsa Abrahanajj Sara warmipar “kullakapätwa samaya” sasin sispachäna? (Gén. 12:10-13)

Cheqas Sara warmejj Abrahanan kullakapapunïskänwa. Saratï warmipätwa saspäna ukhajja, Abrahanarojj jiwayapjjaspänwa. Familiam toqew mä wawajj jutani sasin Jehová Diosajj siskäna ukasa, janiw phoqaskaspänti (wp17.3, páginas 14, 15).

¿Kunatsa Biblia traducirinakan sutinakapajj jan qhanañchaski?

Traducción Del Nuevo Mundo de las Santas Escrituras Griegas Cristianas (Machaq Mundon Jakirinakataki Diosan Arunakapa) Bibliajj mistjjäna ukhatpachajj janipuniw traducirinakan sutinakapajj yatiskiti, ¿kunatsa? Traducirinakajj Biblia qellqayiri Jehová Diosarojj wal respetapjje, ukatwa Diosan Arup kunjamäkitï uka pachpa, jan kun yaptʼasa, traduciñataki chʼamachasiwayapjje. Janipuniw jachʼañchayasiñ thaqapkiti, jan ukasti Jehová Diosaruw jachʼañchapjje, taqenis Diosar jachʼañchapjjaspa ukwa munapjjaraki (wp17.4, página 10).

Mä cristianojj jan wali jaqenakat jarqʼaqasiñatakejj pistola, rifle, jan ukajj yaqha ukhamanak apnaqaspati janicha uk sum amuytʼasiñatakejj ¿kunanakas yanaptʼistaspa?

Akanakatwa amuytʼañasa: Jehová Diosajj jakañ vidarojj wali valoranitwa uñji. Jesusajja, jarkʼaqasiñatakejj espadanipjjañamawa sasajj janiw discipulonakapar siskänti (Luc. 22:36, 38). Diosan servirinakapajj “espadanakapjja qholliñ aradoruw tukuyjjap[jje]”. Jiwasatakejj jakañ vidaw cosasanakat sipansa jukʼamp valorani. Mayninakan concienciap respettanwa, mayninakatak yateqaskaywa sarnaqañ munaraktanjja (2 Cor. 4:2) (w17.07, páginas 31, 32).

¿Kunatsa Mateo qellqatampi Lucas qellqatampejj Jesusajj wawäskäna ukat may may qhanañchapjje?

Mateojja, kunanakas Joseampejj pasäna uka toqetwa qellqäna. Sañäni, Marian usur jaqëtap yatisasa, mä ángel toqe Jehová Diosajj Egiptor sarjjam siskäna ukat Israel markar kutʼjjam siskäna ukhas Joseajj kamsänsa, ukanakatwa qhanañchi. Ukampis Lucasajj Mariatwa jukʼamp parlaraki. Sañäni, Mariajj Elisabet warmir visittʼir sarkäna ukata, Jesusajj wawäkasin templor quedaskäna ukhajj kamsänsa, ukanakatwa qhanañchi (w17.08, página 32).

¿Kunanaksa Bibliajj aguantawayi?

Bibliajj kuna arunakampitï qalltan qellqatäkäna ukajj tiempompejja, janiw sum amuyasjjeti. Ukatjja, mayn mayniw markanak apnaqapjjaraki, ukaw kuna artï jaqenakajj parlapki uk mayjtʼayaraki. Biblia uka arunakaru traducitäñap jarkʼirinakas utjarakïnwa (w17.09, páginas 19-21).

¿Sapa maynit mä uñjir angelanïtanjja?

Janiwa. Jesusajja discipulonakapan “angelanakapajj alajjpachankir Awkijan ajanup uñjasipkapuniwa” sasaw säna (Mat. 18:10). Uk sasinjja, angelanakajj discipulonakapar yanaptʼañ wal munapjje sañwa munaskäna, janiw sapa maynis mä angelanïpkaspa ukham sañ munkänti (wp17.5, página 5).

¿Kunjamas cheqpach munasiñajja?

Biblian yatichäwiparjamäki, ukaw cheqpach munasiñajja. Biblianjja, cheqpach munasiñajj agápe satawa. Uka munasiñajj janiw aleq munasiñakïkiti, jan ukasti jan kun suyasaki yaqhanakar taqe chuyma yanaptʼañawa (w17.10, página 7).