1, 2. Kunsa jakäwimampi luräta uk janïr amtkasajja, ¿kunatsa Jehová Diosar istʼañamajj wakisi? (Aka paginankir fotonak uñjjattʼäta).

JUMATÏ waynästa jan ukajj tawaqöstajja, kunsa jutïrin lurasma uka toqet walja ewjjtʼanakwa katoqpachäta. Inas yatichirinakamasa, kuna profesionsa ajllisma uka toqet amuytʼayirinakasa jan ukajj yaqhanakas akham sasin chʼamañchapjjeristam: ‘Walja qollqe ganañatakejj mä suma profesionanïñamawa’ sasa. Ukampis Jehová Diosajja, janiw ukham lurañam munkiti. Antisas colegion sum yateqañam muni, ukhamat colegiot mistjjasajj ukampi yanaptʼasisa jakañamataki (Col. 3:23). Ukampis kunsa jakäwimampi luräta uk janïr amtkasajja, yatichäwiparjam lurañamatakiw Diosajj chʼamañchtam. Ukanakaw kunsa aka qhepa urunakan lurañam muni uk amuyañatak yanaptʼätam (Mat. 24:14).

² Kunas jutïrin pasani taqe ukanakjja, Jehová Diosajj sum yati, akapachan niya tukjatäñapsa yatirakiwa uk janiw armañamäkiti  (Is. 46:10; Mat. 24:3, 36). Yamas Jupajj sumwa uñtʼistu. Kunanakas kusisiyistaspa, kunanakas janiraki ukanaksa yatirakiwa. Ukatwa kuntï jaqenakajj ewjjtʼapktam ukanakat yaqhepajj waljamäkchisa, jan Bibliarjamäkchi ukajj janiw walïkiti (Prov. 19:21).

3, 4. Adanasa Evasa jupanakat jutir wawanakas jan wali ewjjtʼar istʼapjjatapat ¿kunjamansa uñjasipjjäna?

³ Nayra tiempotpachaw jan wali ewjjtʼanakajj utjäna. Nayraqatajja, Supayaw jaqenakarojj jan wali ewjjtʼanak churäna. Evarojja, esposomampitï munañanakamarjam jakapjjäta ukhajj jukʼamp kusisitäpjjätawa sasaw säna (Gén. 3:1-6). Cheqas Supayajj jupa pachpatakwa llakisïna. Adanasa, Evasa, jupanakat jutir wawanakas Diosar istʼañat sipansa juparu istʼapjjaspa, servipjjaspa ukwa Supayajj munäna. Ukampis Supayajj janiw jupanakatak kuns lurkänti. Antisas Jehová Diosaw chacha warmjam sum jakasiñsa, mä suma jardinsa, jan juchani cuerpsa wiñay jakasipjjañapatak churäna.

⁴ Ukampis Adanampi Evampejj janiw Diosar istʼapkänti, ukatwa Jupampejj jan sum apasjjapjjänti. Ukham jan istʼasipjjatapatjja, jan walinakanwa uñjasipjjäna. Chuymankipstasajj jiwjjapjjänwa, kunjamtï khuchoqat mä panqarajj wañsusin jiwjje ukhama. Wawanakapas ukhamarakiw uka jucha laykojj tʼaqesipjje (Rom. 5:12). Ukham jan walinakan uñjaskasasa, jilaparte jaqenakajj janiw Diosar istʼapkiti, munañaparjamakiw sarnaqasipki (Efes. 2:1-3). ¿Ukham sarnaqasajj kuna jan walinakansa uñjasipjje? Bibliajj “[Jehová Dios] contrajja janiw yatiñasa kunäjjeti” sasaw qhanañchi. Mä arunjja, Diosan arunakap contra ewjjanakajj inamayakiwa (Prov. 21:30, Aymar Biblia).

5. 1) ¿Kunsa Jehová Diosajj yatïna? 2) Ukajj cheqapuniw phoqasïna sasajj ¿kunatsa sissna?

⁵ Ukampis Jehová Diosajja, kunjamsa yaqhepanakajj Juparu uñtʼasin servipjjani uk yatïnwa, jupanakat walja wayn tawaqonakaw ukham lurapjjañapäna (Sal. 103:17, 18; 110:3, NM). Diosajj wali valoranitwa jupanakar uñji. Inas jumajj ukanakat maynïrïsta. Cheqas Diosan walja bendicionanakapwa katoqpachäta, kusisitaw jakasirakpachäta (1 Tim. 6:17; Prov. 10:22). Ukanakat jichhajj pusi uñjañäni: Diosat yatjjatañatak yanaptʼanaka, suma amigonak jikjjataña, kunatï kusisiykistaspa ukanak lurañ amtaña, cheqpach libre jakasiña.

6. ¿Kunatsa Diosat yatjjatañamajj wakisi, ukat kunjamsa Jehová Diosajj yanaptʼtamjja?

⁶ Animalanakat sipansa Diosat yatjjatañwa jaqenakajj muntanjja, ukatakejj Jehová Dios sapakiw yanaptʼistaspa (Mat. 4:4). Arunakapar istʼtan ukhajja, yatiñanïtasa amuytʼasirïtaswa uñachtʼaytanjja, kusisitaw jakasiraktanjja. Jesusajj akham sänwa: “Kusisiñanïpjjew Diosat yatjjatañajj kunja wakiskirisa uk amuyasirinakajja” sasa (Mat. 5:3). Diosajj Arup toqew Jupat yatjjatañamatak yanaptʼtam, ‘suma phoqeri amuyasir esclavop’ toqes Jupat jukʼamp yatjjatañatak walja yanaptʼanakwa churtam (Mat. 24:45; Is. 65:13, 14).

7. Diosajj jupat yatjjatañatak churkistu ukanakat yatjjatañajj ¿kunjamsa yanaptʼätam?

⁷ Diosajj jupat yatjjatañatak yanaptʼanak churkistu ukajja, yatiñanïñataki, suma amuytʼasirïñatakiw yanaptʼätam, ukaw kunayman toqet jarkʼaqätam (Proverbios 2:10-14 liytʼañataki). Sañäni, Diosajj janiw utjkiti sasin yatichapki ukajj kʼarïtapa, jan ukajj walja qollqenïsa, yänakanïsakiw kusisita jakassna  sasin yatichapki ukanakajj kʼarïtap amuyañatakiw yanaptʼätam. Ukatjja, kunatï jan walïki ukanak jan munañataki, kunatï jan waltʼaykiristam ukanakar jan yatintañatakis yanaptʼarakïtamwa. Ukhamajj yatiñanïñataki, amuytʼasirïñatakiw chʼamachasiñama. Ukhamatwa qhawqsa Jehová Diosajj munastam, jumar yanaptʼañ munatapsa juma pachpa amuyarakïta (Sal. 34:8; Is. 48:17, 18).

8. Jichhatï Jehová Diosar jukʼamp jakʼachasïta ukhajja, ¿kunjamsa ukajj jutïrin yanaptʼätam?

⁸ Akat mä jukʼa tiemporojja, Supayan apnaqat akapachajj qʼala tukjatäniwa, ukapachajj Jehová Dios sapakiw jarkʼaqestani. Inas jan kuna manqʼañani uñjaschiñäni, ukhajj ‘Diosaw manqʼa churitani’ sasin confiyañajj wali wakiskirïniwa (Hab. 3:2, 12-19). Ukhamajja, Jehová Dios Awkisarojj jichhaw jakʼachasiñama, jukʼampi confiyañsa yateqañamaraki (2 Ped. 2:9). Ukham luräta ukhajj kuna jan walinsa uñjaskchïtajja, David reyjamarakiw akham säta: “Nayajj Tatitump chikapuniw sarnaqaskta, jupaw kupëjjajjanki, janiw kunas tinkuykitaniti” sasa (Sal. 16:8).

9. 1) Kuntï Juan 6:44 texton siski ukarjamajja, ¿kunsa Jehová Diosajj luri? 2) ¿Kunatsa Testigonakar uñtʼañajj mä suma bendicionajja?

⁹ Diosar jan servir mä jaqer uñtʼta ukhajj ¿qhawqsa jupat yatta? Cheqas mä jukʼakwa yatisma. Inas sutipa kunjam uñnaqtʼanisa ukak yatchisma. Ukampis mä Testigor uñtʼta ukhajj janiw ukhamäkiti, jukʼampinakwa yattajja. Sañäni, Jehová Diosar wal munasitapa, suma chuymanïtapa, Diosajj markapar jawsatapwa yattajja (Juan 6:44 liytʼañataki). Jupajj yaqha markatäkchisa, yaqha costumbrenïkchisa, yaqha kasta jañchinïkchisa, waljanakwa jupat yattajja, jupas ukhamarakiw jumat yati.

10, 11. Jehová Diosan servirinakapajj ¿kunansa niya pachpätanjja, ukat kunjamsa ukajj yanaptʼistu?

¹⁰ Jupajj yaqha arsa parlkchejja, kuntï Diosajj yatichkistu uka ‘qʼoma aru’ jumjam parlatapwa jankʼaki amuyta (Sof. 3:9). Mä arunjja, jupasa jumasa, Jehová Diosaruw servipjjta, Biblian yatichäwiparjamaw sarnaqapjjta,  jutïr urun sum jakasiñsa suyapjjaraktawa. Uk yatiñajja, wali wakiskiriwa ukaw jupar confiyañatakisa, jupampi walja tiempo sum apasiñatakis yanaptʼiristamjja.

¹¹ Jehová Diosaru servisajj suma amigonakanïtawa, janiw ukham amigonakajj utjkaspati. Janis taqenirojj uñtʼkstajja, aka oraqpachanwa amigonakamajj utji. ¿Diosar jan servirinakajj ukham amigonïpjjew sasmati?

12. ¿Kunanak lurañsa Jehová Diosar jukʼampi serviñatakejj amtasma?

¹² (Eclesiastés 11:9-12:1 liytʼañataki). ¿Diosar jukʼamp serviñti amtaskta? Inas Biblia sapüru liyiñataki, tantachäwinakan jukʼamp arstʼañataki jan ukajj jukʼamp sum yatiyañatak chʼamachasisksta. Ukham chʼamachasisin jukʼamp sum luratamatsa, jan ukajj walik ukham lurtajja sasin sapjjtam ukhas ¿kunjamakis jikjjatasta? Cheqas kusispachätawa. Jesusat yateqasisaw munañam lurañat sipansa Diosan munañap luraskta, ukajj wali wakiskiriwa (Sal. 40:8; Prov. 27:11, NM).

13. Kunatï akapachan utjki uk thaqañat sipansa, ¿kunatsa Jehová Diosar servisajj jukʼamp kusisitätanjja?

¹³ Jumatï Jehová Diosar jukʼamp serviñataki chʼamachasïtajja, kusisitaw jakasïta, mä amtampiw jakasirakïta. Apóstol Pablojj akham sänwa: “Suma thurtʼatäpjjam, suma saytʼatäpjjarakim, Tatitur serviñansa walpun trabajipjjam. Jumanakajj yatipjjtawa, Tatitur servipjjatamajj janiw inamayäkiti” sasa (1 Cor. 15:58). Walja jaqenakajj qollqe jikjjatañataki, wali uñtʼatäñataki ukat yaqha ukhamanak jikjjatañatakiw chʼamachasipjje, ukampis janiw cheqpach kusisitäpkiti (Luc. 9:25). Kunjamtï jichhajj yatjjatkañänejja, Salomón reyis taqe ukanak jikjjatasajj janiw kusisitäkänti (Rom. 15:4).

14. Salomón reyejj kuntï lurkäna ukat ¿kunsa yateqasma?

¹⁴ Salomón reyejj munañani wali qamiri ukhamänwa, kuntï munkäna taqe ukanak jikjjatasajj kunjamsa jakasispa ukwa yatiñ munäna (Ecl. 2:1-10). Ukatwa utanak utachasïna, suma jardinanaka, parquenak lurayasïna, mä arunjja kuntï munkäna ukanakwa lurayasïna. ¿Uk lurasajj kusisitänti? Jupa pachpaw taqe ukanak jikjjatasajj inamayakïtapa, thayarusa katthapï sisksna ukhamakïtap amuyasïna (Ecl. 2:11). ¿Kunsa jupat yateqasisma?

15. ¿Kunatsa Jehová Diosar confiyañamajj wakisi, ukat Salmo 32:8 qellqatarjamajj kunjamsa ukajj yanaptʼätam?

¹⁵ Yaqhepajja, jan walir purisakiw kunas wali kunas jan walïki uk yateqapjje. Ukampis Jehová Diosajj janiw ukham yateqañam munkiti, ukatwa Jupar istʼañam muni. Ukatakejj Juparuw confiyañama. Jupar confiyas taqe kuns luräta ukhajj janipuniw arrepentiskätati. ‘Diosajj janipuniw luratanakamatsa ni sutipar munasitamatsa armaskaniti’ (Heb. 6:10). Ukhamajj Jupar jukʼamp confiyañataki chʼamachasim. Ukhamatwa kuntï Diosajj sisktam ukajj juman askimatakïtap amuyäta (Salmo 32:8 liytʼañataki).

16. ¿Kunatsa libre jakasiñar wali valoranit uñjañasa, ukat kunatsa wali amuyumpi sarnaqañasa?

¹⁶ Apóstol Pablojj akham sänwa: “Kawkjantï Jehová Diosan espiritupajj utjki ukanjja, libre jakasiñaw utji” sasa (2 Cor. 3:17). Cheqas Diosajj libre jakasiñar wal munasi, jiwasarus libre jakasiñ munirwa lurarakistu. Ukampis sum sarnaqañamwa muni, ukhamat jan walinakar jan purtʼasiñamataki. Inas jumajj pornografía uñchʼukiri, qʼañu juchanak luriri, jiwañar aptʼirjam anatañanak anatiri, drogasiri jan ukajj alcohol umiri wayn tawaqonakar  uñtʼsta. Ukanak lurasajj inas mä rato kusisipjjchi. Ukampis qhepatjja, jan walinakanwa uñjasipjje. Sañäni, ukanakaruw yatintapjje, usuntapjjewa, jiwañar kunaw puripjje (Gál. 6:7, 8). Jupanakajj libres jakasipkaspa ukhamwa amuyasipjje, ukampis janiw ukhamäkiti (Tito 3:3).

17, 18. 1) ¿Kunatsa Jehová Diosar istʼasajj librew jakassna sasajj sissna? 2) Jichha tiempon jakir jaqenakat sipansa, ¿kunjamansa Adanampi Evampejj qalltan libre jakasipjjäna?

¹⁷ Ukampis Diosar istʼañajj wal yanaptʼistu. Usunakatsa jarkʼaqestuwa, cheqpachapuniw libre jakasiraktanjja (Sal. 19:7-11). Jumatï Jehová Diosan leyinakaparjam sarnaqäta, yatichäwinakaparjam luräta ukhajja, Jehová Diosasa, awk taykamas suma amtaruw purini sasaw confiyapjjätam. Cheqas Jupat jan jitheqtas servirinakaparojj Jehová Diosajj cheqpach libre jakasiñ churañwa muni. Biblianjja, uka kasta jakañarojj ‘Diosan wawanakapjam libre jakasiña’ sasaw qhanañchi (Rom. 8:21).

¹⁸ Adanampi Evampejj ukhamwa qalltan jakasipjjäna. ¿Kunanakatsa Diosajj Edén jardinan jarkʼäna? Mä qoqan achup janiw manqʼapjjätati sasakiw säna, janiw taqe kunat jarkʼkänti (Gén. 2:9, 17). Uka ley churasajj ¿jan sinttʼasirïtapti Diosajj uñachtʼayäna? Cheqas janiwa. Jaqenakajj kunayman leyinakwa apsupjje, munkir jan munkirwa phoqayañ munapjjaraki, ukampis Diosajj janiw ukham lurkiti.

19. ¿Kunjamsa Jehová Diosampi Jesusampejj libre jakasiñ yatichapjjestu?

¹⁹ Jehová Diosajj kunjamsa uñjistu ukanwa qhawqha yatiñanisa uk amuytanjja. Walja leyinak churañat sipansa, pacienciampiw munasirïñ yatichistu. Yatichäwinakaparjam sarnaqañaswa muni, kunatï jan walïki uk uñisiñassa munarakiwa (Rom. 12:9). Jesusajj mä qollun kunanaktï yatichkäna ukaw kunatsa jaqenakajj jan walinak lurapjje uk amuytʼayistu (Mat. 5:27, 28). Jesusajj Diosan Reinopan Reyit apnaqjjani ukhajja, kunas wali kunas jan walïkaraki uk jupjam uñjañatakiw machaq mundon yanaptʼaskakistani (Heb. 1:9). Jañchi toqena amuyuna perfectöñatakis yanaptʼarakistaniwa. Janiw jan walinak lurañ munañajj chuymasan utj-jjaniti, janirakiw pantjasjjañänisa, kusisitakiw jakasjjañäni. Kunjamtï Diosajj siskänjja, cheqpachapuniw ‘wawanakapjamajj libre jakasjjañäni’.

20. ¿Jehová Diosajj taqe kun lurañatak librëkchisa kunjamsa uñjistu, ukat kunjamsa ukajj yanaptʼistu?

²⁰ Libres jakaskchiñänejja, janiw taqe kunsa munañasarjampuni lurkañäniti, Diosar munasitasata jaqe masisar munasitasatwa taqe kunsa lurañäni. Jehová Diosajj jupat yateqasiñaswa muni. Jupajj taqe kun lurañatak librëkchisa, munasiñatwa taqe kuns luri, jiwasarus ukhamarakiw uñjistu (1 Juan 4:7, 8). Ukhamajja, Jehová Diosat yateqasiñäni ukhakiw cheqpachapuni libre jakassna.

21. 1) ¿David reyejj Jehová Diosar kamsänsa? 2) ¿Kunanakatsa akjjar jutki uka yatichäwin yatjjataskañäni?

²¹ Jehová Diosajj kunanaktï churktam ukanak ¿wali valoranitti uñjta? Jupajja, Jupat yatjjatañatak yanaptʼanaka, suma amigonaka, kunatï kusisiñ churkistaspa ukanak lurañ amtaña, cheqpach libre jakasiñatak mä suma suytʼäwi churistu, ukanakwa aka yatichäwin yatjjatawaytanjja (1 Tim. 6:17). Inas David reyjam wali kusisita jikjjatasiraksta, jupajj Jehová Diosar akham sänwa: “Jumaw jakañ thak uñachtʼayitäta, nayraqataman jachʼa kusisiñaw utji; jakʼamansti wiñay kusisiñaw utjaraki” sasa (Sal. 16:11). Akjjar jutki uka yatichäwinjja, Salmo 16 qellqatan kuna suma yatichäwinakas utjaraki ukanakatwa yatjjataskañäni. Ukaw kunjamatsa cheqpachapuni kusisita jakasisma uk amuyañatak yanaptʼätam.