¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:

Diosajj wali sinttʼasiriwa, ¿kunjamsa Bibliajj uk amuytʼayistu?

Israelitanakajj Egipton esclavösajj wal tʼaqesipjjäna, kunjamsa tʼaqesipjjäna uk Diosajj yatïnwa, wal sinttʼasirakïna (Éx. 3:7; Is. 63:9). Niyakejjay jaqejj Diosar uñtasit luratästanjja, jaqe masisat sinttʼasiraksnawa. ‘Diosajj janiw munaskitaspati’ sasin amuytan ukhas Diosajj sinttʼasiskakistuwa (wp18.3, páginas 8, 9).

¿Kunjamsa Jesusajj jaqenakar jan yaqhachasirïpjjañapatak yanaptʼäna?

Jesusajj aka oraqenkkäna ukhajja, judionakat waljaniw yaqhachasirïpjjäna. Ukatwa Cristojj humilde chuymanïñat walja kuti parläna, yaqha kasta jañchininakar yaqhachirinakarus cheqañcharakïnwa. “Jumanakajj taqenis jilapuräpjjtawa” sasaw discipulonakapar säna (w18.06, páginas 9, 10).

Suma Oraqerojja, ¿kunatsa Diosajj Moisesar jan mantaykäna, kunsa ukat yateqsna?

Moisesajj wali sumwa Jehová Diosamp apasïna (Deut. 34:10). Wasarnam 40 maranak viajisajja, israelitanakajj wasitampiw umat quejasiñ qalltapjjäna. Ukatwa Diosajj ‘qarqaruw parlañama’ sasin Moisesar säna. Ukampis ukham lurañat sipansa Moisesajj qarqaruw jisktäna, ukatwa Diosajj colerasïna, inas jan istʼasirïtapata, jan ukajj Jupar jan jachʼañchatapat coleraschïna (Núm. 20:6-12). ¿Kunsa ukajj yatichistu? Diosar istʼañasapuniwa, jachʼañchañasarakiwa (w18.07, páginas 13, 14).

¿Kunatsa mayninakar aleq uñkatasak juzgañajj jan walïkaspa?

Jaqe masisarojja, yaqha kasta jañchinïtapata, yaqha markankirïtapata, qollqenïtapata, pobrëtapata, jan ukajj qhawqha maranisa ukarjamaw juzgsna. Ukampis Jehová Diosajj kunjamtï jupanakar uñjki ukham uñjañwa yateqañasa (Hech. 10:34, 35) (w18.08, páginas 8-12).

¿Kunjamanakatsa chuymankipstat jilatanakajj congregacionan yanaptʼapjjaspa?

Chuymankipstat mä jilatajj congregacionan yaqha luräwsa katoqkchejja, Diosatakejj valoranikïskiwa yaqhanakarus yanaptʼaskakispawa. Kawkïr kullakantï esposopajj jan Testigöki ukarusa, congregacionat jitheqtatanakarus yanaptʼaspawa, yatiyañansa kunayman toqetwa yanaptʼaspa (w18.09, páginas 8-11).

Bibliat yatichañatak yanaptʼanakan ¿kuna herramientanakas utjistu?

Mä qhawqhajj akanakawa: tarjetanaka, invitacionanaka, wali suma wakichtʼat kimsaqallqo tratadonaka, Yatiyañataki ukat ¡Sartapjjañäni! sat revistanaka. Folletonaka, Bibliat yatjjatañatak pä libronaka, pusi videonakaw utjaraki. Uka videonakat mayajj ¿Kunatsa Bibliat yatjjatañama? satawa (w18.10, página 16).

Proverbios 23:23 textorjamajja, ¿kunjamsa mä cristianojj kunatï cheqäki uk alaspa?

Kunatï cheqäki uk alañatakejj janiw qollqejj wakiskiti, jan ukasti tiempow munasi, chʼamachasiñas wakisirakiwa (w18.11, página 4).

Kunjamtï Oseas profetajj Gómer sat warmipar uñjkäna ukat ¿kunsa yateqsna?

Oseas profetan warmipajj walja kutis yaqha chachanakampi sarnaqkchïnjja, profetajj perdonänwa janirakiw divorciaskänti. Diosan mä serviripatï qʼañu juchar purtʼasini ukhajja, jan juchanïki ukajj perdonaspawa. Jupatï juchar purtʼasirimpi wasitat ikthapjjani ukhajja, janiw Bibliarjamajj divorciasjjaspati (w18.12, página 13).