1, 2. ¿Kunatsa yaqhep awk taykanakajj wawanakapan bautisasiñ munapjjatapat llakisipjje?

BIBLIAT yateqerinakajja, sapa maraw waranq waranqanaka Jehová Diosar jakäwip katuyasisa bautisasipjje. Jupanakat jilapartejj wayn tawaqonakäpjjewa, cristiano familianwa jilsupjjaraki, ukham lurapjjatapajj wali wakiskiriwa (Sal. 1:1-3). Cheqas walja cristiano awk taykanakaw wawanakapan bautisasipjjañap wal munapjje (3 Juan 4 uñjjattʼarakïta).

² Ukhamäkchisa inas llakisipjjarakchi. Yaqhep wayn tawaqonakajj bautisasjjapjje uka qhepatwa, ‘Jehová Diosan leyinakapar istʼañajj wakisipuniti janicha’ sasin pächasjjapjje. Yaqhepajj Jehová Diosar serviñatsa jitheqtawayjjapjjewa. Uk uñjasaw awk taykanakajj  akham sasin llakisipjjaspa: ‘Wawajajj bautisasjjani uka qhepat Diosar serviñ munaskakiniti’ sasa. Nayrïr patak maranakanjja, ukaw Éfeso markankir congregacionarojj pasäna. Jesusajj jupanakar akham sänwa: “Qalltan utjkayätam uka munasiñjja jumajj apanuktawa” sasa (Apo. 2:4). ¿Kunsa awk taykanakajj wawanakapan Diosat jan jitheqtapjjañapatakisa, sum ‘jilsusin salvatäpjjañapatakis’ lurapjjaspa? (1 Ped. 2:2). Timoteot kunsa yateqsna uk uñjañäni.

3. 1) ¿Kunapachas Timoteojj cristianöjjäna, yateqkäna ukampejj kunsa luräna? 2) ¿Kunanaksa Pablojj Timoteor säna?

³ Apóstol Pablojj 47 maranwa nayrïr kuti Listra markar visittʼäna, ukhaw Timoteojj Jesusan yatichäwinakap istʼpachäna. Timoteojj waynitüskchïnsa, kuntï yateqkäna ukarjamaw sarnaqäna, pä mara qhepatjja, Pablompiw congregacionanakar visittʼañatakejj viajïna. Mä 16 maranak qhepatjja, Pablojj akham sasaw jupar qellqäna: “Kunanaktï jumajj yateqkta, taqe chuymas creykarakta ukanakjja arkaskakim, khitinakatsa jumajj ukanak yateqta uksa sum yatisktajja. Jumajj wawatpachaw sagrado qellqatanak uñtʼtajja, ukanakaw jumarojj yatiñan jaqer tukuyätam, ukhamat Cristo Jesusar confiyatamatjja salvasiñamataki” sasa (2 Tim. 3:14, 15). Jichhajj aka kimsa toqet yatjjatañäni: 1) “Sagrado qellqatanak uñtʼtajja”, 2) “taqe chuymas creykarakta ukanakjja”, 3) “ukanakaw jumarojj yatiñan jaqer tukuyätam, ukhamat Cristo Jesusar confiyatamatjja salvasiñamataki”.

4. ¿Kuna yanaptʼanakas jiskʼa wawanakamar yatichañatakejj yanaptʼawaytam? (Página 18 ukankir foto uñjjattʼäta).

⁴ Cristiano awk taykanakajja, wawanakapajj “sagrado qellqatanak” uñtʼapjjañapwa munapjje. Uka qellqatanakajj Hebreo Aruta, Griego Arut Qellqatanakawa. Jiskʼa wawanakasa Biblian qellqatäki uka sarnaqäwinakat yateqapjjarakispawa. Diosan markapanjja, kunayman qellqatanakaw utjistu. Sañäni, libronaka, folletonaka, videonaka, ukanakajj kunayman arutwa utjaraki. Awk taykanakajj uka yanaptʼanakampiw wawanakapar yatichapjjaspa. ¿Uka qellqatanakat kawkïrinakas aruman utji? Qollan Qellqatanakat yatjjatañajj Jehová Diosampi sum apasiñatakiw yanaptʼistu, uk janipuniw armañasäkiti.

5. 1) ‘Taqe chuyma creyiña’ siski ukajj ¿kamsañsa muni? 2) ¿Kunatsa Timoteojj Jesusan Mesiasätap taqe chuymaw creyïna sasajj sissna?

⁵ Cheqas janiw wawanakarojj “sagrado qellqatanak” mä arunjja, Biblian qellqatäki uka sarnaqäwinakat yatichañakejj wakiskiti. Timoteo waynarojja, ‘taqe chuyma creyiñapatakiw’ yanaptʼapjjäna. ‘Taqe chuyma creyiña’ siski ukajja, cheqäskapuniw sasin taqe chuyma confiyaña sañwa muni. Jupajj Hebreo Arut Qellqatanakjja, jiskʼatpachaw sum uñtʼäna. Ukampis walja maranak qhepatwa Jesusajj cheqapun Mesiasätap sum amuyjjäna. Ukar taqe chuyma confiyatapatwa, bautisasïna, apóstol Pablompis misionerjam congregacionanakar visittʼir viajirakïna.

6. ¿Kunjamsa awk taykanakajj kuntï wawapajj Bibliat yateqki ukar ‘taqe chuyma creyiñapatak’ yanaptʼapjjaspa?

⁶ ¿Kunjamsa awk taykanakajj Timoteorjam wawanakaparojj ‘taqe chuyma creyipjjañapatak’ yanaptʼapjjaspa? Ukatakejj paciencianïpjjañapawa. Wawanakapajj janiw ratuki kuntï Bibliat yateqapki ukarojj creyipkaspati, janirakiw awk taykapan taqe chuyma creyipjjatap uñjasakis creyipkaspati. Biblian yatichäwinakapar creyiñatakejja, wawa pachpaw ‘sum amuytʼañapa’ (Romanos 12:1 liytʼañataki). Ukatakejj awk taykanakaw yanaptʼapjjañapa, yamas jisktʼapki ukhajj sumwa amuytʼayapjjañapa.  Kunjamsa mä awkejj wawapar yanaptʼatayna uk uñjañäni.

7, 8. 1) ¿Kunjamsa mä awkejj wawapar wali pacienciampi yatichi? 2) ¿Kunanakansa uka jilatjamajj wawanakamar wali pacienciampi yatichañamajj wakisïna?

⁷ Thomas jilatan imill wawapajj 11 maraniwa. Jupajj akham siwa: “Awisajj akham sasaw wawajajj jisktʼitu: ‘¿Jehová Diosajj evolución toqet taqe kunsa lurawayi? ¿Kunatsa eleccionan jan khitirus votosampi yanapktanjja? ¿Yanaptʼsna ukajj janit markasajj nayrar sartkaspa?’ sasa”. Awisajja, Thomas jilatajj sum amuytʼasisaw ukar qhanañchtʼañapa. Diosaw taqe kun lurawayi sañat sipansa, luratanakampi jukʼat jukʼat sum amuytʼayañ wakisitapjja, jilatajj sum yati.

⁸ Cheqas taqe cristianonakaw paciencianïñasa. Thomas jilatajja, imill wawaparu yatichañatakejj ukhamarakiw wali paciencianïñapa, uk jupajj sum yati (Col. 3:12). Ukatakejj tiempo apsusiñapawa, ukhamat wawapampi sum parltʼasiñataki. Wawapajj kuntï Bibliat yateqki ukanakar taqe chuyma creyiñapatakejja, sumwa amuytʼayañapa. Jilatajj akham siwa: “Wali wakiskirïki ukanakatjja, esposajampejj kuntï wawajajj Bibliat yateqki ukar cheqapunit creyiski, janicha. Cheqätap sumti amuyi, janicha ukanak yatiñ wal munapjjta. Jupajj jisktʼapkitu ukajj nanakatakejj wali askiwa. Jan sum yatjjatasin kunarus iyawsjjakispa ukajj janiw walïkaspati” sasa.

9. ¿Kunjamsa awk taykanakajj wawanakapar Bibliat yatichapjjaspa?

⁹ Awk taykanakajj wali paciencianïpjje ukhajja, wawanakajj jukʼat jukʼatwa “qhawqchʼäkitejj cheqa yatichäwinakajj anchorusa, largorusa, altorusa, manqharusa uk sum amuytʼap[jje]” (Efe. 3:18). Awk taykanakajja, wawanakapajj qhawqha maranïpjjesa, qhawqsa yateqerjamäpjje ukarjamaw yatichapjjañapa. Wawanakatï Bibliat yateqapki uk sum amuyapjjani ukhajja, escuelansa yaqhanakarusa, kunatï cheqäki ukjja, jan ajjsartʼasaw qhanañchapjjani (1 Ped. 3:15). ¿Kunas jiwatanakarojj pasi uk wawanakamajj Bibliampi qhanañchapjjaspati? ¿Kuntï Bibliajj jiwatanakat qhanañchki ukarojj creyiti? * Wawanakaru Bibliat yatichañatakejj pacienciaw munasi, ukampis ukham yatichañajj janiw inamayäkaniti (Deu. 6:6, 7).

10. ¿Kunsa awk taykanakajj lurapjjañapa?

¹⁰ Cheqas wawanakajj Bibliat yateqapki ukar taqe chuyma creyipjjañapatakejja, awk taykanakaw suma yateqaskayäpjjañapa. Stephanie kullakajj kimsa imill wawaniwa, jupajj akham siwa: “Wawanakajajj jiskʼasipkäna ukhatpachwa akham jisktʼasirïta: ‘¿Kunatsa Jehová Diosajj utjaskapuniwa, cheqapar taqe kuns uñjiriwa, wali munasirirakiwa sasin taqe chuym nayajj creyta uk jupanakar qhanañchiristti? ¿Nayajj cheqapunit Jehová Diosar munastjja? ¿Ukanak jupanakajj amuyapjjeti?’ sasin jisktʼasta. Nayatï jan taqe chuym creykstjja, kunjamarak jupanakan creyipjjañap suyiriststi” sasa.

11, 12. 1) ¿Kunjamas yatiñan jaqejja? 2) ¿Kunatsa amuytʼasiriti janicha ukajj janiw edadaparjamäkiti sasajj sissna?

¹¹ Kunjamtï yatjjataniwayktanjja, Timoteojj Qellqatanakat sum yatïna, kunanaktï yateqkäna ukarus taqe chuymaw creyirakïna. Ukampis ‘sagrado qellqatanak uñtʼkta ukanakaw yatiñan jaqer tukuyätam, ukhamat salvasiñamataki’ sasajja, ¿kamsañsa Pablojj munäna?

¹² Perspicacia volumen 2 libronjja, akham sasaw  qhanañchi: ‘Bibliarjamajja, yatiñan jaqejj yateqataparjamaw sarnaqe, jan waltʼañanaksa amuyumpiw askichi, janirakiw jan walinakar purtʼaskiti, amtanakapsa phoqhewa, yaqhanakarus ukham lurapjjañapatakiw yanaptʼaraki. Janiw jan amuytʼasir jaqenakjam lurkiti’ sasa. Bibliajj akham sarakiwa: “Pisi amuytʼamp lurañasti, waynanakan amuyupawa” sasa (Pro. 22:15). Ukampis yatiñan jaqejj sum amuytʼasisaw taqe kuns luri. Mä jaqejj amuytʼasiriti janicha ukajj janiw edadaparjamäkiti, jan ukasti Jehová Diosarojj munasiti, leyinakaparjam sarnaqañatakis chʼamachasiti janicha ukarjamaw amuyasi (Salmo 111:10 liytʼañataki).

13. ¿Kunjamsa wayn tawaqonakajj ‘yatiñan jaqëpjjatap’ uñachtʼayapjjaspa?

¹³ Kawkïr wayn tawaqonakatï suma amuytʼasirïpki ukanakajj janiw munañapampisa ni wayna masinakapampis kunjamtï “mä botejj oladampi jaqnaqayaski, thayampis uksar aksar apayaski” ukham apnaqayasipkiti (Efe. 4:14). Antisas “kunatï walïki jan walïki ukanak amuytʼañjja yateqjjapjjewa” (Heb. 5:14). Awk taykapasa jan ukajj yaqha jilïr jaqenakas jan uñjapki ukhas suma amtanakar puripjje, ukhaw amuytʼasirïpjjatapajj qhan amuyasi (Fili. 2:12). Uka kasta yatiñanïñaw salvasiñatakejj wali wakiskiri (Proverbios 24:14 liytʼañataki). ¿Kunsa awk taykanakajj wawanakapan yatiñanïpjjañapatakejj lurapjjaspa? Awkjamajj kunarus taqe chuym creyi uk wawanakapajj sum amuyapjjañapatakiw chʼamachasipjjañapa. Kuntï sapki, lurapki ukajja, Biblian yatichäwinakaparjam sarnaqañatak chʼamachasipjjatapwa uñachtʼayapjjañapa (Rom. 2:21-23).

14, 15. 1) ¿Kunanakatsa bautisasiñ munir wayn tawaqonakajj nayraqat amuytʼasipjjañapa? 2) ¿Kunjamsa wawamarojj Biblian ewjjtʼanakapar istʼañajj kunja wakiskirisa uk amuyañapatak yanaptʼasma?

¹⁴ Awk taykanakajja, janiw kunas wali kunas jan walïki ukak sapjjañapäkiti. Jan ukasti, akham jisktʼasaw wawanakapar amuytʼayapjjaspa: “¿Kunatsa kunatï jiwasatak munañjamäki ukajj Bibliarjam jan walïki? ¿Kunatsa Biblian yatichäwinakapajj jiwasan askisatakiwa sasin amuyta?” sasa (Isa. 48:17, 18).

¹⁵ Mä wawajj ‘bautisasiñ munta’ sani ukhajja,  bautisasiñajj kunja wakiskirisa, kunanak lurañapasa, ukanakat sum amuytʼasiñapatakiw awk taykanakajj wawapar yanaptʼapjjañapa. Bautisasiñ toqet kuns amuyi, kuna askinakas utji, kuna jan walinakansa uñjasispa, taqe ukanakwa amuytʼayapjjañapa (Mar. 10:29, 30). Wawajj ukanakarjamaw janïr bautisaskasajj sum lupʼiñapa. Jupatï Biblian ewjjtʼanakaparjam sarnaqani ukhajja, kuna askinakas utjani, jan istʼkani ukhajj kuna jan walinakansa uñjasirakispa ukanakwa awk taykanakajj amuytʼayapjjañapa. Ukhamatwa Biblian ewjjtʼanakapar istʼañapuniw jukʼamp wakiskirejja sasin amuyapjjaspa (Deu. 30:19, 20).

16. Bautisat wawapajj Diosar serviñat pächasjjaspa ukhajja, ¿kunsa awk taykanakajj lurapjjaspa?

¹⁶ Bautisat wawapajj Jehová Diosar serviñat pächasjjaspa ukhajja, ¿kunsa awk taykanakajj lurapjjaspa? Sañäni, inas mä waynitusa jan ukajj tawaqetas akapachankir jaqenakjam lurañ munjjchispa, jan ukajj Biblian ewjjtʼanakapar istʼañajj wakisipuniti janicha sasin pächasjjchispa (Sal. 73:1-3, 12, 13). Awk taykapajj kamsapjjanisa ukarjamaw wawanakapajj Jehová Diosar servisipkakiniti janicha uk amtjjapjjani. Wawäskchisa jan ukajj qʼajjo waynitöjjchisa, janipuniw ukanakat jupanakampejj jiskhisipjjañapäkiti. Antisas jupanakar wal munasipjjatapsa yanaptʼañ munapjjatapsa yatiyapjjañapawa.

17, 18. Wawapatï Bibliat kuntï yateqki ukanakat pächasjjaspa ukhajja, ¿kunjamsa awk taykapajj yanaptʼapjjaspa?

¹⁷ Bautisat wayn tawaqonakajja, Jehová Diosarojj ‘taqe chuymaw munasïma, taqe kunat sipansa munañamwa luräjja’ sasaw sawayapjje (Marcos 12:30 liytʼañataki). Jehová Diosajj ukham arsupjjatap phoqapjjañapwa muni, cheqas taqe bautisatanakaw uk phoqapjjañapa (Ecl. 5:4, 5). Awk taykanakajja, wawanakaparojj munasiñampiw uk amtayapjjañapa. Ukampis nayraqatajja, kuna yanaptʼanaktï awk taykanakataki Diosan markapajj apayanki ukanakatwa yatjjatapjjañapa. Ukaw Jehová Diosan Testigopäñajj kunja wakiskirisa, kuna bendicionanakas utji uk amuyapjjañapataki wawanakaparojj yanaptʼani.

¹⁸ Awk taykanakajja, Los jóvenes preguntan volumen 1 libronwa “Los padres preguntan” siski uka cheqan wali suma yanaptʼanak jikjjatapjjaspa. Uka cheqanjja, akham siwa: “Wawajajj janiw Diosar serviñ munjjeti sasajj janiw jankʼaki amuyañamäkiti. Awisajj jupa pachpaw sum amuytʼasiñapa” sasa. Inas masinakapajj ukham amtayapjjchi, jan ukajj sapakjam amuyaschi. Jan ukajj Diosar serviñan mayni wayn tawaqonakan jankʼaki nayrar sartapjjepanwa ukham amuyarakispa. Librojj akham saskakiwa: “Ukham amuyatapajja, janis Diosar confiyjjaspa ukham janiw sañ munkiti. Antisas kunatsa ukham amuyapjje, ukanak amuyañatakiw awk taykanakajj chʼamachasipjjañapa” sasa. Ukatjja, kunjamsa awk taykanakajj wawanakapar yanaptʼapjjaspa uksa librojj ewjjtʼarakiwa.

19. ¿Kunjamsa awk taykanakajj wawanakapar salvasipjjañapatakejj yanaptʼapjjaspa?

¹⁹ Cheqas awk taykanakajja, “kunjamtï Jehová Diosajj munki ukarjam cheqañchasa ewjjtʼasa[w]” wawanakaparojj uywapjjañapa (Efe. 6:4). Ukhamajja, janiw kuntï Bibliajj siski ukaki yatichapjjañapäkiti, jan ukasti, kuntï yateqapki ukar taqe chuyma creyipjjañapatakiw yanaptʼapjjañapa. Wawanakajj kuntï yateqapki ukarojj taqe chuymaw creyipjjañapa, ukhamatwa jupanak pachpa Jehová Diosar jakäwip katuyasisa bautisasipjjani, taqe chuymarakiw servipjjani. Bibliasa, espíritu santosa, yanaptʼañatak chʼamachasipjjatamasa, wawanakamarojj salvasipjjañapatak yanaptʼaspa ukwa munapjjta.