1, 2. ¿Kunatsa Jehová Diosan servirinakapajj jichhürunakan wali cuidadompi sarnaqañasa? (Aka paginankir fotonak uñjjattʼäta)

WALJA doctoranakaw jan wali usuni jaqenakar qollapjje. Jupanakajj yanaptʼañ munasaw ukham qollapjje. Ukampis jan uka usumpi apkatayasiñatakejj wali cuidadompiw qollapjjañapa. Jehová Diosan walja servirinakapajj niya ukhamanwa uñjasipjjaraktanjja. Diosan leyinakapar jan respetir jaqenakampiw jaktanjja, trabajiraktanjja. Jiwasatï jan jupanakjam tukuñ munkstan ukhajja, cuidasiñasawa.

² Aka qhepa urunakanjja, jaqenakajj kunatï walïki jan walïki uka toqetjja, janiw Diosan leyinakaparojj respetapkiti. Apóstol Pablojj payïr cartap Timoteor qellqkäna ukanjja, Diosat jitheqtat jaqenakajj kunjamäpjjanisa ukanakatwa qhanañchäna. Akapachan tukusiñap jukʼampi jakʼachasinkipanjja, jukʼampiw jaqenakajj jan walir tukupjjani sasaw qhanañchäna (2 Timoteo 3:1-5, 13 liytʼañataki). Ukanak jiwasajj jan wals uñjkstanjja, jukʼat jukʼatwa jupanakjam amuyjjsna, parljjsna, lurjjaraksna (Pro. 13:20). Ukatwa kunjam jaqëpjjes aka qhepa urunakan jaqenakajja, Diosan servirinakapajj kunjam jaqëpjjarakisa ukanakat aka yatichäwin yatjjataskañäni. Kunsa jan jupanakjam tukuñatakejj lursna,  kunjamsa jaqenakarojj Diosar uñtʼapjjañapatakejj yanaptʼsna ukanakatsa yatjjatarakiñäniwa.

3. ¿Khitinakas 2 Timoteo 3:2-5 texton qhanañchki ukham jan wali jaqëpjjaspa?

³ Kunjamtï uñjktanjja, apóstol Pablojj qhepa urunakan “chʼama tukuña jan wali tiemponakaw utjani” sasaw säna. Ukjjarusti jaqenakajj kunjam jan wali jaqëpjjanisa ukanak mä listanwa tunka llätunkan ayti. Romanos 1:29-31 qellqatanjja, niya ukar uñtasit mä listaw utjaraki, ukampis apóstol Pablojj Timoteor qellqkäna uka cartanjja, Griego Arut Qellqatanakan jan utjki uka arunakaw uñsti. Uka listan apóstol Pablojj akham sasaw qalltäna: “Jaqenakajj akhamäpjjaniwa:...” sasa. Ukampis janiw taqe jaqenakapuni ukhamäpkaspati. Diosan servirinakapajja, janiw uka kasta jaqëpkaspati (Malaquías 3:18 liytʼañataki).

4. Jachʼañchasiri jaqenakajj ¿kunjamäpjjew sasmasa?

⁴ Apóstol Pablojja, waljaniw jupanak pachpa munasirïpjjani, qollqe añcha munirïpjjani sasaw säna, ukjjarojja, waljaniw jachʼa jachʼa tukurinaka, pʼeqe waytat sarnaqerinaka, jachʼañchasirinaka ukhamäpjjani sasaw sarakïna. Uka kasta jaqenakajja, kun sum lurañ yatisasa, suma uñnaqtʼanisasa, qollqenisasa, jan ukajj aytat jaqëtap laykusa jachʼañchayasiñ munapjje. Mä yatjjattʼat jaqejja, jachʼañchasiri jaqet akham siwa: “Chuymapanjja, mä jiskʼa altaraniwa, ukaruw jupa pachpa adorasi” sasa. Yaqhepasti, akham sapjjarakiwa: ‘Jachʼa jachʼa tukuñajja, jan walipuniwa, ukham tukuri jaqenakasa, mayninakar jachʼa jachʼa tukur uñjasajj jan waliwa sasaw amuyapjjaraki’ sasa.

5. ¿Kunas Diosan yaqhep servirinakapampejj pasäna?

⁵ Kunjamtï Biblian siskejja, Jehová Diosajj “jachʼa jachʼa tukuñanaka[rojj]” uñisiwa (Pro. 6:16, 17). Ukham tukuñajja, Jehová Diosatwa jitheqtayistu (Sal. 10:4). Ukampis Supayaw ukham jachʼa jachʼa tukurejja (1 Tim. 3:6). Jehová Diosar jan jitheqtas servirinakat yaqhepajja, ukhamarakiw jachʼa jachʼa tukupjjäna, ukajj wali llakkañawa. Jupanakat maynejj Judá marka apnaqer Uzías reyiwa. Jupajj walja maranakaw Diosarojj jan jitheqtasa servïna, Bibliajj jupat akham siwa: “Ukatsti kunapachatï reinopana wali chʼamani tukjjäna ukhajja, jachʼa jachʼaw tukjjäna, uka laykusti aynachtʼañaruwa purjjäna. Jupasti Tatit Diosaparojj janiw sum arkjjänti, jupasti Tatitun temploparojja incienso altarana nakhayañatakiw mantäna” sasa. Uka qhepa maranakatjja, Ezequías reyejj ukhamarakiw jachʼa jachʼa tukjjäna, ukampis mä qhawqha tiempokiw ukham tuküna (2 Cró. 26:16; 32:25, 26).

6. 1) ¿Kunatsa Davidajj jachʼa jachʼa tukuspäna? 2) ¿Kunas humildëskakiñatakejj Davidar yanaptʼäna?

⁶ Yaqhepanakajja, suma uñnaqtʼanisa, wali uñtʼatäsa, música tocañ sum yatisa, jan ukajj chʼamanïsa, mayninakan jachʼañchatätap laykuw jachʼa jachʼa tukjjapjje. David chachajj ukhamäkchïnsa, janiw jachʼa jachʼa tukurïkänti, wali humildënwa. Amuytʼañäni, Goliatar jiwaykäna ukhajja, Saúl reyejj phuchajampejj casarasismawa sasaw säna. Ukampis Davidajj akham sänwa: “Janiw nayajj khitïktsa, familianakajjas Israel markanjja janiw kunäpkarakisa, nayajj reyin tollqapäñajjatakejja” sasa (1 Sam. 18:18). ¿Kunas humilde chuymanïskakiñatakejj yanaptʼäna? Kunjam jaqëkäntï uksa, sum lurañ yatitapsa, suma lurañanak katoqatapsa, ‘Jehová Diosan humildëtap laykuw (NM)’ katoqäna, uk yatiñaw humildëskakiñatakejj yanaptʼäna (Sal. 113:5-8). Taqe kunsa Jehová Diosat katoqatapwa sum amuyasïna (1 Corintios 4:7 uñjjattʼarakïta).

7. ¿Kunas humilde chuymanïñatak yanaptʼistaspa?

⁷ Jichhürunakanjja, Jehová Diosan servirinakapajj David chachjam humildëñatakiw chʼamachasiraktanjja. Jehová Diosajj Taqe kunjjar Munañani Diosäkchisa, wali humildewa ukajj wal musparayistu (Sal. 18:35, NM). Diosan  aka ewjjtʼaparuw taqe chuyma istʼtanjja, Jupajj akham sistuwa: “Ukhamajj chuymatpach sinttʼasiñampi, suma chuymanïñampi, humilde chuymanïñampi, llampʼu chuymanïñampi, paciencia chuymanïñampi isthapisipjjam” sasa (Col. 3:12). Ukampis munasir jaqejj “janiw jachʼa jachʼa tukurïkiti, janiw wali wal tukurïkiti” uksa yatiraktanwa (1 Cor. 13:4). Jiwasatï humildeñäni ukhajja, jaqenakajj uk uñjasajj Diosar uñtʼañ munapjjarakispawa. Kunjamtï Diosar jan servir chachanakajj “warminakapan sum sarnaqapjjatap uñjasajj” Diosar serviñ munapkejja, ukhamarakiw jaqenakajj Diosar serviñ munjjapjjaspa (1 Ped. 3:1).

8. 1) Wawanakan awk taykaru jan istʼasirïpjjatap ¿kunjamsa yaqhep jaqenakajj uñjapjje? 2) ¿Kunsa Bibliajj wawanakar ewjjtʼi?

⁸ Qhepa urunakan jaqenakajj kunjamäpjjanisa uka toqet apóstol Pablojj akham sänwa: Wawanakajj ‘awkiparus taykaparus janiw istʼjjapjjaniti’ sasa. Jichhürunakanjja, libronakansa, peliculanakansa, televisionansa ukham jan istʼasirïñajj walikïkaspas ukhamwa uñachtʼayapjje. Ukampis janiw ukhamäkiti, antisas familiarojj aynachtʼayiwa. Amuytʼañataki, nayra Grecia markanjja, mä jaqejj awk taykaparu nuwjäna ukhajja, uka markan janiw kuna derechonëjjansa. Romanonakan leyiparjamajja, awk taykaru nuwjañajj jiwayañampi sasïnwa. Maysa toqetjja Hebreo, Griego Arut Qellqatanakanjja, awk taykapar respetapjjañapatakiw wawanakar ewjjtʼi (Éxo. 20:12; Efes. 6:1-3).

9. Awk taykaparu istʼañatakejja ¿kunas wayn tawaqonakar yanaptʼani?

⁹ Jan istʼasiri jaqenak taypins jakstanjja, ¿kunas wawanakarojj awk taykaparu istʼasiñatak yanaptʼaspa? Kuntï awk taykanakapajj jupanak layku lurawayki uk amuytʼañaw yanaptʼani. Cheqas Jehová Dios Awkisajj awk taykasaru istʼañasa respetañaswa muni. Wayn tawaqonakajj awk taykapat sum parlapki ukhajja, yaqha wayn tawaqonakarojj awk taykapar respetapjjañapatakiw yanaptʼapjje. Ukampis awk taykatï wawanakaparu jan munasiñampi uñjapjjanejja, wawanakapatakejj taqe chuyma istʼañajj chʼamakïspawa. Maysa toqetjja, wawanakatï awk taykapan munatäpjjatap amuyapjjani ukhajja, taqe chuymaw istʼapjjani, jan istʼañjamäkani ukhas istʼapjjaniwa. Austin wayna jilatajj akham siwa: “Munañajarjam sarnaqañ wal munayäta, ukampis awk taykajajj munasiñampiw kunatsa ukajj jan walïki uk amuytʼayapjjetäna, nayar istʼañatakis tiempo apsusipjjarakïnwa. Taqe ukanakaw istʼasirïñatak yanaptʼitu. Jupanakajj nayat llakisipjjapunïnwa, ukatwa jupanakar istʼayäta” sasa.

10, 11. 1) Jaqenakajj jan jaqe masipar munasipjjatapjja, ¿kuna jan walinakas uñachtʼayi? 2) ¿Qhawqsa cheqpach cristianonakajj jaqe masipar munasipjje?

¹⁰ Jaqe masiparu jan munasirinakajj kunjamäpjjanisa uka toqet Pablojj parlaskakïnwa. “Awkiparus taykaparus jan istʼirinakä[pjjaniwa]” siskäna ukjjarojja, ‘jan yuspärasirinakäpjjaniwa’ sasaw sarakïna. Cheqas khitinakatï yanaptʼa katoqasajj jan yuspärapki ukanakajj ukhamäpjjewa. Ukatsti, yaqhepanakajj “jaqe masipar jaytanukurinaka”, “jan kuna acuerdorus mantañ munirinaka”, mä arunjja, jan khitimpis sumankthapiñ munirinakäpjjaniwa sasaw sarakïna. Ukatjja, “Dios contra jaqe contra jan wal parlirinaka”, “amigonakaparus jan wal luririnaka” ukhamäpjjaniwa sasaw sarakïna. Ukatsti, mayninakar jan wal uñjayañatakis “kʼarintirinaka” ukhamäpjjaniwa sasaw sarakïna. *

¹¹ Jaqe masipar jan munasipki ukanakat sipansa, Jehová Diosan servirinakapajj taqe chuymaw jaqe masipar munasipjje. Ukajj nayratpachaw ukhamäna. Moisesan leyinakaparjamajja, Diosar munasiñaw nayranki, ukjjarusti  jaqe masisar munasiñaraki sasaw Jesusajj säna, jaqe masisar munasiñajj cristianjam munasiñawa (amor agápe) (Mat. 22:37-39). Ukatsti, cheqpach cristianonakajj jupanak pachpa munasipjjatap laykuw cheqpach cristianöpjjatapajj amuyasini sasaw sarakïna (Juan 13:34, 35 liytʼañataki). Uñisirinakaparus munasipjjarakiniwa sasaw Jesusajj sarakïna (Mat. 5:43, 44).

12. Jaqe masipar munasitapjja, ¿kunjamsa Jesusajj uñachtʼayäna?

¹² Jesusajj jaqe masipar wal munasirïna. Markat markwa Diosan Reinopat suma yatiyäwinak yatiyasa viajirïna. Juykhunakarusa, cojonakarusa, lepra usuninakarusa, oqaranakarus qollänwa, jiwatanakarus jaktayarakïnwa (Luc. 7:22). Walja jaqenakas uñisipkchïnjja, taqe jaqenak laykuw jakäwip loqtasiwayi. Jupajj Awkipjam munasirïnwa. Jichhürunakanjja, Jehová Diosan Testigonakapajj Jesusat yateqasisaw jaqe masisar munasiraktanjja.

13. Jaqe masisar munasiñäni ukhajja, ¿kuna askinakas utjaspa?

¹³ Jaqe masisar munasitas uñjasajja, jaqenakajj Jehová Diosar uñtʼañ munapjjaspawa. Amuytʼañataki, Tailandia markankir mä chachajj kimsa uru jachʼa tantachäwiruw saräna, kunjamsa jilat kullakanakajj munasiñampi uñjasipjjäna uk uñjasajja, wal musparäna. Utapar kuttʼasajja, semanan pay kuti yatichayasiñatakiw mayïna. Taqe familiaranakaparus yatiyarakïnwa, sojjta phajjsinak qhepatjja, Tantachasiñ Utanwa nayrïr kuti Bibliat liytʼjjäna. Jaqe masisar munasisktanti janicha uk amuyañatakejja, akhamwa jisktʼassna: “¿Familiaranakajaru, congregacionankirinakaru, Diosan arunakap yatiykta ukanakar yanaptʼañatak chʼamachasiskti? ¿Kunjamtï Jehová Diosajj jaqenakar uñjki ukham uñjañatakit chʼamachastjja?” sasa.

14, 15. 1) ¿Kunjamsa walja jaqenakajj animalanakar uñtasitäpkaspas ukhamäpjje? 2) ¿Kunjamsa yaqhep jaqenakajj suma jaqer tukjjapjje?

¹⁴ Aka qhepa urunakanjja, jaqenakajj jan wali jaqëpjjatap uñachtʼayapjje, jiwasajj janiw jupanakjamäñ munktanti. Amuytʼañataki, jupanakat waljanejj ‘kunatï walïki uk uñisipjjaniwa’ sasaw Bibliajj qhanañchi. Yaqha Biblianakanjja akham sarakiwa: ‘Aski luräwinak uñisipjjaniwa’, jan ukajj ‘aski luräwinakan enemigonakapäpjjaniwa’ sasa. Ukatjja, “munañapampi  apnaqayasirinaka, qhorunaka” ukhamäpjjaniwa sasaw qhanañcharaki. Yaqhepasti ‘jan amuytʼañ munirinakäpjjaniwa’ mä arunjja, jan amuytʼasisaw kuns lurapjjani, janirakiw luratapajj kunjamsa yaqhanakar jan waltʼayaspa uk amuyañ munapkaniti sasaw qhanañcharaki.

¹⁵ Jichhürunakanjja, mä profeciaw phoqasiskaraki, animalanakjam jan wali jaqenakajja, suma jaqeruw tukusipki (Isaías 11:6, 7 liytʼañataki). Uka profeciarjamajja, qhoru animalanakajja, mä arunjja, qamaqe, león ukanakajj ovejampi vaca qallumpejj sumakiw jakasipjjani sasaw qhanañchi. Ukatsti sumankañajj oraqpachanwa utjani, kunattejj “[Jehová] Tatitun yatiñapajj taqe markpacharu phoqhantani” sasaw qhanañcharaki (Isa. 11:9). Ukampis animalanakajj janiw Jehová Diosat yateqapkaspati, ukhamajj kunjamsa jaqenakajj suma jaqer tukuñatak chʼamachasipjjani ukwa uka profeciajj sañ muni.

16. ¿Kunjamsa Bibliajj yaqhep jaqenakar suma jaqëjjapjjañapatak yanaptʼawayi?

¹⁶ Walja jaqenakaw nayrajj qamaqenakar uñtasit qhoru jan ukajj phiru jaqenakäpjjäna, ukampis jichhajj sumakiw jaqe masipampi jakasjjapjje. Ukanakat mä qhawqhanakjja, jw.org sat cheqanwa, “Bibliat yatjjatasaw nayra jakäwinakapjja jaytawayapjje” siski ukan liytʼsna. Jehová Diosar uñtʼjjapjje ukat servipki ukanakajja, janiw ‘Dios chuymäpkaspas ukham tukuri, ukat janirak ukarjam sarnaqeri’ jaqenakäpkiti. Dios chuyma tukuri jaqenakajja, ‘Diosaruw adorapjjta’ sapkchisa, luratanakapampejj kʼarisipjjatapwa uñachtʼayapjje. Diosan yaqhep servirinakapajja, qhoru jaqenakäpjjänwa, ukampis ‘machaq jaqëñampiw isthapisjjapjje, cheqaparjam sarnaqasa, Dios chuyma’ sarnaqasaraki (Efes. 4:23, 24). Jaqenakajj Diosat yateqapjje ukhajja, Diosan arunakaparjam sarnaqañajj kunja wakiskirisa ukwa amuyapjje. Ukatwa kuntï creyipki, amuyapki, lurapki ukanak jaytjjañatak chʼamachasipjje. Ukham lurañajj chʼamakïspawa, ukampis espíritu santow Diosan munañap lurañ munirinakarojj ukham lurañatak yanaptʼani.

17. ¿Kunas jan wali jaqenakjam jan tukuñatak yanaptʼistani?

¹⁷ Jehová Diosar servirinakampi jan servipki ukanakampejj kunansa mayjäpjje ukajj sapürutjamaw jukʼamp sum amuyasjje. Jiwasajj Diosan servirinakapjamajja, janiw uka jan wali jaqenakjamäñasäkiti. Antisas kuna kasta jaqenakattï 2 Timoteo 3:2-5 textojj qhanañchki ukanakat ‘jitheqtañasawa’, cheqas Jehová Diosaw ukham ewjjtʼistu. Ukampis janiw uka kasta jaqenakat jitheqtkapunsnati, trabajonsa, escuelansa, jupanakampïtanwa, inas jupanakampis jakasirakstan. Ukampis jan jupanakjam amuyañataki, lurañatakiw chʼamachasiñasa. ¿Kunas ukatak yanaptʼistaspa? Jehová Diosampi jukʼamp sum apasiñatakiw chʼamachasiñasa, ukatakejj Biblia liyiñasawa, Diosar serviri amigonakwa ajlliñasaraki.

18. Sarnaqatasas parlatasasa, ¿kunjamsa jaqenakar yanaptʼaspa?

¹⁸ Jaqenakarus Diosar uñtʼapjjañapatakiw yanaptʼañasaraki. Ukatakejj taqe cheqan yatiyañatakiw chʼamachasiñasa, Jehová Diosaruw suma arunak horasapar arsuñataki mayisiñasa. Jaqenakarus Jehová Diosan Testigopätasjja yatiyañasarakiwa. Ukhamatwa suma sarnaqatasampejj jiwasar jachʼañchasiñat sipansa, Jehová Diosar jachʼañchañäni. Jiwasarojja, Jehová Diosaw “jan wali sarnaqañanak apanukuñsa akapachan utjki uka jan wali munañanak apanukuñsa yatichistu”, Juparakiw “suma amuyumpi jakañatakisa, cheqapar sarnaqañatakisa, akapachankir jaqenak taypin Dios chuymäñatakisa yatichistu” (Tito 2:11-14). Jiwasatï Jehová Diosat yateqasiñäni, jupar istʼañäni ukhajja, yaqhepanakajj jiwasar uñjasajj akhamwa sapjjaspa: “¡Jumanakamp saraña munapjjta, nanakasti istʼapjjtwa Diosajj jumanakampïtapa!” sasa (Zac. 8:23).