DIANA kullakajj 80 jila maranëjjewa. Esposopajj Alzheimer usunïnwa, jiwañapkamajj chuymankipstatanakar uñjapki uka utanwa jakasiwayi. Pä wawanakapaw jiwäna, jupas cancerampiw usuntarakïna. Ukhaman uñjaskasasa tantachäwinakansa predicacionansa janipuniw kullakajj llakitäkiti sasaw jilat kullakanakajj sapjje.

John jilatajj 43 maranak jilaw congregacionanak tumptʼirit serviwayi. Diosar ukham servisajj wal kusisïna, ukampis usut mä familiarapar uñjañatakiw uk jaytjjäna. Jilat kullakanakajj jachʼa tantachäwinakan jupampi jikisipjje ukhajja, ‘jilatajj pachpakïskiwa, kusisitakïskiwa’ sasaw sapjje.

¿Kunatsa Diana kullakasa John jilatas kusisitakïsipki? Asignacionap jaytjjasasa jan ukajj tʼaqeskasasa, ¿kunatsa maynejj kusisitakïskaspa? Bibliajj akham siwa: “Aski jaqejj Tatitumpiw kusisini” sasa (Sal. 64:10). Uka toqet sum amuytʼañatakejja, kunas cheqpach kusisitäñatak yanaptʼistaspa, kunas janiraki uk yatjjatañäni.

Jakäwinjja casarasiñasa, wawanïñasa, Diosan markapan mä luräwi katoqañasa, yaqha ukhamanakas Diosan regalopawa ukatwa kusisiyistu. Jupaw casarasiñ utjayäna, wawanïñatakis jaqenakar lurawayistu, markapansa luräwinak churarakistu (Gén. 2:18, 22; Sal. 127:3; 1 Tim. 3:1).

Ukampis jakäwisajj mayjtʼaspawa, ukatwa jan kusisitäjjsnati. Inas chachasasa jan ukajj warmisas jiwjjchispa, jan ukajj yaqhamp sarjjchispa (Ezeq. 24:18; Os. 3:1). Wawanakasa, inas awk taykap contra jan ukajj Dios contra saytʼjjapjjchispa, jan ukajj congregacionat jaqsutäpjjchispa. Amuytʼañataki, Samuel profetan wawanakapajj janiw Jehová Diosatakjam sarnaqapkänti; David reyisti, juchar purtʼasisajj familiap taypinsa jan walinakanwa uñjasïna (1 Sam. 8:1-3; 2 Sam. 12:11). Ukham jan walinakan uñjasisaw kusisit jakaskasajj llakinakan uñjassna.

Maysa toqetjja, usuntjjatas layku, familiaranakasar uñjañ layku, jan ukajj Diosan  markapan cambionak utjatap laykuw kuna luräwinaktï Diosan markapan katoqkayätan ukanak jaytjjsna. Ukham jaytir jilat kullakanakat waljanejja, uka luräw jaytasajj llakisipjjtwa sasaw sapjje.

Ukhamajja, kunanakatï kusisiykistu ukanakajj janiw wiñayäkaspati. Ukampis Samuel, David ukat yaqhanakan sarnaqäwinakapajja, yaqha kasta kusisiña utjatapwa amuytʼayistu. Uka kusisiñajj cambionaka jan ukajj tʼaqesiñanak utjipansa janipuniw tukuskiti.

Cheqpach kusisiñajj kunjamasa uk Jesusajj yatïnwa. Alajjpachan wali sumaw jakasïna. Dios nayraqatanjja sapüruw kusisitäna (Prov. 8:30, NM). Ukampis aka oraqer jutkäna ukhajja, jan walinakanwa uñjasïna. Ukhamäkchïnsa, Awkipan munañap lurasajj wali kusisitänwa (Juan 4:34). Jiwañapatak mä jukʼak faltjjäna ukhajj tʼaqeskchïnsa, aguantänwa, ¿kunas ukatak yanaptʼäna? Bibliajj akham siwa: “Nayraqatapan uskutäkäna uka kusisiñatwa mä tʼaqesiñ lawan jiwañkam aguantäna” sasa (Heb. 12:2). Jesusajj cheqpach kusisiñat kamsänsa uk jichhajj paya uñjañäni.

Mä kutejja, wali kusisitaw 70 discipulonakapajj predicacionat kuttʼanipjjäna. Jupanakajj milagronak lurasa, demonionak jaqenakat alissusaw kusisitäpjjäna. Ukampis Jesusajj jupanakar akham sänwa: “Janiw demonionakamp istʼayasisakejj kusisipjjañamäkiti. Jan ukasti sutinakamajj alajjpachan qellqatätap laykuw kusisipjjañamajja” sasa (Luc. 10:1-9, 17, 20). Ukhamajja, Diosan markapan mä luräwi katoqasin kusisitas sirvkstanjja, Jehová Diosamp sum apasiñaw jukʼamp wakiskiri, ukarakiw cheqpach kusisiñ churistu.

Yaqha urojja, Jesusajj walja jaqenakar yatichaskäna ukhajj mä judía warmiw jupar akham säna: ‘¡Kawkïr warmitejj purakapar apkayätam, ukajj kusispan!’ sasa. Uk satasti Jesusajj akham sänwa: “¡Janiwa, antisas khitinakatejj Diosan arunakap istʼapki phoqapkaraki ukanak kusisipjjpan!” sasa (Luc. 11:27, 28). Cheqas mä awk taykajj wawanakapar  uñjasajj wal kusisispa, ukampis Jehová Diosar istʼani, Jupampis sum apasirakini ukhaw jukʼamp kusisitäni.

Ukajj cheqäskapuniwa, Diosamp sum apasisakiw cheqpach kusisitäsna. Jan walinakan uñjastan ukhajj wal llakistanjja, ukampis kusisitäsnawa. ¿Kunatsa ukham sistanjja? Uka jan waltʼäwinak aguanttan, Diosarus jan jitheqtas serviskaktan ukhajja, jukʼamp kusisitätanwa (Rom. 5:3-5). Jehová Diosajj jupar confiyapki ukanakarojj espíritu santopwa churi, kusisiñasti ukan achuparakiwa (Gál. 5:22). Ukatwa Salmo 64:10 qellqatajj akham sispacha: “Aski jaqejj Tatitumpiw kusisini” sasa.

Qalltan parlaniwayktan uka Diana kullakasa, John jilatas kunatsa llakinakan uñjaskasas kusisitakïsipkäna uk amuysnawa. Kullakajj akham siwa: “Kunjamtï mä wawajj awk taykapar wal confiyaskejja, ukhamarakiw Jehová Diosar jukʼamp confiyasta. Jupasti, kusisita yatiyaskakiñatakiw yanaptʼitu” sasa. John jilatajj akham sarakiwa: “1998 maranjja, Escuela de Entrenamiento Ministerial siski ukan yatichañajatakiw uttʼayapjjetu, yatichañatakejj Bibliat wal yatjjatayäta” sasa. Juparojja, ukaw congregacionanak tumptʼirit jan irnaqjjäna ukhajj Jehová Diosar taqe chuyma serviskakiñatak yanaptʼäna. Jilatajj akham saskakiwa: “Esposajatakisa nayatakis kuntï Jehová Diosajj luram sapkitu ukarjam lurañajj janiw chʼamäkänti, taqe chuymaw istʼapjjarakta. Janirakiw ukham lurapjjatajat arrepentisipkti” sasa.

Jupjamajja, walja jilat kullakanakaw Salmo 64:10 qellqatan kuntï siski ukajj cheqätap amuyapjje. Estados Unidos markankir Betelan 30 maranak jila servir mä chacha warmit parltʼañäni, jupanakarojj precursor especialat servipjjañapatakiw khitjjapjjäna. Jupanakajj akham sapjjewa: “Kunarutï wal munaskta uk jan utj-jjtam ukhajja, llakitaw jikjjatasta. Ukampis janiw wiñay llakiskasmati” sasa. Jupanakajja, jankʼakiw congregacionapamp chika trabajiñ qalltapjjäna. Jupanakajj akham sapjjarakiwa: “Jehová Diosarojja, kuntï munapkäyäta uk qhanwa mayisipjjäyäta. Jupajj kunjamsa istʼapjjetäna uk uñjasajja, wali chʼamañchtʼata kusisita ukhamaw jikjjatasipjjayäta. Congregacionajanjja, waljaniw precursorat serviñ qalltapjje. Yamas Bibliat yatichasipkayäta ukanakat paninejj nayraruw sartapjjäna” sasa.

Cheqas awisajj kunat llakisiñas utjapuniwa. Ukampis Jehová Diosajja, Salmo 64:10 qellqatan akham sasaw chuymachtʼistu: “Aski jaqejj Tatitumpiw kusisini” sasa. Ukhamajja, kuna llakinakansay uñjaskchiñänejja, Jehová Diosar jan jitheqtas serviskakiñäni ukhajj kusisitaw jakasiñäni. Diosajj “mä machaq alajjpachampi mä machaq oraqempi” churañ munkistu uk jankʼak puriniñapwa suyasktanjja. Ukanjja, Jehová Diosan servirinakapajj perfectojjañäniwa ukat ‘wiñayatakiw kusisita’ jakasjjarakiñäni (Is. 65:17, 18).

Ukhamajj janiw usuntjjañäniti, sapürurakiw kun lurañatakis chʼamajj utjistani. Kuna jan walinakantï nayrajj uñjaskayätan ukanak janipuniw amtjjañäniti. Jehová Diosajj akham siwa: “Kunatejj utjkän ukajj armatäjjaniwa, janirakiw khitis mayampsa [...] amtaskjjaniti” sasa. Ukatjja, jiwat walja familiaranakasajj jaktanjjapjjani ukanakampis jikisjjarakiñäniwa. Jesusajj mä imill wawar jaktaykäna ukhajja, kunjamtï awk taykapajj kusisipkäna, ukhamarakiw walja millón jaqenakajj kusisipjjani (Mar. 5:42). Cheqas aka oraqen jakasipkani uka aski jaqenakajja, wiñayaw Jehová Diosampi kusisipjjani.