Uka toqetjja awisajj qhanañchasïnwa. Kuntï siskayätan ukajj Hebreos 12:16 qellqatarjamajj walikïkaspas ukham amuyañjamänwa, uka textojj Esaú chachat akham siwa: ‘Kunanakatï sagradöki ukanakarojj jiskʼachänwa, jilïr wawäñsa mä manqʼa laykukiw Jacobor churjjäna’ sasa. Uka arunakarjamajj Jacob chachaw jilïr wawañ derechonëjjäna, juparakiw Mesiasan nayra awkiparakispa sasin amuyañjamänwa (Mat. 1:2, 16; Luc. 3:23, 34).

Ukampis Biblian utjki uka sarnaqäwinakat sum yatjjatasajja, Mesiasan nayra awkipäñatakejja, janiw mä chachajj jilïr wawapuniñapäkänti. Kunatsa ukham sistan uk yatjjatañäni.

Jacob (Israel) chachan wawanakapatjja, Rubenow jilïrïna, mamapasti Lea satänwa. Qhepatjja Jacobon Raquel munat esposapajj Josearurakiw wawachasïna. Ukampis Rubén chachan juchachasitap laykojja, jilïr wawañ derechopajj Josearuw pasayasjjäna (Gén. 29:31-35; 30:22-25; 35:22-26; 49:22-26; 1 Cró. 5:1, 2). Ukampis, Mesiasajj janiw ni Rubén chachatsa ni José chachatsa jutkänti. Jan ukasti Judá toqnamwa jutäna, jupasti Lea warmin pusïr wawapänwa (Gén. 49:10).

 Mesiasan nayra awkinakapatjja, phesqa sutinakwa Lucas 3:32 textojj ayti. Amuyatajj inas jupanakajj jilïr wawanakäpjjchïna. Ukhamajj Boazajj Obedan awkipänwa, Obedasti Jesé chachan awkiparakïnwa (Rut 4:17, 20-22; 1 Cró. 2:10-12).

Ukampis Jesé chachan David wawapajja, janiw jilïrïkänti, antisas kimsaqallqo jilanakat jupajj sullkänwa. Ukhamäkchïnsa, Mesiasajj Davidan familiapatwa jutäna (1 Sam. 16:10, 11; 17:12; Mat. 1:5, 6). Ukjjar jutirejj Davidan Salomón yoqapänwa, jupasti janirakikiw jilïr wawäkänti (2 Sam. 3:2-5).

Uk sasajja, jilïr wawanakajj janis kunäkaspa ukham janiw sañ munkiti. Uka tiemponjja jilïr wawäñajj wali askit uñjatänwa, jupanakaw familian pʼeqtʼapjjerïna, oraqsa doble katoqapjjerïna (Gén. 43:33; Deu. 21:17; Jos. 17:1).

Ukampis jilïr wawan derechopajj yaqharuw pasayasispäna. Abrahán chachajj Ismael wawapar khitanukusinjja, Isaac wawaparuw jilïr wawan derechop pasayjjäna (Gén. 21:14-21; 22:2). Maysa toqetjja, Rubén chachajj jilïrïkchïnsa, Josearuw ukajj pasayasjjarakïna.

Hebreos 12:16 textot yatjjataskakiñäni, ukan apóstol Pablojj akham sänwa: “Jan jumanak taypinjja qʼañu juchan sarnaqerisa ni Esaú chachjam kunanakatï sagradöki ukanakar jiskʼachiris utjpanti, jupajj jilïr wawäñsa mä manqʼa laykukiw apanuküna” sasa. Uka arunakajj ¿kamsañsa muni?

Apóstol Pablojja, Mesiasajj kuna familiatsa jutäna ukanakat janiw parlkänti. Antisas cristianonakarojj akham sänwa: ‘Kayunakamataki cheqa thakinak lurasisipkakim’, ukhamat ‘Diosan khuyapayasiñap jan aptʼasipjjañamataki’. Jupanakatï ‘qʼañu juchan sarnaqapjjaspäna ukhajja’ aptʼasipjjaspänwa (Heb. 12:12-16). Ukham lurasajj Esaú chachar uñtasitäpjjaspänwa, jupajj ‘kunanakatï sagradöki ukanakarojj jiskʼachänwa’, kunatï jan wakiskirïki ukwa luräna.

Job, Abrahán, Isaac, Jacob chachanakajj jakapkäna uka tiemponwa Esaú chachajj jakarakïna, ukhamajj inas jupajj familiapatak sacerdotjam sacrificionak loqtirïchïna (Gén. 8:20, 21; 12:7, 8; Job 1:4, 5). Ukampis jupa pachpat llakisitap laykuw, taqe ukanak mä manqʼa laykuki aptʼasïna. Abrahán chachan wawanakapajj tʼaqesipjjañapänwa, inas uk yatis jarkʼaqañataki ukham lurchïna (Gén. 15:13). Maysa toqetjja, kʼari diosanakar serviri pä warmimpiw casarasïna, ukham lurasaw kunatï sagradöki ukanakar jiskʼachatapa, kunatï jan wakiskirïki ukampi apayasitap uñachtʼayarakïna. Ukham luratapajj awk taykaparojj wal llakisiyäna (Gén. 26:34, 35). Ukampis Jacob chachajj janiw ukhamäkänti, jupajj Jehová Diosar serviri warmimpiw casarasïna (Gén. 28:6, 7; 29:10-12, 18).

Ukhamajj Mesiasajj ¿kuna familiatsa jutäna? Janiw jilïr wawanak toqetpun jutkänti. Judionak pachpaw ukham amuyapjjäna, jupanakajj Cristojj Jesé chachan David sullka wawapat jutañapatjja, janiw pächasipkänti (Mat. 22:42).